الثلاثاء، 3 يونيو، 2008

النصائح السوسية للتعامل مع الحما النكدية



أكيد هاتقولولي بلاش أنتي ياست سوسو تدي نصايح ... لأن فاقد الشيء لا يعطيه وأنتي لا مؤخذة واحدة أخدت علي قفاها من حماتها لحد ماقالت يابس .. بس أنا شايفة نفسي من الأبطال لأني تحملت وتحملت ومازلت علي زمة زوجي برغم مالاقيته ... ثمان سنوات بحالهم كل سنة تنطح سنة ... واحدة غيري كان زمانها في أحد الأماكن التالية
بيت أبوها واللقب مطلقة
أو العباسية واللقب مجنونة
أو سجن النسا واللقب قاتلة حماتها
ولكني مازلت صامدة ... آه بأشتكي لطوب الأرض وظلطها ... لكني صامدة ... حد يقدر ينكر كدة ؟
عشان كدة خدوا عندكم الخلاصة
حماتك نكدية ... ماتزعليش نفسك .. أمسحي دموعك يادلعدي وتعالي أقري النصايح دي
ـــ لا تخبريها عن نيتكم في الخروج لأي مكان .... خليكي في حالك أحسن وحطيها حلقة مصدية في ودانك ... حماتك هاتشبط وحتي لو كانت عاقلة ومش وش شبط هاتلاقيها بتقول في نفسها .. حسرة عليا في الفرح منسية وفي الحزن مدعية ... وهاتشيل من أبنها ومنك

ـــ لا تلبسي أمامها الجديد ... ماله القديم وياحبذا هالبتا تلبسي مقطع ... أبعدي عن الشر وغنيله ... خليكي قي السليم بدل ماتلاقي نفسك متأشطة أو مش بعيد تطلب من أبنها بطريقة ذكية أن تشتري مثلك

ـــ لا تخبريها عن مرضك وإلا ستركبها أمراض الدنيا وهاتدوخكم السبع دوخات علي الدكاترة لتثبت مرضها .. وفي الآخر هاتطلع صبية ... ماهو جيل متأسس ياأمٌا
ـــــ لا تخبريها عن حقيقة مرتب زوجك ... هاتطلب تنصص معاكم حتي لو مش محتاجة ... البحر يحب الزيادة
ـــ إذا كنتي حامل .. إياكي ثم إياكي أن تخبريها عن تفاصيل زيارتك للطبيب ... وغلطة عمرك هاتبقي كبيرة لوأتجننتي وقلتي آخدها معايا تشوف البيبي في السونار ... بكرة يشرف الدنيا وأبقي قابليني لو حتي شالته مرة في أيديها

ـ لا تشتري لها هدايا في أي وقت .. مالها الفلوس ... أديها ماتحرميهاش أقفلي عليها أي حجة للخلاف بينك وبينها

ـــ لا تصطحبوها معكم لأي محال من محلات الطعام المشهورة
ياإما هاتفتكر أنكم مقضينها تيك أواي طول عمركم .... ياإما هاتبقي عادة عندها وهاتحتاج ميزانية جديدة وجوزك اللي هايكع

ـــ حتي لا تفترسك الأمراض ويركبك العصبي ... حطي في دماغك يابنت الناس أن رأيها صح لا يحتمل الغلط وأن رأيك غلط لا يحتمل الصواب ... الجدال في حالتك دي مامنوش فايدة عامليها كالطفل الصغير وماتنسيش أنك بكرة هاتبقي نسخة منها جايز علي أعقل بس برضه النسخة واردة الحدوث

ـــ لا تخبريها بتوصياتك عليها عند أبنها ليهتم بها ... حتي لا تصبحين الوسيط الرسمي بينهم .. هما أهل في بعض كلمتك أنتي إللي هاتقف في الزور ... وإن رفضتي الوساطة بينهم في يوم من الأيام ستعتبرك حماتك المحرضة الأولي علي العصيان ... أعقلي وماتحطيش نفسك في وش المدفع خليكي ناصحة
ـــــ غيري الموضوع عندما تخبرك عن موبايلها الذي تغيره في السنة خمس مرات وهي مع ذلك تجهل كيفية التعامل مع هذا الجهاز
الواحدة مننا مش ناقصة فقعة
ـــــ أحذري أن تنبهيها بأنك أكتشفتي كذبها ... حتي لو قالت أنها بنت الملك فاروق بذات نفسه ... هاتخسري أيه ؟ ده أنتي حتي هاتطلعي مناسبة بنت ملوك

وإن كان ولا بد فهميها أنك صاحيالها .. بس وأنتي بتضحكي حتي لو ضحكة صفرا .. أهي ضحكة والسلام

ـــ لا تتقدمي بالشكوي لزوجك ... هايعمل أيه ؟ أمه ومايقدرش يغيرها لكن خلي بالك ممكن يغيرك أنتي وعمره ماهايطلعها غلطانة حتي لو غرقانة في الغلط

ـــ لا تسأليها عن حالتها المادية هاتفرسك وهاتقعد تشتكي من أن أكل القطط بقي غالي نار ومش بعيد تصعب عليكي قطتها وتطلعي من جيبك عشانها


ـــ إذا سألتك في يوم أنتم طابخين أيه النهاردة قوليلها عدس ... طووووول السنة عدس ... نباتيين حد شريكك

ــــ عندما تحن عليكي وتعطيكي وصفة من وصفات الطعام ... خديها منها بحذر شديد وحرصي منها وماتخونيش

ـــ لا تفتحي ثلاجتها بدون إذنها حتي لا تقول مالكم ومال تلاجتي أنتم جايين تفتشوها ؟!

ـــ لو فاض بيكي يابنت الناس ... أعملي عيانة كل مازوجك يقرر يزورها زيارة جماعية ... وعلي رأي المثل من حبنا حبناه وصار متاعنا متاعه .. ومن كرهنا كرهناه ويحرم علينا أجتماعه

أما بقي لو كنتي عايشة مع حماتك إللي هي نسخة من فيفي ... في بيت واحد فياريت تعملي نصايح جديدة لأن النصايح دي هاتفقد صلاحيتها عند حضرتك وربنا يعينك

ـــ وأخيراً لا تعطيها الفرصة لكي تخرب عليكي بيتك فهو ده عين المني بالنسبالها ... خليكي قاعدة علي قلبها وقلب أبنها ... وعلي رأي المثل بتاعي ... شكشكوني بميت دبوس غير بيت جوزي مش راح أدوس
خلصت النصايح وإللي يحب يضيف حاجة من حقه يضيف

لسة التقيل جاي بعد كدة أبقوا تعالوا زورونا

هناك 121 تعليقًا:

emmy يقول...

