الأحد، 29 يونيو، 2008

كدبت عليا وحياة عينيا

ــــــــــــــــــــــــــــــــــــــــــــــــــــــــــــــــــــــــــــــــــــــ
الهانم كلمتني في اللفلفون ... قال أيه عشان تمسحلي جوخ وتنافقني ...كل شيء أنكشف وبااااااان ... بقي يرضيكم كدة ... هي مش عارفة أنه كان باين عليها النفاق ... وعليك يبان يانداغ التشيكلس ... وزعلانة قوي أني براقب أبني من السماعة التانية ... بكرة نقعد جنب الحيط ونسمع الزيط ... لما أبنها يكبر وتشوفه عريس .. وتلاقي البنات علي كل لون يابطيسطة ...كل واحدة منهم تقعد تحايل فيه وتعمله البحر طحينة عشان يتجوزها .... ده لولا مراقبتي ليه .. كان زمانه أتجوز واحدة غيرها من زمااااااااااان ...وكان زمانها قاعدة بايرة في بيت أبوها ... وكانت مرات أبني إللي كانت عليها القصد والنية مريحاني ولا كنت دخلت المدونة دي ولا عتبتها برجليا ... وكان زماني كافية خيري شري ... دي حتي المدونة هواها قبلي ومكتومة ... وأنا مش بأحب غير الهوا الطبيعي
أنا عاوزاكوا تفهموا حاجة مهمة خاااالص ... لما المركب بتغرق ... مش كل واحد بيجري يلحقله منها أيُتها حاجة تنفعه والسلام
عملت أيه أنا غلط لما بأطلب من الواد أبني فلوس ذيادة مش هو مركبي وجوازته دي معناها أنه غرق بالنسبالي .. يعني خيره هايروح للسنيورة علي الجاهز ... يعني الأم دي بعد ماشقيت وتعبت وطفحت الكوتة في تربية أبنها .... تييجي الغريبة تاخده علي الجاهز .. لأ وأيه مش عاوزة تدفع خلو رِجل ... ده الشقة الجوماد بيندفع لها خلو
وهي لا مؤاخذة بتدفع حاجة من جيبها ... ماكله من خير أبني وفلوس أبني
أبني ده إللي حملت فيه سبع تشهر ... ... ورضع مني أسبوع وفطم نفسه ... طووول عمره مستعجل .. حتي لما خطب سوسو السوسة أستعجل وخطبها ... وهو إللي نقاها ... ده ماكلفش خاطره يسأل عنها جيرانها حتي
غلطااان ولا مش غلطااان ... خلوه يشرب منها ومن عمايلها
كانت مالها نقاوة عيني ... عمللي نفسه فلحوس وبيفهم في النفوس وقال ياإما دي يابلاش ... بقي فيه حد مايسألش عن النسب ... مش عارفة ماطلعش ليه ذي أمه .. واعي ومدقدق

أحب أطمنكم علي البت سوسو شايلاها في الحفظ والصون ... في أوضة الفيران وبدخل لها أكل كل يومين ... عشان المضروبة عاوزة تخس ... البت ربربت من خير أبني ... وبأساعدها تعمل ريجيم
لو حد عاوز يعمل رجيم معاها أحنا في الخدمة يارجالة

هناك 59 تعليقًا:

واحدة مفروسة يقول...

هههههههههههههههههه
عداكي العيب و طلع على الرابع يا فيفي
اللى تقدري تخديه منه احسن منه و منها الوحشة خطافة الرجاله ديه
حد يا ربي لسه فى الزمن الاسود ده بيعرف يخط راجل من صدر امه...ابن امه الحيله

بس ان جيتي للحق يافيفي البت سوسو الوحشه مش تدخليلها اكل خااالص
ولا اقولك اديهاني اخرطهالك للوز...و لما الوز يربرب و يتخن اجبهولم تمصمصي عضامه



إلا قوليلى يا فيفي ..ابنك فطم نفسه بعد اسبوع ليييه؟

المـــفـــــــقــــــــوعـــــة مــرارتـهــا يقول...

واحدة مفروسة
=====================
واد مابيفهمش بعيد عنك
طول عمره مش عارف مصلحته فين
خايب من يومه

بطوط حبوب يقول...

