الأربعاء، 27 أكتوبر، 2010

عذراً فأنت لست وحدك

عندما هاتفته قلت له انه رجلاً عظيماً ذو رسالة سامية وهي تنظيف مصر من مخلفاتها ومن عشوائية شعبها ولكنني اكملت كلامي بأنه للأسف يعمل وحيداً في مكان يحتاج إلي عدداً كبيراً يشاركه.. انه المهندس أحمد علي رئيس مجلس ادارة هيئة نظافة القاهرة الذي نشر رقم تليفون مكتبه في عدد كبير من المواقع والجرائد لكي يتلقي شكاوي المواطنين الخاصة بمخلفات البناء، ليبحثها بنفسه، قال موظفيه عن كلامه بأنه كلام جرائد فقررت ان اهاتفه حتي اعرف هل نصدق كلام الجرائد ام لا؟ وهل هذا حلم ام حقيقة مسؤل مصري يهتم بشكاوي المواطنين بنفسه؟
رد المهندس احمد علي تليفوني واخذ مني الشكوي بنفسه ولم يحولني لاحد مساعديه وبعد ربع ساعة فقط لا غير وجدت رقماً غريباً يتصل بي ويخبرني بأنه رئيس هيئة نظافة حي المقطم الذي اسكن فيه وانه تلقي شكوتي من المهندس احمد علي شخصياً وطالبني بالصبر حتي يستعد لنقل محتويات الخرابة اللي في شارعنا.
اكتشفت ان المهندس احمد علي ليس وحيداً ياسادة فأنا معه ومعه كل مواطن يرغب في حياة نظيفة، لن اهدأ ولن يرتاح لي بال حتي اعلن للجميع بأن الدنيا لسة فيها خير مادام فيها امثال المهندس احمد علي .

وفي نفس الوقت بدأت اعذر محمد حسني مبارك فالعيب ليس عيبه ولكنه عيب حاشيته وموظفيه الذين يخفون عنه الحقيقة ويجملون له الواقع ويريحون دماغهم .. اعذرني ياريس اللي مايعرفك يجهلك .
سحر غريب

هناك 7 تعليقات:

MaNoO يقول...

يااااااااااااااه وحشنى التفاؤل ايوا كدا بقى انا والله بقولها انه لسه فى امل وامال كتيره كمان الشعب دا عمره طول تاريخه ماكان كله وحش بس احنا كمان لازم نكون معاهم كلنا لازم نكون كدا نبدا نظهر حاجات الحلوه عشان الباقى يتعلم مش شاطرين نفضح نفسنا فى الحاجات الوحشه بس
احييك بجد على البوست اولا لانى واخد عهد احيى اى حد على اى حاجه ايجيابيه تيجى منه
تقبلى احترامى

MR.PRESIDENT يقول...

بعد السلام
اولا احي المهندس الجدع
ثانيا ألومك يا سحر
وتخلي واحدة مخلفة 3 أطفال والثلاثة في مدرسة واحدة .. تعتقدي إنها تتابع مستواهم من خلال كلام المدرسين ولا تابع بنفسها المستوي مع التأكد من المدرسين .

أنا اسف مش متفق معاكي أما مبارك فربك يمهل ولا يهمل .. سؤال ليكي راتب مبارك كام .. سؤال تاني لو انتي حبيتي تقابلي الريس ممكن تروحي له من غير معاد .. وحتي لو بمعاد تعتقدي انه هيقابلك .

معلش يا استاذه سحر اعذريني لكلامي .. لأن البوست فور الدم .. لما شعب شايف الذل .. لما ناس تاكل من الزبالة .. لما ناس تتظاهر عشان الميه مقطوعة بقالها 10 تيام وشربوا من الترع .. لما الفساد يزيد والقتل يزيد والطلاق يزيد والأمراض تزيد أكيد مبارك المسؤول الأول .

تحياتي

Foxology يقول...

كلكم راع وكلكم مسئول عن رعيته ولا عذر لرئيس الدولة فعمر ابن الخطاب رضى الله عنه كان ايضا له ولاة فى الدول الاسلامية العديدة واكرر ( العديدة) ولكن كان يشرف بنفسه عليهم ويعقد لهم مجالس المحاسبة

تحياتى للمهندس احمد على وربنا يعينه

تحياتى

Mafrousa يقول...

سحووووووووووووووووووووووور
واحشااني جداااااااااااااااا
واحشنى رغينا مع بعض و الله
بصي يا سحور
امثال المهندس ده موجوده
و موجوده على جميع المستويات الوظيفيه
بس مش باينين قدام الفسااااااااااااااااااااااااد
طبعا حاجة كويسة ان حصل استجابة لشكواكي
و حاجة كويسة انهم ردوا عليكي بانهم مهتمين
بس اللى مش كويس
انهم لو شالوا المخلفات حتلاقى ناس تانية ترمي، و هكذا
الموضوع لازم يتحل من تحت يا سحور
لازم يكون فيه عقاب رادع علشان مش يتكرر

انا فى سنة من السنين كان وزير البيئة برضه سايب تليفونه على اساس اننا نتصل نقدم شكوى
ووحياتك اتكلمت
ولا حياة لمن تنادى
و برضه ايام انفلونزا الخنازير
و انهم قفلوا محلات بيع الفراخ لفترة
كلمت وزارة الصحة قلتلهم فيه سوق هنا فى اكتوبر
فيه محلين للفراخ
و بينقلوا الفراخ..ايام لما كان ممنوع
و قلتلهم بيذبحوا و بيرموا المخلفات
و برضه لا حياة لمن تنادي
انا متهيألى احنا فى زمن لازم الصغير يحترم القانون علشان الكبير يتكسف على دمه و يشوف شغله صح
لاننا لو فضلنا نقول ما الكبار مش بيطبقوا القوانين نطبقها احنا ليه؟؟؟؟
و نستنى نشوف الكبير مش بيخالف علشان ما نخالفشي يبقا عمرنا ما حنتصلح و حيبقا حالنا زي ماهو
و بعدين انا مش معاكي فى اعتذارك للريس
يا حبيبتى فيه تلفزيون بيوري كل القرف
و ممكن يتقصى و يشوف الكلام ده صح ولا كلام اعلام
لأ يا سحوووور فيه تواكل برضه
ايوه همه مهتمين بحاجات بس انا حاسة انهم لازم يهتموا بامور اخري مهمه جدااااااا
امور لازم دلوقتي تتحل لانها بعد كده حتصبح قنبلة مش حتفرقع غير فى وشهم

AHMED SAMIR يقول...

لو في كل مكان موظف محترم زيه
ماكانش دة بقى حالنا

المجهول يقول...

كلامك ممكن يكون صيحيح .. لكن الريس غلطان برضه لأنه عين ناس ماعندهاش ذمة !!

momken يقول...

ياه يابشمهندس احمد اخيرا ظهر حد كويس بدات تندع


الكناس
رجل وظيفته النظافه...يحتقره ناس وظيفتهم القذاره


تحياتى