يا سوسو كده مش حلو اديني بارقه امل اكمل الخطوبه هوة كتر خيرك علي النصايح بس مش كده
عموما يا اختي انا بدعيليك يهدي فيفي و يبعدها عن دماغك او جوزها ياخدها عندو وترتاحي

متبقيش تتاخري يابطه علينا

إنـســـانـة يقول...

يا ساتر يارب

ارحمينى بقا يا سوسو عشان اعرف اكمل فى الخطوبة زى ما إيمى بتقول

اتقوا الله فينا يا معشر المتزوجووووووووووون

:D

Doba يقول...

اولا: ازيك يا سوسو يا عسل
ثانيا: انا بموت فى مدونتك جدا وبوست بوست متابعاه بس باجى بلاقى فوق الميه فبمشى باحترامى

بس انا كان فى نفسى حاجة وكنت عاوزة اقولها - انتى من اهم الناس اللى قدرت تخلينى اغير طريقة تعاملى مع حماتى لانها ملاك بالنسبة لفيفى - بمعنى اصح خلتينى اتأقلم مع انها ليها عيوب لازم احترمها ومميزات لازم امدحها علشان الدنيا تستقيم حالها وعلشان جوزى يكون راضى

لذا لزم التنويه عن ان سوسو مرات ابن فيفى هيه السبب فى ان هبة غيرت من آرائها وتفكيرها ولزم الشكر الشيدي والطعاء لكى بكل الخير

ربنا يهديكى ليها ويهديهالك ويرضى جوزك دايما بحسن معاشرتك له

مامتى بتسلم عليكى لانى حكيتلها عنك وكانت مبسوطة قوى باللى بتكتبيه

دمك شربات وبشكل او بآخر انتى بتعلمى كل اللى بيدخل هنا فاوعى تقفلى المدونة - انتى عاملة قيمة حلوة قوى بين اللى بييجو يزوروكى

دمتى بكل الحب
هبة

Tamer Nabil يقول...

ياعينى على النصايح الجنان

كل البنات المتزوجة هتقوم بيها بس ياترى الوصفى دى تنفع على طول الخط ولاممكن لا.؟

ربنا يهدى ويوفق كل بنت وحماتها


تحياتى

appy يقول...

لا نصايح هايله بجد يعنى ربنا يستر خالص عصرتى مخك وطلعتى لنا بكل ده ربنا يستر عليا

Sally يقول...

ههههههههههه
والله يا سوسو وطلعتى من فيفى بحاجة مفيدة
اديتك خبرة ونصايح تملى كتب
المفروض بقا تستفيدى منها باكبر قدر وتنشرى كتاب بجد تبقى قنبلة حمواتية قاتلة
ربنا يعينك ويهديكوا لبعض

تعالى بقا شوفى عايش واديله كام نصيحة من بتوعك لحسن فى مشكلة كبيرة وحالته تصعب عالكافر
http://7agat-gowaya.blogspot.com/

دمتى مبدعة يا سحورررررررة
على فكرة اختى اسمها سحر وغلاوتك عندى زيها بالضبط يا قمر

سلاموززززززززز

فاتيما يقول...

إيه يا ماما حقل الألغام اللى إنتى عايشة جواه ده؟؟
الحمدلله إنى إتطلقت قبل حماتى - سابقاً - ما تعمل فيا حاجة ...
أنا عارفة مكانى كان هيبقى فين ؟؟؟
لاااااااااا
موش أنا يا ماما اللى أروح العباسية لااااااااا
عنبر القاتلات فى القناطر طبعاً
بس عشان أنا بنت ناس طيبين ربنا كرمنىو رجعنى بيت أبويا
و حماتك دى بقى هاااا
و لا بلاش
الطيب احسن

حبيبـــــــة القمـــــر يقول...

الله عالقعل والفطنه والكياسه
ايه الحلاوة دي ياسوسو

تصدقي بقى شوية نصايح ذريه وميه ميه
بس الشاطرة اللي تنفذها انا بسجلهم يمكن الواحد يحتاجهم ولا حاجه
محدش ضامن حماته تبقى عامله ازاي

تحياتي لقلمك اللي يجننننننننننن ياقمرى

د/أبويحيى وادم يقول...

السلام عليكم ورحمه الله وبركاته
الوصايا الفنية للحياه مع الحماه عيشه هنية
ربنا يكرمك يارب عجبنى اوى موضوع انك تعطيها فلوس فى ايدها وهى تشترى ما تريد بيريح كثير اوى هذا الموضوع
اما بخصوص الباقى فمع حماتك دى ماشاء الله وصايا مجبرة وفعاله اكيد
بس الحمد لله مش هحتاج لها ابدا أن شاء الله ربنا يحفظنا
والسلام عليكم

عبده الرايق يقول...

يابنتى انا متهيائلى فيفى مستعده تدخل برجليها الاصلاحيه بس تسيبيها فى حالها
وعلى فكره
اللى تاخد حماتها معاها للسونار
تبقى فعلا عايزه ضرب النار

HERO يقول...

يعيني يعني كل النصايح دي وهي مش قاعدة معاكوا امال لو قاعدة معاكوا
بجد ربنا يكون في عونك
انا عارف نظام الحموات ده من ماري منيب ههههههه
بس برضه في حموات طيبين اكيد

تحياتي

قوس قزح يقول...

طيب تصدقى بقى ان انت اكتر واحدة خبرة و تقدرى تنصحينا

بس كل ده حصل فيكى ؟؟

ربنا يعينك

على فكرة فى مكان رابع
فى الجنة ونعيمها و اظن صعب توصلك هناك هههههههههههههههههه

mohra يقول...

شاكرين مهللين يا ستى و اول ما الاقى حماه هاعمل معاها كده على طول

samourai 4 ever يقول...

ههههههههههههههههههههههه
حلوه تصدقى
و بم انى لسه مدخلتش صفيحه الزوجيه اصدى عش الزوجيه
يبقى حرص و لا تخونش

و بردوه
خد فكرة و اشترى بكرة

و دمتـــــــــــــــــــــــــم

بنت مصريه يقول...

ههههههههههههههههههههه
دا انتى تحفه
بوست جميل
اتمنى تنورينى يا قمر

واحدة مفروسة يقول...

ههههههههههههه
ايه ياسوسو الروقان ده و النصايح القيمه ديه
أقولك يا أختشي كلمه فى سرك
انا فعلا لما حماتى بتعرف انى تعبت أى نوع من أنواع التعب تاني يوم تبقى تعبانه بيه
هههههههههههههه
وده مش علشان حاجه ياشريره...
ده من حبها فيا بتحب تشاركنى اوجاعى

ااااااه ياااانى يا فرستى

كلاكيت تانى وتانى يقول...

سوسو هشوفك يوم اجتماع الستات شوفى البوست عند خيحة وتعالى نتقابل ووزعى نصايحك اللى تودى فداهية دى علينا احسن من تقشير توم ابى او تفصيص البسلة او اللف هوالين البنات اللى خاطبهم سوووووو
تحياتى ومستنياكى اشوفك

GeHaD يقول...

النصايح دي نتيجه عن تجاربك مع فيفي بس ولا فيفي دي كل العبر فيها فعلشان كدا حبيتي تفيدي الستات علي العموم ربنا يكرمك يارب وتسكني معاها في نفس العماره علشان تكتبي علي طول كدا وطلعهم عليكي

ٍSOU يقول...

تعيشى و تنصحى :))

دكتور بهــدوء يقول...

اهااا
سوسو تنصح
مجموعه النصائح الذهبيه
عشان تشتري دماغك

سوسو؟؟
مانتي حاجات منها بتعمليها اومّال مابيحوقش ف فيفي لييييه؟
تقريبا ان فيفي حماه م نوع خاااص جدا

monaliza يقول...

شوية نصايح فى الجون ايوة كمان ياسوسو الله يخليكى

عمرو النوبى يقول...

هههههههههههههههههههههههههههههههههه
هههههههههههههههههههههههههههههههههه
بوست جامد اوى اوى اوى
ده لو حماتك قرت الكلام ده يبقى الله يرحمك يا سوسو

بس انا نغسى اسأل سؤال
هما لية الحموات بيعملو كده بجد
يعنى البنت لما تبقى عروسة وفى ايام جاوزها تلاقى حماتها اية زى الموس معاها
ونفس البنت لما تكبر فى العمر هى كمان تعمل كده مع مرات ابنها مع انكم فى الاخر ستات فى قلب بعض يعنى لو الحما بتعمل كده مع الزوج وده طبعا بيحصل هنقول ماشى اهو راجل وبطلع غلبها فية انما انتو لية بتعملو كده فى بعض دى اسميها اية غيره ولا مستخسرة ابنها وتربيتها فى غيرها ولا اية بالظبط
ارجو الاجابة لو تكرمتى ؟؟؟

تحياتى على البوست الجميل
واتمنى انك تشرفى مدونتى المتواضعة
وليا زيارات تانية كتير
الى اللقاء

سمراء يقول...

استخدمت كثير من الأمثال الشعبية اللي هي بتعبر عن ثقافتنا وطرث تعاملنا مع بعض واللي هي جوة وجدانا من غير ما نقصد
على اي حال انا ادرس التراث الشعبي
على فكرة هي بتقول لنفسها
ربي يا خايبة للغيبة
ربنا يوفقك
سمراء

ليلـــــــــــــــــــــــــــــى يقول...

طب لو ما نفعتش النصايح دى أعمل بلوج؟ :P

خلاص ما تزعليش بهزر معاكى. جامدة
النصايح دى و فى الجون الصراحة :))))))))

مدام كعبولة يقول...

زي مقولتي يا سوسو

نصايحك دي زي قلتها بالنسبة للي حماتهم مستوطنة بيتها


و ربنا يستر و متهدمش البيت علي اللي فيه

Foxology يقول...

كدة تماااااااام نالف قصة فيها مواقف حماتك وتتعمل حلقات كوميدية تكسر الدنيا فى رمضان وكمان ننزل كتب نصايح للمتزوجات تتباع فى معرض الكتاب :))

حماتك لازم تنصص معانا فى الأرباح :))

تحياتى :)

كيكى يقول...

هههههههههههه اييييييية النصائح الجامدة دى...حلوة الصورة الى على البوست

المـــفـــــــقــــــــوعـــــة مــرارتـهــا يقول...

emmy
===============
كملي الجوازة وماتخافيش ... العرسان بقت عملة نادرة اليومين دول ...وكل واحدة تحافظ علي عريسها وتتحمل ... هانعمل ايه حظنا كدة وحاولي تاخدي من النصايح دي اللي يناسبك ويناسب حماتك ولو حماتك كويسة وبنت حلال ماتاخديش بيها خالص وعامليها ذي مامتك

المـــفـــــــقــــــــوعـــــة مــرارتـهــا يقول...

إنـســـانـة
==================
كملي علي بركة الله سيري يانورماندي
ماتخافيش مش كل الحماوات ذي فيفي

المـــفـــــــقــــــــوعـــــة مــرارتـهــا يقول...

Doba
============
ماتعرفيش تأثير كلامك عليا أيه ؟
بجد خليتيني أحس أني ليا فايدة
بصي اللي يشوف مصايب غيره تصعب عليه مصيبته
وذي ماانتي غيرتي من طريقة معاملتك لحماتك عشان قلتي ان قضا اخف من قضا ... فأنا برضه أتعلمت إني في رحمة كبيرة لاني مش عايشة مع حماتي في بيت واحد وممكن اقاطعها او اخف رجلي بزيارتها .. وده برضه لما شفت ان فيه ستات كتيرة مافيش في ايديها حلجة لان حماتها معاها في نفس البيت ..فصدقيني احنا بنأثر في تفكير بعض بشكل أو بآخر
ماتنسيش تبلغي سلامي لمامتك وتبوسيهالي

المـــفـــــــقــــــــوعـــــة مــرارتـهــا يقول...

Tamer Nabil
====================
لا طبعاً فيه حالتين مش هاينفع نعمل فيهم بكل النصايح والحالتين دول ا
الأولي ان الحماة تبقي ست كويسة وطيبة وفي حالها وفيه من النوعية دي هما مش كتير بس فيه
والحالة التانية ان الحماة تبقي عايشة في نفس البيت مع البست
فيه حاجات ممكن تتعمل وفيه حاجات لا
يعني في الاكل واللبس ماينفعش الست تخبي لانها هاتبقي كتاب مفتوح لحماتها للأسف

المـــفـــــــقــــــــوعـــــة مــرارتـهــا يقول...

appy
================
أنا مش خايفة عليكي خاااالص علي فكرة
عشان انتي ممكن تاكلي بعقل حماتك حلاوة وتحطيها في جيبك بكلامك وخفة دمك وربنا يستر عليكي

المـــفـــــــقــــــــوعـــــة مــرارتـهــا يقول...

Sally
================
يعني لو فرضنا فرضاً غني عملت كتاب هاتشتريه حتي لو بخمسة جنيه بحالهم وانتي عندك المدونة بحالها قدامك علي النت
علي فكرة انا ليا اخت برضه اسمها سالي اصل احنا عاملين امبراطورية سين
ربنا مايحمرنيش من زيارتك ليا

المـــفـــــــقــــــــوعـــــة مــرارتـهــا يقول...

فاتيما
==============
ماانا ربنا كان هايكرمني برضه واحصلك بس لسة عندي ربع بيقولي لازمتتحملي عشان الولاد ياباتعة

المـــفـــــــقــــــــوعـــــة مــرارتـهــا يقول...

حبيبـــــــة القمـــــر
===========================
سجليهم وربنا مايحوجك ليهم ويطلع عريسك ياإما مامته مودعة يااما ست طيبة ومالهاش في شغل الحماوات المقرفات

المـــفـــــــقــــــــوعـــــة مــرارتـهــا يقول...

د/أبويحيى وادم
====================
أفهم من كدة أنك محدد الهدف وخاطب وعارف اللي فيها
ربنا يسعدك

المـــفـــــــقــــــــوعـــــة مــرارتـهــا يقول...

عبده الرايق
====================
ياعم ياعم علي الأمثال
أنا هاخد المثل ده اصله حلو بشكل مفزع

المـــفـــــــقــــــــوعـــــة مــرارتـهــا يقول...

HERO
===============
انا عندي مامة جارتي بتغير علي بنتها من الحب اللي بينها وبين حماتها لدرجة انك لما بتشوف الحما والام مع البنت تحتار مين فيهم مامتها

المـــفـــــــقــــــــوعـــــة مــرارتـهــا يقول...

قوس قزح
================
ياريت كلنا نروح سوي المكان الرابع ده بس في أوانه ومش من الفقعة

المـــفـــــــقــــــــوعـــــة مــرارتـهــا يقول...

قوس قزح
================
ياريت كلنا نروح سوي المكان الرابع ده بس في أوانه ومش من الفقعة

المـــفـــــــقــــــــوعـــــة مــرارتـهــا يقول...

mohra
===================
ربنا يرزقك بزوج ومعاه حماة او حماة فري مش هايضر برضه

المـــفـــــــقــــــــوعـــــة مــرارتـهــا يقول...

samourai 4 ever
=====================
يارب تدخلي الصفيحة قريب وماتحتاجيش النصايح دي

المـــفـــــــقــــــــوعـــــة مــرارتـهــا يقول...

بنت مصريه
===================
ميرسي انا جاية واشكرك علي الدعوة وانا هاألبيها

سومه...مجنونه فى بلد عاقل يقول...

دى كدا تبقى اسرائيل مش حمى ههههههه
يا بنتى اللى بتعمليه فى حماتك حيتعمل معاكى لما تجيبى ولد
هههههه وشكلك حتبقى حمى سكر
وانا لو منك تحسبا لان دا ميتعملش فيكى فمتقوليش سر الوصفه السحريه دى لحد تانى ويستحسن بعد ما تخلص التعليقات ترفعى البوست لامرات ابنك تشوف المدونه مستقبلا وتنفذها معاكى
تحياتى ليكى سومه_87

المـــفـــــــقــــــــوعـــــة مــرارتـهــا يقول...

واحدة مفروسة
=====================
ياسلام طب خافي عليها بقي وماتقوليلهاش علي عياكي ..خلي عندك رحمة

المـــفـــــــقــــــــوعـــــة مــرارتـهــا يقول...

كلاكيت تانى وتانى
===================
بصي هابقي أسأل سي الأفندي بتاعي وارد عليكم قرار ذي ده ماينفعش ادي فيه كلمة لوحدي

المـــفـــــــقــــــــوعـــــة مــرارتـهــا يقول...

GeHaD
================
أهي دي الدعوات اللي تجيب الواحد وري
بلاش عشان خاطري يابيه تدعي عليا

المـــفـــــــقــــــــوعـــــة مــرارتـهــا يقول...

ٍSOU ...
==============
تعيش وتقرالي

المـــفـــــــقــــــــوعـــــة مــرارتـهــا يقول...

دكتور بهــدوء
=====================
ماهو اللي بيحصلي ده وانا باعمل بالنصايح اصل فيفي يطلع منها اكتر من كدة بكتير يعني كدة الخفيف يافندم

المـــفـــــــقــــــــوعـــــة مــرارتـهــا يقول...

monaliza
==================
اهم حاجة تبعدي عن جدالها وتغنيله مامنوش فايدة تقنعيها بوجهة نظرك ولو اطربقت السما علي الارض مش هاتقتنع بكلامك فريحي دماغك وماتجادليش

همس الاحباب يقول...

تعرفى انك ناكرة للجميل
تعرفى فيفى دى ليها افاضل عليكى كتير
قوى بس احنا كده زى القطط ناكل ننكر
يعنى فيفى السبب فى عمل مدونتك
فيفى السبب فى شهرتك
فيفى السبب فى تعاطف الناس معاكى
فيفى السبب فى انك بقيتى حكيمة زمانك وبتدى نصايح كمان
عايزة ايه تانى بس تبقى مندوب الحموات الفاتنات فى الامم المتحدة على ايد فيفى اتبقى متخافيش
بس بجد نصايح جامدة
هههههههههههه
تحياتى

ههههههه

المـــفـــــــقــــــــوعـــــة مــرارتـهــا يقول...

عمرو النوبى
====================
عندك كل الحق احنا الستات اللي بنعمل كدة في بعض ... عشان كدة لازم المدونة دي تبقي تذكرة لينا للي بيتعمل فينا من حماواتنا عشان لما نبقي حماوات مانعملش كدة في بنات الناس
وتحياتي لرأيك العبقري

المـــفـــــــقــــــــوعـــــة مــرارتـهــا يقول...

سمراء
===============
انا أعشق الأمثال والمثل اللي تفضلتي وقلتيه اكيد مافاتش عليا ... ده هو ده الشعار الرسمي للحماوات الفاتنات
وانا كنت استخدمته في بوست قديم وبحب التنويع
فيه بعض الأمثال هاتلاقيها عندي ومش هاتلاقيها في حتة تانية يعني لما يسألوكي فين المرجع بتاعك هاتقولي مدونة حماتي ملاك عارفة ليه عشان هي من تأليف العبدة لله , بس ييجي منها

المـــفـــــــقــــــــوعـــــة مــرارتـهــا يقول...

ليلـــــــــــــــــــــــــــــى
==================================
لو البلوج هاينفس عنك ويريحك فأعمليه
بس لازم حماتك مايكونش ليها في النت عشان ماتتقفشيش وسنتك تبقي بمبي

المـــفـــــــقــــــــوعـــــة مــرارتـهــا يقول...

مدام كعبولة
===================
للاسف ماعنديش مزاج اروح اقعد مع حماتي في بيت واحد عشان اكتب نصايح للي قاعدين مع حماواتهم في بيت واحد ومااملكش غير الدعوة ليهم بأن ربنا يفك أسرهن

المـــفـــــــقــــــــوعـــــة مــرارتـهــا يقول...

Foxology
==============
ماشي ننصص وهو انا خسرانة حاجة ... لما يبقي المسلسل يتعمل ويحقق ارباح نبقي ننصص وهو انا هايجيني اعز من فيفي انصص معاه

المـــفـــــــقــــــــوعـــــة مــرارتـهــا يقول...

كيكى
==============
انا للأسف إمكانيات النت عندي مش بيخليني اعرف اجيب صور فللأسف باخدها من المدونات الصديقة
وانتهز الفرصة اني اعتذر لأي حد يدخل ويلاقي صورة من مدونته عندي
مجبر ة أختكم لا بطلة

المـــفـــــــقــــــــوعـــــة مــرارتـهــا يقول...

سومه...مجنونه فى بلد عاقل
=============================
خلي البوست في حاله ... يمكن يفكرني باللي قسيته عشان ماتقاسيش بنات الناس معايا وارجع اقري وافتكر اللي حصلي

المـــفـــــــقــــــــوعـــــة مــرارتـهــا يقول...

همس الاحباب
===================
دي فيفي افضالها عليا مغرقاني .. هو انا اقدر انكر ؟
حلوة مندوبة الحماوات في الامم المتحدة ..وماله وهو انا يعني شوية

Sally يقول...

يا سوسو ما هو الكتاب مش هيبقى للمدونين بس
ده هيبقى لكل فئات الشعب الكادحة
وكل ما واحدة تتخطب وتشوف فى عين حماتها هدوء ما قبل العاصفة هتجررررررى تشترى النصائح السوسية للتعامل مع الحما النكدية

بس ممكن بقى الحموات الفاتنات يعملوا ثورة ويطالبوا بوقف نشر الكتاب
ساعتها بقى انسى .. وكملى نشر لأن الحموات من الشعب والشعب ملوش كلمة فى البلد دى
هههههههههههههههههه

دمتى بخير يا حبيبتى

رئـــــيسـة حزب الأحلام يقول...

جزاكى الله خيرا على هذة النصائح الجهنمية
وربنا يهديلك حماتك ويصلح بالك
تحياتى

Ema يقول...

والله كل ما أكون متضايقه آجي عندك أضحك شويه ...أسلوبك رائع...ونفسي أشوف حماتك دي علشان أبوسها إنها مطلعه الطاقه الإبداعيه دي عندك...يا ريت تشرفيني شويه ..لأني ناويه أحطك في مكان مهم في المدونه
تحياتي

اهو ده عيبه يقول...

واضح ان دى عصارة حشاشه تجربتك مع فيفى

جزاك الله خيرا عن كل الزوجات اللى هيعملوا بالنصايح دى يمكن ربنا يفرجها عليهم

كان الله فى عونك

Heart Whispers يقول...

أدعوك لزيارة مدونتي :)

funckydoctor يقول...

ههه حلوة هبعتها للناس يقروها

يوميات فنانه مفروسه جداا يقول...

ايه النصائح الفولاذيه ديه
استني كده ممممممممممممم
هقوم اجيب ورقه وانقلها

وربنا عسل يا سوسو ايه دا كله ايه دا كله

بس اوعدك لو طلعت حماتي قرينة فيفي هنفذها طبعا بحزفبرها

ربنا يصبرك يا سوسو يا اوختشي

مقولتلناش بقي عملتي ايه في الخناقه
ههههههههههه
اكيد اتخنقتيها بس انتي ناسيه صح

بوست هايل

سلام يا جميل

حسام مصطفي إبراهيم يقول...

انتي هايلة على فكرة .. مالكيش حل.

نبضات يقول...

انتى عسوله خااالص.... بنبونايه
انا بعلق دلوقتى وانا فى الشغل وعماله اقرأ نصايحك واضحك وخايفه الناس تقول عليا مجنونه لكن الحمد لله محدش شايفنى بس يارب مش يسمعوا ضحكى
عارفه هذه النصائح تنفع معايير زى المعايير الدوليه فى المحاسبه ثم زى مادرست ان كل دوله بتاخد هذه المعايير كمودل وتعدل عليه على حسب البيئه بتاعتها لانها بتختلف من مكان لاخر ومش ينفع تتطبق حرفيا لان اللى يصلح مع شخص لايصلح مع اخر لكن الاساس واااحد

ايه رئيك بقه فى هذه الاضافه العلميه

عارفه نفسى اوى حماتى تكون ام تانيه ليا وطبعا بعد ماما ربنا يديهخا الصحه وطوله العمر عاوزه حماتى تكون زى سميحه ايوب فى مسلسل الضوء الشارد
حاجه كده تفصيل وياريت ابنها برده يكون تفصيل هههههههههههه

سعيده جداااا بمعرفه مدونتك

تحياتى

.:.-=- ELGaZaLy-=-.:. يقول...

ههههههههههه
جميلة النصايح بجد ضحكتينى من قلبى
بس دة نظام دولى يعنى...

دمك خفيف بجد

وعجبنى اوى تعليق نبضات

ayman badr يقول...

ايه النصائح الفذة دى انتى جبتى كل حاجة بس ليه مش هتنفع مع فيفى، هى مش ز باقى الحموات ليهم كتالوج للاستخدام ومحاذير للاستعمال
ربنا يكون فى عونك بس لما ابنك أو بنتك تتجوز متتحوليش لفيفى
بوست جميل تحياتى

المـــفـــــــقــــــــوعـــــة مــرارتـهــا يقول...

Sally
=================
احنا شعب ديموقراطي هاندي للحماوات فرصة عشان ترد .. وبما ان الحماوات مالهومش في النت والتت يبقي احنا هانتصرف ونحاول ننقل وجهة نظرهم قريب
أبقي تعالي

المـــفـــــــقــــــــوعـــــة مــرارتـهــا يقول...

رئـــــيسـة حزب الأحلام
============================
ربنا يهدي الجميع

المـــفـــــــقــــــــوعـــــة مــرارتـهــا يقول...

Ema
===============
ربنا يخليكي ياإيما وتضحكي كمان وكمان

المـــفـــــــقــــــــوعـــــة مــرارتـهــا يقول...

اهو ده عيبه
===================
فرجه قريييييييييييييب ... الصبر مفتاح الفرج

المـــفـــــــقــــــــوعـــــة مــرارتـهــا يقول...

Heart Whispers
===================
من عينيا الاتنين

المـــفـــــــقــــــــوعـــــة مــرارتـهــا يقول...

funckydoctor
======================
بس بشرط تقول جايبها منين مش أكتر وياحبذا لو تسيب عنوان المدونة تحتيها واهي تبقي دعاية برضه

المـــفـــــــقــــــــوعـــــة مــرارتـهــا يقول...

يوميات فنانه مفروسه جداا
============================
وهو انا وش ذلك يابطة ... انتي تصدقي ان سوسو كابانتوظو تتخانق مع جيرانها

المـــفـــــــقــــــــوعـــــة مــرارتـهــا يقول...

حسام مصطفي إبراهيم
========================
رأيك يسعدني ويعلي راسي في السما

المـــفـــــــقــــــــوعـــــة مــرارتـهــا يقول...

نبضات
===================
ربنا يحققلك اللي في نفسك .. ومايطلعش بختك ذي بختي لأني كنت داخلة جوازتي بنفس صافية وكنت عاوزة حماتي تبقي ذي ماانتي وصفتي كدة بالظبط بس قليل البخت يلاقي العضم في الكرشة وانا لاقيت هياكل عضمية مش عضمة بس
اما بالنسبة للمعايير الدولية فانا مااقدرش اعمم لان فيه حماوات لو نفذنا معاهم النصايح دي يبقي احنا اللي مفتريين وظالمين
انا كنت ساعات اقعد مع صحباتي والاقيها بتشتكي من حماتها ابقي هاين عليا اقولها ماتيجي نبدل وبطلي بطر

المـــفـــــــقــــــــوعـــــة مــرارتـهــا يقول...

.:.-=- ELGaZaLy-=-.:.
===========================
ده النظام اللي ممكن نتبعه مع النكدية بس .. الحماة الطيبة تتشال في العين والنني
شكراً علي الزيارة

المـــفـــــــقــــــــوعـــــة مــرارتـهــا يقول...

ayman badr
=================
لما ابني يتأهل كل اللي هااعمله .. اني هااعمل مدونة بس .. ينفع ؟
المدونة دي من الحاجات اللي ممكن تفيدني بيها اني هاسجل لنفسي مافعلته معي حماتي لأتعلم منه كيف اعامل زوجة أبني

شهد الكلمات يقول...

هههههههههههههههههههههههههههههههههه
حلو جدا جدا جدا دمك شربات
شكشكوني بميت دبوس غير بيت جوزي مش راح أدوس ( مثل تحفة )

انا ليا سؤال هايجنني من ساعة ما تابعت المدونة بتاعتك تعملي اية لو حماتك خدت خبر بالمدونة دي!!!!!!!!!

هوة فى أيه؟؟soso يقول...

ههههههههههههه
نصائح والله غااااااااااليه جدا
ومش أى كلااااااااااام
نابعه من تجارب فيها خلاصه الحيااااااه
من واحده كده مجربه
يا بنتى أنتى حقك تخدمى البشريه وتنزلى كتاااااااب
ومسلسل
أنتى زى السكر وزى العسل

مدحت محمد يقول...

تعرفى فى حماوات بيبقو عاملين زى الامهات

مش كل الحموات كدة

مينفعش نطبق عليهم كل النصايح دى

هى بتختلف من حما لحما

صبرني يارب يقول...

تصدقى يا سوسو انك بقيتى خبيره ايه ده .

نفس النتايج الى انا وصلتلها برض على فكره .
يمكن دي يا اختي بركات ال 8 سنين

عارفه اختي الله يصلح حالها حماتها قاعده معاها اغلب الوقت بتسافرلها يا حبة عينى بره تقعد معاه 7 شهور مثلا خبط لزق كده .
هى زي حماتك كده بس ناعمه وغريبه على الاخر .
اختي دي دايما تقولي شوووووووفي مهما تكون الحما دي ايه لكن ما تكونش عايشه معاكي فى شقه واحده كده كابسه على افكارك ليلا نهارا ممكن تعدي الحكايه.

قلتلها مصدقاكي ياااااا اختي ومجربه


بس نسيت اقولك لو خرجتى وما قلتلهاش عيالك وابوهم هايقعوا بلسانهم مافيش فايده فيهم
وهاتبقى ليلتك مطينه بطين يا سوسو وتبصلك من تحت لتحت وتقولك بقى كنتى فى القناطر الاسبوع الى فااااااات يا سوسو وكان حلو الباااااااااانيه يا سوسو
عارفه لو قمت لقيت الكيك اتحرق يا سوسو هاتضربي ايه الرغي ده

محاولات مخنوقة يقول...

بجد يا سوسو نصائح رائعة وبالذات بالذات نصيحة انها تاخد فلوس وتشترى اللى هى عاوزاه .. مع ان للأسف مش كلها هاقدر انفذها لان حماتى ساكنة معايا في نفس العمارة ( طبعا صعبت عليكم )في انتظار المزيد من نصائحك المفيدة وربنا يهدى لك جوزك وحماتك

Ahmed Mubarak يقول...

وأخيراً لا تعطيها الفرصة لكي تخرب عليكي بيتك فهو ده عين المني بالنسبالها ... خليكي قاعدة علي قلبها وقلب أبنها

ينهار ابيض وملون ..

انا خلاص مش عايز اتجوز .. يالهوي .. ايه ده كله ..

ده انتي مشكله
:)

صفا يقول...

الكلام ده ناتج خبرتك مع فيفى يعنى لازم نثق فيها فى انتظار التقبل اللى جاى ورا يا جميل

المـــفـــــــقــــــــوعـــــة مــرارتـهــا يقول...

شهد الكلمات
==================
أنا هافترض معاكي أن حماتي عرفت بالمدونة واشوف هاتعمل ايه
هي مش هاتعرف غير لو حد قال لها وساعتها هارسموش بريء وأقول
حماتي الغالية ده أنا بحبك وبأعشقك ومن كتر حبي فيكي بأكتب عن حواديتك اللي حكيتيهالي ولو حد قالك غير كدة يبقي الله يسامحه وهما غيرانين من الحب اللي بحبهولك

المـــفـــــــقــــــــوعـــــة مــرارتـهــا يقول...

هوة فى أيه؟؟soso
ـــــــــــــــــــــــ
البشرية مش عاوزة تستفيد مني هاأشربها بالعافية .. كفاية عليا أنتم ربنا يخليكوا ليا

المـــفـــــــقــــــــوعـــــة مــرارتـهــا يقول...

مدحت محمد
===============
انا وضحت كدة في التعليقات بس ممكن عشان مايلتبسش الأمر علي الزوار أضيفها للبوست لان فعلا فيه حماوات تتشال فوق الراس وجوة العين

المـــفـــــــقــــــــوعـــــة مــرارتـهــا يقول...

صبرني يارب
====================
البعد في حالة الحماة احسن لان ياحبيبتي مصارين البطن بتتخانق فمابالك بأتنين عايشين في مكان واحد

المـــفـــــــقــــــــوعـــــة مــرارتـهــا يقول...

محاولات مخنوقة
===================
النصيحة دي بقي بالذات نتيجة مش لخبرة واحدة ولا أثنان بل ثلاثة في عين العدو الفلوس اسلم طريق عشان تهادي حماتك
ومعلش ياقمر كلنا لها

المـــفـــــــقــــــــوعـــــة مــرارتـهــا يقول...

Ahmed Mubarak
=======================
ليه بس مش عاوز تتجوز ؟
اتجوز وعلي ضمانتي ولو حصل حاجة لا قدر الله هابقي اعملك كونسولتو من المدونات الحريم وهااقولك تحل المشكلة إزاي
وساعتها هاتبقي الخبرة أستوت علي نار هادية ونقدر نساعدك
ماتخافش وراك سوسو

المـــفـــــــقــــــــوعـــــة مــرارتـهــا يقول...

صفا ...
ــــــــــــــ
قبل التقيل فيه بوست كدة لازم انزله بس مش بطال

shaimaa samir يقول...

معلشى مقرتشى البوست
بس هقولك حاجة
طب والله العظيم قاعدة بذاكر وبفكرفى ابنك جدااااااااااااااااا
هو رهييب بكل المقاييس
ربنا يباركلك فيه
ممكن بقى تنزلى صورته
لانى فعلاا عايزاها بجد
عشان خاطرىىىىىىىى
وهجبلك يا ستى الشبكة
وكمان ب 18 الف جنية
ولا تضايقى نفسك

دعواتك

3ala asm masr يقول...

جامده اوى النصايح اهى تنفع بردو
وربنا يبعد عنك فيفى

karim يقول...

اسمعوا كلام سوسو و على رأى المثل اسأل مجرب



تحياتى

سبهللة عالاخر يقول...

عسل
انتى فنطاس عسل
وان شاء الله لما تعملى المدونة دى كتاب انا اول واحدة هاشتريه واهديه لامى
لانها حماة صعبة جدا
كان الله فى عون مرات اخويا
تحياتى ليكى
وياريت تفكرى فى موضوع الكتاب
على الاقل هاتكونى استفدتى من ورا غلاسة حماتك كتير
وعندى سؤال
هو جوزك بيقرا المدونة دى ؟؟؟؟

nonoymm يقول...

السلام عليكمطبعا قريت كل تدويناتك اللي فاتت تصبيرة من الريدر لحدالنت ما وصل الحمد لله
نصايحك غالية بس مش هنتفع بيها اصل الغالية اخدتها من قصيره وقابلت ربها قبل ما اتلم على ابنها
بس والله سيرتها عطرة اوي
الله يرحم اموات المسلمين
تحياتي يا سكورة

ولا بيهمنى يقول...

how r u soso..
i don`t know why .. i couldn`t log in with my other account (am sweetywhisper if u remember me)..
it seems like my husband knew that it was me as i used the usual nickname am using...and propably he changed my password...
aslo shayf en el-7agat de hya elly btbawaz el-tafkeer na7yt el-7amawat el-fatenat...
anyway ana wala hayhmny bgad...
ana 7`alas a3lant el-7arb asl ana b2a fefe bta3ty maf3olha wasely mn masr l-7ad amrica....
ana 3ala fekra kol kelma bt2oleha 7asa eny ana elly ba2olha...
rabena m3ana

انا مذنب يقول...

ربنا يهديهالك ويسعد ايامك انتي وزوجك

لكي مني كل التحيه

المـــفـــــــقــــــــوعـــــة مــرارتـهــا يقول...

shaimaa samir
==================
تعالي لحضن حماتك ياشوشو
ماتخافيش يابنتي ده أنا تربية فيفي مش بأعض خالص ... أنا بأبطح بس

المـــفـــــــقــــــــوعـــــة مــرارتـهــا يقول...

3ala asm masr
======================
كل حاجة بتنفع ... مافيش حاجة بتضر

المـــفـــــــقــــــــوعـــــة مــرارتـهــا يقول...

karim
------------
قول لهم ياكريم انا مش مجرب بس ده أنا فاتحة معمل تجارب

المـــفـــــــقــــــــوعـــــة مــرارتـهــا يقول...

سبهللة عالاخر
====================
وتلاقي الأم في معظم الأحوال اللي هي الحماة القاسية لزوجة الأبن هي نفسها الحماة الحنونة لزوج البنت
ماتخافيش جوزي بيحب يقري سياسة أقتصاد لكن مش بيحب يقري عن الحموات

المـــفـــــــقــــــــوعـــــة مــرارتـهــا يقول...

nonoymm
====================
الله يرحمها أكيد كانت هاتبقي حماة طيبة مادامت كانت أم طيبة وست طيبة

المـــفـــــــقــــــــوعـــــة مــرارتـهــا يقول...

ولا بيهمنى
=================
طبعاً عارفاكي ياجميل
بس بجد فيه واحدة تدي الباسوورد لجوزها .. يابنتي أتنصحي أهو عاملك هاكر علي المدونة كلها .. بس انتي شاطرة برضه وأتصرفتي وربنا يعينك ولو انك في رحمة عشان انتي في بلد وهي في بلد دي ميزة علي فكرة مايحسش بيها غير اللي عايش مع حماته في بيت واحد او بلد واحدة

المـــفـــــــقــــــــوعـــــة مــرارتـهــا يقول...

انا مذنب
====================
ربنا يخليك وميرسي علي الزيارة الجديدة

شهرزاد يقول...

السلام عليكم ورحمة الله وبركاته

بجد كتاباتك جميلة جدا
ياريت لو تشاركينا بيها في المدونات المرشحة للنشر في كتاب مدونات مصرية للجيب
ادخلي على اللينكات دي عشان تلاقي الشروط المطلوبة وتبعتي على الايميل التالي dwen_fun@yahoo.com
لقراءة شروط الاشتراك من هنا
http://www.facebook.com/group.php?gid=13820826455
أو ده
http://sneen.blogspot.com/

المـــفـــــــقــــــــوعـــــة مــرارتـهــا يقول...

شهرزاد
=================
وجب ياشوشو
انا بعثتها خلاص

شهرزاد يقول...

وصل ياقمر
شكرا على سرعة استجابتك
وان شاء الله أعمال المدونين اللي بعتوا لنا هتتحكم ونختار افضلها
دمتي بخير

المـــفـــــــقــــــــوعـــــة مــرارتـهــا يقول...

شهرزاد
==============
بصي ياشوشو لو انتي لاقيتي حاجة تنفع للنشر قوليلي وانا ابعتها
لاني الصراحة بخاف ابعت حاجة ماتنفعش للنشر
فلو لاقيتي حاجة تنفع قوليلي وانا ابعتها علي طوووول

زهرة الياسمين يقول...

ربنا يكون فى عونك يا سوسو
و يصبرك على ما بلاكى
لك الجنة و الله

المـــفـــــــقــــــــوعـــــة مــرارتـهــا يقول...

زهرة الياسمين
====================
منوراني ياست البنات

ayar يقول...

الله عليكى ياسوسو ياريت انتى بس تعملى بيهم النصايح دى ....

ranim يقول...

ههههههههههههههه سوسو حبيتي نصيحك كلها اتحفظت انا قلتلك قبل كده احنا نجوز واحد مقتوع من شجرة ولا امه ميته علشان نخلص ويعم يا عم علي النصايح ال100 100
ايه بس الحلوه ديييييييييي


تحياتي عاشقتك مبتسمة دائماااااااا

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
شات صوتي
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه

خدمات متميزة يقول...

شركة تنظيف منازل بالجبيل
شركة تنظيف بالجبيل
شركة تنظيف بيوت بالجبيل
شركة تنظيف فلل بالجبيل

شركة تنظيف بالجبيل
افضل شركة تنظيف بالجبيل
شركة تنظيف شقق بالجبيل
شركة تنظيف مسابح بالجبيل
شركة تنظيف مجالس بالجبيل
شركة تنظيف خزانات بالجبيل

خدمات متميزة يقول...

تتشرف شركة المثالي جروب للنظافة الشاملة بالمنطقة الشرقية بتقدم شركة تنظيف منازل بالخبر والتي تقدم افضل خدمات تنظيف المنازل والشقق والفلل والمجالس والكنب والسجاد والموكيت بالاعتماد عليافضل الامكانيات الحديثة والعمالة الماهرة وخبرة عشرات السنوات بمجالات التنظيف لجميع اركان المنزل وكل مع يحيط به فمع شركة تنظيف بالخبر تستطيعون الحصول علي افضل جودة ممكنة لتنظيف المنازل بارخص الاسعار المثالية

شركة تنظيف منازل بالخبر
شركة تنظيف بالخبر

خدمات متميزة يقول...

نقدم لكم عملائنا الكرام افضل شركة تنظيف ومكافحة حشرات بالمنطقة الشرقية والتي من خلالها تستطيعون الحصول علي افضل خدمات التنظيف الشاملة لجميع اركان المنزل فمع شركة المثالية للتنظيف انتم دائما في امان فتعد شركة المثالية للتنظيف بالقطيف افضل شركة متخصصة في تنظيف المنازل والشقق والفلل والمجالس والبيوت والكنب والسجاد والمفروشات بالقطيف وكذلك بجميع مدن ومحافظات المنطقة الشرقية بالمملكة العربية السعودية , تعتمد شركة المثالية للتنظيف بالقطيف علي افضل واحدث اجهزة التنظيف المثالية والتي من خلالها نسنطيع نقديم افضل خدمات التنظيف الشاملة للمنازل والمجالس بافضل جودة ممكنة وبارخص الاسعار المثالية فعندما نبحث عن افضل شركة تنظيف بالمنطقة الشرقيو فنحن بحاجة الي شركة المثالية للتنظيف التي لديها الخبرة الكبيرة والامكانيات الكبيرة والقدرة الهائلة علي خدمة عملائها بالاستعانة بامهر العمالة ذات الخبرة الكبيرة في مجالات التنظيف منذ عشرات السنوات ولم تغفل شركة المثالية للتنظيف فروعها الاخري بل اننا نقدم افضل خدماتنا بالاحساء من خلال شركة المثالية للتنظيف بالاحساء التي تستطيع توفير كافة الامكانيات اللازمة لتنفيز خدمات النظافة الشاملة بالاحساء وكذلك مدن محافظات المنطقة الشرقية فكل هذا تستطيعون الحصول علية من خلال
شركة المثالية للتنظيف بالاحساء
كما ان شركة المثالية للتنظيف لم تغفل افضل الخدمات واكثرها اهمية لعملائها وهي خدمة مكافحة الحشرات فلدينا شركة المثالية لمكافحة الحشرات التي تسستطيع تقديم خدمة ابادة الحشرات الطائرة والزاحفة بجميع انواعها باستخدام افضل المبيدات الامنة والنظيفة ذات التاثير القوي والفعال علي الحشرات والتي من خلالها نضمن لعملاء شركة المثالية لمكافحة الحشرات بالاحساء العيش في منزل امن خالي من الحشرات بجميع انواعها فلدينا الخدمات الاتية
شركة المثالية لمكافحة الحشرات
شركة المثالية لمكافحة الحشرات بالاحساء
شركة المثالية لمكافحة الحشرات بالدمام