الأحد، 13 ديسمبر، 2009

هي الحرب


يرفضون البرادعي لانه لم يخوض حروب مصر كما فعل جمال
نكونش في حرب واحنا مش داريين ؟
ياتري الحروب في الاحلام تتحسب والا لا؟ ميت مرة اقول الغطي مهم جدا اثناء النوم.
مش جايز جمال، طويل العمر طول عمر حارب واحنا مش عارفين، مش جايز يكون بيلعب ريد اليرت الحربية علي الكمبيوتر وكانت غيته يحارب تحت لواء مصر ... مش برضك حروب الكمبيوتر تتحسب والا ايه يااخوانا ؟
وبعدين هو مش ابوه حارب يبقي هو كمان حارب ؟
هو مش اتحرم من ابوه وهو في حرب اكتوبر يبقي حارب اليتم وابوه علي وش الدنيا شفتم بقي احنا ظالمينه ازاي؟ وبعدين هو مش حارب داخل اروقة الحزب واداها طناش وسابهم يزوروا براحتهم ؟
الانتخابات الجاية الحزب عاوز بخليها استنساخ لاول انتخابات رئاسية في عهد مبارك فاكرينها؟
كانت انتخابات في منتهي النزاهة الصراحة
انتخابات العاهات الحقيقية ولبسنا احنا الشعب طراطير او طرابيش من تاني دي حتي الطراطير طلعت موضة مش هاتتغير غير بالطبل البلدي
مع تحياتي وخالض تقديري

التوقيع
واحدة بتحارب مع حلل المطبخ بذمة وضمير
سحر غريب

هناك 10 تعليقات:

Wanda يقول...

بصى انا نفسى اختار بجد يوم الانتخابات يعنى ماشى برادعيى و جمال بس كمان ناس ثانية و كذا واحد
و كل واحد يدخل يقول حيعمل ايه و برنامجه و خطته
مش بلاها سوسو خذ نادية
شكلنا حناخذ كلنا فوزية فى الاخر

دعواتى بالنصر و القضاء على الحلل :-))
بس اوعى تستشهدى فى الحرب ده :-) خليكى معانا

mohamed ghalia يقول...

ربنا يعينك يامحاربة خدى بالك من الكوبيات بقى هههههههه

Foxology يقول...

ايوة طبعا الحروب بمجرد النية محسوبة ومحسوبة الضعف كمان امال ايه ؟؟

كلنا بنحارب بس كل واحد بيحارب بطريقته

تحياتى

tarek momen يقول...

طيب بما انك بتحاربي مع الحلل في المطبخ يبقي انتي جديرة برئاسة مصر
انتي من الأحرار يابنتي
تحياتي

أحمـــــــــــــد أبو العلا يقول...

طبعا
انتوا فاكرينها لعبه ولا ايه

وعلى فكره بأه جيمي مش بيلعب ريد ألرت, ده بيلعب زوما وفيفا 2009 كمان يعني الراجل up to date وزي الفل بس عل الله هوا بس يرضى

هوا احنا نطول لما يحكمنا رئيس ابن... رئيس

وبعدين يحكمنا دلوقتي ليه, ربنا يخليلنا الرئيس الكبير

مفيش فايده

DoMaLaYs يقول...

ربنا معانا بجد

توبيك هادف بجد

م/ الحسيني لزومي يقول...

نحن مقبلون علي لحظات حرجه في تاريخ مصرنا
انتخابات مجلس الشعب 2010
انتخابات الرئاسه 2011
هل اعددت نفسك لتقول كلمتك
هل سجلت نفسك في الجداول الانتخابيه
اذا كنت قد سجلت نفسك ادعو غيرك
الحمله الشعبيه للقيد بالجداول الانتخابيه
باقي من الزمن 45 يوم

sal يقول...

ادواتك التى تحاربين بها سيدتى "تنفع اوى "
لانها مناسبة للواقع المعاش
لك كل التقدير

سلمى *ساجدة للرحمان* يقول...

وبعدين هو مش ابوه حارب يبقي هو كمان حارب ؟
هههههههه، لأ فى دى عندك حق
واضح أننا شعب جاحد أخص علينا لازم نعمل وقفه مع نفسنا
أتفق مع salجدااا
بجد تدوينه جامده

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه