الثلاثاء، 20 مايو، 2008

أديها فلووووووس تديك غموووووووووس

تــــــــــــحــــــــديث مُهم جداً
ــــــــــــــــــــــــــــــــــــــــــــــــــــ
أنا كنت هناك ... هناك فين ... في حفلة توقيع أول عدد من مدونات مصرية للجيب
الكتاب يجنن والصراحة معمول فيه شغل جامد أوي ... مش خسارة فيه الأربعة جنيه ... وشفت أمم ماتتعدش من المدونين ... وسلامهم عليا خلاني طايرة من السعادة ... أنا كنت بتاخد بالأحضان ... من المدونات البنات بس طبعاً ... حسيت إني أعرفهم كلهم واحدة واحدة وبيننا عشرة عُمر
ربنا مايحرمنيش من طلتكم عليا ... أنا لاحظت أن فيه ناس كتير بتتابع من بعيد لبعيد ... ليا رجاء حار ... ياريت تكتبوا تعليق ولو كلمة تحياتي عشان أعرف أن فيه حد بيدخل ويتابع وبيقري التخاريف بتاعتي
بجد بجد أنتم مدونين مالكومش حل ... فرحتوني ربنا يسعدكم
________________________________________________

تحذير هاااام جداً ... جداً .. عشان قلبي عليكم

.......................................
إلي كل من له زوجة يحبها تفضل تحت رجليه ... تشكره وتبوس في أيديه
وتنادي بأعلي حسها وتقول يامستتني يامهنيني يارافع راسي وسط أصحابي ... يامبغددني ... ياصارف مالك كله عليا ... أوعي تخليها تقري هذا البوست الهدام
أنا قلت أهوه البوست فيه أفكار سامة ...
الحكاية ومافيها إني عملت إضراب ... إضراب بحق وحقيقي ..مش فاساكونيا
.... أصلي قمت بإضراب وحدي ........... أشهد ياتاريخ .. إشهدي ياحكومة
فقد أمتنعت عن القيام بمهامي الأسرية لأجل المطالبة المشروعة في مصروف أيد
وذلك بعد أن قرأت بجريدة الأخبار أنه من حق كل سيدة أن تمتنع عن قضاء مهامها المنزلية من طبخ ومسح وكنس وتربية للأولاد وكذلك مهمتا الحمل والرضاعة ... إذا لم يعطيها زوجها مُرتباً شهرياً خاصاً بها وحدها وأن كل ماتقوم به الزوجة بلوشي يعتبر تبرعاً منها وتكرماً ... وهي غير مُلزمة بعمله بدون إرادتها
وأن الشرع لا يخالفها إذا أمتنعت عن القيام بهذه المهام ..ولا تعتبر عاقة لزوجها في تلك الحالة وان نساء العالم طالبن بهذا الحق
الذي حفظه لنا ديننا الحنيف
وأنا من موقعي هذا أنادي .... المرتب المرتب يانخلي نهاركوا مهبب
وزوجي كان من أنصار أن عمل الزوجة في بيتها يجب أن يتم ورجليها فوق راسها .. وليس من حقها أن تشتكي أو تطالب بأية نقود نظير تأدية هذه الخدمات .. وكنت عندما أطالبه بمصروف يد كان يرد بإستهزاء شديد ... الست لو أخدت ثمن لخدمتها في ببيتها تكون خادمة رسمي ... وأن كرامة الست في خدمة زوجها وأولادها
أنا سكت سنين وسنين ... والبيه مديني الطناش
ومكبر دماغه من ناحيتي ... حاولت أخدها حبة حبة وطلبت منه جنيه في اليوم ... قلت أسحبها واحدة واحدة ... رفض رفضاً قاطعاً
فمبدأ أني آخد مصروف حتي ولو كان رمزي مرفوض جملةً وتفصيلاً
مامته تطالبه بذيادة المصروف يزودها ... الدنيا غليت وفيفي من حقها تاخد تمن تعبها فيه وحمله في بطنها سبعة شهور ... كانت هاتعمل أيه لوماكانتش ولدته بدري ؟ أما الرضاعة فكانت صناعي

وعندي أنا ... أم ولاده ... يكبر الكبيرة ... وصدق أللي قال ... ماضاع حق ورائه مُطالب
و فيفي طالبت بحقها ... فحصلت عليه
وأنا الخوف ماليني ... والقهر مخليني راضية وساكتة ... ومكتوم علي نفسي
يعني مامتك الدنيا ولعت عندها ... وأنا الدنيا واقفة محلك سر عندي
وإللي زاد وغطي إني كنت مقدمة علي شغل وبعد المقابلة الشخصية جاتلي حالة إحباط شديد فقد أكتشفت أن سوقي وقف ولم أعد مطلوبة في سوق العمل يمكن عشان لغتي وشهادتي تعلوهم الصدأ.... وورايا زوج وأولاد ... غير إني لاحظت أن فيه بوادر إستقلال بدأت تظهر علي زوجي ... يعني ممكن يقرر في لحظة طيش إنه يتحرر من قبضتي ويعلن حالة الفرار من جوازنا ... الحكاية دي تكررت كثيراً وقريت عنها علي صفحات الحوادث ... تلاقي الراجل من دول عايش ومبسوط مع زوجته وأول ماربنا يفتح عليه أول حاجة يغيرها في بيته هي زوجة كفاحه ... ورفيقة طريقه وياخد واحدة صغننة تعوض شبابه وتجني معه ثمار كفاحة ... وأم العيال تاخد إستمارة ستة حتي بدون مكافأة نهاية الخدمة
كل الحاجات دي أتجمعت مع بعضها والدنيا أسودت في عينيا ... وقررت أتمسك بحقي في المطالبة بمصروفي الشخصي

قمت عملت الإضراب ... فأضربت عن
مذاكرة الولاد
والطبيخ
والغسيل
والإضراب عملته في الأجازة من الخميس بالليل للسبت الصبح ... عشان الخساير تبقي مقدورة عليها

بقي جوزي ياكبد أمه يذاكر للولد
ويأكله هو وأخوه
وأنا ولا علي بالي .... ميين قال طبعاً علي بالي .. بس خلوها في سركم
لحد ماإبني قال لباباه ... يااااااااع يابابا أكلك وحش أوي

إحنا عاوزين ماما ترجع تطبخ لنا ... أكلك محروق يابابا
والله وطمر فيك شقايا وتعبي ياأبني ياضنايا

مش هاأقولكم حالي كان عامل إذاي ... كنت بأعيط وأنا عاملة الإضراب ده ... وقلبي كان مش مطاوعني .. بس أنا أديته أجازة وسفرته يتعلم من حماتي أصول القساوة .... وأديت الجرين كارد لعقلي يعمل مابداله
الراجل ماإستحملش مني يومين ...هما يومين بالعدد .. هما آه كانوا يومين نكد ... نكد سادة
لكن في آخر اليومين لقيته فرش مائدة المفاوضات .... وبدأ ياخد ويدي ...ويفاصل ويوعد
وطلعت من إضرابي ده بمرتب شهري كمصروف يدي ... أكيد ليس مساوياً لمصروف يد حماتي ... لكن أهوه ماشي وأول الغيث قطرة
وبكرة ربنا يعدلها ويحن جوزي علي سوسو ويديها كل حقوقها المهضومة
مش قلتلكم البوست ده هدام ... بس أدعولي بس أن جوزي مايرجعش في كلامه ويلغي المصروف أحسن أروح فيه في داهية
وآخد فيه تأبيدة
ــــــــــــــــــــــــــــــــــــــــــــــــــــ

هناك 164 تعليقًا:

واحدة مفروسة يقول...

هههههههههههه
ههههههههههههه
و الله جادعه يا سوسو
ان كيدهن عظيم

فعلا الموضوع ده بيضايق جدا بتحسى و انتى بتطلبى الفلوس كانك بتشحتى

طيب ممكن يا خبيره تقوليلى بقى انا ممكن اعمل ايه؟
انا لو فكرت اعمل زيك كده...اولا ماعنديش ولاد ثانيا لو مطبختش..عادى حيروح لمامته ياكل
و لو مغسلتش برضه عادى حتلاقيه نزل اشترىهدوم جديده....
قوليلى اعمل ايه يا اختشى فى حالتى الميؤس منهاديه؟؟؟؟؟

sweetywhisper يقول...

hi soso..
this is my 1st time to write a comment in ur plog...
sorry that i cann`t write in Arabic , am an egyptian wife live in USA so my keyboard contains only englisj letters..
am one of this plog fans and i read all ur posts , but i was trying to find a way to write in arabic but invain..
asl ana kman 3andy fefe zay de we anyal 7abba..

anyway u r talking in this post in a very important issue ..
ana kman ba3any mn nafs el-7aga
3shan ana bardo msh bashta3`al
rabena yehdy el-gamee3

ميرو يقول...

هاي سوسو مبروك على نتيجه الاضراب وربنا يجعلنا كلامنا خفيف على بتوع الاضراب وما يفهموناش غلط اولا خدي بالك لو حماتك عرفت الموضوع ده قبل ما تاخدي المصروف هتعمل عيانة ولازم يتعمل لها كونسلتو وطبعا عشان جوزك ما يديكيش حاجة وشهر يجر شهر والموضوع يتنسي
ثانيا من هنا لميعاد القبض تعملي جدول زمني كل يوم تنقصي يوم ويبقى متعلق قدام جوزك عشان ما يعملش نفسه ناسي وهو بيوزع المرتب ويقولك خليكي للشهر الجاي
ثالثا اول ما تاخدي المصروف ان شاء الله وتعدي كل المعوقات اللي في طريقك تدخلي بيه جمعية على طول مع حد من الجيران عشان لو رجع في كلامه وما اداكيش مصروف تاني شهر تبقى فضيحته بجلاجل قدام الجيران وبالتالي في المنطقة كلها ولو صرفتيه هيقول عليكي مسرفة ومش بتحافظي على فلوسك ويحرمك من المصروف ولو حوشتيه اكيد هيتنزنق اخر الشهر ويستلفه منك وهو بيضحك في سره عليكي
واسألي مجرب يا حبيبتي

Dr-hema يقول...

اهو ده اللى هيبوظ الدنيا

وكلك م فى مركب واحده واللى هتعملى عليه إضراب هيجى على راسك انتى الأول قبل ما يجى عليه

د/هيما

GeHaD يقول...

ههههههههههه
ايه اللي انتي بتعمليه دا ياسوسو انتي بتصدقي كلام الجرايد ولا ايه ؟؟؟
م الاخر يعني انا مش معا ان الزوجه تاخد مصروف من جوزها علشان هي بتكنس وتمسح وتعمل الاكل طيب ماهو ممكن يجيب جاريه من سوق عكاظ ويديها فلوس وانتي تقعدي من غير ما تعملي حاجه
حرام عليكي يا سوسو ارحمي جوزك
ليكي يوم يا سوسو
تحياتي

Desert cat يقول...

ايوا كدجا يا سوسو برافو عليكى
فعلا ما ضاع حق وراءه مطالب
والمفروض بقى اول مرتب قصدى اول مصروف تجيبى هدية للقمر اللى قال لباباه يع يابابا اكلك وحش هههههههههه
لانه كان مساهمة قوية فى نجاح الاضراب

رئـــــيسـة حزب الأحلام يقول...

موضوع جميل كالعادة
واضراب جميل بس ماتضربيش كتير
وربنا معاكى

حماتــــــــــــي ملاااااااااااك يقول...

واحدة مفروسة
===============
أنتي بقي ربنا معاكي
دكني من تحت الترابيزة .. ولو اني كنت باعملها وآجي في الآخر أطلعهم علي الترابيزة ذي الهبلة وأقوله خد أصرف ياحبيبي

حماتــــــــــــي ملاااااااااااك يقول...

sweetywhisper
=====================
ولا يهمك انا بأفهم أنجليزي كويس
انا سعيدة أنك قررتي تكتبيلي وتعرفيني أنك متابعة بوستاتي
موضوع مصروف الأيد للست موضوع مهم جدا وخصوصا مع إنتشار حالات الطلاق
واللي يغيظ ان فيه رجالة مايحلالهاش الطلاق غير بعد مالست تعجز ولا تنول شقة لان فترة الحضانة بتكون خلصت والمؤخر بتاعها بيبقي ذي قلته لأنه بيكون صغير بمقياس السنين اللي عدت
وممكن تكون تعبانة كمان وماتلاقيش تمن العلاج بتاعها
بجد مشكلة كبيرة والمفروض نقلد الأجانب في نظام طلاقهم ... بجد ان الممتلكات تتقسم بالنص هو ده العدل لان الراجل ذي مابيتعب برة البيت الست بتتعب جواه ومع أولاده ... وساعات بيبقي مفروض عليها ماتشتغلش كمان من جانب زوجها
يبقي الستات إللي مابيطبقش عليها الطلاق علي تقسيم الممتلكات لازم تحتاط لأي لحظة غدر وده بأنها تاخد مصروف أيد وتمن لكل ماتقوم به في البيت ... حقها

حماتــــــــــــي ملاااااااااااك يقول...

ميرو
================
شفتي إزاي أحنا بنكمل بعض ودماغنا ماشية في طريق واحد
عندك حق مفروض فعلا أشيل الفلوس بعيد عن أيده وأدخل بيها جمعية لأنه ممكن يتحايل بأي طريقة عشان ياخدهم
وأحنا ياستات قلبنا أبيض وبننسي أو ممكن فعلا يطنش يديهم لي وساعتها أرجع أعمل إضراب تاني ويعني هو هايطلع أحسن من حكومته

حماتــــــــــــي ملاااااااااااك يقول...

Dr-hema
================
أنا عارفة أن كل الرجالة هاتهاجم البوست ده لأن دماغهم هاتكون بتفكر تمام ذي دماغ جوزي ومتوقعة الهجوم
بس للأسف أنا مقتنعة مليون في المية بهدفي من الإضراب ومستعدة أستمر فيه لمدة لا تتخيلها .. ماعلينا الطيب أحسن
هيما أنا عمري مابزعل منك ياهيما وعمري مالغيتلك تعليق .. انت كنت كاتب التعليق في بوست قديم يادكتور

حماتــــــــــــي ملاااااااااااك يقول...

GeHaD
---------------
بص أنا ممكن أكذب الجرايد في حاجات كتير بس بالنسبة للموضوع ده أنا مصدقاها ومقتنعة بيها وعلي فكرة الكلام ده انا كنت بقولخ دايماً بس ماكانش حد بيصدقني وأولهم جوزي
أنا موافقة ياسيدس إني أكون جارية
ماعنديش مانع مادامت الحرة هاتاخد علي دماغها ... يابني الست مننا بتعمل في البيت أكتر من اللي بتقوم بيه الجواري
ونروح للجواري ليه ؟
مانرجع لديننا ونشوف ديننا بيقول أيه ؟
بص انا بحب أدي العيش لخبازه وممكن نسأل حد يكون جدير أنه يفتينا برأي الدين في الموضوع ده ... بس من خلال قراياتي أن الست لو جوزها متيسر فهو ملزم من أنه يجيب لها خدامة ويجيب لها مرضعة كمان أنا بقي عاملة خدامة ومرضعة وكل ده وعايزة أجرتي
تخيل اني مرة كنت هاجيب واحد تساعدني في البيت ولاقيتها أتأخرت قمت وضبت بنفسي البيت وطلبت من جوزي نفس المبلغ اللي كان هايديه للست رفض بحجة اني بأخدم في بيتي ... انا واحدة سبت الدنيا وعشت تحت رجلين زوجي من حقي إني لو أتطردت من بيتي لأي سبب إن كان إني ألاقي حاجة تساعدني علي شيخوختي
وشكراً

حماتــــــــــــي ملاااااااااااك يقول...

Desert cat
===================
ربنا مايحرمه من صراحته .. ربنا يخليه لماما وبابا
ليه الرجالة عاوزين يحرمونا من سعادتنا بمرتب نظير شقانا وتعبنا
انا قبل ماتجوز كنت بأشتغل كان يوم القبض ده بالنسبالي يوم عيد .. كنت بأفرح بيه ذي الطفلة الصغيرة

حماتــــــــــــي ملاااااااااااك يقول...

Baha'i Family - اسرة بهائية
----------------------------
يكفي أن ربة البيت هي اللي بتسهر علي الولاد وهما مرضي ... بجد أنا لو سيبتهم لباباهم كانت هاتبقي مصيبة انا اللي بأصحي وانا اللي بداوي
وانا اللي بأربي
وكل ده مستكترين علينا ياستات ناخد بعض من حقوقنا

حماتــــــــــــي ملاااااااااااك يقول...

رئـــــيسـة حزب الأحلام
=========================
الحمد لله ماأحتاجتش اكتر من يومي أنتي عارفاني بنخ بسرعة

قوس قزح يقول...

انا كنت زيك كده قعدت سنين مكسوفة اخد مصروف و بعد موقف حصل بينا صممت على المصروف
لكن للاسف اول بند بيتاخد لو حاجة حصلت هو مصروفى لانه ده البند الوحيد فى المصاريف اللى مش ضرورى اوى فى نظره

و علشان كده قررت اكتبهم على النوتة علشان كل شوية اقوله انا عايزة منك كذا .. غلاسة مش اكتر هههههههههههههههه

شـمو نشـادر يقول...

طب والنبى انتى سكره ..
وجدعه والله ..
انا معاكى بكل جوارحى ..
لو الشعب كله عمل زيك كده كنا خدنا حقوقنا فى البلد دى من زمااااااان ..
تحياتى ..
أسامة أمين

اهو ده عيبه يقول...

هييييييييه يحيا العدل

اخيرا فى اضراب نجح فى البلد دى

مبروك يا اختشى وعقبال باقى النسوة

امل يقول...

مبرووووك المصروف
بس هيه فيفي خدت خبر
بالموضوع ده والا لسه
خلي بالك ربنا يستر
تحياتي

وينكى يقول...

ههههههههههههه
والله برافو عليكى
اوعى تسكتى على حق من حقوقك
زى ماقلتى بالضبط
اى حاجه تعمليها وبيتعودوا عليها بتعتبر من المسلمات وماحدش بيفكر فى كم التعب والمعاناه اللى بتشوفيها
جدعه يابت
ايوه كده نورونى

مواطن مصري يقول...

وراء كل رجل فقير امرائة

Zika يقول...

لأا بجد البوست ده موتني من الضحك
بجد بوست دمه خفيف
والمدونه هايله ودمها خفيف جدا
تحياتي

حماتــــــــــــي ملاااااااااااك يقول...

قوس قزح
===============
الكسوف ماينفعش بين الراجل وزوجته
وخصوصا في المسائل دي
عارفة لوكنت بأشتغل كنت كبرت دماغي من المسألة دي بس للأسف انا أعتمادي كله علي زوجي .. وحاولت اعمل نوتة ذيك كدة بس مانفعش خااااااااالص
لان اللي بيروح عنده بيتنسي

حماتــــــــــــي ملاااااااااااك يقول...

شـمو نشـادر
----------------
سياسة الإضراب محتاجة النفس الطويل ماينفعش من أول قلم الواحد ينخ

حماتــــــــــــي ملاااااااااااك يقول...

اهو ده عيبه
================
عقبال عندك ياأم فاروووووووووق
لولو لو لو لي

حماتــــــــــــي ملاااااااااااك يقول...

امل
===============
هو انا مجنونة عشان أقولها حاجة ذي دي مش بعيد كانت تحجر علي أبنها إللي وافق يدي مراته مصروف

حماتــــــــــــي ملاااااااااااك يقول...

وينكى
==============
بصي ماهي الغلطة مش غلطة الرجالة الغلطة علي الست اللي بتسمح بحقوقها تتهدر
ربنا يصلح حالنا كلنا يارب

حماتــــــــــــي ملاااااااااااك يقول...

مواطن مصري
===================
يعني هي جات علي مصروفي اللي هايفقره
أهم حاجة تتعلمها مني انك لازم تدي زوجتك مصروف أيديها وخصوصاً لو ماكانتش بتشتغل
ولو هي ست واعية هاتشيلهم لك وصدقني مافيش ست بنت أصول هاتلاقي جوزها مزنوق وتبخل عليه بتحويشة عمرها
ربنا مايجيب زنقة قادر ياكريم

حماتــــــــــــي ملاااااااااااك يقول...

Zika
===============
بص يازيكا لو رجعت للقديم هاتتضحك أكتر


منورني ياجميل

يــوم جــديد يقول...

أنا داخلة بإيدي اليمين أهو والله
بسم الله
يا أهل المدونة يا اللي هنا
هو مفيش حد هنا ولا ايه ؟
سوسو ؟
ازيك يا سوسو
مش ممكن انتي فظيعة
أنا أول مرة أدخل هنا بس قريتها كلها
بجد مش ليكي حل نوهائي
وموضوع الإضراب ده موضوع جامد جدا
أصل مش معقول يعني نبقى شغالين من غير أجرة طول العمر كده
عجبتيني أوي اليومين اللي كبرتي فيهم دماغك دول :)

حماتــــــــــــي ملاااااااااااك يقول...

يــوم جــديد
=================
ماهو الطناش أخرته وحشة ومادام هو مديني الطرشة يبقي أنا بقي لازم أديله الطرشتين ... وربنا يستر وتستمر نتيجة الإضراب ده علي طوووووووول
دعواتك معانا

دكتور بهــدوء يقول...

مش مهم اللي حصل المهم انكوا رجعتوا كويسين تاني وانتي اخدتي المصروف اللي نفسك فيه وهوه م حقك بصراحه
بس هوه اد ايه؟؟؟
وفيفي عرفت
ياتري لو عرفت رايها هيبقي ايه؟؟
ع ما اعتقد ممكن يغمي عليها وتحلف ماهي فايقه الا اما يزيد مصروفها
يا ما يديكيش
وتلاقيها بتقول ماهو فلوسه كتير اهو اومّال مديقها ع امه ليييييييه
وتهانينا لانتصارك ف المعركه ركه ركه

نوسه يقول...

ليه كده ياسوسو تزعلى الراجل وتنكدى على نفسك وبعدين كان ممكن لاقدر الله الحل ميجيبش نتيجه .. كنتى هتعملى ايه بقى لو كان اكتفى ذاتيا يااوختى ؟؟
فى رجاله بتحن للعزوبيه خدى بالك .. يعنى لو سبتيها ال يعنى تفكر مع نفسها وتتحمل مسؤليتها ممكن تستحلى الحكايه بقى
بس الحمدلله الموضوع جاب نتيجه معاكى اهو بس يارب ميرجعش فى كلامه :)
بس بردو جدعه ياسوسو :) اهى دى الستات ولا بلاش :)

mostafarayan يقول...

والله العظيم انتي دمك زي العسل وانامن اول ماقرأت وانا مش قادر امسك نفسي من الضحك بجد اسلوبك حلو قوي
بس اتمني ان نوبةالثورة دي ماتكنش بسبب القصة اللي انتي قرأتيها عندي
علشان جوزك مايتخنقش معايا بعد كدة
تحياتي لأسلوبك الجميل
ملحوظة : ياريت لو تمسحي تعليق اسرة بهائية
انتي تعرفين ان هذه مذهب مخرف وهو مخالف لمذهب اهل السنة المذهب الذي يسير عليه المسلمون في مصر والعالم

aya يقول...

تعيش سوسو
تا تعيش
تا تعيش

براوة عليكى يا اختى
هو ده الكلام
واللى مش عاجبه يطلع من البلد

هههههههه
ربنا يستر عليكى يا بنتى

ADAM يقول...

لا يا ستنا

تيجي عالحما براحتك

تيجي على الرجالة

لأ وألف لأ

احنا عماد الحياة

احنا الأب والزوج والأخ والابن

كل واحد من دول يستاهل إنك تضحي عشانه

اسمحي لي إني أعرض إضرابك

وأطلع في الجايد وأقول ده إضراب فشنك

وادعو الرجالة كلهم

يضربوا عنكم

ونشوف مين اللي هيعيط الأول

احنا صحيح منعرفش نعيش من غيركم

والدنيا من غيركم طعمها زفت

ولونها أسود

بس احنا رجالة هنستحمل

هنحاول نعيش يومين من غيركم

لحد ما تيجوا تعملوا معاهدة فض اشتباكات

وهدنة

وترضخوا لشروطنا لإقامة معاهدة سلام


ها ؟ عرفتوا ؟

احنا مش سهلين

أسلحتنا الاستراتيجية كتير أوي


ومش هتكلم أكتر من كده

انتوا عارفين الباقي



تحياتي لروحك المرحة الجميلة


آدم

3ala asm masr يقول...

والله ميه ميه
جدعه يا سوسو

مدام كعبولة يقول...

معرفش يا سوسو اللي عملتيه صح ولا لأ انا واحدة من الناس لو كنت مكانك كنت انهرت بعد 3 ساعات من الاضراب و ميهنش عليا لا صريخ العيال ولا صريخه


انمااااااااا

لازم كل راجل يعرف ان الكبت بيولد الانفجار و طالما ربنا فتحها عليه و بيبقشش علي فيفي يبقي بيته كمان ليه حقوق زي حقوق فيفي احنا مبنقلش يموت امه ولا يديها الطناش بس زي مربنا وصي علي الام و صي علي الزوجة وزي ما دي ليها حقوق دي كمان ليها حقوق

يبقي طالما مصمم انه يخليها ضرتك يبقي العدل العدل العدل العدل

ليلـــــــــــــــــــــــــــــى يقول...

ازيك يا سوسو؟ :)
بصى يا ستى المشكلة فى القصة دى ان المجتمع بقى هو اللى بيحط القوانين مش الدين و الشرع

يعنى لو سأل واحد صاحبه حيقوله مرتب ايه و بتاع ايه؟ (و خدى بالك للأسف اننا مجتمع بينظر لبعضه و يقلد من غير تفكير)مع ان فعلا من واجباته انه يريح مراته طالما مقتدر

و العدل انه يساعد مراته فى شغل البيت لو هى بتشتغل زيه و بتساعد و لو بجزء بسيط من مرتبها

و احقاقا للحق فى برضه حاجات الدين محللها و المجتمع بيجرمها زى الزواج التانى محدش يقدر ينكر مننا ان مفيش واحدة تقبل ان جوزها يتجوز عليها حتى و ان كان توفرت أسباب للزواج الثانى اللى الاسلام شرعها.
(هو طبعا محدش لاقى فلوس علشان يتجوز أولانى لما حيتجوز تانى) :)))))))

بس أنا حبيت بس أوضح من غير ما ابعد عن الموضوع الأساسى اننا طول ما احنا ماشيين بدماغ المجتمع و التقاليد عمرنا ما نرتاح.

حماتــــــــــــي ملاااااااااااك يقول...

دكتور بهــدوء
==================
أهو أنت أول واحد يقول حقك بصراحة
هنا بالنسبة للرجالة .. الستات كلها تأييد تام
أما عن فيفي طبعا ماعرفتش ولو ان صحبتكم مابيتبلش في بوقها فولة بس انا ماسكة نفسي لانها كانت هاتعمل بالظبط ذي ماأنت قلت ... انتم خلاص عرفتوها أكتر مني
المرتب حاجة رمزية برضه يعني في حدود خمسة في المية من مرتبه انا مادبحتش الراجل خالص

حماتــــــــــــي ملاااااااااااك يقول...

نوسه
==============
انتي عاملة ذيي يانوسة وانا كنت مخطوبة ... يالهوي عليا وعلي رومانسيتي اللي ماتت ... كان لما ييجي يتكلم في اي حاجة عن الماديات اقوله اللي تشوفه هو احنا بين برضه الكلام ده
بس خلي بالك اكتشفت اني كنت غلطانة اكبر غلط

حماتــــــــــــي ملاااااااااااك يقول...

mostafarayan
===================
الإنفجار اللي حصل بعد قرايتي لمقالك كان بعد الانفجار ده ... ماتخافش مش انت السبب .. دي رواسب قديمة

حماتــــــــــــي ملاااااااااااك يقول...

aya
==============
شكرا شكرا شكرا دعونا نعمل في صمت
منورة ياقمراية

حماتــــــــــــي ملاااااااااااك يقول...

