الأحد، 20 سبتمبر 2009

تعيش وتخسر ياباشا


مش فاهمة انا ليه الشماتة فى فاروق حسنى
واحد قدم فى شغلانة وخسر
المسألة مش محتاجة هوليلة وازعرينة
كل الحكاية ان دمه طلع تقيل على قلب اصحاب الشغل
بس هو مايياسش كدة ويسمى ويحاول يشوفله صنعة يكسب من وراها دولارات

ومش مهم انه يغير مهنته واضح ان مهنة وزير ثقافة مش بتأكل بسبوسة
عنده شغلانات بالهبل وكلها ترفع الراس والركبة
ان شالله حتى يقف فى كشك بتوزعه الحكومة خليه نموذج مشرف لشبابنا الصغير ومش عيب ان الواحد يبدأ من جديد ويكوم فى نفسه

والا اقولكم احنا نعمل جمعية ونلم من بعض قرشين نساعده بيهم عشان يفك رهنية البسكليتة اللي باعها عشان يشترى البدلة الجديدة اللى طلع بيها فى التليفزيون واهو كله بثوابه ربنا يوسع يطعمكم مايحرمكم، قادر ياكريم.

كل سنة واتنتم طيبين ياشعب البلوجراوية


كل سنة وانتم بخير وفي صحة وسعادة.

الثلاثاء، 8 سبتمبر 2009

حماتى لسة ملااااااااااك


هل جئتي ياحماتى تطلبين ناراً أم تراكي جئتى تشعلين البيت ناراً

الست حماتى ربنا يعمر بيتها بخناقة شبه اللي عملتها عندى في بيتي جاءت زيارة وكانت ناوية تقعد عندى قول تلات أيام بالكمال والتمام

اول يوم شيلتها على كفوف الراحة فهى كانت مريضة بالانفلونزا المعدية بصورة وبائية لدرجة انى اخدت الدور منها واتسطحت على الكنبة جنبها مريضة

دا اول يوم مرعلى خير رغم العدوي التى اصابتني


اليوم التاني وانا مريضة متسطحة اخذ اولادى العفاريت يلعبون ويجرون هنا وهناك وانا زورى مع الصيام تعبان لايخرج صوتاً

حتى جاء زوجى من عمله وهنا صدّرت له حماتي بوذاً مستورد من القلب الاسود فدخل زوجى المطبخ عليا مجلجلاً : انتي عملتى ايه في ماما نفسيتها مش تمام اوعي تكونى زعلتيها

ومع الحاحه

قامت الحريقة اخذت تحكى له عما حدث : الست مراتك سامعة عيالك بيصرخوا ومش بتنطق

انتم جايبيني هنا تتعبونى والا تريحونى بقي دا بيت فيه واحدة ست

اخذت اسمع كلام يخرج من فمها رصاصا مع محاولة يائسة من جانبي لكي اهدئها

انا كنت نايمة عيانة ياناس اعمل ايه بس

مش مهم طبعاً بالنسبالها نومي وتعبي اللي هي السبب فيه وجوزي بالطبع كان معها على طول الخط مافيش تهدئة من ناحيته، وطبعا فضيحتى هاتبقي بجلاجل

على اساس كلامها اللي انا متصوراه واللي هايكون : انا روحت عند ابني ، مرات ابني بقي ست بااااااااااااااااردة

العيال بيعملوا دوشة وهي مش هاين عليها تقول بس ياواد

طبعا جوزي في حالة زعل منى بسبب مامته

والملاك هاتفضل طول عمرها ملاك تعمل العملة وتقعد تتفرج على الدنيا بتولع حواليها

هااااااااااااااا دنيااااااااااااااااااااااا وحدووووووووووووووووووووه