الثلاثاء، 31 مارس 2009

إضراب الحبيب ذي أكل الزبيب


جاءني صوته عبر أثير التليفون مختنقاً مكتوماً مهزوزاً، نبراته تحمل صدي معاناته في السجن وقسوته

ساعتها سألته هل عذبوك قال نعم، عذبوني وهذا هو الطبيعي في أمن الدولة

ساعتها فقط قررت أن تشارك مدونتي في الإضراب

سألبس السواد علي الحرية رحمها الله في مثواها الأخير

سأشيعها بملابسي السوداء

وسيتم تلقي العزاء يوم السادس من إبريل

وعلي من يتعاطف معنا لبس ملابس الحداد
أنا ضد التخريب الغير هادف والمظاهرات العشوائية ولكني لست ضد الإضرابات السلمية
حقاً هي وسيلة العاجز ولكنها أفضل من لا شيء
هي وسيلة بديلة للصراخ علي أطلال الديموقراطية
ولكنها مع ذلك وسيلتنا الأولي التي كونها الغليان وأعتقد أنها مقدمات لحركة كبري قادمة لا نعلم أبعادها بعد
لنثبت لصناع القرار بأنهم يحكمون بشراً سيأتي عليهم اليوم لينفجروا ويعلنوا عصيانهم ورفضهم لمظاهر الظلم ... هي وسيلتنا لإعلان وجودنا ورفضنا للأمر الواقع
نحن نشجب نعترض نرفض الإستبداد وسياسة كتم الأنفاس
نحن مازلنا أحياء وسيظل صوتنا مجلجلاً
نحن هنا رغم حقد الحاقدين وقمع القامعين
نحن نتنفس تحت الظلم

الأحد، 29 مارس 2009

أنا..........اللي منخوليا مش هو



في يوم من ذات الأيام كنت فاتحة الماسنجر بتاعي لاقيت الماسنجر بتاع أخويا منور...قام نقحت عليا عروق الغلاسة ... قلت أغلس عليه وأضايقه، عادي أخوات وبنغلس علي بعض، وبما إني غلسة ولمضة وحشرية دخلت فيه شمال في شمالـ، مش قلنا أخوات وأنا أتحرمت بسبب جوازي بدري من إني أشد شعر أخويا وهو يشد شعري وأمسك زمارة رقبته وهو يمسك زمارة رقبتي، أقطع كتبه وهو يرسم علي كتبي ويشخبط عليها، ياخسارة مالحقتش أتهني وأعيش الجو الأخوي الخنيق دا أتخطفت وأتجوزت بدري، عيني عليا

المهم ماسنجر أخويا منور وكمان صورته منورة، هي آه من بعيد بس هو أخويا عارفاه، حد يغيب عن أخوه أبن بطن مامته حبيبته، متصور وفي حتة عمري ماشفتها قبل كدة، بس البعاد وحش وهو أنا يعني أعرف كل الأماكن اللي أخويا أتصور فيها


أنا : انت قاعد بتعمل ايه ياابني

BUZZ!!!

أنا : أنت مش وراك كلية بكرة أيه اللي مصحيك لغاية دلوقيت؟
محمد : مين معايا؟
أنا : انا اختك
محمد : ايوه اختى مين؟
أنا : يادي النيلة.... عد غناماتك ياعم جحا... تلاتة في البيت نايمين جوة وواحدة في بيت جوزها

محمد : مش فاهم حاجة
أنا : انت بتنجان ياأخي

أكتشفت مؤخراً إني أنا اللي بتنجانة بس حاطة منيكير
أنا : انا سحر
اوعي تقول سحر مين.... أحسن بالكي بورد وهاافتح نفوخك


كويس أنه هو اللي مافتحش نافوخي وكان هايبقي معاه حق والقانون في صفه ميه في الميه
محمد : معلش عشان بس فى زهايمر
أنا : ههههههههههههههه
الزهايمر ينسيك اختك
يافرحة امك بيك
محمد : سحر مين؟
أنا : سحر مين؟وكمان بتسأل ياخاين العيش والملوخية؟
طب خد ... طب خد .... طب خد
محمد : بجد مش مركز
يابنتى فكرينى

كنت هااجننه... وماله


أنا : ابقي اسال ماما (......) اللي نايمة جوة وهي تفكرك
محمد : ماما مين؟
محمد : ولا اعرف حد بالإسم ده
حضرتك بتكلمى مين بالظبط

مافيش فايدة يابني انت لو بتكلم حيطة كان زمانها فهمت أن صلتك بيها كالصلة بين الحيطة وقرع العسل
أنا : انت هاتشتغلني
صورتك قدامي يامحمد سمير
محمد : انا اصلا مسميش محمد سمير
أنا
: كلمة السر حمودة

هنا بانت الرؤية مادام ماعرفش كلمة السر والسيم اللي بينا يبقي في الحكاية إنا وكأن ولكن ولعل

أنا : لا بجد انت مين

خلاص بدأت أتقهقر وأرجع بالذاكرة لوري، حاسب ياعم الكلاكس خرمان
محمد : حضرتك الى مين
انا معرفش حد اسمه سحر
أنا : انا اسفة
افتكرت ايميلك ايميل اخويا
انت شبهه جدا جدا
محمد : حضرتك عندك مدونة على النت؟
أنا : اه
حماتي ملاك
محمد : يانهار ابيض
دى بقى يتقال عليها ايه
فرصة سعيدة
وقد كاااااااااااااااان
الحمد لله اني فهمت أخيراً لان واحدة يشبه تركيب مخها تركيب مخ الحمار الحصاوي المريض بالتخلف العقلي الذي يجعله أحمر من بقية الحمير اللي خلقها ربنا ... كان حتما ولابد تتمسك برأيها أكتر بس ماحصلش
فرصة أسعد يامحمد وربنا يخليك يامحمد كان زماني بأعاني من حالة إزبهلال وتوهان بسبب الموقف المحرج دا.... بجد البني آدم دا معجزة إلهية يستطيع أن يمتص حرج أي إنسان، موقف ذي دا كان ممكن يرقدني أسبوع عيانة وعندي حالة توهان وأرق يصاحبه إحمرار شديد بسبب الحرج الشديد
أصل محسوبتكم آه حمارة بس عندها مشاعر وأحاسيس وشوية دم صغننين وفيلينج من اللي بيبقي مدفون جوة ومابيطلعش غير في الشديد الأوي

الاثنين، 23 مارس 2009

غلبتني معاها

تحديث مهم جداً
--------------
كل سنة وانت طيب ياعم محمد وعقبال ميت سنة وحكاية محمد غاليا حكاية هاابقي احكيها البوست اللي جاي او حتي هاابقي انزل لكم اول حوار حصل بيني وبينه لأنها صدفة جميلة
اللي يحب يعيد علي محمد ويقول له كل سنةوانت طيب يدخل اللينك دا
mohamed ghalia

الست دي هاتجنني
------------------------------------------------------------------------------------------
من كام يوم كدة شافتني واحدة جارتي ست زووووق زووووق صراحة بتحبني مووووووووت


وكل ماتشوفني لازم تحسسني إنها قلبها عليا ونفسها ياعيني تخدمني في أيتها حاجة بس أنا أأمر،
اول ماشافتني قالت: مالك ياختي أنتي خسيتي كدة ليه؟


باين علي جوزك منكد عليكي وسادد نفسك، ماعلش ياختي هما الرجالة كدة مالهومش فايدة في الدنيا غير انهم ينكدوا علينا


وبصرف النظر عن اللي حصل لكتابي فلذة عقلي بيديها حيث لاقيتها اخدته تتفرج عليه وطلبت تقراه وترجعه تاني وهي في قعدتها حطته جوة بقها وقعدت تسلك بيه سنانها بصيت ليها والقرف يكاد يبتلعني بصي سيبي الكتاب لما تتعلمي القراية ابقي استلفيه تاخديه لفة وترجعيه


انا أول مرة أعرف أن الكتب ممكن نستنفع من وراها ونسلك بيها أسنانا أنا طول عمري أعرف أن الكتب مكانها الوحيد قدام عينينا او نضارتنا ماتفرقش لكن جوة البق اهو دا اكتشاف لوزعي جديد الست دي تستحق براءة إختراع لمجهودها الخارق في خدمة العلم والمثقفين


ورغم ان كتابي صعب عليا بس اللي أثر فيا عطفها وحنانها علي شخصي الضعيف


ورغبتها الحارة في زعزعة ثقتي في نفسي، الزعزعة اسم مستخرج من زعازيع القصب


ويدل علي مدي ضعف وسوء طعم عود الزعازيع المذكور
مش مهم بقي انها من كام شهر شافتني وقالت كلام يضرب الكلام دا علي نافوخه يموته فقد قالت ونظرة الاشمئزاز تعلو وجهها وكأنها قد رأت الست قشطة بلحمها وشحمها :
ايه ياختي دا؟ انتي سايبة نفسك تتخني كدة ليه لازم تخسي احسن جوزك يبص برة، الرجالة دي عينيها زايغة ولما تصدق ان الست بتاعتهم تقصر في اهتمامها بنفسها يقوموا يطلعوا يبصبصوا برة
والبصبصة اسم مشتق من بص يبص يبصبص يعني عينيه تزوغ والامؤاخذة
طيب انا هااتجنن يعني اعمل ايه لما تخنت شافتني طفسة والفيل صديقي المقرب ولما رفعت قالت عليا بقيت شبه العرسة تاكل وتنسي ... احسن حاجة اني اخليها تتفرس واقول لها
انتي مالك جوزي راضي وانا راضي وإيش دخلك انت ياقاضي
مش كدة والا ايه؟


الأحد، 22 مارس 2009

آأأأأأأأأأأأأأأأأأأأأأأأأأ ه يانا


امبارح اكتشفت ان الماسنجر بتاعي بياكل ويتغذي ويقتات علي الرسايل الأوف لاين

قلت اصلحه، وجبت عدة الشغل والشاكوش بالمرة عشان لو عصلج معايا اضربه بيه واخلص من قرفه، والنوم جفاني وفضلت سهرانة مخصوص عشان اشوف له صرفة واصلحه

برضه مافيش فايدة ، انا آه بأقعد ألف علي المساعدة جوة الكمبيوتر واكتر من مرة حليت مشاكلي بنفسي

لكن واضح اني المرة دي جيت أكحلها عميتها وجات الطوبة في الإيميل بتاعي إللي قفل بالضبة والمفتاح

وأدخل إيميلاتي ورسايلي الحجز وحكم عليهم بالمؤبد

ومش عارفة أتصرف إزاي، فحاولت أخد المساعدة من الستات والبنانيت اللي عندي علي الماسنجر بصراحة هما جدعين جدا

بس للأسف إمكانياتهم الهندسية الكمبيوترية مش مساعداهم، حاولت مع الجنس لآخر بس ماحدش معبرني والندالة حكمت
وانا اتعودت إني لما اتزنق في حاجة اطلبها منكم
نصيبكم كدة معايا هانعمل ايه؟

عشان كدة عاوزين حد مهندس كمبيوتر ولو حتي من منازلهم يتبرع ويقوللي هو الإيميل بتاعي جراله أيه قبل مااحاول اصلحه وأكمل العك وأجيب ضرف الكمبيوتر كله في وشي وانتم عارفين ان الكمبيوتر أصبح كالماء والهواء

وماحدش يقوللي بخريه لأني عندي حساسية من ريحة البخور
ولا إديله حقنة لأنه بيخاف من الحقن
انا هنا مستنياكم

الجمعة، 20 مارس 2009

جبت لها قلق


لما يسألني حد جبتي لمامتك ايه في عيد الأم أرد بدون تردد جبت لها قلق مزمن
والقلق دا بيكون ذي الهدية الأكيدة المؤكدة التي تهادي بها الفتيات والداتهم عارفين ليه
عشان يامخلفة البنات ياشايلة الهم للمات
بصراحة الله يكون في عون أي أم عندها بنت مش عشان البنات وحشة لا سمح الله، لأ عشان البنت معجونة بمية قلق وخوف، فعندك خوف الأم علي بنتها وهي لسة صغيرة أحسن حد يضحك عليها وياخدها في حتة ضلمة وتلاقيها تعصر علي نفسها لمونة عشان تصاحب بنتها الرغاية لأجل تعرف المستخبي كله ولا تفاجأ بأمور لا يعلم مداها إلا الله، وبعد لما البنت تتأهل وتتجوز تلاقي أم العروسة فاضية ومشغولة عقلها مش معاها مع بنتها اللي هاتفارقها وتسيب اوضتها وحضن مامتها ثم نأتي للقلق الأكبر والذي يميز أم البنات عن أم الصبيان وهو حمل وولادة فلذة كبدها، تلاقي الأم المسكينة ياحبة عيني بتحس بآلام بنتها وكأنها بعد ماشابت رجعوها تحمل وتعاني من ألام الطلق ووجعها فأم البنت تكون أم مركبة أم لآخر نفس ولا لما يوم مابنتها ترجع لبيت مامتها متخانقة مع المحروس جوزها تلاقي الأم ياعيني اللي كانت مش عايزة تفارق بنتها خايفة عليها لترجع وتهد بيتها بأيديها وتقعد تحايلها وتحايله عشان ترجع المية لمجاريها.
عشان كدة كل سنة وأنتي طيبة ياأمي ياأم الأربع بنات

ومع أني ماعنديش بنات ومستنية لما ولادي يكبروا ويهادوني بهدية مختلفة عن هديتهم السنوية وهي الصداع النصفي، وعارفة قد أيه الأمهات بتتعب وتقاسي سواء أم البنت أو الولد في ولادة وتربية أولادها فبقول لكل أمهاتنا كل سنة وأنتن طيبات
سحر غريب

الأربعاء، 18 مارس 2009

عندما تكتئب سوسو


عندما تكتئب سوسو

عندي إكتئاااااااااااااااب

صحيت الصبح النهاردة لاقيت حالتي مش ولابد أعمل أيه ؟

أنام تاااااااااااني مادام الإستيقاظ يوقظ معه المواجع والآلام المبهمة

نمت النهاردة أكتر من 14 ساعة كاملة وبرضه مكتئبة ... واضح من خلال تجربتي العلمية المخبريه أن النوم يُزيد الإكتئاب ولا يقضي عليه

لبست نظارتي البنية التي تجعل الدنيا قاتمة أمام عيناي وجدتها فاتحة بالنسبة لما يجول بخاطري من أفكار سوداء شديدة القتامة

ماذا حدث؟ ماهذه الحالة الغريبة ؟ أهي حالة طارئة وستزول أم أن الإكتئاب سيظل مآنسني كثيراً ؟

طول عمري أكره الزعل وأعمل علي تحويل كل لحظة حزينة إلي ضحكة حتي لو كانت غارقة في الدموع

أفقدت موهبتي تلك في ظروف غامضة ؟

أسرقت مني الفرحة في عز الفرحة ؟

ماذا حدث لماذا يطبق أخطبوط الحزن علي صدري وينفث سمومه الموحشة التي لا تنتهي.

أحياناً أتمني الإختفاء وهدم مابنيته والبدء من جديد بداية ناصعة البياض ليس فيها ألم أو ذكريات، أتمني أن أستيقظ يوماً وقد فقدت كل ماعلق بالذاكرة، وأتمني أكثر أن يكون لي في ذاكرتي الجديدة حق الاختيار فأنا حالياً لست مُخيرة بل مُسيرة ومُجبرة علي المضي بلا عودة ولا أمل في تصحيح الأخطاء.
ماهذا الذي يحدث تمر الدقائق والساعات والحالة تتفاقم وتتزايد وتخلف ورائها جروح غائرة لا تندمل ولا تطيب، أشعر بالوحدة الموحشة المطبقة فقد وضعت حدوداً لما يجب أن يُقال، وأنا بعد لم أعتاد علي الكتمان فأنا مخلوقة تحيا علي الفضفضة وإخراج مخلفات الأحزان.
هل سينقشع الظلام وتسترد الضحكات مكانها في قلبي ويُعيد الكون لي ماسلبته الأيام؟
حزينة أنا رغماً عني

الاثنين، 16 مارس 2009

إهداء خاص إلي كل المدونين

إلي كل اهل المدينة الفاضلة التي خلقناها في عالمنا الإفتراضي... إلي كل من وضع كلمة او أضاف تعليقاً يبني ولا يهدم

إلي الجميع

حلقة برنامج الأجندة الثقافية علي قناة النيل الثقافية والتي سجلها مشكوراً الأخ المبدع العزيز محمد التهامي صاحب الكتاب الجميل بني آدم مع وقف التنفيذ ورواية هيروبولس

مع شكر للأخت العزيزة رحاب السيد لنشرها موضوع عن الكتاب بجريدة الدستور اليومي يوم السبت الموافق 14/3

تحياتي

الأربعاء، 11 مارس 2009

حبيبة والحب





أخيراً لفظت لحظات الصمت أنفاسها داخل قلب حبيبة، تكلمت حبيبة وقالت وباحت بما تخفيه
ظلمتها الدنيا وساعدت هي الدنيا لكي تجهز علي شعورها بالمساندة ممن حولها
طمست حبيبة معالمها وعاشت بيننا كسراب لا تريد لأحد أن يعرف عنها شيئاً ولا أن يتصل بها عندما تغيب
وافقت علي الوجود بيننا ولكن بشروطها القاسية وهي الكتمان والوحدة رغم أن قلوبنا تتمني منها الثقة فينا وفي حبنا اللامحدود لها
باحت حبيبة بما تخفيه وياللهول لقد أخطئت هي في حق نفسها أولاً
أخطئت حين أحبت من لا يكافئها اجتماعيا ودراسياً والأهم خلقياً
أخطئت حين تركت مصيرها بين طيات ورقة في صورة وصل أمانة قد تسجن من أجل ماتحتويه من أرقام خادعة.
وعندما حانت لحظة المواجهة هربت حبيبة بطفلها لكي تنجو من قضبان السجن وهذا حقها فهي قد تم خداعها بأسم الحب... لعنة الله عليه، هذا الإحساس الغامر الذي يصيبنا بشلل حاد في خلايا التفكير.
حبيبة لقد علمتنا الدنيا أن نتعلم من أخطاء الآخرين
لماذا تضنين علينا بما أعطاك الله من ابتلاءات التجربة
لماذا تتركين غيرك يقاسي كما قاسيت لأنك في يوم من الأيام لم تخرجي شكواك خارج أضلعك، ولم تشاركينا فيها
حسناً فعلتِ حبيبتي حينما قررت الاعتراف لنا بمكنون صدرك
فلو سألتني ماذا ستفعلين لو كنت مكاني وخفق قلبك لشخصاً وفرض والدك عليه مالا طاقة له به... لما خرج الحل عن أن أكتب له ورقة توازي الورقة التي اكتتبها والدي عليه وتلغي ما جاء فيها.. تماماً كما فعلتِ.
أنتِ لم تصنعي بدعة في قانون الحب... ففي عالم الحب العقل يتلاشي ويأخذ أجازة طويلة حتى يستيقظ من سباته العميق علي كارثة أدخله فيها القلب بكل رعونته وطيشه.
ولست وحدي من ستفعل فعلتك التي تعاقبين نفسك عليها الآن فقد سألت غيري من الفتيات عما سيفعلنه، ولم يخرج رد فعلهن عما حدث بالفعل معك.
هل رأيتِ كيف تفكر النساء؟
نحن في نفس المركب الغارقة تتهادي بنا الأمواج وتتخطفنا الأعاصير والجاني هو الحب

إذا أردت أن تعرف حكاية حبيبة الغالية فما عليك إلا زيارة مدونة روح قلب ماما لصاحبتها فاتيما

السبت، 7 مارس 2009

كل سنة وانتم معايا طيبين


يقول الرجل الخمسيني الذي يبكيني كثيراً ويسعدني قليلاً ان الاحتفال بعيد الميلاد يجب أن يكون بلبس ملابس الحداد علي سنة ولت وأنتهت ورغم زعمه هذا أجده يحتفل بعيد ميلاده ...حقاً يكون الاحتفال علي الضيق ولكن من قال أن إحتفالي بعيد ميلادي يكون علي الواسع العريض


مالمانع في أن أطفيء شمعتي وعلي وجهي إبتسامة ... فانا لا أبكي علي عام خاصمني وآذن بالرحيل ولكني أستقبل عامي الجديد بوجه مبتسم سعيد جايز يحن عليا ويكون عاماً من الانجازات والنجاحات


سأحتفل بسنة جديدة رغم انف المتشائمين فأنا سعيدة


ولم لا أسعد وأنا أعيش وسط أجواء من الصداقات الجديدة التي تهون علينا الطريق


فاتيما التي جلست بجواري في لحظاتي الحرجة لتعيد لي ثقتي في نفسي وتميل علي قلبي لتحادثه وتخرجه من لحظات إكتئابه التي كادت تفتك به


محمد غاليا الذي أصبح أخي و لم تلده أمي وجعل من الدنيا مكاناً أفضل لكي نعيش فيه وأعاد لي ثقتي بأن مصر مازالت تلد شباباً تفخر بأنهم من بلدك... ومعرفتي بأخي العزيز محمد هي خير دليل علي أن الصدفة قد تكون خير الف مرة من الف ميعاد


رئيسة حزب الأحلام التي أثبتت لي بأن بيتنا كان أرض خصبة لخلق مجموعة بنات مرهفات الإحساس قد لا يستيطيعون التعبير عن ذواتهن باللسان ولكن القلم أصدق تعبيراً من كل ألسنة العالم


لم لا أحتفل وفي حياتي هؤلاء وغيرهم وغيرهم الكثيرون


لم لا أحتفل وأنا مدونة أملأ الدنيا الصماء ضجيجاً

سأحتفل معكم

كل سنة وانا طيبة وانتم معايا طيبين ومالين عليا الدنيا

الاثنين، 2 مارس 2009

كلكم مدعويين لحضور حفل توقيع الكتاب بنقابة الصحافيين


ينظم جروب كتاب جديد بالأسواق حفل توقيع جماعي للكاتب محمد فتحي صاحب كتب ليك شوق في حكاية ومصر من البلكونة ووبيض


بالبسطرمة ونامت عليك حيطة


والكاتب تامر أحمد صاحب كتاب ضربة حب وحدث في انتيكا وكتاب اخبط راسك


وسحر غريب صاحبة كتاب حماتي ملاك
وغيرهم


وذلك بمبني نقابة الصحفيين بشارع عبد الخالق ثروت وذلك من الساعة السادسة مساءاً يوم الخميس الموافق 5/3


ماتنسوش حلقة حواء وآدم في الفترة المفتوحة بإذاعة القاهرة الكبري من الساعة الثانية عشر ونصف بعد منتصف الليل يوم الثلاثاء الموافق 3/3

الأحد، 1 مارس 2009

انا في اذاعة القاهرة الكبري

يوم الثلاثاء الموافق 3/3 علي الراديو في اذاعة القاهرة الكبري في البرنامج المفتوح حواء وآدم من الساعة الثانية عشر مساءاً وحتي الساعة الثانية صباحاً .. ابقوا اسمعوا البرنامج ان شاء الله
والسهرة صباحي