ADAM
==============
لا ياعم مش لاعبة ... كل ده عشان بحاول أأمن مستقبلي مع زوجي .. طب انا راضية زمتك فيه راجل في الدنيا ليه أمان ... مافيش وبعدين ماهو احنا لو طلاقنا يبقي زي طلاق الأجانب اللي بيوزع الممتلكات بالنص كنت لا طلبت مصروف ولا دياوله بس الست لما بتتطلق بتترمي في الشارع ياسيدي
ولان القضاء رجالي فمعظم الستات بتتظلم
رأيك علي عيني بس مش مقتنعة بيه
تحياتي

حماتــــــــــــي ملاااااااااااك يقول...

3ala asm masr
=====================
ميرسي ميرسي

حماتــــــــــــي ملاااااااااااك يقول...

مدام كعبولة
===================
وأنا مش عاوزة غير العدل
أنا حالتي كانت وحشة فعلا في اليومين دول سيبك من زعيقه الولاد هما اللي صعبوا عليا

حماتــــــــــــي ملاااااااااااك يقول...

ليلـــــــــــــــــــــــــــــى
==================================
المشكلة ان المجتمع هو اللي بيحط القوانين والمشكلة الأكبر أننا بنعتبر القوانين دي كأنها منزلة من الله وممنوع نخالفها ولو أنها قوانين ظالمة ومحتاجة تتغير

همس الاحباب يقول...

ههههههههه
ليه كده ياسوسو اضراب منزلى شامل
مع ان المدام بتاخد مصروف مضاعف وبرده عاملة اضراب بس الحمد لله همس بتاكل من ايدى اى حاجة وبتقولى حلو يا بابا وتغيظ مامتها هههههه
يعنى انا اعمل اضراب انا كمان وما ادفعش المصروف وخليه اضراب باضراب
بس انا الحمد لله ما عنديش فيفى كفاية عليه المودام بميت سوسو
هههههههه
بس بجد انتى مشكلة ماليهاش حل انتى وفيفى هانم صعبان عليا ابو العيال
تحياتى
خالد

ايوية يقول...

من موقعى هذا اايد واساند اضرابك المشروع

Yahia يقول...

سبحان الله هو مفيش حاجة بتستخبى في البلد دي !!! اصل الموضوع ده قرأت وقولت مش هقوله لمراتي عشان وجع الدماغ على الرغم من انها كويسه ومتعاونه بس انا عرفت الموضوع ده وكنت فاهم ان الواجبات المنزليه دي مطلوبه منها بشكل شرعي او الدين بيقول كده بس لما عرفت ان الاصل في الزواج هو الاستمتاع فقط وان اي حاجة تانيه تتعمل المفروض تكون من خلال خادم واذا كان مفيش مقدره عشان نجيب خادم يبقى نعطيها اجرها ولو مفيش مساحه وامكانيه لاجرها يبقى نحط في عنينا حصوة ملح ونعرف انها متتطوعه للجهد ده. بس ومن ساعتها انا شخصيا غيرت رأي وتعاملي معاها على الرغم من اني كنت بستحمل اي تطنيش منها في مسائل البيت من باب المرونه والتسامح بس دلوقتي بطنش من خلال منظور تاني.

تحياتي

كوارث يقول...

الاضراب الشرع ما بيعترضش عليه ؟
شكلها فتوى أزهرية لشيخ الازهر !
ولا بلاش عشان ميحاكمنيش بتهمة الافساد في الارض
بطلي يا ابلة الافكار المسمومة ده
حرااااااااااام
يعني الشباب مش عارف يتجوز هتخربي بيت المتجوزين كمان :D
وبعدين ايه يعني
الرجالة ييجاو على نفسهم شوية ويغسلوا ويطبخوا يومين
بس لو الوضع استمر فده يهدد بانهيار الجنس الذكوري
انا بطالب بوقفة ضد الاضراب ده
فين أجهزة القمع ؟

بحبك يامصر يقول...

انا عرفت ان اسمك سوسو
ايه الافكار دى ؟ والنبى بلاش احسن افكارك دى تلاقى صدى وتنتشر ويبقى مش الشباب بس اللى مش عارف يتجوز لاء وكمان اللى متجوزيين هيتخرب بيتهم انا بطالب باضراب مضاد للاضراب ده بس هنضرب ازاى؟

ههههههههههه ههههههههههههه
طبعا لو الراجل مقتدر يبقى لازم يوسعها على اهل بيته من غير ما يكون ملزم بمصروف شهرى والكلام ده مش لازم يكون فى صورة مرتب شهرى ملزم بيه الزوج
هو الزوج من نفسه ادام ربنا موسعها عليه يبقى لازم يوسعها على اهل بيته
تحياتى ليكى وبلاش الفكره دى والنبى

monaliza يقول...

برافو ياسوسو

rovy يقول...

والله برافو عليكى يا سوسو
اوعى تفرطى فى حقوقك وان مش بأوقع ولا حاجه انا جايه اهدى النفوس بس مش بطريقة حماتك .
المهم انى عاوزه اقولك ان الراجل لما ربنا يفتح عليه لازم يسعدزوجته اول واحده . بس برضه الست لازم تهتم بنفسها قوى يعنى بكل حاجه شعرك - بشرتك - جسمك - ثقافتك .. كل حاجه .. فاهمه يا سوسو .. انا عارفه انك جادعه و مش محتاجه توصيه .
ربنا يقويكى ..
دمت بخير
تحياتى
rovy

مرجانة يقول...

جميييييييييييييلة اوي يا سوسو
ومبروك وياريت بأة تكشفي راسك و تبرقي وتقولي " الاول " زي امير الانتقام
بس فيه حاجة هي ليه الازواج بتتحول الى كائنات بخيلة بعد الزواج ؟؟؟؟
تحياتي

مرجانة يقول...

جميييييييييييييلة اوي يا سوسو
ومبروك وياريت بأة تكشفي راسك و تبرقي وتقولي " الاول " زي امير الانتقام
بس فيه حاجة هي ليه الازواج بتتحول الى كائنات بخيلة بعد الزواج ؟؟؟؟
تحياتي

Miss. Sosa يقول...

برافون عليكي يا سوسو يااختي قلبي معاكي .. بس اوعى الموضوع يرسى علي جنيه يتيم .. ده مايكفيش باكو لبان .. واحنا بنحرق في اليوم باكوين من غيظنا .. والدوريتوس نجيبه منين ؟! والجالاكسي ؟! .. ماهم لا يبقوا اد مطالبنا الشخصية لا بلاش
الواحدة تعيش ازاي من غير دوريتوس وجالاكسي ولبان .. ديه حاجة تتعب الاعصاب !

على فكرة انا اللي بكتب الاستهلال اللي في اول كل بوست وانا اللي بكتب الاستهبال اللي في نص كل بوست :)

تحيـــاتى

doaa يقول...

اهو دخلنا بايدينا اليمين الحمدلله
انا طبعا متابعة من زمااااااااان
وفرحانة قوي كل ما تنتصري على في في ربنا يهديها
بس المرة دي
الفرحة ما ساعتنيش لانك انتصرتي على ابن في في
اصل الانتصار ده في حد ذاته زي انتصار ام المعارك كدة
المهم
سيبك من هجوم الرجالة
هما لازم يهاجموا خاصة لما الموضوع يمس الجيب
هو مصروف الست مش لانها بتطبخ وتغسل وبتهلك صحتها قبل الاوان علشان خاطر بعلها واولادها
المصروف حق لكل مواطن
زي ما الست اللي بتشتغل زوجها بيشوف ان من حقه انه يعرف شغلها وانها المفروض طالما بتشتغل ما تطلبش لنفسها فلوس
اشمعنى بقى؟؟؟
ولا هو في الاخد على قلبكم زي العسل
ولما تدوها جزء من حقها بقت وحشة واخييييي عليها

كل واحد يدي زوجته مصروف حسب امكانياته
محدش بيقول يزنق نفسه
بس زي ما بيعمل حساب السجائر والقهوة والمشاريب والماتشات يعمل حساب ام العيال الغلبانة اللي بتنحت في الصخر كل يوم
كملي الله يفتح عليك وعلى اضراباتك
ولا يهمك من كلام الرجالة
مدهون بزبدة
النهار يطلع عليه
زي ما انت فاهمة بقى
اختك في الكفاح الزوجي

زيزو الشقى يقول...

كتبت احد موضوعاتى وسوف ترى افكارى

تحياتى

عز

سلاااااااام

ADAM يقول...

السلام عليكم

بقى احنا ملناش أمان ؟

مين حبيب بابا ؟

مين روح بابا ؟

علشان مين بابا بيتعب ميت سنة ؟


مش بابا ده راجل ولا كيس قطن ؟

وظل راجل ولا ظل حيطة

بقى الظل دلوقتي ملوش أمان ؟

آه منكم انتم يا بنات حوا

القضاء بقى للحريم دلوقتي

وانتوا اللي بتخلوا الرجالة تمشي في الشارع تقول

أنا حـسـحـس

وحـسـحـس أنا

تسلم عينك


تحياتي


آدم

مفقوعة مرارتها يقول...

همس الاحباب
=====================
مايصعبش عليك غالي
ماتنساش تسلملس علي خطيبة أبني الأمورة همس

مفقوعة مرارتها يقول...

ايوية
================
مادام أنتي مؤيدة يبقي أنا كدة أستريحت عقبال الرجالة ماتأيدنا

مفقوعة مرارتها يقول...

Yahia
================
أنا بقي جوزي ناصح هو إللي إداني ورقة الجرنان بأيده
ماهو أصلك ماتعرفش لولا الورقة دي كان زماني بينضحك عليا وعمري ماكنت هاأخد حاجة خالص

مفقوعة مرارتها يقول...

كوارث
===================
حاضر ياأستاذ ولو إني كنت هانادي أكتر بحاجات تانية بس يالا عشان خاطرك بس ... هانقفل علي كدة ماتزعلش نفسك الدنيا ماتستهلش

مفقوعة مرارتها يقول...

بحبك يامصر
=================
المشكلة أن الرجالة بتحتاج لحد يفكرها دايما بواجباته ناحية زوجته ... وبعدين المرتب ده كله حسب سعته
يعني اللي مرتبه صغير يدي زوجته مرتب صغير أو ممكن يديها كلمة حلوة تسعدها
مادام مش قادر يديها مرتب يبقي يديها أهتمام ورعاية وممكن مساعدة

مفقوعة مرارتها يقول...

monaliza
===============
كله حسب الشرع يامونمون

مفقوعة مرارتها يقول...

rovy
================
من عينيا .. أنتي بس تؤمري ... ونصايحك علي عيني وعلي راسي

مفقوعة مرارتها يقول...

مرجانة
===============
للأسف الرجالة بتتحول لكائنات بخيلة عاطفياً ومادياً في نفس الوقت ياريتها تيجي علي الفلوس ياأوختي

مفقوعة مرارتها يقول...

Miss. Sosa
=================
بصي أنا معجبة جدا جدا بطريقة الإستهلال بتاعك بجد حكاااااااااية

مفقوعة مرارتها يقول...

doaa
=================
أنا معاكي في كل اللي قلتيه كل حسب سعته
وعموما ربنا يخلي الستات إللي بتأيد ويخلي لنا الرجالة إللي بتعارض

مفقوعة مرارتها يقول...

زيزو الشقى
================
طبعاً جاية يازيزو

مفقوعة مرارتها يقول...

ADAM
=================
ههههههههههههههههههههههههههه
والله أنت عسل بقي راجع مخصوص عشان تغنيلي
صوتك جميل .. وأنا بحب الأغنية دي أوي

سنووايت يقول...

هههههههههههه
مبروووووووووك علي المرتب ايوة كدة ما ضاع حق وراه مطالب
والاضراب نجح اهو , هو ده الكلام
بس هتعملي ايه بقي بالمصروووووف!!!

كلاكيت تانى وتانى يقول...

سوسو انا قريتلك كتير بس فعلا لما شفتك حسيت بالتعب والمرار اللى شفتية عشان تقدرى تكونى بمثل هذة القوة صورتك الرقيقة لا تتناسب مع ما تتعرضين لة من مضايقات والحمد لله ان التدوين ساعدك لتكتشفى طاقتك الكامنة للتغلب ع كل هذا
حبيبتى سعيدة جدااااا بمعرفتك اليوم وكالعادة الازواج مفرقوا الجماعات والوقت الحلو بيخلص بسرعة
اخبار الفيلم اية ..؟؟
تحياتى

سبهللة عالآخر يقول...

يا خيبتك يا سوسو
انتى لسه فاكرة بعد كل السنين دى انك تاخدى حقك
على كدة انا اشطر منك
انا بئى كل فلوس جوزى ايام ماكان معاه فلوس
كلها فى ايدي مش سيطرة منى ولا حاجة لا تفهمى غلط
هو اللى زوق
ومن اول يوم واحنا بنحط فلوسنا على بعض فى الدولاب ونصرف منها وطبعا لما جبت العيال وقعدت فى البيت النظام ما اتغيرش
وهو بئى يحط فلسه فى الدولاب تحت تصرفى
بس تصدقى ولا مرة فكرت انى اخد مصروف ايدى او اجرة اعمالى المنزلية
يمكن لان كل حاجة معايا

Soooo يقول...

الله الله الله

لا بقى .. ان شاء الله لما ربنا يكرمني واتجوز بعد الشر .. مراتي مش هتعتب مدونتك خالص
احنا ماعندناش اضراب ومش عارف ايه
اللي مش عاجبها على بيت العز يابيتنا


ملحوظه
انا بجد سعيد جدا جدا اني اتعرفت عليكي والله
ربنا يكرمك ويسعدك دنيا وآخره يارب



سلامووووووووووز

Om Dodo 7abiby يقول...

هههههههههههههههههه
والله لو كنا فى ظروف غير أيامنا دى كنت طالبت بمصروف إيد ورجل كمان
بس لما البورصة تبقى واقعة
والمرتب والحوافز والعلاوة الـ 30% بيطيروا فى مصاريف البيت وكروت الموبايلات والبس و...و...و...الخ
يبقى الضرب فى الميت حرااااااااااام

ربنا يرزقهم برزقنا
" برزقنا بس يارب لدواعى أمنية بحتة "

--------------
أنا قاعدة أخرج من بلوج وادخل بلوج ألاقيكوا بتتكلموا عن الحفلة
انتوا بتغظونى ولا ايييييييييييه ؟؟؟؟

الله يسامحكم
كان نفسى بجد اكون معاكم

وأشوفكم كده عالطبيعة بالالوان ويا سلام بقى لو كنتى جايبة فيفى معاكى
كنت ههريها ضرب ههههههههههههههههههههههههه
عشان خاطرك بسسسسسسس

ربنا يفرحك دايما يا قمر ويارب يكونلى نصيب واشوفكوا فى مرة من ذات المرارير

دعواتك

دمتى بخير أختى
سالى

زيزو الشقى يقول...

شكرا لكى على متابعتك لمدونتى

بالتوفيق و النجاح

تحياتى لكى

appy يقول...

تعيش سوسو حره مضريه هههههههههه
بس متقوليش اني شجعتك ههههههه
اصل انتى عارفه اللى فيها
وميرسى لوجودك معانا فرق كتير بجد

wanna b a physician يقول...

ههههههههههههههههه
عادى على فكرة تاخد مصروف مش مشكلة
بس على شرط لو بتشتغل وبتقبض اكتر ياخد هو مصروف هههههههههههههههه

بنت مصريه يقول...

بصراحه يا مفقوعه
انا مع جوزك
تاخدى فلوس عشان ترضعى ابنك
ههههههههههههه
يا بنتى بيتك دا مملكتك
حد يتضايق لما ينضف مملكته
انا عارفه انك شويه وهتقومى تضربينى ههههههههههههه
بوست جميل تحياتى

واحدة مفروسة يقول...

خيااااااااانه كده يا مفقوعه يا صحبتى تروحى من غيرى
معلش انا اللى اختفيت يومين
احكيلى بالتفصيل الممل شوفتى مين و مين
و كانت لطيفه اللمه ديه؟
يارتنى كمن موجوده معاكو.....

الجدة فصيحة يقول...

السلام عليكم ورحمة الله وبركاته


موضوع مصروف الأيد للزوجة شيء جميل لكنه لا يجب ان يكون نظير تعبها مع أولادها وبيتها
لأن تعبها مع أولادها وبيتها أولا لها عليه ثواب من ربنا سبحانه وتعالى
ثانيا هي ليس خادمة تأخذ أجر نظير عمل معين
وثالثا وهذا هو المهم الزوجة والأم لا يوجد أجر مادي مهما كان قيمته نقدر نقول انه مقابل او مساوي لما تقوم به

لكن طبعا المرأة في حاجة إلى مصروف شخي لطباتها الشخصية ولا يعقل كلما رغبت في شراء شيء تطلب ثمنه من زوجها كل شوية

تحياتي

أبو خالد يقول...

سعيد أنى تعرفت بحضرتك و رئيسة حزب الأحلام أنتم ناس طيبين و بخير
ربنا يسعدكم و يسعد زوجك كان نفسى
يبقى قليلا معنا و اضح أنه إنسان محترم
و أنتم ناس جميله و فكركن عالى
دمتى مبدعة

همس الاحباب يقول...

ههههههه
وبتقولى مفقوعة مرارتك يا سوسو
طب يا ريت كل الزوجات المفقوعين يبقو طيبيبن ودمهم خفيف زيك كده
سعيد برويتك طبعا يا حماة بنتى يا ملاك هانم ههههههههههه
تحياتى
خالد

اهو ده عيبه يقول...

مفقوعه حبيبتى

سعيده جدا انى اتعرفت عليكى وشفتك وانتى بجد زى العسل واللى بتعمله فيفى فيكى ده حرام

ربنا يخليكى يارب ويسعدك

mayada يقول...

كان هيتفقع ليه مراره واشوفك انت
وابي وفاتيما بجد كان نفسي اشوفكوا قوي
وكنت هرسم لك صوره لحماتك عن ماحد حوش
هههههه ربنا يسعدك ياقمر ويفرحكم

Dr-hema يقول...

اوبز لا كده انا اللى غلطان ومختش بالى سورى


د/هيما

Dr-hema يقول...

بس ليه غيرتى اسمك
؟؟؟

Dr-hema يقول...

سورة مش واخد بالى بس بتهيقلى كان اسمك غير كده

Dr-hema يقول...

ولا انا بهيس.؟؟

funckydoctor يقول...

اه شرعا مش واجب عليكى
لكن عرفا الناس خليته فرض
بس انت مش سهلة يا واخدة حقك يا واكلة دراع جوزك:D

ayman badr يقول...

على فكرة انا جيت ومشفتكيش كان يوم جميل جدا
وبالنسبة للبوست دلوقتى عرفت نسبة الطلاق زادت فى مصر ليه أكيد بيدخلو مدونة حماتى ملاك
ملحوظة: لو فيه نصيب وإن شاء الله ظهر عدد تانى من السلسلة يا ريت تبقى تدورى على واحد امور وزى العسل هتلاقيه اغلب الوقت واقف لوحده اللى هو انا عشان نتعرف اكتر ماشى
تحياتى

المـــفـــــــقــــــــوعـــــة مــرارتـهــا يقول...

سنووايت
==============
محسوبتك غلبانة هاتحوش المصروف قرش فوق القرش ولو لا قدر الله أتزنق أبو العيال في فلوس ولا حاجة هايلاقي نفسه مسنود بيا ... مش بقولك بيضحك عليا

المـــفـــــــقــــــــوعـــــة مــرارتـهــا يقول...

كلاكيت تانى وتانى
==================
اليوم فعلاً كان مالوش حل وأنا كنت فرحانة جداً بمعرفة الكنوز اللي شفتها في الحفلة ويارب نشوف بعض تاني
أما الفيلم فهو ماعجبوش أوي أصله راح يشوف فيلم أنديانا جونز الجزء الجديد ... بس كويس أنه راح سينما عشان أحساسي بالذنب مايموتنيش

المـــفـــــــقــــــــوعـــــة مــرارتـهــا يقول...

سبهللة عالآخر
===================
البركة ياأوختي في كارت الأيه تي أم
مش مخلي الستات تتلايم علي المرتب ذي زمان

المـــفـــــــقــــــــوعـــــة مــرارتـهــا يقول...

Soooo
================
أنا أسعد بمعرفتك ياسو
ماتخافش علي المودام بتاعتك ... أنت بس أعملها وأتجوز وأنا هاأخدها أديها كورسات في الطاعة وحسن السير والسلوك
وإذا كان علي المدونة ياسيدي وأفكارها الهدامة ماتخافش موش أنا بأكتب تنبيه قبليها ... عشان برضه أنتم أخواتي وأنا مش عاوزة أأذيكم برضه

المـــفـــــــقــــــــوعـــــة مــرارتـهــا يقول...

Om Dodo 7abiby
==================
بصي حكاية المصروف دي في حالتي يعتبر ضرورة مش دلع عارفة ليه ... لان زوجي من النوع المسرف بطريقة فظيعة وبيعيش بمبدأ أصرف مافي الجيب يأتيك مافي الغيب
وكذا مرة أكون محوشة وأيله فلوسي بحسن نية وعن طيب خاطر عشان يسدد دين أو يشتري حاجة لازمانا في البيت
فصدقيني المصروف مصلحته أولاً وأديكي شايفة الزمن عمال يجري والغلا بياكل اللي وراه واللي قدامه فلازم الواحد يحرص لبكرة ومادام هو مش عارف يحرص أحرص أنا
ويارب نقدر نشوفك في توقيع العدد التاني ان شاء الله

المـــفـــــــقــــــــوعـــــة مــرارتـهــا يقول...

زيزو الشقى
=================
العفو يازيزو

المـــفـــــــقــــــــوعـــــة مــرارتـهــا يقول...

appy
=================
مابلاش أنتي أحسن ... ده خطيبك شكله مفقوع مني علي الآخر ... أنا أسعد بجد ياآبي ياعسولة

المـــفـــــــقــــــــوعـــــة مــرارتـهــا يقول...

wanna b a physician
==========================
الست لو بنشتغل بيبقي زيتهم في دقيقهموبيصرفوا من جيب مشترك لكن اللي بتبقي قاعدة في البيت بتكون ياعيني عليها مالهاش غير جوزها وبس يصرف عليها

المـــفـــــــقــــــــوعـــــة مــرارتـهــا يقول...

بنت مصريه
==================
ماتخافيش انا هاضربك بالراحة مش هاأعورك .. أثبتي أنتي بس وماتجريش من قدامي .ههههههههههههه
بصي ياجميل أنا ماليش دعوة أنا عاوزة أقبض ذي الموظفين عاااااااااااااا

المـــفـــــــقــــــــوعـــــة مــرارتـهــا يقول...

واحدة مفروسة
====================
ماهو انتي اللي مصممة تلبسي طقية الأخفا وماتجيش .. انا مش قلتلك هاروح ماشبطيش فيا ليه وجيتي
الحفلة كانت روعة بس كانت ناقصاكي
التفاصيل بقي شوفيها عند الصباغ ولو اني ماليش صورة عنده

المـــفـــــــقــــــــوعـــــة مــرارتـهــا يقول...

الجدة فصيحة
===================
انا غلبت معاه افهمه اني عاوزة مصروف لأيدي ... قلت خليه مرتب بقي .. والحقيقة اللي خلاني واقفة علي أرض صلبة وأنا بطالب بالمرتب هو المقالة اللي قريتها في الأخبار وتحليل الشرع لهذه المطالبة

المـــفـــــــقــــــــوعـــــة مــرارتـهــا يقول...

أبو خالد
==================
ربنا يخليك ياعمو .. الحقيقة أني أنا اللي كنت أسعد بمقابلة حضرتك
ويارب تتاح لينا فرصة أننا نشوف حضرتك مرة تانية
تحياتي

المـــفـــــــقــــــــوعـــــة مــرارتـهــا يقول...

همس الاحباب
================
ده بس من زوقك ياخالد
سعيدة بمعرفتك سلملي علي همس خطيبة أبني

المـــفـــــــقــــــــوعـــــة مــرارتـهــا يقول...

اهو ده عيبه
=====================
ربنا يخليكي ليا يارب ومايحرمنيش من وجودك جنبي

المـــفـــــــقــــــــوعـــــة مــرارتـهــا يقول...

mayada
=================
ملحوقة المرة الجاية .. الكتب كتيرة
وانا بقي لما هاشوفك هالزمك بوعدك وناخد لنا اقرب سلم ونقعد نفن سوي
انا عليا الوصف وانتي عليكي الرسم

المـــفـــــــقــــــــوعـــــة مــرارتـهــا يقول...

Dr-hema
=========
ده أسمي القديم ياهيما
ورجعته تاني اصلي لما كنت في حفلة التوقيع الناس كلها عارفاني بمفقوعة
وكل اللي كلمني طلب مني اني ارجع الأسم القديم قمت رجعته
خليها مفقوعة يالا ان شالله ماحد حوش

المـــفـــــــقــــــــوعـــــة مــرارتـهــا يقول...

funckydoctor
====================
ماكلتوش لسة
لما هاكله هاأقول مش هاأخبي حاجة عنكم

المـــفـــــــقــــــــوعـــــة مــرارتـهــا يقول...

ayman badr
==================
بص انا كنت داخلة في البنات وعمالة أسأل أنتم مييييين ؟
بس الرجالة أتكسفت أسأل وبقيت أعرف بالصدفة مين معايا
بس اكيد المرة الجاية هابقي أكثر جرأة
مش أوي بس هاأحاول

Ghada & Rofayda يقول...

خليكي وراه لحد متخدي حقك تالت ومتلت
زي فيفي واكتر شويه

بووووست راااااائع

اول مره ادخل مدونتك بس اكيد مش الاخيره
ان شااااااااءالله

تحياااتي...ودمت بخير

صبرني يارب يقول...

مفقوعه

على فكره انا من كام يوم انا وجوزي دخلنا فى نقاش طويييييييييل يجى 3 ساعات حول الموضوع ده

مش عشان مصروف بصراحه لا انا كنت باخد مصروف زمان بس بطلته ما باعملش به حاجه باجيب له به هدايا فى الاخر ههههههههههههه

بس النقاش كان حول هل فعلا الزوجه مطالبه باعمال البيت شرعا ؟؟؟
وهل من حقها الامتناع وتقول ماليش دعوه يا تعمل معايا يا بلاش ؟؟؟
ولو هى مش مسؤله امال مين مسؤول ؟؟؟

على فكره ياريت يا مفقوعه لو تعرفي تجبيلى المقال الى فىالاخبار ده اشوفه
عشان انا عايزه اعمل بحث فى الموضوع ده من الجانب الشرعي واستنى نتيجته منى بقى .
لان بجد بجد الموضوع ده فى استهبال تام من الرجاله.
خصوصا الى زوجاتهم بيشتغلوا .
تبقى هى بتشتغل وبتجيب فلوس زيه زيها ومع ذلك هى المسؤله عن البيت كليةً!!!!!!!! ليه وعشان ايه ؟؟؟
مش عارفه ايه الاستهبال ده .

ده غير طبعا انه بعد ما يغرقها فى البيت والعيال والشغل ويموتها من التعب والشغل والاجهاد والضغط النفسي

يشكي اهمالها له وانها بقت لوح خشب وانها كمان عقلها بقى كله طبيخ وعيال
ويروح يتجوز بقى غيرها تطري على قلبه بدل لوح الخشب
داته لوح خشب فى دماغه نخلص منه .

لكن حكاية الاضراب دي يا اختي نفسي اعملها .
مش عشان ليا مطالب
لا عشان بس كل يوم الشعب كله يقول ولا يوم من ايام صبرني فى البيت .

فكرت كتير اعملها بس طول ما انا فى البيت هايفشل الاضراب

انتى جدعه يا بت يا سوسو انا عايزه درس يا ابله .
اعملي جمعيه بالمصروف ده يا اختي عشان العربيه الى اتفقنا عليها .

L0vElYGh0sT14 يقول...

يامبغددني!؟؟؟ ثواني افتح جوجل :(
......
.....
..
.
وووووااااااااااااء
وبعد بحث وعناء طويل لما ابحث عن شيء معناه "مبغددني" او شيء من هذا القبيل فهل لي بأن أعلم بمعنى هذه الكلمة؟ يعني ان شاء الله لما مراتي تيجي وتقولي يا مبغددني افتكر دي شتيمة ولا حب واغراء وشوية شوية نحب ببعض
....
ولا اية؟؟؟؟؟؟

la3lahakhier يقول...

هههههههههه
مش هدام اوى يعنى
الا هى بتاخده تحطه فى جيبها ولا بتاكل بيه اهلها
ربنا يصلح حالنا

حنين القلب يقول...

والله يا مفقوعه انا عمرى ما فكرت فى حمايه المرتب ده
وحتى لو فكرت وعملت اضراب زيك برضه مش هاخد حاجه جوزى بيدينى المرتب كله ويقولى قضى نفسك ووحياتك بكمل الباقى من معايا
يعنى مستحيل هطلع منه بحاجه
وبصراحه الست لما تشتغل احسن بكتير من قعدتها فى البيت على الاقل بتبقى ماسكه زمام الامور لو عايزة حاجه بتجبها يعنى بتخفف عنه شويه برضه
المهم انك اخدتى المصروف والحمد لله وربنا يخليه ليكى ويسعد ايامك زى ما بتسعدينا
ابقى نورينى ماشى
سلام

حنين القلب يقول...

والله يا مفقوعه انا عمرى ما فكرت فى حمايه المرتب ده
وحتى لو فكرت وعملت اضراب زيك برضه مش هاخد حاجه جوزى بيدينى المرتب كله ويقولى قضى نفسك ووحياتك بكمل الباقى من معايا
يعنى مستحيل هطلع منه بحاجه
وبصراحه الست لما تشتغل احسن بكتير من قعدتها فى البيت على الاقل بتبقى ماسكه زمام الامور لو عايزة حاجه بتجبها يعنى بتخفف عنه شويه برضه
المهم انك اخدتى المصروف والحمد لله وربنا يخليه ليكى ويسعد ايامك زى ما بتسعدينا
ابقى نورينى ماشى
سلام

سجدة يقول...

h

سجدة يقول...

انا كمان شوفتك هناك وفرحت بيكى اوى
دى اول مرة اعلق عندك برغم انى بقرأ لك كل يوم
وبحبك اوى

Diyaa' يقول...

كنت هناك
خسارة بجد ما شفتكيش :(
الدوشة والحر والتنظيم المتواضع أوي
خلوني مش مركز أعرف حد خالص
بس أتمني المرة الجاية يكون في ساقية الصاوي مثلاً
والبوست كالعادة
زي العسل
مش ممكن عليكي بجد 8-)
تحياتي

Eno يقول...

هههههههههههههههههههههههه
العنون حلوووو اووووووووووي
والله انتي عليكي افكار تودي في داهيه بس زي العسل برضه متحوليش

ربنا يخليلك الاولاد اللي واخدلك حقك وهما مش واخدين بالهم :))

تحياتي ليكي :)

Sampateek يقول...

شطوووورة عقبال ما الحكومة تفرش مفرش المفاوضات هي كمان

مبروك المصروف حتعزمينا على اية بقى حلاوة الاضراب؟
تحياتي

Dr-hema يقول...

لا ...بدل انتى راكبة دماغك فى الإضراب ده
انا كاتب مقال اسمه فلتكن مانعة صواعق والمقال ده مش هنزله إلا كمان شهر أو شهر ونص لإن فيه بوستات كتيرة قبله
وفكرة المقال عشان محرقوش لازم يكون فيه نوع من التضحية تخلى المركبة تمشى وخليكى ما نعة صواعق فى البيت تحاولى تهدى الامور كده وتمتصى شحنات الغضب والمشاكل فى البيت بذكائك
واحنا عايشين فى ايام ما يعلمبها إلا ربنا وميعرفش نعمة االجواز والخلفة إلا العُزاب والشباب اللى هيطق وانتى احمدى ربنا
والمفروض لما زوجك يجى من الشغل بتهديه وتأكليه وتشربيه وتحسسيه بالحنان وتحاولى تمتصى وتخرجى شحنة القرف اللى بيمتصها طول اليوم فى الشغل او خارج المنزل
وتسأليه وتناغشيه وطبعاً مش هقولك على الحاجات دى
وتحاولى تحسسيه ان انتى معاه وواقفة معاه
وان الغضب والإضراب اللى انتى فيه ده من الشيطان اللى عايز يدمر الأسرة
وعايز يطلع أولادك شخصيتهم ناقصة وصدقينى دا عن خبرة وعن دراسة برضه يا ما الواحد بيشوف والله حاجات ربنا يسترها علينا

واهدى كده وشاورى نافسك يا إما هيروح لغيرك وادينى بحذرك لان هيلاقيكى مش معبراه هيطير والعوانس كتير

خافى على جوزك وقبل جوزك ولادك وبيتك وقد اعذر من انذر

ودا مش تحيزا مع الرجل زى ما حضرتك بتقولى ولو انا ست عاقلة كنت قلتلك كده برده

وطبعاً أكيد انتى عارفة الكلام ده بس انا بذكرك بس فإن الذكرى تنفع المؤمنين

وربنا يسعدك

د/هيما

المـــفـــــــقــــــــوعـــــة مــرارتـهــا يقول...

Ghada & Rofayda
=====================
ماضاع حق ورائه مطالب
تحياتي

المـــفـــــــقــــــــوعـــــة مــرارتـهــا يقول...

صبرني يارب
===================
المقال كان منشور في جريدة الأخبار من أكتر من شهر ... بس هو أتحفر في ذهني وساب علامة
بصي انا عاوزاكي تعملي بحث في الموضوع ده وتناقشيه ياريت .. لأنه بجد موضوع مهم جداً
حاضر بس انا باحوش من غير جمعية
وأديني هاأوفر عليه تمن عربية ليا
هو اه برضه منه بس اهي حاجات بسيطة مش بيحس بيها لما تتجمع هاتعمل حاجات كبيرة
وعلي رأي المثل عيش نملة تاكل سكر عيش فيل تاكل نجيل

المـــفـــــــقــــــــوعـــــة مــرارتـهــا يقول...

L0vElYGh0sT14
======================
بقي بجد مش عارف يعني ايه بغددني لا بقي .....ز انت كدة عاوز حقنة لغة في الوريد ...... ماتخافش مابتوجعش
بص بغددني جاية من بغددة يعني ببساطة يامهنيني
لا ماتخافش ماهياش شيتيمة خالص
دي حاجة حلوة

المـــفـــــــقــــــــوعـــــة مــرارتـهــا يقول...

la3lahakhier
===================
اول واحد بيستفيد من المصروف ده هو الزوج علي فكرة لانه لو احتاجه بيلاقيه

المـــفـــــــقــــــــوعـــــة مــرارتـهــا يقول...

حنين القلب
================
أخدته بس هايقل شوية عشان كان داخل فيه تمن مذاكرة الولد .... وأحنا في عطلة دلوقتي

المـــفـــــــقــــــــوعـــــة مــرارتـهــا يقول...

سجدة
====================
كان يوم جميل ماتوقعتش العدد ده يكون هناك ........ سعيد اني شفتكم كلكم

المـــفـــــــقــــــــوعـــــة مــرارتـهــا يقول...

Diyaa
==============
ماعلهش ياضياء تتعوض المرة الجاية
بس نبقي ننسق مع بعض كلنا عشان نبقي عارفين مين اللي رايح

المـــفـــــــقــــــــوعـــــة مــرارتـهــا يقول...

Eno
=================
بصي ياحبيبتي عشان تخلي بالك الإضراب ده ماحصلش غير بعد تمن سنين جواز يعني في الأول ماينفعش الواحد يعمل حاجة ذي كدة ........ صعوبات البدايات بتبقي مش ناقصة كمان مصروف للست ... بس لما ربنا بيفرجها الواحد ممكن يتكلم بقلب جامد شوية
وربنا يسعدك يارب

المـــفـــــــقــــــــوعـــــة مــرارتـهــا يقول...

Sampateek
==================
هااعزمكم علي شيكولاتة أفتراضية
انا بعد اللي شفته في الحفلة اقدر اقولك انه ولا الف مصروف يجيب شيكولاتة حقيقية للجمع الغفير ده كله

المـــفـــــــقــــــــوعـــــة مــرارتـهــا يقول...

Dr-hema
==================
انت لو معاك فلوس ومراتك طلبت منك مصروف او مرتب هاترفض ؟؟؟؟؟
خلي بالك اني متجوزة بقالي تمن سنين .. منهم خمسة مقضياهم من غير حتي مصروف بيت للبيت كله وكان جوزي هو اللي بيشتري كل حاجة ... وانا ممنوع عني المصروف.... الصراحة الراجل كريم ومايتوصاش في الصرف .. لحد مابدأ زوجي يفكر اني انا معايا أطفال وممكن لا قدر الله يحصل حاجة واحتاج يكون معايا فلوس فبدأ يديني مصروف بيت .... علي فكرة المصروف اللي باخده حاجة رمزية
يعني لو كنت باخد مصروف من زمان كان زماني علي الاقل طلعت عمرة مع جوزي اللي طلع لوحده من كام سنه ومارضيش ياخدني معاه بحجة ان الفلوس هاتعجز معاه
فيه حاجات كتير ممكن الواحد يعملها بالمصروف ده غير انه هايديني شعور بالأمان
انا مابقولش ان الست مفروض من وهما لسة في البداية ومفلسين تجري تطالب بمصروف ايد ........ اللي مايشوفش من الغربال يبقي أعمي
كل واحدة زكية وتعرف هي ممكن تطالب بمصروف ولا لأة ... وأمتي تطالب بيه ...

تحياتي ... وماتزعلش نفسك

Foxology يقول...

والله الأضراب نجح .. كان نفسى الأضرابين اياهم يبقو زى اضرابك بس والله برافو عليكى

مبروك المرتب الشهرى عقبالنا يارب :))

دعاء مواجهات يقول...

إزيك ياسوسو ياعسولة

انا كمان كان نفسى اوى اكون معاكو

بس مش عارفة انضم ازاى للجزء التانى من الكتاب؟؟

قوليلى علشان عاوزة اكون معااكو

مستنيااااكى تنورينى وتردى عليا وعزماكى ع عصير فريش ف البوفية

اصلى خلاااص افتتحتة من يومين

واى حد يحب يفرفش وينعنش يتفضل

كلو ع حسااب مواجهاات..

سلااااام ياقمر

mohamed يقول...

هههههههههههههههههههه ياه كل ده و شايله في ألبك ربنه معاكي

HERO يقول...

يعني خدتي كام في الاخر ؟؟ مهو ممكن ببساطة يزود الضرائب عليكي علشان يعوض ال 30 %
بس برافو عليكي عرفتي تاخدي حقوقك كويس كل weekend اعملي اضراب بقى وربنا يسهلك

تحياتي

drpharma يقول...

الف سلامه علي المراره

Dr-hema يقول...

براحتك

د/هيما

قوس قزح يقول...

سوسو
متتخيلش انا سعيدة ازاى انى اتعرفت عليكى
يا جماعة من موقعى هذا
احب اقولكم ان :


سوسو دى طيبة اوى اوى اوى اوى
و زى القمر

و حرام يا فيفى بقى خفى عن البونية دى شكلها غلبانة وهادية

لازم يا سوسو نتقابل تانى

كلاكيت تانى وتانى يقول...

يا سوسو انتى تجننى يابنتى كل الرقة دى يارب يطلع منها كل دة دانتى عصفورة بترفرف فالهوا كلمتك دقيقتين فرحتى قلبى بجد يارب سعيدة وقادرة تاخدى حقك دايما انا هحط البوست اللى قلتلك علية برغم انى كنت هحط شوية نكد بس خليها الاول تحديث لأنة موضة الايام دى
تحديث
انتى المفروض تدى نصايح زوجية تودى اللومان لا عش الزوجيةههههههه
اول اضراب منزلى لازم تفتكرى التاريخ دة كويس قوى دة سبق صحفى
تحياتى

karim يقول...

ممممممم صعب على اى زوج موضوع الاضراب المنزلى ده....
انتى بئا كمدونه اسلوبك حلو اوى و دمك خفيف....تحياتى
اتمنى تزورى مدونتى يهمنى رأيك.

HARD TIMES يقول...

طيب هي المرأة تعرف تعيش من غير الرجل اذاي حتي لو عملت ميت اضراب ههههههه
لو انتي عارفتي كويس تقدري تخدي منه عنيه مش مصروف شخصي وبس
حرام عليكم بقي هتبقوا انتم والزمن براحه شويه هههههههههههه
تحياتي لكي علي كلامك الجميل

المـــفـــــــقــــــــوعـــــة مــرارتـهــا يقول...

Foxology
===================
بكرة كله يبقي تمام وإضرابات الشعب تجيب نتيجة ذي إضرابي

المـــفـــــــقــــــــوعـــــة مــرارتـهــا يقول...

دعاء مواجهات
=====================
أنتي فاكرة أن كلنا نزلنا بوستات في الكتاب
انا مانزليش حاجة خالص ومعظمن مانزلناش حاجة لسة

بس كلنا روحنا الحفلة .. كله من أحمد الصباغ عملنا دعوة كلنا... التفاصيل كلها عنده

المـــفـــــــقــــــــوعـــــة مــرارتـهــا يقول...

mohamed
=================
عادي اللي يعيش ياما يشوف

المـــفـــــــقــــــــوعـــــة مــرارتـهــا يقول...

HERO
-----------------
ماينفعش اضراب كل اسبوع يبقي كدة الإضراب فقد معناه ..... مش هاأغلط غلطة الشعب

المـــفـــــــقــــــــوعـــــة مــرارتـهــا يقول...

drpharma
====================
الله يسلمك ومانجيلكوش في حاجة وحشة

المـــفـــــــقــــــــوعـــــة مــرارتـهــا يقول...

drpharma
====================
الله يسلمك ومانجيلكوش في حاجة وحشة

المـــفـــــــقــــــــوعـــــة مــرارتـهــا يقول...

Dr-hema
=================
أوعي تكون زعلت مني .. انا مااقدرش علي زعلك

المـــفـــــــقــــــــوعـــــة مــرارتـهــا يقول...

قوس قزح
=================
أخجلتيني ..ده بس من زوقك

أيوة كدة وصيها عليا أحسن مافيش فايدة خااااالص

المـــفـــــــقــــــــوعـــــة مــرارتـهــا يقول...

كلاكيت تانى وتانى
======================
أنا هاروح جري أسجله في الشهر العقاري بأسم إضراب سوسو

المـــفـــــــقــــــــوعـــــة مــرارتـهــا يقول...

karim
==================
ربنا يبارك فيه
بس كدة طيران علي مدونتك

المـــفـــــــقــــــــوعـــــة مــرارتـهــا يقول...

HARD TIMES
-------------
يعني انت رأيك كدة ... خلاص مش عاملة إضراب تاني ... ربنا مايحوجنا للإضرابات وأيامها ربنا مايوريك

حبيبـــــــة القمـــــر يقول...

على فكرة انا باجي كتير وربنا وشكلي بتوووووه شويتين وبفطس تلات شويات من الضحك
واخيرا بنسى اني اعلق
عايزة الضرب مش كده هههههههه

لفت نظري جدا الموضوع دا وناس كتير تناولته بالنقاش من غير ماتطبقه في بيتها
افتكر انه مش هين ومهم اوي ان الواحده في بيتها تحس انها المكله فيه مش بتخدم وتستني اجر
انا متأكده ان ناس كتير هتفكر في الموضع غلط وهتحاول تطبقه بشكل غلط بردو

بس حقيقي احيكي على اسلوبك اللي يجنن دا

المـــفـــــــقــــــــوعـــــة مــرارتـهــا يقول...

حبيبـــــــة القمـــــر
================================
يافرحتي بنفسي وانا عايشة ملكة وفي آخر العمر تيجي للراجل هفة ويبدأ يدور علي شبابه ويرميني في الشارع
بتحصل ولا لأة ؟؟؟؟؟؟؟؟؟؟؟؟؟
بتحصل كتير
الواحدة لازم تحاول بهدوء وبالراحة مش لازم الخناق من اولها مانفعش تعمل اضراب
علي فكرة ده احسن من الخناق
تنوريني في اي وقت
واشكرك علي متابعتك الغالية

الشنكوتي الكبير يقول...

في دنيتنا دي معرفش ليه محدش بيقرر يدفع اللي عليه من نفسه
لازم نزعل من بعض ونتخانق وناخد مواقف سخيفه قوي علشان الطرف التاني يقتنع انه عليه واجبات لازم يأديها
وكأن مساله المناقشه والأقناع متنفعش تقنعي البني ادم ينكر ويستهبل ويرفض مهما زنقتيه بالمنطق لكن تزنقيه بالضغط والأرهاب يحترم نفسه
حاجه بقت تخنق بجد
عموما ربنا يسعد ايامك

سلاااااااااااااااااااااام

المـــفـــــــقــــــــوعـــــة مــرارتـهــا يقول...

بلدنا كلها ماشية كدة بمدأ الأستهبال
مادام مابتطالبش بحق من حقوقك يبقي تتحرم منه .. للأسف لازم الواحد يسعي عشان ياخد أبسط حقوقه
ميرسي علي زيارتك الغالية

سارة يقول...

هههههههههههههههههههه
هههههههههههههههههههه

راجل من دهر راجل

المـــفـــــــقــــــــوعـــــة مــرارتـهــا يقول...

سارة
==================
ماتخافيش عليا ده أنا ساعات أعجبك

ayar يقول...

ايوة كدا خليكى قوية .. لا دا المفروض كل الستات تقرا البوست دا ياسوسو وتتعلم .. اينعم الرجالة هايكرهوكى .. لكن الستات هاتحبك اوىىىى ههههههههههه

المـــفـــــــقــــــــوعـــــة مــرارتـهــا يقول...

ayar
===============
اللي كان كان وكرهوني وفيه ناس قاطعتني كمان
ماانا كنت ساكتة كان لازم احكي عن التجربة دي ؟

ranim يقول...

هيءهيءهيءهيء متفكرنيش يا سوسوكل ما افتكر اني مش رحت بيجلي احباط هيء هيء


هههههههه يا جامدة يا سوسو تحيا سوسو حره مستقلة سوسو هوهو سوسو هوهو ايه بسالحلو دي اضراب مره واحده بس يعيني علي ولادك اكيد راحوا لدكتور عليشان الأكل المحروق انتي المره الجايو تديلوا دروس في الطبخ علشان الأضراب الجي الولاد ميكلوش محروق هههههههههههه



تحياتي مبتسمة دائما

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
شات صوتي
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه