الأربعاء، 29 أبريل، 2009

حماتي ملاك في مجلة كل الناس


فيه تحقيق عن الحماوات نزل في مجلة كل الناس بقلم الكاتبة الموهوبة هند أمين

التحقيق اخذ منها ست صفحات منهم صفحة كاملة تمثل مشاركتي في التحقيق

بجد أنا سعيدة جداً أن مجلة عريقة ذي مجلة كل الناس تكتب عن كتابي

في نفس المجلة اللي بيكتب فيها الشاعر والمفكر الذي احترمه واحترم أرائه كلها

فاروق جويدة والكاتب الكبير دكتور سامي هاشم الذي أتابع عموده في النهاردة أجازة

ابقوا اقروا التحقيق وبلغوني رأيكم

الاثنين، 27 أبريل، 2009

سوبر أديب


محمد تهامي موهبة جديدة خارقة للعادة يثبت أن الموهبة لا تحتاج عمراً طويلاً لكي تختمر داخل الإنسان

سعيدة بوصول كتبه إلي مكتبتي وقد لاحظت من خلال قراءتي لكتابه بني آدم مع وقف التنفيذ

أن نقطة قوة محمد تهامي في الكتابة هي كتابة الروايات التي تنبع من أعماق ودهاليز التاريخ فتصف

حدث قديم مثلاً من خلال مجموعة من الشخصيات والأحداث الخاصة
وقد أنهيت أول قصة قصيرة من كتاب بني آدم مع وقف التنفيذ وتركت الكتاب وأخذت أقول
بصوت عالي ووووووووووووواو
القصة روعة بالفعل وأسلوب محمد فيها أكثر من ممتاز... لون جديد سيخلق كتب مبسطة
للتاريخ الذي هجرناه

ولقد حضرت مؤخراً حفل توقيع كتاب هيروبلس لمحمد تهامي
والكتاب معي في جدول قراءاتي وسأقرأه وأقول لكم عن رأيي بصراحة فيه

سعيدة بمحمد جداً وأتنبأ له بمولد أديب جديد

خارق للعادة أو سوبر أديب

بالتوفيق يامحمد

الأحد، 26 أبريل، 2009

راحت عليك يالساني


اذيكم كلكم

انتم ناس ممتازين خاااالص وحلوين وذي الفل

بس أنا بقي اللي لازم أكن في الذُرة واخليني في حالي وانكتم عشان كلامي دا بيجيبلي وجع القلب

وبيزعل ناس كتيييييييير مني
مش معني كدة اني هااقفل المدونة
لأ بس هااحاول مااقولش كل اللي جوايا
أومال انا باعمل ايه دلوقتي ؟
باقول برده اللي جوايا .
ياريت اللي قري حاجة تزعله يسامحني

انا بصراحة كنت فاكرة ان المدونة مش مقروءة

حاجة كدة مالهاش لازمة حاجة خاصة بأفضفض فيها وأطلع اللي جوايا بدال مااطق

بس واضح اني بعد كدة هااطق من سُكات

ولا من شاف ولا من سمع

الثلاثاء، 21 أبريل، 2009

مصر هاتفضل زحمة

تحديث :

موضوع كتبته الكاتبة النشيطة باسنت موسي علي موقع الأقباط المتحدون زوروه علي اللينك دا

http://www.copts-united.com/article.php?I=57&A=2089




مصر هاتفضل زحمة عارفين ليه؟

لان المصري لو اتخلص من الزحمة عينيه هاتفتح علي حاجات مش ولابد

الديموقراطية مثلاً والعياذ بالله يااخوانا دي رجس من عمل الشيطان ولازم نبعد عنها

طول ماندي ضهرنا للديموقراطية هانفضل عايشين عيشة هنية

والا الحرية... استغفر الله العظيم... البت سحر النهاردة بتجيب سيرة حاجات مش ولابد

دي الكلمة لوحدها تودي النار والعياذ بالله

وعشان شيطاننا الله يجازيه مايوزناش ونجري وري الحاجات الوحشة دي الحكومة

كتر خيرها مظبطانا زحمة وطوابير والذي منه

يعني تعمل ايه المغفور لها ... غلبت معانا

شعب لسانه عاوز القطع والبنية مستحملانا
ولا يوم قالت تخلص علينا ولا يوم فكرت ... شفتوا فكرت بس ..تخنقنا بسحابة بنفسجي
واحنا مع كل دا مش مقدرين نعمة الديكتاتورية .. يديمها علينا نعمة
ومش مقدرين سياسة اللسان المقطوع اللي مابيسمحش غير برأي واحد وكلمة واحدة
تعيش الكلمة الواحدة تا تا تعيش
دي الوحدة حلوة ياجودعااااااااان
في بلدنا انت معي اذاً انت قديس انت ضدي فانت ابليس
والعياذ بالله
انتم معايا ولا مش معايا
خلي باااااااااااااالكوفكر كويس ياعم انت وهو
معااااااااااااايا

الأحد، 19 أبريل، 2009

زيارة المنصورة أتأجلت ولما يتحدد ميعادها هاابلغكم

تحدديث مهم جداً : جاني تليفون من محمد هشام عبية كتر خيره الراجل شقيان معانا بصراحة بيقول ان صاحب المكتبة أعتذر عن حفلة التوقيع فالحفلة أتأجلت ولما يتحدد ميعادها بعد هاابقي




المهم حلقة قناة الإنسانية عدت علي خير والمذيعة كانت هايلة بصراحة وشاطرة ومحضرة علي غير عادة


مذيعين الايام دي






الجمعة، 17 أبريل، 2009

بكرة قناة الإنسانية


غداً السبت بعد الساعة خمسة في برنامج نون النسوة علي قناة الإنسانية

شوفوني

بيقولو هايعملوا مداخلة تليفونية مع حماتي ومع جوزي

ربنا يسترررررررررررررررررر
أدعولي أروح علي بيت جوزي بعد الحلقة مااروحش في حتة تانية

الخميس، 16 أبريل، 2009

الحاجة الإيجابية الوحيدة في اليوم الغريب إياه


الحاجة الإيجابية الوحيدة يوميها كانت أسماء رمضان صاحبة صفحة المدونخانة في

جريدة العالم اليوم ... كانت الطراوة الوحيدة في اليوم دا

يابخت اللي هايتجوزها بجد مش مُجاملة لأن فيها صفة هايلة في البنت

وهي إمتصاص الغضب

فبالرغم من ان الجو كان مشحون بالغضب

لكن هي كانت محافظة علي إبتسامتها معايا طول الوقت

وكنت مع كل الأحداث دي مبسوطة إني شايفاها قدامي وبنضحك سوي

واعتقد ان دا كان العزاء الوحيد يوميها

ربنا يسعدك يانسمتي الرقيقة

يافراشة جوة قلبي
غير بقي ان اسماء عملت للمدونين صفحة كبيرة عريضة للمدونين علي الجريدة
وهي بنت موهوبة جدا في اختيارتها وفي كتاباتها وخلت جرايد كتيرة
تهتم بكتاباتنا كمدونين
ربنا يباركلنا فيها يارب

الاثنين، 13 أبريل، 2009

أعمل أيه يابشررررر



ندخل بقي علي البرنامج ومخرج البرنامج اللي كان هايشوطني علي أساس

أن الأخراج عكننة وصوت عالي واضح أنه خريج معهد أتهد وأكتم ياغلس

أنا لاقيته بيزعق قلت أهديه بكلمتين لوجه الله وعشان خاطر الأذن الوسطي بتاع الأنا فقلت كلمة لاقيته بصلي شزراً

وكان ناقص يديني القلم اللي فلت من كف سواق الميكروباز وعينيه جابتني من فوق لتحت بمنتهي الأشمئزاز

رغم أني كنت مستحمية وحاطة آي لاينر

دا احنا كنا في فيلم رعب ياجرعان ...علي رأي عمنا سووووو

المهم مسكت كتابي وحاولت اديه للمُعد والمذيع في ذات الوقت عشان مايطلعش في البرنامج تور الله في برسيمه

ويبقي عنده نبذة هو هايكلم مين لكنه رفض يبص علي العنوان حتي

ماعلينا عدي ياليلة ... الليلة معصلجة ومش عاوزة تعدي

خلصنا الحلقة والتوتر شغال علي ودنه وصوت المخرج العالي بيشخط في المذيع علي السبيكر بتاعه كان هايطرشه

مش مهم هما زملا مع بعض يطرشوا بعض براحتهم خاااالص

بعد البرنامج طلب المذيع نسخته المجانية قلتله لأ دي نسختي أنا وأنت ياعم الأمور

لسة مديني سؤال في الحلقة انتي كسبتي قد ايه من موال الكتاب دا قلتلك ولا نكلة

هي الناس مش بتصدق ليه؟
ياجماحة أنا يوم ماأخدت تلاتين جنيه علي القطعة في مجلتي سيحت وقلت لكل الناس حتي حماتي

الكتاب غير مربح بتاتا وتسجيل الحلقات للبرامج التليفزيونية بيبقي ببلاش دا احنا اللي بنصرف علي التليفزيون يابشر

المهم تنازلت علي مضض وأديته النسخة اللي كانت معايا وكويس أنها بس اللي كانت حيلتي وقتها قووووم أيه

الباشمعد والمذيع جاله تليفون من واحدة عزيزة عزيزة عندها عزة وكرامة وطالبة نسخة من كتابي مجانية برضك شوووووف إزااااااااااااااااااااي ؟ ولاقيت المذيع ماسك التليفون وبيطلب مني بمنتهي اللطف والأدب نسخة مجانية كمان

بصيتله بصة شزراً رداً علي البص اللي اخدته في اليوم العجيب دا كله وقلت ببرود متناهي

خليها تشتريه من المكتبة .... النسخ المجانية بح مافيش خلصت

قفل مع الست وعاتبني البيه إزاااااااااااااااااااي واحدة ذييي تحرجه قدام جارة مامته اللي في مقام خلته لزم

وتقول له خليها تشتريه

الناس فاكرين أن كتابي لما يقع في أيديهم ويقروه يبقوا كدة عملولي خدمة عزيمة عزيمة ياأرض

اللواء ... الواد سوووو النهاردة مأثر في معجمي اللغوي أصل هو بتاع الست عزيمة بتاعة أرض اللوا


واحدة صحبتي صديكتي لما شافتني بعد طول غياب قالتلي فين نسختي المجانية

قلت لها ببجاحة عادي في الزبادي ياجماحة : أنزلي أشتري نسخة من أي مكتبة مالكتاب يُصرف من المكتبة

قالتلي لأ دا أنتي مفروض عليكي توزعي علي الجروب كله مجاني دي شهرة ياعبيطة

دا أحنا هانعملك شهرة وسط المجتمعات الجاهلة كلها

وأنا من مدونتي ومن منبري العالي بأقول هي البت دي جاية مع مين يااخوانا

شيلوا البت دي من وشي بدال مااروح فيها في نصيبة

يعني أنا أستلفت تمن الكتاب من جوزي وقلت ضيقة وتعدي لكن كمان أستلف تمن النسخ اللي هاانزل ألمها من السوق

وأرجع أوزعها ببلاش تاني ليه ياعالم ياكفنة

ياجماعة حد يفهمهم إني بالمنظر دا هاادفع تمن الكتاب مرتين ودا مش أصول لا مؤاخذة

قال دعاية قال وأنا أجيب منين ؟ أعمل قرض من البنك انزل اشتري بيه الكتاب

من السوق بدال مايرطرط ... تصدقوا حكاية النسخ المجانية اللي خلت ناس كتير

تحطني في خانة البخلاء القيحة التلقيحة الغلسين هاتخليني أمتنع بجد عن

طبع طبعات جديدة من الكتاب أو كتابة ونشر كتاب جديد

أنا مش هااعيش كل يوم في الموال دا

الخميس، 9 أبريل، 2009

أول الغيث قطرة من دبليو سي المجتمع


في بداية رحلة الوصول لحلقة النيل الثقافية في برنامج .........

بصيت في محفظة نقودي فإذا بي لا أجد بها غير جنيه فضة فكة والباقي صحيح فضربتها في دماغي

الصدئة وقلت اركب ميكروباص وياريت رجليا كانت غرست وأنا رايحة أركب البعيد

كنت هانضرب ياجودعااااان ظلماً وبهتاناً

سواق الميكروباص في منتهي الشهامة والذوق... راجل مافيش كدة لسان طلعله حمار
سوري ياحمار

واحدة ست غلبانة مش عارفة الطريق قالت بكل بساطة وأدب: نزلني السنترال

أول مرة أعرف أن السنترال دي كلمة أبيحة

السواق سمع شتيمته بودنه.. بتقوله سنترال ياعاااااالم ياكفنة

قال بكل ليونة ومياعة كما الدبابة البلهاء : هو أنتي فاكراني خدام عند أهلك

وأخذ يلوح بيده اللي عاوزة قطعها والناس تستحلفه ماعلش عيلة وغلطت خليك أنت الكبير

أطلع ياأوسطي سكتك سالكة

وهو أبداً فقد كان مصمماً علي الإنتقام والست ياعيني تقول له أصلي مش عارفة

السنترال فين وهو أنا لو أعرف كنت سألتك

ومازالت يده تشوح ومصمم علي أنه يتخانق ويطلعها غلطانة وياللهول يداه

أقتربت قليلاً من وجهي

فثرت عليه.. مش أوي يعني بشويييييييش ياجماعة إذا كانوا الرجالة ماأتدخلوش وطلعوا المهراجا السواق صح والست راكبها الغلط ... ناس ذووووق ذوووق صراحة رجالة من ضهر رجالة


المهم محسوبتكم أتعلمت علام مش ولابد اليومين دول اتعلمت اني لما اشوف حاجة غلط أعلق

وأقول رأيي وعشايا عليك ياكرييييييييييييييم

زمان كان ممكن السواق دا يضربني بالقلم وأعيط وأنكتم لكن دلوقتي

قلتله: طيب أفرض أيدك دي دخلت في وشي أعمل أيه أنا دلوقتي

قم رد الملاك البريء الطاهر المظلوم

أنتي مش شايفة بتقول أيه ؟

قلتله الست ماقالتش حاجة غلط الست مش عارفة السنترال فين فعاوزة تأكد عليك عشان ماتنساش

الست ماأجرمتش في حقك.

فأستدار الرجل إلي مقود السيارة وقال بطريقة أقل حدة وكان مستني رد فعلي العنيف عليه

فقد قال : وأنتي أيش دخلك ياآنسة في اللي مالكيش فيه

فعلاً أنا آنسة وعندي عيلين وفعلاً أنا أيش دخلني في اللي ماليش فيه

كانت لازم أيديه تطبع قلم محترم علي وشي وأقول هات كمااااااااااااااان

وطبعاً كان ممكن أتكلم وأديله من المنقي ياجوافة

بس أنا ماليش في شغل الخناقات أنا قلت اللي كان في نفسي وخلااااااااويص علي كدة

وسكت

وهذه كانت البداية

تسجيل الحلقة في اللينك دا للي عاوز يشوف العار

http://www.facebook.com/video/video.php?v=1127415510562&comments

الأربعاء، 8 أبريل، 2009

النهاردة شوفوني علي الآي تي شو علي النيل الثقافية


النهاردة الساعة واحدة يوم الخميس الموافق 9/4 أنا ضيفة لبرنامج آي تي شو علي قناة النيل الثقافية لأتكلم عن المدونات الإلكترونية الساخرة

والمدونات التي تحولت إلي كتب

شوفوني

يارب ماتشوفوا وحش

السبت، 4 أبريل، 2009

يشمعني جوزي


موعود معايا بالعذاب ياجوجل

غيرت اسم المدونة ييجي خمس ست مرات لحد دلوقتي ... وعم جوجل الله يحفظه يمشي ورايا ويغيره ... وانا بأقول لعم الحاج جوجل ماتزعلش نفسك واحمد ربنا دا انت في نعمة ... والله نعمه .... دا انت عمر معرفتي بيك لا يتعدي سنتين تلاتة بكتيره أومال ياعين قلب أمه... المسكين جوزي يعمل أيه معايا بقاله في العذاب دا ييجي تمن سنين.. ومش ناوية اديله افراج واخلعه ... قاعدة علي قلبه تقيلة بقي خفيفة اهو قاعدة والسلام... كان حقنا نعمل له تمثال

بصراحة الراجل مستحمل بلاوي

وانا الصراحة بأعذر الراجل فلما ييجي يشتريلي هدوم عيد والا هدية واطلع عينه معايا وبعد مااشتري الحاجة من هنا اروح البيت واصمم واقعد اعيط بالدموع الساخنة عشان استبدلها وارجعها للمحل الوحش الكوخة اللي بيضحك علي الزباين ويخليهم يشتروا حاجات مش في دماغهم اساساً... اصلي كنت شاربة حاجة اصفرة وانا باشتريها

والراجل بناءاً علي دموعي الحارقة لازم يعصر علي نفسه زتونة وينزل معايا تاني ويعرض نفسه للأحراج بس بصراحة حقه يقول ماعلش اصل المدام عيلة وبترجع في كلامها

وعشان كدة بتدب خناقة سنوية لرب السما يوم عيد ميلادي عشان يهرب من انه يشتريلي هدية
انا مش عارفة لحد دلوقتي التردد دا كان فين وانا باخد قرار مصيري ذي قرار جوازي الذي كان اسرع قرار اتخذته في حياتي واللي مفروض يبقي اصعب قرار الواحدة بتاخده ... وغالبا والله اعلم بقيت حريصة ذيادة عن اللزوم بعد التسرع الرهيب اللي اتجوزت بيه

بيني وبينكم وكلام في سركم الستات كلها كدة

القرارات مش شغلتهم

فعشان كدة لازم تستحملوني هو انتم اقل من جوزي وسيبقي الاسم علي ماهو عليه

حماتي ملاك

الخميس، 2 أبريل، 2009

سيبقي الحال علي ماهو عليه

زوروا مجلة علي صوتك
عاملين المرة دي شغل عالي اوي روحوا وبلغوني رأيكم


عدد أبريل من مجلة على صوتك
http://www.3allisotak.net/
معنا فى هذا العدد
الأفتتاحية وعضم الترب مع محمد فرج
وملف العدد عن الكذب والأشائعات
ومعنا فى آراء مستقلة
المأذون الطبى / حريتى فى الحلم / مصر المضربة / شوارع غير صالحة للسير الأدمى / دار الكتب على الأنترنت
ومعنا أيضا فى قسم كلام ستات
قمر 14/ كيف تواجهين كذب طفلك
وخدمة جديدة وباب جديد فى قسم كلام ستات وهو نبضات القلوب وأمكانية أرسال كل مشاكلكم والوصول الى حل لها معنا
ومعنا قسم علمى علمك وخرطوشة تاريخية والرياضة وحلو وفنان والعدالة والقانون وابداعات فنية
ومعنا فى النت والتدوين عدد من تدوينات المدونين وخدمة جديدة فى طرح أعمالكم التدوينية معنا
ومعنا أضحك من قلبك بريشة الفنان ياسر حسين
وأخيرا بريد القراء وأستقبال كل أعمالكم لنشرها
http://www.3allisotak.net/