فيفى
بصى انا جاى اهدى النفوس
مرات ابنك مش بتخاف من الفيران انتى تجيبلها نمووووووووور
ليكلوها ويخلصوكى
ليكلوها برضه وتخلص هى
هههههههههههههههههه

وابقى ابعتى سلامى لسوسو وقوليلها تعملها مدونه تانيه طالما انتى احتليتى دى

فاتيما يقول...

سحورة
أنا ببعتلك ندا من ورا باب أودة الفيران
أحنا معاكى و بنحبك
اجيبلك عيش سن عشان الريجيم ؟؟
أنا و الأربعة بتوعى مستنيين الأشارة عشان نجيب المقشات و نكنس المدونة فى أقرب فرصة من الواغش اللى معشش فيها بقاله مدة ....
إنتى بس قولى يا جزر
هتلاقيناعندك علطول
------------------
و بخصوص الدعوة الحريمى أشكرك عليها من قلبى بس للأسف عندنا فرح برا القاهرة و هنبقى متدهولين من اول النهار ...
خيرها فى غيرها
و يا رب تستمعوا على الآخر
تحياتى يا حبيبتى

أحمد كمال يقول...

يا نهار زي بعضه !

أنا شكلي كده جيت في وقت مش مناسب ، و الظاهر إن الخناقات الحريمي مش حاتنقطع هنا ، و الدم حايبقى للركب ..

و لذلك أفضل الانسحاب بهدوووء

شفقة هانم واحسان بك يقول...

لا حرام يا فيفى والنبى خرجيها من اوضه الفيران
ههههههههههههههههههههههه
البوست حلو اوى اوى

mohra يقول...

بصراحه ملهاش حق تضايقك يا فيفى
ده انت حتى قلبك عليها و عاملالها ريجيم

مهيج الجماهير يقول...

ياعينى عليكى ....
ازاى تاخد ابنك منك ؟
لا معندهاش قلب
المفروض يتجوزوا و كل واحد يقعد فى بيته بقى
بس و النبى ابقى اتكى عليها شوية فى الريجيم
يعنى بلد ما تأكليها كل يومين أكليها كل اسبوع
عشان الريجيم يخلص بسرعة و ترجعلنا تانى لو مكانش يضايقك يعنى
هههههههههههههههههههههه
سلام

رئـــــيسـة حزب الأحلام يقول...

الله ياريت الرحلة دى تطلع بجد انا مستنيه
ازيك ياست فيفى امتى بقى تظرى الاخت سوسو
تحياتى للجميع

المـــفـــــــقــــــــوعـــــة مــرارتـهــا يقول...

بطوط حبوب
======================
نمور
شكلك كدة عاوز تخلص مني انا
لا انا المحتلة الكبري
ده انا اللي دهنت الهوا ملوخية

مدام كعبولة يقول...

شوفي من الاخر كدة

انا مش بتكلم معاك

يا طلعي سوسو اكلمها يا حعملك ثورة في المدونات

عايزين سوسو عايزين سوسو

الديكتاتورية البيرقوراطية امثالك مش من حقهم انهم يتكلموا

انا رافعة شعار الثورة علي الحموات و اللي مش عاجبه براحته

عرفيني بس مكان اوضة الفران و خليني ادخل لسوسو و اطلعهم عليكي

اين انت يا سوووووووووووووسوووووووو

المـــفـــــــقــــــــوعـــــة مــرارتـهــا يقول...

فاتيما
===================
ماتقليش عقلك ... هاتبوظي عليها الرجيم خلينا نعرف نخدمها
ــــــــــــــــــــــــــــــــ
ياخسااااااارة ... انتي وحشتيني وكان نفسي اشوفك

المـــفـــــــقــــــــوعـــــة مــرارتـهــا يقول...

أحمد كمال
=================
انا واحدة عندي من الديموقراطية يملي شفاشق
بس اهم حاجة تبقي واقف في الناحية الصح .. بعيد عن وش الشفاشق اصلها إزاز بيعور

المـــفـــــــقــــــــوعـــــة مــرارتـهــا يقول...

شفقة هانم واحسان بك
=======================
ماتخافيش الفيران بتاعتي قنوعة هاتاخد اللي يكفيها وهاترجع الباقي

المـــفـــــــقــــــــوعـــــة مــرارتـهــا يقول...

mohra
====================
روحي قوليلها
احسن دي جابتلي صداع منصوف في نافوخي من كتر الصريخ

المـــفـــــــقــــــــوعـــــة مــرارتـهــا يقول...

مهيج الجماهير
===================
بالدور بالدوووووووووووووور
هي اخدت دورها الدور عليا بقي اليومين دول
وبعدين مين اللي عاوزها ترجع ؟
دي لو رجعت هاتكون عضم من غير فتفوتة لحم
الفيران جعانة ياجرعان

المـــفـــــــقــــــــوعـــــة مــرارتـهــا يقول...

رئـــــيسـة حزب الأحلام
============================
ادينا بنظبط مع بعض
وربنا يسهل

المـــفـــــــقــــــــوعـــــة مــرارتـهــا يقول...

مدام كعبولة
=====================
جواب صغنن من مجهول لحماتك هايظبطك
ماتزعليش بكرة حماتك تقعد علي تلها

appy يقول...

يااااااااا دى فيفى دى الحنيه والاحترام
يا شيخه بطلى افترى عليها بقى ههههههههههه

بت خيخة وأى كلام يقول...

دار الاسلحة والذخيرة بعيدة اوى
عايزين حاجة قريبة

واساسا يعنى انا مش فاضية يوم اربعة سبعة

روحوا انتوا بقى بلبطوا فى البسين وانا هابعتلكم مخبر من عندى يصوركم بالمايوهات
وهافضحكم فضيحة المطاهر يوم طلعوه على المعاش


والنبى يا فيفى
خفى على البت سوسو شوية دى غلبانة ومنكيسرة
وبلاش اوضة الفيران دى
انا عندى اوضة تانية تنفع مع اشكالها
ايه رايك فى اوضة الاسود

الا هى فيفى دى هتفضل مستوطنة فى البلوج كتير
هى مش هتمشى بقى تشوف حالها فى حتة تانية

زفته وقطران يقول...

انا قلت ياست انت حساقر وارجع الاقيكي مشيتي وريحتينا

اتكسفي شويه وامشي بقي
سوسو حبيبتي
ولا يهمك من الفيران
عادي كائنات اليفه

حسبي الله ونعم الوكيل

هيثم الدهشان يقول...

سبع اتشهر ورضع اسبوع ( بس ) وفطم نفسه
ده ايه الاستعجال
بس بقولك ايه بدل ماتعمليلها ريجيم ممكن تدينى 10 / 15 كيلو منها اصلى عايز اتخن

كالعادة مقدرش اقول غير اسلوب verygood
تقبلى تحياتى

snohe يقول...

ههههههههههه
تحياتى

Foxology يقول...

ههههههههههههههههههههههههههههههه

على كدة فيفى معتقلة سوسو ؟؟ طب فى فدية ؟؟ بس ده يعتبر انقلاب بلوجرى غير مسلح :))

تحياتى وربنا يفك سجنك :))

المـــفـــــــقــــــــوعـــــة مــرارتـهــا يقول...

appy
================
بالحضن ياحبيبتي
الله
انتي مالك مابتاكليش ولا أيه
تعالي أكلك عندنا
عندنا مفتقة تخلي العروسة مطرشقة
كلي
بس ماتحفيش البنات اللي عاوزة تتخن كتير
انا اصلي هافتحها تخصص تسمين وتخسيس
بس ايدك علي الفيزيت الأول
احنا مش فاتحينها سلسبيل

المـــفـــــــقــــــــوعـــــة مــرارتـهــا يقول...

بت خيخة وأى كلام
======================
بت ياخيخة
طب نأجلها طيب لو تحبي
عموما انا كدة كدة باروح النادي يوم الجمعة اللي عاوز ييجي ييجي
بس ظبطي انتي بقي خروجة تانية علي زوقك

المـــفـــــــقــــــــوعـــــة مــرارتـهــا يقول...

زفته وقطران
====================
بقولك ايه يامزمازيل زفتة هانم
ماتيجي تاخديلك فارين تربيهم وتخليهم ولاد ذوات كدة وتوديهم مدارس ونطلع بيهم سباق الفيران اللي في العتبة وناخد الكاس من وراهم

المـــفـــــــقــــــــوعـــــة مــرارتـهــا يقول...

هيثم الدهشان
===================
ياكبدي عليك




ماعلش جيت متأخر ياضنايا
هي خلاص نقلت للفيران لحم واللي كان كان



وانت عارف الفيران طفسة مش بتوف اللي بلعته

المـــفـــــــقــــــــوعـــــة مــرارتـهــا يقول...

snohe
===================
ايه ياعمنا الغيبة الطويلة دي
انا قلت تلاقيك روحت تشتري عيش ولسة واقف في الطابور مستني دورك

المـــفـــــــقــــــــوعـــــة مــرارتـهــا يقول...

Foxology
=====================
حلوة الفدية دي
وياتري اطلب ايه
واطلبها من مين

تعالي هنا


انت محوش كام وتقدر تدفع كام بالصلاة عاالنبي

شهد الكلمات يقول...
أزال المؤلف هذا التعليق.
المـــفـــــــقــــــــوعـــــة مــرارتـهــا يقول...

شهد الكلمات
==================
اه جد وبحق وحقيقي
ابقي شوفي وتعالي

شهد الكلمات يقول...

يا ست انتي مش هاتتهدي بقي ده كلام تقولية يعني ابنك الغلبان تفتكري اتفطم بعد اسبوع لية!!!! يا عيني حس انه لو كمل سنتين رضاعة هايبقي صورة منك اراشان و معقد

و ان كان على سوسو فوراها رجالة تاكل البسكويت و ممكن توريكي العين الزرقة عشان قرك ده اللي مابيخلصش

وحشتينا يا سوسو و بجد موضوع الاسلحة و الذخيرة حقيقي ولا اية لو كدة اشوف النظام ;)

تحياتي

شهد الكلمات يقول...

معلش انا حذفت الاولانية و نزلتها تاني عشان كان فيها بعض الاخطاء في الكتابة

و بجد لو كدة يبقي خلاص نشوف الموضوع و الظروف و كلمة السر كتكوت يا معلم
و نخلي بالنا من الارشان الكبير ;)

امل يقول...

السلام عليكم
ازيك يا طنط فيفي خلي بالك من سوسو
واتوصي بيها دي بتقول دايما عليكي انك ملاك وبلاش اوضة الفيران انتي قلبك كبيــر برضه

الربان يقول...

تحياتي

كل هذا...و هي حملت فيه سبعة شهور فقط....سبحان الله...ماذا لو كانوا تسعة شهور.....؟

هذه الزوجة فدائية....ارشحها لجائزة
نوبل لتحمل الحموات...


تحياتي و تقديري

شفقة هانم واحسان بك يقول...

انا اللى عايز اعمل ريجيم.....ههههههههههه
انتى مشكلة يا مفقوعة بجد دمك عسل مش ممكن
احسان اللوذعى

الـجـدة فـصـيـحـة يقول...

السلام عليكم ورحمة الله وبركاته

ياسلام
ما دي سنة الحياة كل أم بتحمل وتولد وتربي عشان لما ابنها يكبر ويبدأ يبني بيته وحياته بعد كدة
ومن حقه انه يختار اللى هاتبني معاه الحياة دي

حجتك ضعيفة يافيفي
شوفي غيرها
وبراحة على سوسو

وسوسو إن شاء الله توصلي للوزن المثالي وصحة وعافية يارب ويقويكِ على فيفي

دمتِ في رعاية الله

فزلوكة يقول...

أنا الحمدلله
لامحتاجة ريجيم ولا دايت,, لو كان بالشكل دا

تدوينة دمها خفيف ماشاء الله

المهم إنتى شدى حيلك معاها كدا.. وورينا

بنهدى النفوس بس

blue-wave يقول...

والله مش ممكن
انا بقيت بستمتع اوى بكل بوست جديد ليكى
تحياتى

WEDA يقول...

calm down every thing ill be ok

المـــفـــــــقــــــــوعـــــة مــرارتـهــا يقول...

شهد الكلمات
====================
خلاص كتكوت يامعلم ولو جيتي ومش لاقيتيني
فيه مايكروفون علي البسين نادي وقولي سحر فين
او ابعتيلي علي الميل اللي متسجل في البروفايل وانا ابعتلك موبايلي تكلميني وانتي هناك

المـــفـــــــقــــــــوعـــــة مــرارتـهــا يقول...

شهد الكلمات
====================
خلاص كتكوت يامعلم ولو جيتي ومش لاقيتيني
فيه مايكروفون علي البسين نادي وقولي سحر فين
او ابعتيلي علي الميل اللي متسجل في البروفايل وانا ابعتلك موبايلي تكلميني وانتي هناك

المـــفـــــــقــــــــوعـــــة مــرارتـهــا يقول...

امل
=====================
أوضة الفيران دي عشان الحبايب بس
الحق عليا ان قلبي عليها وبخسسها طبيعي من غير برشام ورياضة

المـــفـــــــقــــــــوعـــــة مــرارتـهــا يقول...

الربان
==================
واحد مستعجل من يومي
مايعرفش يصبر ابدا

المـــفـــــــقــــــــوعـــــة مــرارتـهــا يقول...

شفقة هانم واحسان بك
==========================
عندي اوضة مليانة عيش سن وشوية خفافيش
دي بقي للحالات المستعجلة
تعالي
وببلاش

المـــفـــــــقــــــــوعـــــة مــرارتـهــا يقول...

الـجـدة فـصـيـحـة
===========================
حجتي قوية ومتينة ومفترية
بس البسي النضارة وانتي تتأكدي منها

المـــفـــــــقــــــــوعـــــة مــرارتـهــا يقول...

فزلوكة
===================
ماتخافيش عليها
دي سوسو دي في عينيا المنفدة علي اوضة الفرافير

المـــفـــــــقــــــــوعـــــة مــرارتـهــا يقول...

blue-wave
==================
وماله انت منورنا ومشرف فيفي

المـــفـــــــقــــــــوعـــــة مــرارتـهــا يقول...

WEDA
=================
الهدوء مامنوش فايدة
الدنيا تؤخذ بالعافية

Desert cat يقول...

اصدقائى الأعزاء المدونين والمدونات
غدا الخميس 3/7 يتم اذاعه الحلقة التانية من اجابات سؤال الإختراعات
فى برنامجنا الإذاعى
أنت تسأل والكمبيوتر يجيب
والذى يذاع يومياً الساعه 9.10 صباحا على إذاعة البرنامج العام ما عدا يوم الجمعة
وسيتم اذاعه اجابات كل من
عيله مفتريه سابقا
قطة الصحراء انا بلا فشر
ايمن بدر
نونو
سحر غريب
الجده فصيحه
الطير الحزين
هانى ميشيل
الحشرى

تمنياتنا بدوام التواصل

momken يقول...

طانط فيفى ازاى حضرتك
والله وحشانى موت موت موت

ياستى مين قالك ان الشقه مكتومه ومقفله
ابدا
دى الى اسمها سوسو هى الى بتقل ازاز الشبابيك والبلكونات ال ايه علشان التكيف ميسربش

ولما انتى بتيجى البيت عند ابنك حبيبك هى بتضيع الريموت بتاع التكيف متعمده
علشان انتى بزهقى وتمشى خفيف خفيف
ويا بخت من زار وخفف

اما بالنسبه لموضوع فلوس ابنك
فانتى ممكن تتصلى بالشركه الى بيشتغل فيها
وتعملى تحويل مرتب
وهو يجى يصرف مرتبه منك زى بتوع المعاش
وانتى بقى سعتها تديها على اد مصروفه
بدل الولد ميشرب سجاير
ولا الى اسمها سوسو دى ماتخده تسهره وتقعده فى كفيهات وتفسد اخلاقه

او اقولك احجرى عليه وريحى دماغك

مع تحياتى صديق البرنامج
ممكن


تحياتى

فارس بلا جواد يقول...

المدونه دى روعه
تسلم ايدك بجد

سبهللة يقول...

ههههههههههه
والله يا فيفى انتى وسوسو عش=سل عسل عسل
وفعلا ما جمع الا ما وفق
والله انا خايفة كام يوم والواد ابنك توحشه مراته يقوم يحبسك معاها فى اوضة الفيران ويحتل هو المدونة ويطلع اللى كاتمه بقاله سنين يمنكم انتوا الاتنين

المـــفـــــــقــــــــوعـــــة مــرارتـهــا يقول...

Desert cat
==================
ميرسي ياقطة
نخدمك في الافراح ياختي

المـــفـــــــقــــــــوعـــــة مــرارتـهــا يقول...

momken
==================
صديق البرنامج
بأحييييييك علي افكارك اللوزعية الجهنمية
ربنا يخليك للبشرية المعذبة

المـــفـــــــقــــــــوعـــــة مــرارتـهــا يقول...

فارس بلا جواد
==================
اخجلتم تواضعنا
ميرسي الف ميرسي

المـــفـــــــقــــــــوعـــــة مــرارتـهــا يقول...

سبهللة
================\
وهو لو كان فاضي كان سكت
لولا شغله عليه
كان زمانه عمل له مدونة يسيح لنا فيها

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
شات صوتي
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه