الاثنين، 23 مارس، 2009

غلبتني معاها

تحديث مهم جداً
--------------
كل سنة وانت طيب ياعم محمد وعقبال ميت سنة وحكاية محمد غاليا حكاية هاابقي احكيها البوست اللي جاي او حتي هاابقي انزل لكم اول حوار حصل بيني وبينه لأنها صدفة جميلة
اللي يحب يعيد علي محمد ويقول له كل سنةوانت طيب يدخل اللينك دا
mohamed ghalia

الست دي هاتجنني
------------------------------------------------------------------------------------------
من كام يوم كدة شافتني واحدة جارتي ست زووووق زووووق صراحة بتحبني مووووووووت


وكل ماتشوفني لازم تحسسني إنها قلبها عليا ونفسها ياعيني تخدمني في أيتها حاجة بس أنا أأمر،
اول ماشافتني قالت: مالك ياختي أنتي خسيتي كدة ليه؟


باين علي جوزك منكد عليكي وسادد نفسك، ماعلش ياختي هما الرجالة كدة مالهومش فايدة في الدنيا غير انهم ينكدوا علينا


وبصرف النظر عن اللي حصل لكتابي فلذة عقلي بيديها حيث لاقيتها اخدته تتفرج عليه وطلبت تقراه وترجعه تاني وهي في قعدتها حطته جوة بقها وقعدت تسلك بيه سنانها بصيت ليها والقرف يكاد يبتلعني بصي سيبي الكتاب لما تتعلمي القراية ابقي استلفيه تاخديه لفة وترجعيه


انا أول مرة أعرف أن الكتب ممكن نستنفع من وراها ونسلك بيها أسنانا أنا طول عمري أعرف أن الكتب مكانها الوحيد قدام عينينا او نضارتنا ماتفرقش لكن جوة البق اهو دا اكتشاف لوزعي جديد الست دي تستحق براءة إختراع لمجهودها الخارق في خدمة العلم والمثقفين


ورغم ان كتابي صعب عليا بس اللي أثر فيا عطفها وحنانها علي شخصي الضعيف


ورغبتها الحارة في زعزعة ثقتي في نفسي، الزعزعة اسم مستخرج من زعازيع القصب


ويدل علي مدي ضعف وسوء طعم عود الزعازيع المذكور
مش مهم بقي انها من كام شهر شافتني وقالت كلام يضرب الكلام دا علي نافوخه يموته فقد قالت ونظرة الاشمئزاز تعلو وجهها وكأنها قد رأت الست قشطة بلحمها وشحمها :
ايه ياختي دا؟ انتي سايبة نفسك تتخني كدة ليه لازم تخسي احسن جوزك يبص برة، الرجالة دي عينيها زايغة ولما تصدق ان الست بتاعتهم تقصر في اهتمامها بنفسها يقوموا يطلعوا يبصبصوا برة
والبصبصة اسم مشتق من بص يبص يبصبص يعني عينيه تزوغ والامؤاخذة
طيب انا هااتجنن يعني اعمل ايه لما تخنت شافتني طفسة والفيل صديقي المقرب ولما رفعت قالت عليا بقيت شبه العرسة تاكل وتنسي ... احسن حاجة اني اخليها تتفرس واقول لها
انتي مالك جوزي راضي وانا راضي وإيش دخلك انت ياقاضي
مش كدة والا ايه؟


هناك 42 تعليقًا:

mohamed ghalia يقول...

فى نوعيات كتير كده تحب تدخل فى حاجات الناس ربنا يهدى

MaNoO يقول...

كدا طبعا ونص
فى ناس كدا تحسى انهم كل حاج بتاعتهم وليهم الحق يتكلموا فيهاوعندهم النصائح المفبكرة خصيصا لمساعدتك واهى عملت فيلم فى نص ثانية مرة انك تخنتى وجوزك ممكن يتجوز ويخلف ومرة تانية انه منكد عليكى وانتى خسيتى

يالهوىىىىىىىىىىى الناس مالها ماكل واحد يشوف اللى عنده ويشوف مشاكله نشغل نفسنا ببعض ليه نتدخل ليه برده مش عارف ومهما اتكلمنا هيفضلوا انواع الناس دول موجودين

محمد عبد الرحمن شحاته يقول...

جارتك دي مش عاجبها حاجه خالص دا غير انها انسانه متدخله بشكل انعقادي والشخصيات دي بتحب تكون زعاميه الى درجه كبيره تلاقيها تجمع مجموعه من النساء وتعمل الزعيمه بس عجبني في نهاية الموضوع جوزي راضي وأنا راضي وأيه دخلك انت ياقاضي هي دي حلها فعلاً
تجهليها تماماً

MǿиY El-Shreef يقول...

مال دي

فكرتني بعماتي ربنا يصلح حالهم

كل حاجه يتحشروا فيهااااا

بصي المره الجايه ردي عليها رد يخليها تتكسف ع دمها بس يبقى بطريقه شيك كده

مرة واحده بتقولي تخنتي قلتلها باكل من بيت ابويا ايه الي زعلك :D

طبعا دي مش شيك خالص اوعي تعملي زيي :D

ربنا يهديها عليكي يا سحورتي يا حبي

شفقة هانم واحسان بك يقول...

ده ايه الجارة الحشرية الرزيلة الثقيلة دى؟
بقولك ايه سيبك انتى منها وكلى وربربى كده وخليكى تومام علشان الراجل تبقى عينه مليانه على الاخر وميبقاش فيها مكان لحد تانى جنبك
يعنى سدى عينه من اولها لاخرها
تحياتى شفشوقة

mostafa rayan يقول...

والله كويس انك صبرتي كدةوانتي شايفاها بتسلك سنانها بكتابك لأن الموقف دة لو بجد حصل معايا انا كنت خرشمتلها وشها قبل ماتفكر تسلك سنانها بكتاب طلع فيه عين اهل اللي خلفوني
المشلكة يا سحر ان الناس فاكرة ان الكتاب بيطلع بالساهل مش عارفين الكاتب بيتعب قدايه على بال ما يطلع له كتاب وان ظهره بيتقطم مرتين مرة قدام الورق ومرة قدام الكمبيوتر وعذابات الكتابة عليه وقدايه بيضحي بوقته وفكره ومجهوده وفلوسه وانه بيدفع حق الكتاب مرتين .. مرة للناشر علشان يطبع ومرة في المكالمات اللي بيكلمها للناشر علشان يطمن على اخبار الطبع وانه بيدوق كل مرارت الدنيا على بال ما بيشوف اسمه مطبوع على الكتاب دة اللي بالنسبة للناس مجرد شويةورق لكن بالنسبة له عمر وحياه ووقت وفكر ومجهود
الست دي اقطعي علاقتك بيها مافيش حل غير كدة
تحياتي ليكي ولزوجك الفاضل وربنا يحفظكو من شر البلاوي دي

ريهام العربي يقول...

هههههههههههههه لا ربنا يكون في عونك ايه ده انا لو كنت شفت كتابي في بقها وربنا كنت نتشتو منها

ولو اتحشرت فاللي مش ليها فيه كنت هقصر معاها ومش هعبرها بعد كده رغن انها هتقول رافعه مناخيري في السما وكلام كتير بس ده اهون من لما الواحد يستحملها

وتلاقي اصلا موضوع الكتاب ده عامل شغل جااامد معاها حبه غيره علي حبه نق وحسد علي تشكيله كلام واحاسيس اكيد مضمونها مش تمام

ههههه في النهايه ربنا يكون في عونك

مش كنتو تختارو الجار قبل الدار

MR.PRESIDENT يقول...

ربنا..يكرم..الست..نصحه..ده..باين
إن..نصايحها..والقبر..ابقي..سلميلي
عليها..اوعي..تنسي..وتشكري..علي
البوست

د. ياسر عمر عبد الفتاح يقول...

بغض البصر طبعاً عم إسلوبك الجامد جداً والساخر جداً جداً
وبغض النظر عن معانى الكلمات اللى بتوضح حاجات كثير .. بس ده من أنهى معجم؟؟

ففى ناس كده بناقبلهم فى حياتنا
مفيش حاجة بتعجبهم
ودول مبنحطش كلامهم فى دماغنا أوى يعنى
ننفضلهم ونقلبهم ونكرفهم ونحلقلهم من الأخر

محمد فوزي يقول...

عندي ليكي فكره حلوه تتعاملي بيها مع الست دي , بدل ما تزهقك زهقيها انتي , أول ما تشوفيها وقبل ما تفتح بقها قوليلها يا خبر !! انتي مالك وشك اصفر كده ليه ؟ لأ لأ كده غلط انتي لازم تهتمي بصحتك شويه ولا انتي عاوزه الناس تقول عليكي انك كبرتي وانتي لسه في زهرة شبابك ؟

مره تانيه وقبل ما تتكلم برده ادخلي فيها شمال على طول لو لابسه غامق قوليلها الفواتح بتليق عليكي لو لابسه فاتح قوليلها الغامق عليكي بيكون أجمل بكتيييييير

هتلاقيها بعد كده لما تعدي من قصادك هتعمل نفسها مشافتكيش بوتيتاً

جربي وادعيلي

ستيته حسب الله الحمش يقول...

مفيش بنت او ست عاقلة تاخد نصايح عن جمالها وحلاوتها من بنت او ست تانية بسهولة

الستات اللي عندهم ثقة في نفسهم وشايفين نفسهم جمال لدرجة انها شايفة جمال الناس كمان دول نادرين ندرة المخلوق الأخضر الحرشفي اللزج اللي اسمه الديناصور

علمتني التجارب ان اللي تيجي ناحية شكلي او لبسي او تخني ورفعي تاخد ضحكة من بتوع تحية كاريوكا متبوعة بكلمة "اسم الله علي .. والنبي تقولي يا اختي ما شاء الله لا قوة الا بالله لحسن انا نجمي خفيف" واسيبها محروقة بالنابالم وامشي وكتفي لفوق .. راسي لفوق .. مناخيري لفوق على رأي فؤاد المهندس

Foxology يقول...

عاااادى فى نوعيات بشر ما يعلم بيها الا اللى خلقها :)

الموضوع فكرنى بقصة جحا وابنه والحمار :))

معلش ربنا يهدى

تحياتى :)

روح الحيـاة يقول...

السلام عليكم.. دي اول مرة ادخل علي مدونتك وان شاء اللة مش اخر مرة... اول ما قراْت موضوعك ضحكت جدا لاْنك بتحكى عن شخصية فعلا موجودة تقريبا عند كل واحدة ست .. اسلوبك جميل .. السهل الممتنع واتلمس من كلماتك روحك الجميلة .... وانتى دمك خفيف جدا ..... اتمني لك التوفيق .. ولك تحياتي

زوجة عنيدة يقول...

دى عايزة نهز ثقتك فى نفسك وخلاص

غيرة بقى انتى طنشيها ويا سلام بقى لو شوفتيها وعملتى نفسك مش واخدة بالك منها

دى مريضة نفسيا

الله يكون فى عونك دا الجار قبل الدار وانتى عندك جارة فظيعة

صيدلانيه طالعه نازله يقول...

انا لو منك و شفت كتابى فى بقها كنت شديته و طلعت بصف سنانها كله
ده ايه التباته دى ملكيش لسان تقوليلها انتى مالك مش متفالحه غير على فيفى الغلبانه بس
انتى بعد كده اول ما تشوفيها اعملى تعبانه و عن اذنك يا ختى اصل عندى انفلونزا الطيور و كده حتلاقيها خافت منك و طلعت تجرى
ههههههههههههههههههههه

أبو العريف يقول...

اكتر حاجه بتضايقني
ان حد يستلف مني كتاب
وهو اصلا مش هيقراه
المشكله بقي ان كتبي غاليه قوي عليه
وبضطر اشتريه تاني
لانه مش بيرجع
بس عمري ما شفت حدبيسلك سنانه بكتاب
جديده دي

GeHaD-----(male) يقول...

دول ناس غاويه تلصص علي الناس التانيه
وعلي رأي المثل اللي بهديهولك
لولاكى يا جارتى لانفقعت مرارتى

محمد فارس يقول...

hbالاخت الغاليه
سحر
ان كان فعلا الست ديه
حصل منها الكلام ده
يبقي انتِ اكيد في مصر
مع تمنياتي ان ربنا ما يوقعش
الست ديه في سكتك مره تانيه

Dr.Mohammed Gohary يقول...

طبعاااااااااااا

عندك حق

هههههههههههههههه

حلو حوار تسليك السنان دا
محسساني انها بتسلك ماسورة المطبخ
ههههههههههههههههههههههه

تحياتي

الربان يقول...

تحياتي

ياريت كل واحد منا يشغل نفسه بنفسه
ينظر داخله حتي يري عيوبه و يصلح من نفسه قبل ان يشرع في اصلاح ( اقصد افساد) حياة الاخرين...

انا في مثل هذه الحالات باطنش و ابتسم.

تحياتي و تقديري

طعمية سخنة يقول...

أولا شكرا لتشريفك مدونتي المتواضعة
ثانيا في استخدامات كتيرة للكتب
مثلا الاستخدام اليومي و ده طبعا قراطيس الطعمية و ورق لف سنتدوتشات الطعمية برضه ! و سندوتشات الفول لأ !!!

ده غير انك ممكن تستفيدي منها في تلميع مرايات البيت

و كمان تفرشيها ع الطبلية LOL

و كمان تحطيها تحت البطاطس و البرنجان عشان الورق يشرب زيتهم lol

و ساعات بتستخدم بدل الكلينكس !!!

و مش هقول اكتر من كده !

انا عندي هواية بقي واخدها وراثة من بابا بجمع كتب الهلال القديمة يعني بحاول اضيف لمجموعة بابا اللي منها كتب من قبل سنة 47 يعني قبل ما بابا نفسه يتولد!!!

و قريبا هبيعهم اي حاجة ب ربع جينه تشتري يالا؟

الطائر الحزين يقول...

نسلك سنانا بالكتب ليه مفيش عيدان كبيرت و وبعدين جوزك على ما تعودية ومحدش يجيب فى سيرة حد علشان عيييييييب

hasona يقول...

السلام عليكم ورحمة الله وبركاته

كل سنة وأنت طيبة
وكل سنة وكل أم بكل مكان بأفضل حال وبالف خير وسلامة

،،،،

ههههههههههه
يعني من الاول كنت قولتي كده وخلاص
وانت مالي يا فاضي يا اللي عامل فيها قاضي

خسيتي تخنتي
طولتي قصرتي
مش مشكلة حد تاني غيرك وغير جوزك

ولو منك تديها كتاب انجليزي تقري فيه
وابقي شوفي هتقولك ايه

أو اديها كتاب عتيق لما تيجي تسلك ودانها أقصد سنانها بيطلع روائح غريبة
،،،
يا حاسدين الناس مالكم ومال الناس

تحياتي

أمبارح كان عمرى عشرين!!! يقول...

ربنا يهديها
بس دى خنيقه اوى
انا لومنك مش هستحمل الصراحة انا هكبسها على طول
الناس دى بتبقى دماغهم مش طبيعية

الحب يجمعنا يقول...

السلام عليكم

شفقة هانم واحسان بك يقول...

ايه يا عم هو اللى عيلى عيلى ولا ايه
يعنى لا سلام ولا ازيكم ولا وحشتونا انتى وحشة

شمس النهار يقول...

علي فكره النوعيه دي انا قابلتها في حياتي كتير جدا
وقاعدين للناس يرقبوا كل حاجه كده
احسن حاجه انها لما تقابلك تبتسمي ابتسامه سوري بلهاء خالص
وتعتزري بلهقة انك نسيتي حاجه مهمه ولازم تعمليها حالا وتجري من قدامها بسرعه

الجواز و سنينه يقول...

طيب انتى تخنانه دلوقت ولا مرفعه
حلوه مرفعه دى
يعنى خاسه
ههههههههههههههههههههههه
يابنتى النوع ده منه كتير اوى
مش عارفه ليه
بس انتى اول ما تشوفيها قوليلها
انتى مالك وشك اصفر كده ليه
مال تحت عنيكى اسود كده
يااااااااه انتى تخنتى خالص
و قوليلى النتيجه ساعتها

david santos يقول...

Really great work!!!
Happy Day!!!!

أحمـــــــــــــد أبو العلا يقول...

هههه
ديه ست كميله خالص
على الأقل بتحسسك بالفرق بين آخره مره شفتك فيها


هههه

هيا عندها احساس انها تعرف عن الأزواج أكتر من معرفة الزوجات

Eno يقول...

ههههههههههههههههههههههههههههه

كده طبعا عندك حق

في ناس كده حشريه بدرجه تخنق الله يقويكي :)

حنين القلب يقول...

ايه الست دى
هى ناقصاها
شاطرة يا سوسو قوليلها انتى مالك ومالنا

دى حشريه اوى

وحشتينى يا سوسو

mostafa rayan يقول...

اختي العزيزة سحر
اشكرك على مجاملتك الرقيقة هذه
بوضع غلاف الكتاب عندك
ربنا يخليكي ويكرمك دايما
وكل سنةومحمد مبروك
تحياتي ومودتي الكتير ليكي يا اختي الفاضلة

يــوم جــديد يقول...

عندك كذا حل
1- لما تقول لك تخنتي قولي لها أصل التخن الأيام دي موضة وبرضه لما تقول لك خسيتي

2- لما تقول لك تخنتي قولي لها اه اسكتشي ياست أم فاروق دا جوزي بيقول لي عايزك تملي علي البيت ومصمم إني أتخن أصله بيموت في التخان ولما تقول لك خسيتي قولي لها اه مادريتيش يا حبيبتي مش جوزي قالي لازمن تخسي وإلا...

3- لما تقولك تخنتي تقولي لها لالالا أنا ع الميزان مازدتش ولا كيلو انتي بس تلاقيكي مش واخدة بالك

كفاية كده ولا نقول كمان؟؟ عندي مخزون يا حبيبتي ما تقلقيش
أخبار إيميلك ايه؟

ঔღঔ نـــوارة ঔღঔ يقول...

يووووووه النوعية دي منتشرة اوي

تعمل قلبها عليكي وبتحبك وهي مفروسة منك علطول وعاوزة تجيب فيكي اي عيب وخلاص

سيبيكي منها وحاولي تغظيها وتفرسيها بادب يعني لو قلتلك حاجة بعد كدا

اتمايلي قدامها وقوليلها جوزي هيتجنن عليي وانا كد دا بيحبني موت هههههههههه وهكذا عن كل حاجة

وهي تموت من الغيظ

بالتوفيق ياقلبي

mahasen saber يقول...

كل سنه ومحمد بالف خير

بس بمناسية ايه

ليكون عيد ميلاده

اصحى يا مصر : اسلام ديو يقول...

حاجة بجد تعصب ان الواحد ياخد الكتاب ويسلك سنانه او ودانه ، دى حاجة فعلاً بجد تعصب ولله

طب كويس بقى علشان كان ممكن تغيظك اكتر وتكتب فيه مشتريات البيت او ما الى ذلك

فعلاً حاجة تغيظ ، بس اعرفى ان فى ناس بتقراه لأنك مبدعة فعلاً

تحياتى لك ، والمدونة احتفظت بيها كمدونات اتابعها من شدة التأثير فعلاً
وبعد اذنك طبعاً
تحياتى مرة اخرى

زهرة الأمل يقول...

ههههههههههه

عاااادى جداً فى ناس كتير زيها حشريين

كدا ..

ولا يهمك ..

مسعدة يقول...

السلام عليكم
ايه الجمال دة
مدونة جميلة ودمها خفيف
تحياتى

Esraa Hamed يقول...

كده طبعا
هما الناس الحشريين دول لااازم يترد عليهم كده


:))

شفقة هانم واحسان بك يقول...

انا زعلانة منك اوى يعنى لا بتسالى علينا ولا سلام ولا كلام
انا مخصماكى بجد

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
شات صوتي
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه