الثلاثاء، 22 أبريل، 2008

قرررررررررب شوووووووف وصفات فيفي للعكننة




من ساعة ماتأهلت ... يعني أتجوزت ... وكل المناسبات والأعياد بتعدي عليا ...وفوقيها طبقة عكننة ثقيلة أو خفيفة مع التقليب المستمر حتي الذوبان فيصير لدينا خميرة عكننة فيفي المشطشطة ... وخد لك فكرة وأشتري بُكرة .
كحك العيد .... تعمل عليه مشكلة وتعمله من هنا وترميه من هنا ... وتشتري جاهز .. لبس العيد مشكلة لوحده فتثير علي حسه ضجة لا أول لها ولا آخر ... إللي مضايقني إن شهر رمضان الكريم دخل وسط دايرة العكننة غصب عن عين التخين ....
والخناقة فيه بتبقي علي كمية ياميش رمضان ... الذي تفضله حماتي بكميات وفيرة .... غزيرة ...
أنا بقي بأعترف إني حريصة من ناحية ياميش رمضان وخصوصاً
لأني حاسة أن زوجي لا حارمني ولا حارم مامته من أيتها حاجة
طوال شهور السنة يبقي لازمتها أيه نزنق نفسنا بمصاريف ذيادة في شهر واحد .. المفروض أنه شهر عبادة مش شهر طفاسة
وحماتي حافظة مش فاهمة ... تحب تقلد وخلاااااص ... ومادامت شايفة الناس كلها بتجري تشتري الياميش وكأنهم داخلين علي مجاعة ... تقولوش هايقضوا رمضان في الصومال ياأخواااااتي ... يبقي لازم تجرينا أحنا كمان ذيهم

وهنا حدثت العاصفة ...فقد أخذني زوجي معه إلي السوبر ماركت لنشتري
الياميش والسمن والزيت والسكر ... وفوجئنا هناك بأن جميع الأسعار قد تضاعفت .. فرأفة مني بحالة زوجي المادية طلبت منه أن نكتفي بالأساسيات ونختصر في الكماليات ... أظن مش هانموووت لو ماأكلناش قراصية وصويحباتها
المهم أشترينا من كل صنف قطعتين ...بالعدد واحدة لينا والأخري للغالية ... وأكتفينا بنص كيلو فقط من كل نوع من أنواع المكسرات

ففي شقتنا كان يعيش فردان .. علي إعتبار أن إولادي الصغيرين مالهومش في الحاجات دي قوي ... وفي شقة حماتي يعيش فردان أيضاً علي إعتبار إن القطط مانفسهاش في الياميش
يعني مالهاش لازمة الكميات الكبيرة ... التي سبق و أشتكت من كثرتها حماتي مما يعرضها للفساد ... وكان زوجي يشتري وهو متوجس خيفة من رد فعل مامته وأنا عمالة أطمنه ..
ماتخافش هي قالت الحاجات دي مش بتاكلها وبتبوظ من الركنة

لكن أتضح لي أن فيفي دي مش واضحة ...وإللي في نغاشيش قلبها مش علي لسانها ... وينطبق عليها المثل اللئيم
عيني فيه وأقووول إخييييييه
المهم أخذني زوجي إلي والدته ليفرحها بمجايبه
التي أستقبلتنا مقابلة شنيعة مريعة فزيعة ... أنا لو باأحس علي دمي ماكنتش عتبت بيتها في حياااتي من تااااااني .... باين عليا عندي فقر دم شديد ... وإحساسي مهاجر في القطب الشمال وأتجمد هناك ومش عارفاله طريق جُرة

فقد وقفت حماتي علي باب شقتها ومسكت الشنط من يدينا لتوزنها بميزان يديها ثم نطقت وعلي وجهها إصفرار غريب
أيه ده ؟
هو ده الياميش كله وحاجات رمضاااااااان كلها ...ولا لسة فيه تااااني

زوجي : أنا جبت كل إللي وصيتي سوسو عليه
هي : أنا ماليش دعوة بسوسو بتاعتك دي ... أنا طلبت منك ماتجيبش حاجة ؟! هي سوسو بتجيب حاجة من جيبها
ده حقي .. هو أنت فاكر نفسك بتتجبي عليا ... ده أنا أرفع عليك قضية وأجرجرك في المحاكم أبيعك بيها إللي وراك وإللي قدامك
عشنا وشفنا هي الهانم هاتخليك تستخسر في أمك علي آخر الزمن
هو : ذي ماجبت ليكي جبت لينا بالظبط ... مافيش حاجة ذيادة
هي : يااااااما جاب الغراب لأمه ..... هو أنت فاكر نفسك بتهادي عصفورة ؟ ! الكمية دي ماتنفعنيش .... طب أنتم ناس مش بتحبوا تاكلوا .. ومحرومييين ... أنا مالي بيكم
أنا واحدة نزيهة وأحب أنزه نفسي ...
أبقي تف علي وشي إذا كان ربنا يرضي عنك ولا عمرك هاتورد علي جنة ... أنا عارفة جرالك أيه ؟ ماأنت كنت ذي الفُل ... قبل ماتتجوز السنيورة

قصدها ...أنا ... أنا ... مش بقول لكم بتحبني .. حتي في عز خناقتها بتقوووول عليا سنيورة ... أنا بأعشق الست دي !

بقي هي دي آخرة صبري وتربيتي فيك ... أخس عليك .. أسمع ياواد أنت وهي .. بيتي ده ماتعتبوهوش برجليكم طووول ماأنا عايشة وحسي في الدنيا ... الله الغني عنكم وعن مجايبكم ... ربنا يعوض عليا عوض الصابرييييييييين ... بررررررررررررة ... برررررررررررررة
ثم تبعت حماتي كلامها بقصف مسلح للشنط بما تحتويه علي الأرض مبعثرة للياميش في كل حدب وصوب ...
... ياخسارة تعبنا وشقانا ... بقي هي دي متشكرة بتاعتها ؟! طب ذنبه أيه بس الياميش يقع علي الأرض ....أوعي الصلصة ... حاسب السمنة ... أوعي الزيت ....بالراحة علي الرز والمكرونة ... لم ياجدع الفلوس إللي وقعت علي الأرض ؟!
أحسن حاجة في حماتي أنها مش بتعرف تنشن كويس .. كان زماني أنا وجوزي في عنبر الإصابات الحرجة بتاع ياميش رمضان ... من تحت راس علبة السمنة
لملمنا حالنا المتبعتر وروحنا علي البيت نضرب كف علي كف
حتي تورمت الكفوف

ولقد تم الصلح علي خير بعد بداية رمضان بأسبوووع واحد حيث أحتاجت حماتي أن تكمل بقية الشهر بعد أن شطبت علي النقود التي كانت بحوزتها
أنا شفت كتير وقليل بس عمري ماشفت أم بتعشق التراب إللي في محفظة فلوس أبنها كدة ... يعني عاوز حب ودعوة ليك يبقي لازم تدفع مقدماً ... الدفع كاش .. علي الترابيزة ..ولا تقبل الشيكات أو الفيزا كارد ... وأبقي سلملي علي قلب الأم وحنان الأم
وست الحبايب يامقشطاني ياأما
ولا عزاء للأمهات

يعني لولا أنها بتحتاج فلوس ولادها كان زمانها مقاطعاهم ... مقاطعة تااامة
وهو ده حناان الأم إللي تدعي علي أبنها وتكره إللي يقووول آميييييييين ... وكله بتمنه يااااااااابا
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

هناك 88 تعليقًا:

Migo Mishmish يقول...

اول مرة اشوف مدونتك
صعبتي عليا قوي انا وقعت من الضحك على فيفي ولسانها اللي بنقط جاز وبنزين وبتنفخ نار من مناخيرها
على فكرة انا كمان عندي فيفيتين (2 فيفي) بس هما مش حمايا وحماتي هما يقربوا لجوزي برضه بس مقدرش احكي اكثر من كدة
بس انتي من الواضح انك عندك ذوق انا بقه ياختي بيبقى عندي زوق مع اللي عندهم انما مع الفيفتين لو حد حاول يلون معايا ببوز وش امه.
ببساطة من ضربني على خدي بافقعله عين واسيبله التانيه علشان تعيط عليها
بس عايزة اقولك حاجة هتنفعك بجد اوعي لما تسألك على حاجة تردي على سؤالها يعني ردي على السؤال بسؤال تاني
خدي بالك ديه بتحفرلك حفرة علشان توقعك فيها اوعي تخليها تعمل كدة معاكي
وكل اما تتكلمي معاها اتكلمي في اسعار الخضار والبيض اللي غلي ولحمه الحمير واذا حاولت تفتح معاكي اي موضوع اعملي هابله
يعني انا علشان حامل كل اما اي فيفي من الاتنين يحاول يرغي معايا احط ايدي على بقي واعمل نفسي هارجع قلبت معدة ابوهم
تحياتي وسلملي على فيفي

love
MishMish

Crystal Lobna يقول...

لاحول ولا قوة الا بالله . بالذمه دى أم دى. يالا ربنا معاكوا و قوى قلبك يا سوسو . و ربنا يخليكى لجوزك و أنتى مراعيا ظروفه

فراشة يقول...

ايه ده تالت تعليق بس احمدك يااااااااارب
اهو ده اللي بيقولوا عليه ياعينى على الام وحنان الام ههههههههه
الست دى والله نزيهه يعنى يا اما القراصيه يا اما فلا وطردتكوا من على السلم لم لم السلم لم لم .... حوشي اللي وقع منك يا فوفو
منظرك بقي وحش اوى هتعرضي قضيتك ازاى دلوقتى قدام دول عدم الانحياز هههههههه اقلك انتة كنتى عملتى حاجه جامده جدا بقي عارفه طالما هيه كده كنتى خمتيها يعنى حطيلها كام قالب طوب في الشنطة من تحت اهو الشنطه تبقي تقيله ويعدى اليوم وبعدين بقي لما تكتشف يبقي يحلها الحلال بس برضه الواحد ميضمنش فوفو يمكن تضربك انتى وابنها بقالب الطوب وتيجي انتى ترمينى بقله عشان الاقتراح المهبب ده لالالالا ياستى يا داخل بين فوفو وحماتها هههههههههه

حسبي الله هو نعم الوكيل .... قلبي معاكي

wanna b a physician يقول...

الست دى امه شاربه من دمه
لالالالا بجد دى حاجة عجيبة اوى مش ممكن خالص خالص يعنى الله يكون فى عونكم

ghoneem يقول...

اهلاً بيكي

خامس تعليق ده بالنسبة لية رقم قياسي جديد....

جامدة جداً وصفة الشيف أسامة اللي ف الأول دي بجد حسيت اني جعان

بس انت ايه اللي فكرك برمضان واللي حصل ف رمضان ...اللهم بلغنا رمضان بس من غير ياميش وصويحباته
ههههههههههه

ومازالت .......طبعاًانت فاهمة قصدي

تحياتي

بالتوفيق....

nody_1987 يقول...

امال انتى عاوزاها تتعرفهم ببلاش
دى مش بعيد تكون كاتبه عليهم شيكات حق ما حملت فيهم

اهو ده عيبه يقول...

لا حول ولا قوة الا بالله

طب كونها تستهون بالحاجة اللى جتلها رغم ان يعنى كتر خيركم ده مش فرض عليكم لكن كله الا انها ترمى نعمه ربنا على الارض

واضح انها فى عزلة عن الدنيا ومتعرفش الناس بتتعب اد ايه علشان تجيب القرش

وبعدين اذا كانت بتحب ولادها على اد فلوسهم يبقى ده ميتسماش حب خالص

ربنا يكون فى عونك وعون جوزك

دكتور بهــدوء يقول...

نزيهه وبتحب تنزه نفسي
ياروحي عليها ع جمالها
وترمي الياميش ع الارض
انا لو مكانك كنت عزمتها ف يوم وماعملتش اي حاجه بتاعت رمضان
يعني زي اكل يوم عادي
وتبقي هيه السبب ف ان مافيش حاجه وانتي تفهميها كده ان كل حاجه باظت اما اترمت
ولو اني عارف انها ممكن تكون خدت بالها ايه اللي باظ بالظبط وايه السليم
ف عز المعمعه بتضرب بعينها ف الحاجه
والله انتي جبل
ويا جبل مايهزك ريح
ولا فيفي حتي
انا بس بهدي النفوس
ومع ذلك نرجع ونقول

زي نينه
و
رمـــــضان كريم
وعوءبال خناقه الكحك وبعديها الخروف وبعدين حلاوه المولد والفسيخ
دا طول السنه امال بتبقوا كويسين امتي بس
قدرك بقي
عشان جوزي تهون فيفي

معلش الله يا سوسو الله يعينك

صيدلانيه طالعه نازله يقول...

قراصيه ايه اللى انى جايباها كنتى جبتى لها بلح من الناشف عشان يكسروا سنانها
قمر الدين بس يكون قديم و يلزق فى سنانها و يطلع بالطقم كله فتنسى باقى الحاجات و تتلهى فى علاج سنانها
يابنتى المؤمن كيس قطن
قصدى كيس فطن قبل ما تكيدك كيديها انتىو اما تشتكى من اللى انتى جايباه قوليلها انزلى اشترى انتى يا حبيبتشى
وورينا الشطاره

نسيان يقول...

اختي تحية و بعد
اريد فقط ان اقول لك ان الله سيعوضك بما هو خير
فكوني متأكده انه كلما زادت الدنيا عليك في المصائب و الاحداث كوني متأكده ان هناك ما هو اجمل و اروع و انبل مما تتوقعين من خير
كوني بخير

mostafarayan يقول...

معلش ولاتزعلي نفس خالص

واحدة مفروسة يقول...

سيبك انتى انتى طلعتى بالكيلو كله ... ياااااله وفرت....و طبعا حنونه ..ديه ما دخلتش المكسرات بقها و اديدهالكو...تنكرى؟اه ياناكره و الله ياسوسو انتى زى القطط ... الست بتحبك و بتقول عليكى السنيوره...ليه كده يا سوسو ...ليه كده؟....قوليلى كنتى جايبه من عين الجمل المجعلصه ديه اللى عامله زى الكور كنتى زألتيها بواحده ى دماغها ....الست كانت مستنيه تقولوها خدى الكيلو كله بس انتى طلعتى واعيه......سلام

صحفية روشة يقول...

ههههههههه
طب تصدقى انا وسط ضحكى ورغم انى عارفة انك بتكتبى الموضوع فى اطار فكاهى عارفة وحاسه قد اية هى منكدة عليكى ويمكن قبل كتابه البوست ده بتبقى متنرفزة من افعالها لكن لما بتروقى بتقلبيها كوميديا مش عارفة كلامى صح ولا لا
_______________________________
اول مرة هطلب زيارة محتاجه جدا جدا اجابات على البوست الاخير بمدونتى
شكرا

رئـــــيسـة حزب الأحلام يقول...

السلام عليكم
دى وصفات هائلى اوى للعكننة

غير معرف يقول...

يا سلام على فيفي ديه

ديه قنبلة موقوتة

Desert cat يقول...

ههههههههههههههههههه
والله العظيم انا لو فى مكانك اقف اضحك لما انفجر من الضحك
واجمل حاجه وهى بتقول برررررررررره
وبعد كدا اتصالحتوا عادى الله الغنى عنها الدعوة ام فلوس وكمان بررررررره

عبده الرايق يقول...

هو سؤال بدون ازعاج
يعنى ايه ياميش ؟؟؟؟؟؟؟؟؟؟؟؟؟؟

امل يقول...

يا خببببببببببر ابيض
معقولة فيه حاجة كده
ربنا يصبرك

د/اجدع بنوته يقول...

لا حول ولاقوة الا بالله

لا ده موقف صعب جدا

ده مش ينفع يتاخد بهزار اطلاقا

ربنا يهديه يارب وتعيشوا ف سلام

ويمنعوا الياميش

sasatifa يقول...

بجد انا مش متصور ان فى ام كده ،بتحب ابنها عشان فلوسه طب ووذنب الزيت ايه فى الموضوع ،الست دى ربنا مش يوريها بالى تعمله فى مرات جوزها..و لا مرات ابنها ولا مرات اى حد ...المهم ان انتى ضربتى على الزيت واللى يجى منها احسن منها
وشكرا على الزيارة ..بس ايه رأيك انا بتقدم ،أول مرة كنت ال144 واللى بعديها75 ودلوقتى 20 ايه رأيك

مفقوعة مرارتي من حماتــــــــــــي يقول...

Migo Mishmish
===================
منوراني .... ياستي انا لازم ابقي الوحيدة اللي عندها ذوق فيهم لان كلمتي هي اللي بتقف في الزور ... هما ممكن ياكلوا في بعض لكن انا اللي مش مسموحلي اكح وسطيهم
لما باتكلم معاها في الأسعار بتطلب فلوس ذيادة علي طول من جوزي
أنا رجعت مرة عند فيفي وانا حامل علي فكرة
لاقيتها بتجري علي ابنها وبتقوله نضف وري مراتك ... ايه القرف ده ... أنتم جاييين تقرفوني ؟
أنا من ساعتها مش باحب الأكل عندها

مفقوعة مرارتي من حماتــــــــــــي يقول...

Crystal Lobna
===================
أنا باحس ان الرجالة بتحب نوعية فيفي هااات ... مش بيقدروا الست اللي بتضحي وتحوش لهم

مفقوعة مرارتي من حماتــــــــــــي يقول...

فراشة
==============
وهو رمضان ييجي من غير القراصية
قالب طوب يامفترية ... انتي عاوزة تخلصي علينا ... كدة هانضمن البطح

مفقوعة مرارتي من حماتــــــــــــي يقول...

wanna b a physician
==========================
الست دى امه شاربه من دمه
لا ياعم دي حلوة أوي وجاية علي الجرح انا هاخدها شعار المرحلة القادمة
متشنكرة

مفقوعة مرارتي من حماتــــــــــــي يقول...

ghoneem
=================
هانت فاضلك تكة علي أول تعليق .. شد حيلك يابطل

هي وصفة العكننة تجوع برضه ياراجل ... تاخد قطمة ؟؟؟

مفقوعة مرارتي من حماتــــــــــــي يقول...

nody_1987
====================
لوجات علي الشيكات انا هاأدور عليها وأقطعهم
دي ماسكالهم ذلة باين

مفقوعة مرارتي من حماتــــــــــــي يقول...

اهو ده عيبه
===================
وهي تعبانة في حاجة ... وبعدين ماهي الحاجات اللي رميتها دي اتجاب لها غيرها لما اتصالحت معانا يبقي ترمي براحتها بقي

مفقوعة مرارتي من حماتــــــــــــي يقول...

دكتور بهــدوء
=================
بجد انا سعيدة بزيارتك ... أنا أصلي بأعدي علي مدونتك ...ايه ياراجل الهدوء ده ... أنا قلت إستحالة تييجي عندنا في الدوشة بتاعتي انا وحماتي
ربنا يخليك للمزعجين اللي ذينا

مفقوعة مرارتي من حماتــــــــــــي يقول...

صيدلانيه طالعه نازله
=======================
أنا دايما بقول لجوزي اديها حقها ناشف ... فلوس وهي تعمل بيه مابدا لها ..بس هو بقي مش فاهمها وفاكرها بتحبه يشتريلها طلباتها
مايعرفش ان الستات بتحب تعمل شوبينج لوحدها وبمزاجها

مفقوعة مرارتي من حماتــــــــــــي يقول...

نسيان
====================
ربنا يخليك يارب ...علي كلامك الجميل ده
ومنورني أول زيارة

مفقوعة مرارتي من حماتــــــــــــي يقول...

mostafarayan
================
ماسمعتش دكتور بهدوء بيقولكسوسودي جبل
أنا جبل ولا بيهمني

مفقوعة مرارتي من حماتــــــــــــي يقول...

واحدة مفروسة
==================
المرة الجاية هابقي اجيب لها عين جمل تحسباً لظروف القصف الجوي اللي ممكن تشنه علينا

مفقوعة مرارتي من حماتــــــــــــي يقول...

صحفية روشة
===============
بصي انا كل الحاجات دي كانت بتبقي غايظاني مووت ..لكن طالما خرجت وبعبعت بيها ... لأ وكمان لاقيت ناس متابعاها ومبسوطة منها ... خلاص بتبقي مش اكتر من موقف كوميدي بيضحك
الموقف ده بالذات ماكنتش متوقعاه
انا قلت هاتنبسط لاقيتها مدياها عكننة
أما عن طلبك ...فوجب يامعلمة

مفقوعة مرارتي من حماتــــــــــــي يقول...

رئـــــيسـة حزب الأحلام
=============================
أبقوا أكتبوها جايز تنفعكم
ومن فيفي نستفيد

مفقوعة مرارتي من حماتــــــــــــي يقول...

غير معرف
==============
لوتحب تاخدها تفجرلك اي حد اتفضل
القنبلة للإيجار

مفقوعة مرارتي من حماتــــــــــــي يقول...

Desert cat
=================
أنا شريرة بقي ...وكان نفسي نفضل برررررة علي طول ...تعملي ايه بقي في قلب الأم المدفوع الأجر مابيستحملش يعيش من غير ضناه أكتر من اسبوع

مفقوعة مرارتي من حماتــــــــــــي يقول...

عبده الرايق
===================
هاأبعتلك منه تدوقه علي رمضان الجاي
أصل ياميش من غير رمضان مايمشيش

مفقوعة مرارتي من حماتــــــــــــي يقول...

امل
=========
إللي يعيش ياااما يشوف

مفقوعة مرارتي من حماتــــــــــــي يقول...

د/اجدع بنوته
===================
ياشيخة ماحدش واخد منها حاجة ..
ماتزعليش نفسك كدة ... أنا جبلاية
مش قلنا عندي فقر دم

مفقوعة مرارتي من حماتــــــــــــي يقول...

sasatifa
=================
عقبال يارب لما أصحي من النوم وألاقيك في المركز الأول وأديك الكاس
انا بازورك ياسيدي بس مش عارفة أعلق عندك والله
منورني

nonoymm يقول...

مش عارفة هفضل اقولك معلش واحتسبي افعالك عند ربنا لامتى
عاااااااااااااا
معلش انا ما بجبش الحاجات دي الا يعني عينات كدة برضه من ناحية اسعارها ولعة نار
ومن ناحية تانية برضه ما نحرمش نفسنا برضه
بس هتعملوا ايه رمضان الجاي بقى
حوشي واستعدي
ربنا يعينك عليها

زُمُرده يقول...

ههههههههههههه

اولا اشكرك على الضحكه والبسمه اللي رسمتيها فيا في اول نهاري

اسلوبك كوميدي هزلي واقعي تحفه
مش بيقولوا هم يضحك وهم يبكي
اديكي خليتينا نضحك من الهم

حلوه حواديت الحموات الفاتنات

ثانيا اشكرك على زيارتي اللي عرفتني طريقك يا عسوله

سومة المفروسه يقول...

ربنا يقويكى ويبعد شرها عنك انا بردو عندى نفس الفيفي دى بالضبط بس على فشاره اوى بتموت في الفشر والتاليف


انا اول مرة اكتب عندك بس بجد طريقه كتابتك لذيذه جدا ودمك سكر
ومتبعاكى على طول

سمراء يقول...

الحماه حما مهما كانت طيبة بتحس ان واحد او واحدة اخدت منها ابنها او بنتها
وانها لم تعد مهمة لابنها او بنتها
المهم ان الوصفات دي متاثرش على علاقتك بجوزك
ربنا يمنحكم حياة مليئة بالسلام والسعادة

اسلوبك الساخر مبدع
اسعدني زيارتك
سمراء

semsema يقول...

انا لو منك كنت انتهز الفرصة دى ولا اعبرها تانى
خليها تشبع بابنها
وانتى ضغطك هيبقى طبيعى وصحتك اكيد هتبقى احسن
بس جوزك بقة ربنا معاااه
تحياتى

بطوط حبوب يقول...

المواضيع دخلت فى منحنى تانى
ياترى ايه هيحصل تانى
وهل لسه فى حد لسه ناوىى يتقدم لفيفى
ننتظر بعد الفاصل

مفقوعة مرارتي من حماتــــــــــــي يقول...

nonoymm
================
حاضر من عينيا

مفقوعة مرارتي من حماتــــــــــــي يقول...

زُمُرده
==============
دي زيارتك إللي أسعدتني بجد عاوزاكي متابعة دائمة

مفقوعة مرارتي من حماتــــــــــــي يقول...

سومة المفروسه
================
أسوأ صفة في البني آدمين الفشر ... بصي عشان أبقي صريحة معاكم كلكم انا عندي اربع بوستات من الواقع بأسلوبي وبطريقتي بس بعد كدة هابدأ أستخدم تأليفي وأستفيد من تجربتي في الكتابة ليكم ومن تشجيعكم ليا
بس تعرفي انا لسة كاتبة واحدة جديدة من تأيفي وطلعت مسخرة موووت أنا نفسي كنت هاموت من الضحك وانا اللي كاتباها .. هي فانتازيا

مفقوعة مرارتي من حماتــــــــــــي يقول...

سمراء
============
تعرفي انا بافكر في أيه ... عشان أبتكر حاجة جديدة
ممكن أكتب بعض البوستات بس ألبس لبس حماتي وأفكر بعقليتها وأكتب عن اللي ممكن يكون بيدور في عقلها ساعتها
عاوزة رأيك ورأي المتابعين في الفكرة دي
أنا بجد بأعذرها ساعات

مفقوعة مرارتي من حماتــــــــــــي يقول...

semsema
================
وهو أنا نطقت ليها ... أنا بس قلت رأيي في سفه الصرف علي الياميش بهبل بيني وبين زوجي
الحمد لله ... تشكري
منورة

مفقوعة مرارتي من حماتــــــــــــي يقول...

بطوط حبوب
===============
فيه فاصل فعلاً البوست القادم
أبقي تعالي قول رأيك ... فرأيك يهمني

شهرزاد يقول...

مدونة رائعة

وباين أن صاحبتها دمها خفيف وزي العسل

وربنا يعينك على حماتك

دي باين عليها قنبلة ذرية

ومولعة كل شيء في حياتك

حتى سميتي المدونة باسمها

وكتبت كل شيء عنها

تحياتي

شهرزاد

la3lahakhier يقول...

لا حول ولا قوة الا بالله
انتى عارفة انا دخلت مترو رمضان اللى فات ولاقيت الياميش اسعاره نار والرجل اللى واقف عليه بيغرنى للشراء قلت لا اللهم انى صايمةةةةةةةةةةةةةةةةة
يا عينى على بختك يا سحور

samourai 4 ever يقول...

ما شاء الله
هو فعلا لسه فى حموات كدة
مش انقرضوا برضه
و لا دى سلاله جديدة

شكله سلاله معدله
الغلاسه اكتر
الرخامه اكتر
العكننه اكتر
تطور بقه
و على رائيك
خد فكرة و اشترى بكرة
و اللى ما يشترى يتفراااااااااااااج
و يلا بيييييييييييييينا
احم .... احم
ما علينا
ربنا معاكى من الاخر

و دمتــــــــــــــــــــــم

mady يقول...

يعني بجد والله الست دي كده
ولا انتي عامله فانتزييا
عشان نضحك وكده
في امه كده حتي لو بتكرهك متعملش كده
في ابنها
والله بدعيلك من قلبي ربنا معاكي

حياتي قنبلة ذرية يقول...

حد يوسع

واحد بيخبط دماغه في الحيطة

واحد بيصرخ

واحد جنبه ضرب(بعد متفقت مرارته

صحيح يا بنتي انت جبل مايهزك ريح و ربنا يجازي جوزك خير بصراحة

و جزايكي الفردوس الاعلي علي صبرك

اقول ايه يا بنتي حسبي الله و نعم الوكيل

Rainbow يقول...

انتى بتتكلمى جد ؟
فى ام تعمل كده ؟
طيب موقف جوزك ايه من الليلة دى ؟

هى لو كده فعلا يبقى الله يكون فى عونكم
انا لو منك مدخلش بيتها تانى ابدا
انا جاية اهدى النفوس بس

مفقوعة مرارتي من حماتــــــــــــي يقول...

شهرزاد
=================
حماتي بلا فخر ... من حكايتها وحكايات مغامرتها أيام تاصبا تتعمل كتب مجلدات .. بس أنا اللي مش عاوزة أتكلم عن شبابها عشانماكنتش موجودة
دي عندها حكايات عن الأرانب والكلاب والقطط والعرس والتعابين ... تحكيها كدة وهي رايقةكانها بتحكي حاجة في الأخبار
مش بقولكم لذيذة
هي بس ساعات أعصابها بتفلت
لكن مايضرش اننا بنحبها

مفقوعة مرارتي من حماتــــــــــــي يقول...

la3lahakhier
=================
إللي أنا كنت فاكراه أن الزوجة مفروض هي اللي تطلب وتتخانق علي الكحك والخروف والياميش
لكن الأم فده إللي كانت غريبة عليا ومتوقعتهاش أبداً
بس عادي الجتة نحست والأعصاب أتجمدت

مفقوعة مرارتي من حماتــــــــــــي يقول...

samourai 4 ever
================
... أيه رأيك ؟؟ أنا بعد كدة هاعمل رسم دخول للمدونة قدره جنيه واحد للماوث... مش كان زماني لميت تلات ألاف جنيه ..مش كانوا نفعونا لرمضان الجاي بدل ماأحنا بنترمي بالياميش كدة ؟

مفقوعة مرارتي من حماتــــــــــــي يقول...

mady
============
بصي لحد دلوقتي حصل .. وحصل وحصل ولأربع بوستات قدام حصل
بس بعد كدة اتفرجوا علي الفنتازيا بقي ولا تحبوا الفنتازيا نقدمها شوية ...هي جاهزة علي النشر
بس فيه حاجة في الأول هانقاشها معاكم وياريت الكل ييجي يشارك برأيه

مفقوعة مرارتي من حماتــــــــــــي يقول...

حياتي قنبلة ذرية
====================
كلنا لها ... ابقي تعالي محتاجة رأيك البوست القادم

مفقوعة مرارتي من حماتــــــــــــي يقول...

Rainbow
=============
مش دخلته تااااني ... أصل جوزي أروبة .. بيعرف إزاي يدحلبني عشان أروح هناك بأي حجة والسلام وباروح وراه ذي العبيطة
أنا ضد قطيعة الأهل ومافيهاش حاجة أن الواحد يسامح وينسي
منوراني ... تعالي برضه البوست الجاي ضروري محتاجة رأيك

الربان يقول...

تحياتي

الصابرون بخير...و الام وان أخطأت أم
لكن اسلوبك جميل... يجلب الابتسامة بالرغم من ان الموضوع جاد.

ماذا لو سأل زوجك الفاضل و الدته عن
احتياجاتها بالتفصيل قبل الشراء..
يمكن هذا يريحها...

المهم... لا تحزني...لا تبتأسي...السن له احكام...


تحياتي و تقديري

الربان يقول...

معذرة اقصد سن والدة زوجك...لان التصرفات قد تخضع للسن و احيانا الي بعض الامراض البدنية التي قد تؤدي الي مثل هذه العصبية.

تحياتي

غير معرف يقول...

بجد كان الله فى العون

غير معرف يقول...

تقريبا نفس العينة
انا سمعت الكلام دة فين قبل كدة والفيلم دة ان بقالى عشر سنين بشوفة يا سبحن الله

عـــفـــراء يقول...

مش بقولك انا اللى بيتفقع مرارتى مش انتى
استعد يابطل رمضان قرب يهل
علشان كدة افتكرتى رمضان اللى فات
عينى عليك ياسنيورة
ربنا يقوى عزيمتك
خالص تمنياتى

nicelife23 يقول...

عارفة لما بحب انبسط شوية واحس بالنعيم الي انا فيه (يعني لسة ماتجوزتش)بدخل لمدونتك وبقعد اضحك اضحك بجد دمك شربات وربنا يخلي لك الست حماتك عشان عطاءاتك ماتقلش

واحدة مفروسة يقول...

كلاكيت تانى مره
ازيك يا مفقوعه اصلى بحب ازورك كتير علشان اضحكلى شويه....بدل ما كل حاجه تخلى الواحد يعييط..و الصراحه كمان بحب اقرا التعليقات اللى عندك
هههههههههههه
و يظهر كده ان حماتك مش لوحدها انا ملاحظه ان حماتك صورتها متكرره فى اكتر من بيت .....
ده حتى يا عينى غير معروف بيعانى او بتعانى بقالها 10 سنين و خايف يحط اسمه لحماته او حماتها تقفشها عندك هههههههههه
انا برده عندى حما ...هيه بتحبنى....اعتقد.....بس الاكيد ما بتحبنيش لما اجبلها الخضار اصلى ما بعرفش انقى و كده و اللى بيدوهلى باخده..وانا و حظى....طلع كويس حسمع كلمه كويسه..... طلع وحش.....باسمع الحب كله.........و على رأى الربان فعلا كل سن و له حكمه

مفقوعة مرارتي من حماتــــــــــــي يقول...

الربان
===================
لا عادي انا مستحملة للآخر
انت عارف احنا بقينا نعمل ايه ؟
بقينا نديها الفلوس وهي تتصرف مع نفسها

مفقوعة مرارتي من حماتــــــــــــي يقول...

غير معرف
===========
ياسبحن الله له في خلقه شئون ... ربنا يصبرك أنتي كمان ... بس عشان خاطري ابقي وقعي التعليق بأسم أحسن انا مش بأطيق غير معروف ده

مفقوعة مرارتي من حماتــــــــــــي يقول...

عـــفـــراء
=================
ربنا يخليكي أبقي تعالي ضروري محتاجة مساندتك

مفقوعة مرارتي من حماتــــــــــــي يقول...

nicelife23
===============
الحمد لله لاقينالنا فايدة أهوه
يارب دايماً

مفقوعة مرارتي من حماتــــــــــــي يقول...

واحدة مفروسة
===============
هو احنا لينا بركة إلا حماواتنا
ربنا يخليهم لينا

مفقوعة مرارتي من حماتــــــــــــي يقول...

غير معرف وورخم ودمه يلطش
==============================
ربنا يشفي ... الحمير ويضرك
ويهديك يابني
انت اللي جنيت علي نفسك
البوست الجاي الرد جاهز

سبهللة عالآخر يقول...

دمك شربات يا مفقوعة
بس تعملى ايه لو فيفى دى تبئى امك
بتكلم بجد
انا حماتى هى امى
وام جوزى ملاك والله جنب امى انا
سبحان مغير الاحوال

مفقوعة مرارتي من حماتــــــــــــي يقول...

سبهللة عالآخر
====================
بجد الله يكون في عون إللي أمه كدة يعني الحما ممكنتقاطعيها لكن الأم لأة
ربنا يعينك يارب ويجعله في ميزان حسناتك

Esraa Hamed يقول...

هي الست دي ملسوعة في دماغها و لا حاجة ؟!!!

ياللا اهو كله بثوابه بردو

مفقوعة مرارتي من حماتــــــــــــي يقول...

Esraa Hamed
،،،،،،،،،،،،،،
قدر الله وماشاء فعل

Dr-hema يقول...

لا يعنى بجد هى كده فعلاً لا د انا لو منك أطلق جوزى قصدى أخلعه
ولا هى بقى قصداكى حتى لو قصداكى
مفيش حد عنده ذوق ويشتم فى الوش كده دا انتى مرات ابنها
ولا هى عافية وقلة ذوق
ولا هى جينات قلة الذوق فيها والجليطة
اعذرينى من الكلمات البذيقة دى

د/هيما

zoga 3asria يقول...

مش عارفة ليه مش قادرة اقتنع ابدا ان في ام علي وجه الارض ممكن تكون بالشكل ده مش مقتنعة خالص حساكي بتبالغي جدا جدا جدا او بتقولي حاجات مش حقيقية او لو كان ده كله صح يبقي اسفة اني اقولك زي ما انتي قولتي علي نفسك معندكيش دم عشان لسه علي علاقة بيها لحد دلوقتي مفيش ست مهما كانت صبورة وتعرف ربنا او بتموت في جوزها تستحمل كل ده ابدا خصوصا في زمانا ده اي واحدة فينا حماتها هتعمل فيها كده مش هتسكتلها ابدا ومش بعيد تديها بالصرمة كمان .... انا اسفة بس مش مصدقة المدونة خالص بضحك عليها اوكي بس مش مصدقاها

حماتــــــــــــي ملاااااااااااك يقول...

Dr-hema
=================
ده طبعها ياهيما .. مش مخصوص عشاني
معظم الناس القديمة كدة ... وهي قديمة قوي
مش بيهمها غير طلباتها وبس والدنيا بعدها تولع

حماتــــــــــــي ملاااااااااااك يقول...

zoga 3asria
===================
بصي الشتيمة أساسا كانت موجهة لأبنها فبالطبع لم أتدخل بينهم
لكني شيلت منها جدا تعرفي اني مقاطعاها .. مش عشاني عشان ولادها واللي بتعمله معاهم .. لاني اخدت مبدأ وهو اذا كانت بتعامل ولادها كدة يبقي هاتعاملني انا إزاي ؟
بس تعرفي بقي أبنها كل شوية ببجاحة يسألني
ياسوسو انتي بتحبي ماما ؟
ولما بأرد عليه لأة
يزعل ويتقمص ويقلبها خناقة
طب بزمتك واحدة بالمواصفات دي تتحب إزاي ؟

ranim يقول...

ههههههههههههههههه والله ياسوسو انتي تحفه وكتابتك كلهااااااااااا تهبل ما شاء الله وان شاء الله هتشوفيني في المدونة هنااااا ديما وان شاء الله هدخل علي مدونة ام احمد بس بعد لما هخلص المدونة التحفة دي بتاعت سوسو حبيبتيييييييييييييي وانا مستنية الطبعة الثانية من الكتاب

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
شات صوتي
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه

farnandas يقول...

دي باين عليها قنبلة ذرية

ومولعة كل شيء في حياتك

حتى سميتي المدونة باسمها

وكتبت كل شيء عنها
وكالة سمارت