بحبكم

الف الف شكر لكل اللي شرفني بالحضور وكل من لم تسمح له الظروف انه ييجي الحفلة

بجد بجد ومن غير مبالغة رفعتم راسي واسعدتموني لسنة قدام

وكان فيه ناس فاجأتني بوجودها ... ربنا مايحرمنيش منكم

الحمد لله احب اطمنكم علي حركة الكتاب... كتابكم كلكم ... كتاب كل حد دخل عندي وشجعني وكل اللي طالب بان المدونة تتحول لكتاب ... شكرا الف شكر

________________________________________

كل الأمهات تحمل في تسعة أشهر ولكن حملي انا استمر سنة كاملة ... نعم حملي فكري داخل عقلي فقد بقي جنيني يتغذي بحنايا قلبي وكان حبله السُري يوصل بين أفكاري واصابع يدي ... كبر جنيني واكتمل نموه فوق وريقاتي .. كانت الولادة قيصرية متعثرة اضطررنا فيها بالتضحية بالوقت والصبر والأعصاب ... ثم وضعت الكتابة داخل الحضانة والتي كانت مدونتي الالكترونية الي تابعها الآلاف فترعرع صغيري ونما وبات طفلاً يحبو ويتكلم ويطالب بأن تجمع أجزاءه في كتاب ينتظر الأيادي لكي تحمله من فوق الأرفف وتشتريه.

كتابي الصغير يافلذة عقلي هل ستنمو؟ هل سيكون لك أخوة غيرك أم أنت طفل وحيد؟

حبيبي أراك واقفاً علي الأرفف فأخاف من وحشتها عليك ... سامحني حبيبي فلو كان الأمر بيدي لوقفت بجوارك حتي تترك رفك المخيف بلا رجعة... كتابي العزيز لا أملك إلا دعوة الأم لك بأن يجعل الله في وجهك القبول ويحبب فيك خلقه من الغلاف الي الغلاف ... ستبقي انت اعز الأبناء حيث أنك أنت الأبن الأول الذي يتجاهل كل الأعراف ويأخذ لقب أمه التي حملته وهناً علي وهن ... أمه التي سهرت الليالي من أجل عينيه ... كن بسمة أو كن رواية ولكنك دوماً ستكون أبني الغالي الحبيب وسيبقي اسمك منيراً في شهادة ميلادك كتاب حماتي ملااااك باسم أمك سحر غريب

حفل توفيع الكتاب

ان شاء الله حفل توقيع كتاب حماتي ملاك بقلم سحر غريب يوم الجمعة القادم الموافق 30/1/2009

المكان دار نشر كيان بسراي كندا في معرض الكتاب الساعة 3.30

قاعة كندا موجودة بجوار قاعة ايطاليا الدخول من بواية المعرض الرئيسية

ياريت بجد بجد اشوفكم كلكم هناك جنبي

مستنياكم

يوم ميلاد سعيد

انضموا لجروب الكتاب علي الفيس بوووك

http://www.facebook.com/groups.php?ref=sb#/group.php?gid=43106967485

3 /1/2009

يوم ميلاد ابني الورقي

كتابي الذي يحمل غلافه ووريقاته ساعات من عمري وايام من سنيني

مدونتي التي كانت ملجأي وملاذي تحولت الي كتاب يتم تداوله وقراءته

هل ستكلل التجربة بالنجاح ام ستكون البداية والنهاية في نفس الوقت

حضر معي ساعة الميلاد مجموعة من اصدقائي المدونون

احمد الصباغ بحضوره الطاغي

دماغي بفلسفته ودماغه العالية

نيجرو الشخصية الكاريزمية الجميلة التي تري فيه صديقا قديما برغم انك قد تكون تراه لاول مرة

عسقلاني شخصية دمها خفيف جدا

نضال الصحفي الشاب الذي يهتم بالاحداث الجارية

سارة الصورصارة اللي اكلتنا كوكيز بالقرفة والزنجبيل عمايل ايديها

شيماء وسمر من الزقازيق صاحبة مدونة كرانيش

وكانت معانا الكاتبة الصحفية الجميلة اسماء من جريدة العالم اليوم والمهتمة بكل مايخص المدونين

النهاردة ماكانش فيه حفل توقيع كتاب بس الجمعة الجاية هايبقي فيه حفل توقيع

مش عايزة ابقي لوحدي فردانية

تعالوا املوا القاعة عليا

ياإما مني زكي يابلااااااااااش

ياإما مني زكي يابلااااااااااش
-------------------------------
حماتي الغالية فيها طبع انتم عارفينه ومتابعينه وهو انها عندها ميول استخباراتية وطرق تعذيب ذهنية تفوق الموساد في قوته وضراوته وعندها مقدرة غريبة علي دحلبة اللي بتكلمه وتقنعه بأمور يعتقد إنها خارجة من دماغه هو شخصياً... وياااما وقعتني في الكلام وانا ذي الشاطرة كنت بأقع ذي المدب واطلع كل اللي جوايا ...الست دي خسارة انها ماكملتش في سلك التعذيب كانت هاتبقي ظابط شرطة ممتاز علي كتفه نياشين بالكووووم.... فمثلاً لو أتأخرنا في الذهاب إليها تبدأ هي في أخذ أقوالنا لتعرف ليه أتأخرنا ثم تسأل الشهود عن الواقعة والشهود طبعاً هما أطفالي الصغار لأننا في نظرها كلنا كذابين وتبقي ليلتنا مطينة بطين لو الأقوال تضاربت يبقي أكيد الحكاية فيها إنّا... عشان كدة دايماً تلاقيني رايحالها بمصحف عشان أحلف عليه كلما دعت الحاجة لذلك... وبرضه مش بتصدق... علي رأي المثل قالوا للحرامي أحلف قال جالك الفرج ....وأنا في نظرها شيخة منصر.
طبعاً حماتي عرفت عن موضوع الكتاب وهي مرحبة بطريقة مريبة ..تدعو للقلق والحذر جايز برضه عشان تخليني اقرالها اليوميات دي وتستخدمها ضدي ... الجديد بقي أنها بتحكي عن يومياتها من أول ماأتولدت لحد ماأدحدر بيها الحال وبقت حماتي.
وبعد ماحكت عن زواجها الأول من دبلوماسي سوري علي ضرة والمعاملة الوحشة اللي كانت بتتعاملها هناك عشان هي مصرية ثم هروبها منه ولجوءها للقنصلية المصرية ثم طلب الطلاق من زوجها السوري وتدخل الرئيس عبد الناصر شخصياً ليطلقها منه ثم زواجها من حمايا الذي كان يعمل في شركة رمسيس نجيب للإنتاج السينمائي مما جعلها علي علاقة صداقة بالعديد من الممثلين والملحنين منهم الموجي وأحمد رمزي وسعاد حسني وفتونة علي رأيها أو فاتن حمامة مش قلنا أصحاب بقي وبيدلعوا بعضيهم وزهرة العلا ... كل ده وانا باسمع ولأني علي نياتي فبأصدق... جايز بتسرح بيا كالعادة بس أهي حكايات مُسلية بتقتل الوقت اللي بيمشي يتمخطر طول ماأنا في صحبتها... ورغم ان الحكايات دي كانت بتتحكيلي علي حلقات علي مدار سبع سنين بس هي لاقت اني ممكن اشهرها واطلعها السما...فبدأت تزود الجرعة.. الجميل في الموضوع انها عاوزة تعمل قصة حياتها فيلم بس حقوق الملكية تبقي ليها هي بس وبشرط ان مني زكي تمثل دورها لانها شايفة نفسها في شبابها شبه مني زكي الخالق الناطق... دي وجهة نظر يا مني ماتزعليش نفسك وقالت ان حمايا طلب منها توكيل عشان يكتب لها قصة حياتها ... واخدين بالكم من التكتيك بتاعها بتحاول تعمل نفسها عليها طلب عشان تخليني اقول وليه تتعبي حمايا أكتبه أنا...بس علي مييييييييييييين خلي الطلعة دي لحمايا ده لو فيه طلعة أصلاً... كفاية عليا كتاب واحد ولو انها ممكن يتعمل منها موسوعات.

عرفان بالجميل

تحديث

ــــــــــــــــــــــــ

مدونة حماتي ملاك علي صفحات تيلي بيزنيس ملحق الخميس من العالم اليوم في باب المدونخانة وكتبته الأستاذة أسماء رمضان واستعانت فيه ببوست من بوستات المدونة

وفي نفس الصفحة تكلمت عما يقدمه المدونون من جهاد لمساعدة أهل غزة بقيادة آبي

شكر واجب لكل من وقف بجواري في خطوتي الكبيرة وعلي رأسهم زوجي العزيز اللي شجعني بكل قوته رغم اني كنت مش موافقة علي فكرة نشر الكتاب لكن مش هاتصدقوا ان حماتي كمان موافقة ومستنية نسختها علي أحر من الجمر ... شكرا ياغالية مش عارفة من غيرك كنت عملت ايه؟

أحمد الصباغ اللي نظم لي موضوع الفيس بوك بجد بجد انت إنسان مُحترم جداً يا أحمد ومُتعاون وبيحب يساعد واتمني ان ربنا يوفقك في مجلة اليومين دول وفي اي خطوة تدخلها جديدة ويوقف لك ولاد الحلال لانك انت فعلاً ابن حلال

الأستاذ محمد هشام عبية الصحفي والكاتب بجريدة الدستور الراجل ده ياجماعة أكدلي حاجة مُهمة جداُ أحنا غافلين عنها ومتناسينها وهي إن مصر لسة بخير ... بصراحة تعاون معايا بشكل إيجابي ومدّني بكل المعلومات اللي سألته عليها بكل صبر وطيبة ... شرقاوي أصيل

بسمة عبد الباسط ورغم ان هي كمان مشغولة بكتابها البنات عايزة ايه لكن البنت دي وقفت معايا وقفة رجالة من أول مادخلتني معاها في مجلة علّي صوتك لحد دلوقتي بنت تستاهل كل خير بصحيح واللي عرفتني علي ناس ممتازين في مجلة علّي صوتك وعلي راسهم هبة ووليد وبدرية ووينكي

واحدة مفروسة وهي المُشجع الأول لي في هذه المدونة اللي لولاها كنت انكسرت من زماااان واستسلمت لليأس لكن هي بصراحة وقفت جنبي كتير... وطبعاً معاها دوبا وقوس قزح وفاتيما ومدام كعبولة والشنكوتي الكبير وبطوط حبوب ومدام صبرني يارب ونوسة الغائبة وفوكس وإينو وعروسة ننوسة زوجة إحسان بيك ومصطفي ريان ومواطن مصري نايم وسبهللة وسلوي رئيسة حزب الاحلام وسالي حاجات جوايا ونبضات وممكن وآيار وقطة الصحراء وضياء ودكتورة اجدع بنوتة وخمسة فضفضة وشهرذاد وطهقانة ومحمود واي مي واهو ده عيبه ونونو عاشقة النقاب ومدونات زوجة عاشقة وطبعا صيدلانية طالعة نازلة وصحفية روشة وميس دوت وبجابيجوا ومحمد فوزي وعلا بركات واحمد منتصر وعاليا حليم وسمباتيك وحنة وهاجر ونودي ودكتور هيما وحاسوباتية ولعلها خير وسنووايت وأمواج اللي تعليقها اتحفظ في دماغي وآية وآبي بتنجاني ووائل وغنيم ومجداوية واحمد سلامة وفراشة وايوية وميشيل وروني المصري وسنوحي و وشاب نفسه يحقق حلمه وبلوجاتي وفيس مووون وام احمد المصرية وغراب وحمامة ويوكي وساد دورا واريج السمر والشموع السوداء والوحدة بتقتلني وفانكي دوكتور والتكية وابو امل ووشاب من نفسه يحقق حلمه وحسام مصطفي ابراهيم وسوووووو وهمس الاحباب وبابا ابو خالد وام دودو حبيبي واوعي تفكروموناليزا وبكر وروفي ومايوشا واحمد سكر وبنوتة مصرية ودكتور بهدوء ونسيان ووميس سوسة والمجني عليها وكلاكيت تاني وتاني وشيماء احتمال وكيكي ومحاسن صابر وياسر حسين وفنانة مفروسة وصالح سعيد وكفراوي وكوارث وغني يابهية واميرة الصعيد ومن هنا وهناك وجيهان علي وانثي الخيال وانين الحزن وبنت مصرية وواحد من البلد دي ودينا سليمان ومادي واسماء ومشربية و cenotaphوست البيت وEldebugوويمني وسوسو وعلي حب ومادي ونايل كويين ووشيري وعلي اسم مصر وومن وجني ورامي اشرف وصفا والارهاب المنزلي وزوج مخنوق وزوجته الرائعة ومها زين وحزلوقة وعلي بلاطة وطبعا الربان وانسانة وساموراي فور ايفر وساسو وبرقش وميرو وعفراء ووصوت من مصر ودكتور شاندرا وجميما وميجو مشمش ومجرد حكاية ومصري بالغربة وبت خيخة واي كلام وميادة و ودعاء مواجهات واميرة الصعيد والوردة البيضا وwanna b a physicianومروة الزارع وساد دورا و انسانة شوية شوية وحبيبة وانت عارفني وانا عارفك ونودي 87 وليسندرا ودينا وكناري وعبدو الرايق وفرنسا هانم وكاميليا ونور الإسلام وولاء وبونجو ونوري allfollowsomeو DayDreaming وsemsema و شقاوة شعب واحمد ابو العلا وCrystal Lobna كلكم كلكم.. اللي ماقراش اسمه مايزعلش اصل ضهري وجعني ومش قادرة اكمل

أحمد أبو زيد الناشر اللي بصراحة تعبته معايا وكنت كل شوية أقوله غير ده واعمل ده والراجل بصراحة كان صبور لأبعد الحدود رغم اني قلتله اكتر من مرة ان الإزعاج اللي انا عملته له هو ضريبة التعامل مع الجنس اللطيف ...

الفنان العبقري طارق عزام اللي صمم صورة الغلاف اللي للأسف مش عارفة انزلها علي المدونة بسبب النت اللي شغال بالزق ... بجد شغله عبقري

رحاب السيد وهي صاحبة مدونة بنات صاحبة الجلالة وصحفية في الدستور انا بجد محظوظة اني اتعرفت علي واحدة بالطيبة دي

الناس دي ياجماعة وقعتلي من السما هدية ...اول مرة اتعرف علي مجموعة طيبة كدة مرة واحدة ... احمد ربنا عليهم وعلي معرفتي بيهم وكان لازم ابعت لهم رسالة شكر في المدونة لاني احب اعترف بالجميل وياريت كان في ايدي حاجة تانية اقدمها لهم كنت قدمتها بلا تردد

غزة صداع في رأس مصر

بعيدا عن الإنفعال الغير مُبرر والمبالغة في ردود الأفعال سنتكلم عما يحدث الآن في غزة وعن دور مصر وعن الحنق الذي يعاملنا به الفلسطينين وكأننا نحن من رفع السلاح في وجههم وليس عدوهم اللدود...فرغم النزاعات الداخلية علي أرض فلسطين والتي جعلت منه بلداً مفككاً لا يعترف برئيس واحد تجد أنهم مصرون علي الحرب ورفض مد فترة الهُدنة.. ولا أعلم مبرراتهم المُقنعة في هذا الأمر فمن الواضح أنهم غير مستعدون بالمرة للدخول في حرب...أم تراهم أدمنوا الولولة والبكاء ورؤية الأشلاء تتطاير مع قاذفات العدو ثم ابتزاز ضمير العالم بها ... إن سيدنا محمد وهو رسول الله المُنزه عن الخطأ قام بعقد هدنة مع اليهود والكفار... أأنتم ياشعب فلسطين المفكك أفضل من رسول الله...
أما المصيبة أنهم ومعهم بقية جمهور العرب المتفرجون مصرون علي زج مصر في حرب ليس لنا فيها ناقة ولا جمل.. ألا يكفيهم أن رئيسنا الذي دخل بياتاً شتوياً طويل الأمد خرج من بياته مخصوص لكي يشجب الأعتداء الإسرائيلي.. برغم أنه لا يخرج من هذا البيات المقدس مهما كانت حاجة شعب مصر إليه، لا تنكروا أن المصريين فلسطينين أكثر من الفلسطينين أنفسهم.. وكم من مرة أوفد رئيسنا مساعدات لشعب فلسطين الشقيق وهو مالم يحدث مع شعب مصر اللاجيء... وكل هذا وعلم مصر يُحرق علي الأرض المحتلة ويُقتل معها جنودنا علي الحدود بأيدي الفلسطيني الشقيق... أنتم أيها المساكين أخترتم خيار الحرب الذي يُعتبر خياراً غبياً في ظل ظروفكم الحالية.. فعليكم أن تصمدوا وحدكم فليست قراراتكم الخاطئة إلزاماً علينا... نحن نتعامل مع الفلسطينين كأنهم أطفال يخطئون ونتسامح معهم... يقولون للغول عينك حمرا ويريدونه أن يتحمل... حارب الغول إذا أردت ولكن يجب عليك أولاً أن تكون مُستعداً لمواجهته إذا سن سكاكينه ووجهها نحوك...لقد ذكرني موقف الفلسطينيون بموقف رجل ضعيف لا حول له ولا قوة وهو يهاجم رجلا يفوقه في الحجم والعقل ومع ذلك تجده يقول ما تقدرش .
لقد قلت ومازلت أقول أن الفلسطينين فقدوا أبعاد ومصداقية قضيتهم عندما رفعوا سلاحهم علي بعضهم البعض... هنا فقط أوقفت قلمي عن الدفاع عن قضيتهم وتمنيت أن يهديهم الله... أما عن فتح معبر رفح وأستقبال الفلسطينين عندنا فاحذروا يا شعب مصر المطالبة بهذا الأمر بدواعي الإنسانية فالفلسطينين سيدخلون أرضنا ثم يلقون صواريخهم من عليها وهنا ستتذرع إسرائيل لكي تدخل وتعود لإحتلال أرضنا مرة أخري ونحن كشعب عاني من الحروب وويلاتها الكثير والكثير في غني عن احتلال جديد... ويا عرب إذا أردتم حرباً فعلية مع إسرائيل فعليكم حمل السلاح بأنفسكم.. يكفيكم شجب وخطابات شديدة اللهجة وشحن في مشاعر الأخوة العرب ومعهم الفلسطينين ضد مصر... ومن الشخصيات التي نددت بمصر رجلا أحترم وقفته الشجاعة وهو حسن نصر الله الذي أعترف أن دخوله حرباً مع اليهود وخطفه لجنودهم كان قراراً خاطئاً أدخل لبنان في حرب غير ضرورية.... عدونا واحد ولكنه يحتاج منا التكاتف والإيمان والصبر والترابط , عندما نترابط ساعتها فقط سنقف يداً واحدة ضد هذا السرطان اليهودي الذي دخل بيننا ولكن كيف نترابط وفي البلد الواحد فتح وحماس وسنة وشيعة ...عندما ننسي اختلافاتنا العقائدية والسياسية ساعتها فقط سنضع أيدينا علي أول الطريق السليم في حربنا المقدسة ضد أعدائنا... عدونا ذكي ويحتاج منا إلي ذكاء مماثل ووقفة رجل واحد.
سحر غريب

آخر الأخباااااااااااااااااااااااار

أعلن أنا المدعوة سحر غريب عن تهوري العقلي وحالة جنان مفاجئة أصابت نخاشيش مخي


عن توقيعي عقد كتاب حماتي ملااااااااااااااااااااااااااك مع دار نشر كيان او ليلي سابقاً وهاينزل علي المعرض ان شاء الله


أديني سمعت كلامكم أهوه واللي كان كان


بس وحياة العيش والبوستات اللي بينا... لو حماتي رفعت عليا قضية تعويض مادي ياريت تلموا من بعض ذي الشاطرين وتدفعولي التعويض احسن الكتاب اقشط تحويشة عمري وخلاني قاعدة من غير اللامؤاخذة الحديدة

قفلوا عليكي يا حلوة تابووووووت

حتشبسوت ... فاكرينها الست الكمل اللي لبست لبس الرجال ونطت علي حكم مصر في الدولة الحديثة وحكمتها... ست عليها هيبة تهز اجدعها شنبات... ست بألف راجل ... خرجت من تابوتها ونظرت ناحيتي شزراً وبكل تأفف قالت :
نفسي ايام العز ترجع تاني للمصريين... نفسي اشوف المصري رافع راسه من تاني وليه شنة ورنة ذي ايامنا يافراعنة مش دلوقتي المصري بقي مقهور ياكبد أمه وكل مين يسوي ومايسواش بيديه علي قفاه وفين يوجعه... دول قالوا في الأمثال اللي يخرج من داره يتقل مقداره وانتم يامصريين عاوزين تهجوا من بلدكم وتسيبوها... طب مين هايبني أهراماتكم؟ومين هايزرع ومين راح يقلع؟
قلت لها : بلدنا بقت قاسية أوي علينا والفقر في الوطن غربة... مصر السبب في اللي بيحصل ده طردت العلماء عشان مش مدياهم فرصة يكبروا ولما خرجوا وفاتوها واحد منهم اكتشف الفمتو ثانية والتاني اكتشف علاج للسرطان واخدوا جوايز عالمية والاسم مصريين والفعل أمريكان مخترعين .. تفتكري ياست الستات لو كانوا الناس دي فضلت في مصر وفضلت الحكومة تناقرهم ويناكفوها كان زمانهم اكتشفوا حتي صباع موز... خلينا ساكتين وبالهجرة متهنين وخليكي انتي في حالك ماهو اللي مايعرفش يقول عدس.
قالت الست شوشو: طب واللي سمعت عنهم في رقدتي ... الناس اللي بتهاجر هجرة غير شرعية وبترجع في بطن السمك مخفية.
أنا وقد بدأ صبري ينفذ من جهلها الحاد بحال البلد: الناس دي أكتشفت ان موتهم احسن الف مرة من عيشة الضنك اللي عايشينها هنا.
قالت وعرق الوطنية نفرعلي رقبتها: فين انتمائكم يافراعنة فين أمجادكم فين اهراماتكم فين كرامتكم
قلت لها خليكي نايمة في رقدتك ياحاجة ماتتعبيش نفسك... مصر خلاص جالها جفاف انتمائي... مصر مابقيتش الحضن اللي في البرد بيدفينا مصر حضنها بقي شوك بيشكشك فينا.
اختفت حتشبسوت في تابوتها صارخة ارجعوا مصر ياولاد مصر ... مصر محتاجاكم
هنا استيقظت من نومي لأكمل كتابة ورق الهجرة الذي بدأت فيه بالأمس وما أعطلكيش ياأرض الجدووووووود.