الأربعاء، 17 يونيو 2009

حكاية بنت اسمها مريم



مريم بنوتة صغيرة لا يتعدي عمرها خمس سنوات تعيش في كندا مع ابيها وامها في هجرة دائمة
قررت مامتها زيارة مصر لمدة عدة أشهر لكي تري بلدها ويتعرف ابنائها علي اقاربهم والأهم علي مصر
صعدت مريم الطائرة هي واخوتها الثلاثة وأمهم، كانت سعيدة فأخيراً ستري جدتها وخالتها وخالها الذي جمع بينهم
النت والماسنجر فقط ومرت الرحلة بسلام أو هكذا تخيلوا فماحدث بعد ذلك لم يخطر ببالهم
فرغم ان اخبار انفلونزا الخنازير تملأ الدنيا الا ان ام مريم لم تتخيل انها مُعرضة لهذا المرض
ولم تستوعب فكرة ان تلبس هي وابنائها الصغار كمامات
ونسيت كبسولة الأمراض الطائرة وهي الطائرات
وتبادل الفيروسات الذي يتم فيها منهم وإليهم
وبدلاً من استقبالهم بالترحاب استقبلهم رجال الأمن ووضعوهم في الحجر الصحي
فقد تبين عن طريق المسح الحراري للام واطفالها بان مريم مُصابة بانفلونزا الخنازير او اتش وان ان وان
ولكن مايثير الدهشة حقاً هو ان هذا المسح الحراري لم يتعرضوا له في مونتريال حيث استقلوا الطائرة من مطار كندا
فلو كان تم المسح الحراري هناك لكان المريض قد تم الكشف عليه وتم علاجه في بلده حيث الرعاية الصحية الأفضل والمعاملة الآدمية الأفضل ولما قام بإصابة اي راكب آخر بالعدوي
دا شيء عجيب بقي مصر المُتخلفة البلد اللي عايشة ومش عايشة فيها جهاز الكشف الحراري
عن المرض وكندا بمالها بهيلمانها مافيهاش واحد ذيه
ايه نسلفهم واحد؟
اهم شيء
ان تدعوا لمريم بالشفاء العاجل

الجمعة، 12 يونيو 2009

آخر الأنباااااء يابشر

تحديث
حلقة القناة الثانية أتأجل ميعادها ولما أتأكد من ميعادها الجديد هاابلغكم

انا عارفة اني مقصرة معاكم كلكم نفر نفر بس حقكم عليا بجد


اولاً ميعادكم معايا


يوم الأتنين الساعة العاشرة صباحاً ان شاء الله علي القناة الثانية في برنامج يسعد صباحكم هاتشوفوني


طبعاً ماتشوفوش وحش......... قولوا هانشوفك


خدتكم في الكلام تاني هام نزل لي موضوعات للمرة الاولي والأخيرة في صفحة شبابية ساخرة اسمها شبورة علي صفحات اللواء العربي الورقية


ثالث هام الأخ المبدع محمد تهامي عمل معايا حوار علي مدونته ولينكها




ودلوقتي هاسيبكم مع موضوع جميل للأخ المبدع إسلام جاويش صاحب مدونة اصحي يامصر





ثورة جديدة في عالم المدونات يتزعمها اسلام جاويش ..


أبناء شعبى البار ، قررت أنا الموقع أدناه أن أقوم بثورة شعبية موجهة ضد الناموس
ولازم لازم تشاركونى فيها كلكم دا الرب واحد والدم واحد
إحنا خلاص زهقنا ، خلاص بجد بجد تعبنا
مش كل شوية وانا قاعد على الكومبيوتر صاحى أو نايم ألاقى جيش عرمرم مزود بقوة جوية خارقة نازل عليا قرص وفين يوجعك ياسمسم
ولما بأصحى وابص لنفسى الاقى اثار الخسائر كتيرة اوى،..اهئ اهئ

لقد أصبح الوضع مستحيلاً حيث ضرب الناموس سكور عالي في مص دمائي يابشر
لازم من دلوقتى نتحد ونتكاتف ونتلاحم ونعمل ثورة ضد الناموس انا لما بجهز اسلحتى وابدأ في ابادته بالرش تارة وبالضرب تارة أخري، الاقيه يغيظنى ويروح طاير قدامى ...حاجة بجحة اوى يعنى






جبت فوطة وقعدت اضرب فيه مافيش فايدة حطيت نفسي تحت اللحاف لإخفاء معالم حدودي عن أنظار قوي العدو المتربصة بي ثم رشيت رشة جريئة ولكن الناموس واعي ونبيه فلم تأتي الفوطة معه بنتيجة وأخترق اللحاف بكل مهارة وبعد الرش انتعش وفاق وقال بكل وقاحة أديني رشة كمان
ياشعبي المقروص سأتقدم الآن ببنود مطالبنا من كبير النموسجية وهي

أولاً ... يطلعو الهرم ويمصوا من اللى فيه ...احنا غلابة ومالناش فيه
ثانياً ...يحدو من ازمة التطورات اللى فى مجتمعهم..عمر الحق ماكان يمنعهم
ثالثاً .... اتاحة الفرصة لمزاولة أعمال القرص من الساعة واحدة إلي الساعة الثالثة وبعدة كدة ياخدوا اجازة
رابعاً ....نحن غير مسؤولون عن أي فعص او موت او رش أي ناموسة منكم في غير ساعات عملكم الرسمية
خامساً...اذا لم تتم الموافقة علي مطالبنا الشرعية في حياة بدون قرص فإن الضرب سيستمر وهندخل في حرب شعواء ستستمر لأجيال قادمة.
وعلي السادة القراء رفع حالة الطوارئ القصوى وتدريب مشيليات مُجهزة للقضاء علي فلول العدو وسنكمل ثورتنا

الأربعاء، 3 يونيو 2009

نوركم غطي علي الكهربا


الدنيا منورة بزيادة

اتاري اوباما عندنا

يامرحبا يامرحبا نوركم غطي علي الكهربا
والطريق واقف بس ولا يهمك ياجدع الطريق طوووول عمره واقف
دي اقل حاجة عندنا نقدر نقدمهالك ياراجل ياسكرة
................
الدنيا قايمة ومولعة بسبب زيارة أوباما وأنا مش قادرة أستوعب السبب في اللغط

والكلام دا ايه

مصر أم الكرم وطول عمرها فاتحة ذراعها للزوار والسواح وغيرهم

هانيجي عند الراجل السكرة اللي قدر يجمع أمريكا كلها وراه وقدر يعمل جو حلو في العالم

وبيحاول يحسن في صورة امريكا امام الكل.... ونطرده

دا احنا ماعملنهاش في بوش اللي اعلن حروبه الصليبية علي العرب كلهم

نقوم نعملها مع واحد ذي اوباما

شعب يخاف مايختشيش

انت ليه يامواطن تعلي في سقف توقعاتك وتأفور في طلباتك خليك علي قدك يامواطن منك ليه

عشان مايحصلش بعد كدة كبوة وشعور بالاحباط

ودمتم

سحر غريب