الجمعة، 20 مارس، 2009

جبت لها قلق


لما يسألني حد جبتي لمامتك ايه في عيد الأم أرد بدون تردد جبت لها قلق مزمن
والقلق دا بيكون ذي الهدية الأكيدة المؤكدة التي تهادي بها الفتيات والداتهم عارفين ليه
عشان يامخلفة البنات ياشايلة الهم للمات
بصراحة الله يكون في عون أي أم عندها بنت مش عشان البنات وحشة لا سمح الله، لأ عشان البنت معجونة بمية قلق وخوف، فعندك خوف الأم علي بنتها وهي لسة صغيرة أحسن حد يضحك عليها وياخدها في حتة ضلمة وتلاقيها تعصر علي نفسها لمونة عشان تصاحب بنتها الرغاية لأجل تعرف المستخبي كله ولا تفاجأ بأمور لا يعلم مداها إلا الله، وبعد لما البنت تتأهل وتتجوز تلاقي أم العروسة فاضية ومشغولة عقلها مش معاها مع بنتها اللي هاتفارقها وتسيب اوضتها وحضن مامتها ثم نأتي للقلق الأكبر والذي يميز أم البنات عن أم الصبيان وهو حمل وولادة فلذة كبدها، تلاقي الأم المسكينة ياحبة عيني بتحس بآلام بنتها وكأنها بعد ماشابت رجعوها تحمل وتعاني من ألام الطلق ووجعها فأم البنت تكون أم مركبة أم لآخر نفس ولا لما يوم مابنتها ترجع لبيت مامتها متخانقة مع المحروس جوزها تلاقي الأم ياعيني اللي كانت مش عايزة تفارق بنتها خايفة عليها لترجع وتهد بيتها بأيديها وتقعد تحايلها وتحايله عشان ترجع المية لمجاريها.
عشان كدة كل سنة وأنتي طيبة ياأمي ياأم الأربع بنات

ومع أني ماعنديش بنات ومستنية لما ولادي يكبروا ويهادوني بهدية مختلفة عن هديتهم السنوية وهي الصداع النصفي، وعارفة قد أيه الأمهات بتتعب وتقاسي سواء أم البنت أو الولد في ولادة وتربية أولادها فبقول لكل أمهاتنا كل سنة وأنتن طيبات
سحر غريب

هناك 19 تعليقًا:

اسماء يقول...

الله الله
اول تعليق
يا سلام
كل سنة وانت طيبة يا سوسو
وربنا يخلي امهاتنا كلهن بصحة وسعاده يا رب

ريهام العربي يقول...

هههههههههههه وانا اللي كنت فاكره ان ماما هي بس اللي بتخاف زياده عن اللزوم طلع كل الامهات كده

بس والله معاكي حق

كل سنه وانت طيبه وعقبال ما اولادك يكبرو و يجيبولك اغلي حاجه تتمنيها


تحياتي ليكي يا قمرايه

قوس قزح يقول...

كل سنة وانتى طيبة
و مامتك طيبة

Eno يقول...

والله عندك حق الحمد لله اني بنت وحيده :))

كل سنه وكل ام طيبه وبخير :)

MǿиY El-Shreef يقول...

كل سنه وانتي طيبة يا سحوورة

وكل امهات مصر طيبااات يااارب

وبعد الشر عنك من الصداع المصفي والتلت تربعي :D

هابي ماذرز داي ياقمر

مسدس صغير يقول...

كل سنة ومامتك بخير وكل الامهات بخير
وانا عايز ان ميكونش يوم 21 مارس بس هو اللى نعبر فيه لامهاتنا عن حبنا انا عايز كل يوم يعدى على الام وهيه جنبنا يكون يوم عيد وحب وحنان.
وفى النهاية احب اسمع اغنية
" ست الحناين يا حماتى انتى "

mohamed ghalia يقول...

ههههههه
ياعينى عليها ماما الى انتى تعباها معاكى
كل سنة وهى طيبة
وكل سنة وانتى طيبة

موناليزا يقول...

لا يوجد كلمات توصف قدر الام فهى فعلا رمز العطاء بلا منافس
كل سنة وكل امهاتنا بخير وسعادة

mahasen saber يقول...

كلسنه ومامتك وانتى وكل ام بالف خير
يا سحوره
والملاك حماتك كمان

رئـــــيسـة حزب الأحلام يقول...

كل سنه وانتى طيبة
وماما اللى تعبانا معانا طيبة وربنا
يفك همها يارب
تحياتى لكى وللعيال

صيدلانيه طالعه نازله يقول...

تعيشى و تجيبلها يا سحوووووووور

تخيلى فعلا المثل بتاع يا مخلفه البنات

فعلا صح الامهات بتوعنا على طول قلقانين

مش عارفه ليه

و بعدين احمدى ربنا ان ولادك جابولك

صداع نصفى انا ولادى جابولى تخلف عقلى

كل سنه و احنا كلنا طيبين

أبو العريف يقول...

مش ام البنات بس اللي بتشيل الهم والله
ام الولاد هي كمان
ومابالك بقي بام الاتنين
كل سنه وكل ام طيبه

ايوشة يقول...

والله عندك حق انا كمان جبتلها ضغط من المنكفة معاها كل يوم وليل ونهار الامهات دول ياما بيشوفوا
ربنا يخلي مامتك يارب ويحفظ اولادك

محمد عبدالرحمن شحا ته يقول...

مشكور على الموضوع الجميل واتمنى المزيد دائماُ

Foxology يقول...

يا خبر ابييض

قلق وثداع نصفى كمان ؟؟؟ :))

الله يكون فى عون الأمهات بجد

كل سنة وحضرتك طيبة :)

تحياتى :)

شفقة هانم واحسان بك يقول...

كل عيد أم
وإنت وأمك سعداء يارب

شمس النهار يقول...

كل سنه وانت طيبه
انا ام ل 3 بنات والحمد لله ربنا هاديهم ليه

mostafa rayan يقول...

كل سنةوكل ام طيبة

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
شات صوتي
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه