الثلاثاء، 21 أبريل 2009

مصر هاتفضل زحمة

تحديث :

موضوع كتبته الكاتبة النشيطة باسنت موسي علي موقع الأقباط المتحدون زوروه علي اللينك دا

http://www.copts-united.com/article.php?I=57&A=2089




مصر هاتفضل زحمة عارفين ليه؟

لان المصري لو اتخلص من الزحمة عينيه هاتفتح علي حاجات مش ولابد

الديموقراطية مثلاً والعياذ بالله يااخوانا دي رجس من عمل الشيطان ولازم نبعد عنها

طول ماندي ضهرنا للديموقراطية هانفضل عايشين عيشة هنية

والا الحرية... استغفر الله العظيم... البت سحر النهاردة بتجيب سيرة حاجات مش ولابد

دي الكلمة لوحدها تودي النار والعياذ بالله

وعشان شيطاننا الله يجازيه مايوزناش ونجري وري الحاجات الوحشة دي الحكومة

كتر خيرها مظبطانا زحمة وطوابير والذي منه

يعني تعمل ايه المغفور لها ... غلبت معانا

شعب لسانه عاوز القطع والبنية مستحملانا
ولا يوم قالت تخلص علينا ولا يوم فكرت ... شفتوا فكرت بس ..تخنقنا بسحابة بنفسجي
واحنا مع كل دا مش مقدرين نعمة الديكتاتورية .. يديمها علينا نعمة
ومش مقدرين سياسة اللسان المقطوع اللي مابيسمحش غير برأي واحد وكلمة واحدة
تعيش الكلمة الواحدة تا تا تعيش
دي الوحدة حلوة ياجودعااااااااان
في بلدنا انت معي اذاً انت قديس انت ضدي فانت ابليس
والعياذ بالله
انتم معايا ولا مش معايا
خلي باااااااااااااالكوفكر كويس ياعم انت وهو
معااااااااااااايا

هناك 17 تعليقًا:

بعبعه يقول...

عارفه فى مثل فلاحي بيقولك ايه

اشغل الست لا تاكل ولا تشاكل

اهو احنا برضه الحكومه بتعمل فينا كده برضه يا اختي

هى بتعمل فينا حاجه تانيه كمان بس مش مهم بقى دلوقتي

اشغل الشعب عشان لا ياكل ولا يتشاكل

Ahmed يقول...

طبعا
الحكومه عارفه مصلحتنا اللي احنا مش عارفينها

احنا شعب لازم يتلهي عشان ميبصش على اللي يتعب أعصابه

يعني احنا لو سبنا كل واحد يتكلم براحته هنوصل لأيه؟ الناس هتختلف مع بعض, وينكن يتخانقوا واستحمال (معلش أصلي انا مثقف شويه) يعوروا بعض وجايز يروحوا المستوصف

طب وليه ده كله
الأحسن كل واحد يحط لسانه جوه خاشمه ويلم نفسه أحسن
صح؟

ونفضل نغني ونقول
أنا وطني وطني بطنطن
على كل الأوطان ياوطنطن
ياوطنطن, ياوطنطن

MǿиY El-Shreef يقول...

امووووووووت انا ف الحكومه والموالين لها

اطال الله عمرك ياسحوورة وجعلك قدوه للشعب

داحنا ماشفناش الا الخير من ساعة ماحبيبنا مسكنا وبقينا ف نعمه ونحمده

ههههههه

دي ماما ياسحر :)))

بلاش فضايح يقول...

فلتحيا الحكومة ويحيا مجلس الشعب
ربنا يخلى الحكومة وينتقم مننا احنا

طبعا مهو لما تشغلنا بالطوابير ومشاكل التعليم والمواصلات والجرى ورا لقمة العيش مش هنفضى ولا هنفكر نقول اى حاجة

مع ان المشاكل اللى عاملاها الحكومة لينا بتخلينا تتفتح عينينا على حاجات كتير

بس بنبئا دايخين مش فاضيين نعمل حاجة

مصطفي ريان يقول...

سحر ممكن اعلق على الموضوع قبل السابق دة
بتاع الكتب
عايز اقول لكل حدبيقرأ وفاكر ان الكتاب دول شايلنهم تحت البلاطة من ارباح الكتاب يا جماعة الكتب مش بتكسب الكاتب هواللي بيدفع للناشر متوسط مبلغ 2000جنيه علشان ينشر كتابه مافيش ناشر بينشر مجانا وكمان بيدفع قدمهم تليفونات علشان يطمن على خطوات الكتاب والناشر براحته خالص على بال ما يحن على الكاتب وينزله كتابه اه يا جماعة في سوق النشر بنتزل بفلوسنا علشان نطلع افكارنا للناس
علشان كدةاكتر شيئ بيضايق اي كاتب حوار النسخ المجانية لانه طالع عينه فلوس
ياريت الناس تعرف وتقدر احنا بنتعب قد ايه
تحياتي ليكي يا سحر ويارب من نجاح لاكبر

mohamed ghalia يقول...

طبعا معاااااااااااااااااكى هههههههههههههههههههههه
ربنا يكرمك يا سحوره وبالتوفيق دايما

Unknown يقول...

هى مصر طول عمرها كدة
ههههههههههه
وهتفضل كدة
تسلمى على البوست الجميل

محمد عبدالرحمن شحاته يقول...

انا بحب الزحمه
وبحب اتواجد ف الاماكن اللي فيها زحمه
ماشاء الله
الجامعه زحمه
المواصلات
الطرق
كل حاجه
وانا بمر بكل الحاجات دي يومياً
ولكن أقول
ربما زحمة في ثرى الوطن الحبيب
خير من براح الكون في الوطن الغريب
وتقبلي مروري

Foxology يقول...

الحكومة دى مظبطانا والله فعلا

احنا اللى عاملين زى القطط ناكل وننكر :))

شعب عاوز البستفة :D

تحياتى :)

Mafrousa يقول...

هيه الحكومة مظبطانا بعقل؟؟؟؟؟؟
ديه مكيفانا كمان...كيف من الغالى اوي
يا بنتى الزحمة سياسة
و تكسير الشوارع و العمل آل ايه على اصلاحها ...سياسة
و الخضار المرشوش مبيد برضه سياسة...و علاج
اه طبعا علاج انتى ماسمعتيش على الناس اللى عندها دودو فى بطنها؟؟؟؟؟؟ اهو الخضار و الفاكههة المرشوشة ديه لعلاج هؤلاء
يا بنى احنا شعب وحشششششش وحششششش جدااا مش بيقدر و لا بيرحم
ده احنا ربنا بيخلص مننا فى الدنيا النظيفة اللى بتلمع ديه

القمر الساهر يقول...

ما شاء الله

ما شاء لله

عزظيمة يا مصر

شايفين الشعب مؤؤؤؤؤؤؤؤدب ازااي

وجبا ا ا ن اقصد بيحب الجكومة من قلبه ازاى

بس ربنا يستر احسن الحب يزيد عن كدا ويطفح من القلب ويطرطش ويغرقنااااااااااا

دينا حامد يقول...

الحكومة تعبانة معانا والله
الناس مش عارفين يعملوا ايه
المشكلة ان احنا دايما بنيجي عليهم

طاطي طاطي انتي في بلد مطاطي
مش ديمقراطي :D

تحياتي

غير معرف يقول...

أنتى شكلك عايز يتقبض علينا فى القاعدة دى

الحكومة كتر خيرها أكثر الله ما أفكارها اللى بتلهينا و تخلينا مش حاسين بحاجة وحشة...نزعل من الحكومة يعنى عشان مش عايزة تزعلنا و عايزة تحسسنا إن الحياة بمبى

mahasen saber يقول...

ازيك يا سحر اخبارك ايه

بالنسبه لحفلة توقيع كتابك هحاول احضر ان شاء الله ده شئ يشرفنى جدا يا سحوره

Unknown يقول...

أ/ سحر غريب

انا اتعرفت على مدونتك من تعليقاتك
فى مدونة بلال فضل
اللى حضرتى عاملها
و بعد كدة طلعتى صاحبة كتاب حماتى ملاك
و كنت بلف امبارح على كتاب معين فى محطة الرمل عندنا فى اسكندرية
و لقيت كتابك فإشترتيه و قريت فيه
بجد شكراً على هذا الكتاب القيم
اللى خلانى اضحك و ابتسم ، رغم برده ان الاعيب الحموات مملة شوية
- انا وصلت فيه لحد قصة خناقة الأحفاد مع تيته و موضوع القرد
و لسة حكمل
---
شكراً ليكى
---
انا ضفت مدونتك عندى فى رول المدونات
ياريت حضرتك تضيفينى برده
و تشرفينى بتعليقاتك
----
بخصوص موضوع الزحمة
التدوينة عندك حق فى كل كلمة فيها
تحياتى

المـــفـــــــقــــــــوعـــــة مــرارتـهــا يقول...

استاذ بدراوي
------------------
سعيدة بزيارتكوقراءتك للكتاب
وسعيدة كمان بمدونة الاستاذ بلال فضل
لاني بجد باعشق كتابات الراجل دا
هو حالة من الجرأة والثقافة والدماغ بجد كتاباته بتشغل فيوز مخي وبتخليني افكر
اتاري انا مصدعاكوواجعة دماغك بتعليقاتي بس برده كل شوية هاتلاقيني بأتفسح هناك وهاتلاقيني بأعلق
تسلم ايديك
اما عن مدونتك فانا باحاول ادخلها ومش راضية تفتح معايا دلوقتي بس اكيد هاازورك طبعاً
نورتني

arabcooL يقول...

بلوقر
This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه