الجمعة، 11 يوليو، 2008

نقول هش ماتنهشش ... البعيدة مابتحسش


البت دي مالها كدة لازقة بغري ... كل ماهشها ماتتهشش ...

البت مقصوفة الرقبة والفشة ناوية تتجوز أبني البكري بجد ... وكل إللي بأعمله معاها مش جايب نتيجته ... طب أعمل أيه بس ... أنا عمري ما عدت عليا الأصناف اللازقة دي ... هو آه سوق العرسان شاحح بس مش للدرجة دي ... ده علي رأي المثل

قاعدة عند أمي أحسن ماأتجوز وأشيل همي
الولد يقولها ماما هاتييجي تآنسنا مرة في الأسبوع تقول وماله دي مامتك في عيني ... جاتها مُلة سرير تقع علي نافوخها تجيبلها تربنة ... وهو أنا هاسيب بيتي الطراوة وأقعد عندك في بيتك القبلي ياموكوسة ... تأكليني علي مزاجك وتنيميني في أوضة العيال .. ومش بعيد تستغليني وتنزلي تشتغلي وتعمليني الدادة الفولبينية بتاعتك ... هو أنتي فاكراني مقطوعة وماليش بيت يلمني

... ده إللي يخرج من داره ياخد ديسكاونت علي مقداره

طلعت أوت ياكات

شفتم عمركم تلامة أكتر من كدة ... أنا قلت أخليها علي نور من أولها وأعرفها مقامها فين بالظبط .. وعشان كدة لما روحت شقتهم زيارة طلبت من أبني تلاجة وتليكوم وسخان ... وهي ولا علي بالها .. البعيدة باردة ... ده أنا لوكنت منها كنت أترعبت وقلت في نفسي ... لما أنا علي البر وحماتي تعمل كدة فيا ... أمال لما أغوط في الجوازة هايتعمل فيا أيه ... لكن باين عليها البت سوسو دي ومش بتفهمها وهي طايرة ... لازم نصطادهالها ونحطها تحت مناخيرها تشوفها وياريتها بتشوف

فهمها بطيء بطيء بطيء ... غلطانة غلطانة .. كان حد يفهمها ياجماعة ..

ولو أني كدة بدأت أخاف علي أحفادي أحسن يطلعوا علي نياتهم وبينضحك عليهم ذي أمهم

وزعلانة أوي الهنومة عشان عيطت في فرح أبني ... وهي أيش داراها بإللي جوايا مش جايز دموع الفرح ... وهو فيه مناسبة أحسن من كدة الواحد يعيط فيها ...ده لولا الملامة كنت أديتها صوتين من نوعية يابعلي ياجملي يامستتني ... هي فاكرة أن الأمهات كلها ذي مامتها ... إللي ماصدقت أنها تخلص من بنتها ... وتسيبها لواحد غريب يشيل همها ويأكلها ويصرف عليها من جنيه لجنيه وربع

أوعوا يكون بيصرف عليها أكتر من كدة أحسن أشدلي محامي يحجر عليه ... بس بيني وبينكم الواد ساب مكانه برضه في بيتي ... أنا قلبي كان حاسس أنه هايوحشني ... بقي أوضة نومه هاتفضي عليا ... ماتعرفوش حد يأجرها مني مفروش ... والا صوته العالي إللي كان الجيران بيشتكوا منه خلاص مش هاأسمعه غير في المناسبات ... أجيب منين حد يعكنن علي جيراني غيره ... الواد أتخطف مالحقتش أسجل له كلامه قبل مايمشي ..هو كان مستعجل علي أيه ؟.ماله الجواز في الأربعين ولا حتي في الخمسين .. وهوفيه في الدنيا شاب يتجوز في التلاتين ؟؟؟ بكرة يندم ويقول ياريتني سمعت كلام مامي

العواف عليكم بقي عشان أمسح دموعي إللي لسة مانشفتش من يوميها
إهيء إهيء إهيء

هناك 45 تعليقًا:

Two in One يقول...

الله يكون فى عونك يا طنط

انا لو منك ماكونتش اجوزه خالص

خليه قاعد جنبي مونسني

على رأي ابلة كريمة

ده الضنا غالي يا ولاد

semsem يقول...

هههههههههههههههه
هههههههههههههههههههههههه
هو خلاص فوفو سيطرت على المدونة بجد ولا ايه
ههههههههههههههههههههه
عموما منورة انا اقدر اقول غير كده!!
ده انا غلبانه والله
ادعيلى حماتى تبقى طيبه
نياههاهاهاهاها

فارس بلا جواد يقول...

ههههههههههههههههه
حلوه قووووووى بجد
طبعا كالمعتاد
بجد المدونه دى لذيذه جدا
تحياتى

نعكشة يقول...

بس هوه حضرتك مذكرتيش أي عيب في البنت غير إنها متمسكة فيه
هوه دة عيب اليومين دول ؟؟؟

عامتاً ربنا يخليهم لبعض
و بارك الله لهما و عليها و جمع بينهما في خير
و رزقهم بالذرية الصالحة

و إن شاء الله يجيلك احفاد عساسيل يونسوكي يا جميلة

و يخليلك ابنك و يزورك كتير إن شاء الله
و تبقي زوجتة بنت ليكي

ربنا يفرحك دايماً

دمتي سالمة

سلامٌ عليكي

كلبوشستان يقول...

دي بدايه مشرررررقه ومليئه بالامل والتفاؤل والحمد لله

يعني اتجوز وما اشيلشي هم ولا ايه ؟؟مامتي حبيبتي هتجيب لي حقي تالت ومتلت نيااااااااهاااااااااااا

يا ست الحبايب

هو ايه صحيح التليكوم دا ؟؟ جهاز تجسس ؟ ولا نصنت ؟ولا لاسيلكي بعيد المدى ؟؟
اممممممممممممممم
على جثتي التليكوم دا يدخل البيت

فكرتيني بالموكوسه اللي عايزة بانيو في الحمام ؟ هات هات هات مفيش خد ابدا

دي بقت عيشه تطهق

بطوط حبوب يقول...

ههههههههههههههه

يااااااااارب امى متجيش تقرا البوست ده

مفقوعه عودى حماتك كده هتخلى امى ما تصدق ومش هعرف اروح اجوز وامى ما هتصدق


ندااااااااااء لاصحاب القلوب الرحيمه رجعولنا مفقوعه

HERO يقول...

من جنبه لجنيه وربع ؟؟؟ هههههههه
وبعدين صحيحان مكنتيش هتعيطي في فرح ابنك هتعيطي امتى ؟؟
الله يكون في عونك ده اللي عنده مراة ابن زي دي ويستحملها يدخل الجنة حدف

تحياتي

semsem يقول...

انتى وديتى مفقوعه حبيبتنا فين
اعترفى
انتى اللى اكلتيها صح
امممممممممممم
مبقولش حاجه حضرتك بالهنا والشفا
بس كنت بس عاوزاكى تبليغيها رساله مهمه
(((هى وحشتنا اوى)))
ههههههههههههههههه

الشنكوتي الكبير يقول...

سد يا فوفو سد
معلش يا حبيبتي هم البنات بتوع اليومين دول بقوا كده بعيد عنك فزااااااااااع
الواحده من دول ما تصدق تقفش في رقبة واحد عبيط تقوم تهبش فيه وتنسيه اهله كلهم مش امه بس

هنعمل ايه يعني اديكي بتحاولي معاهم يمكن اللي انكسر والغلطه اللي حصلت تتعوض بقى وتعرفي تاخد يحقك منهم

عموما خدي بالك بس لحسن البنت سوسو دي شكلها كده سوسه وعايزه توقعك قدام الناس وتطلعك انتي يا غلبانه يا حبيبتي قال ايه انتي اللي مفتريه عليها

فشششششششششر ما عاش اللي يقول عليكي مفتريه

اخص عليها
ناس معندهاش دم
سلاااااااااااااااااااااااااااام

شهد الكلمات يقول...

هي الست دي مش هاتتهد ولا اية شكلها عايزة تتسك ع نافوخها و عايزة واحدة مفترية و قوية ترنها عالقة عشان تعرف مقام سوسو
و انتي تاشري بس يا سوسو وانا اندهلك البلطجية اللي روقوا سيد غتاتة يجوا يروقوا ست هانم دي

رئـــــيسـة حزب الأحلام يقول...

عايوها تتهش ليه بس ياحاجة عايواها تعملك ايه بس
اتقوا الله بقى ورجعولنا البت

blue-wave يقول...

كالعادة زى العسل
تحياتى

همس الاحباب يقول...

ههههههههه
ربنا يصبرك على ما بلاكى يا طنط فيفى
مش عارف اقوللك ايه بنات لزقة بالغراء
ومفقوعة جايبة 6 كيلو غراء معاها فى الجهاز يعنى لزقة بالسدس
اقولك على حاجة شدى حيلك واخلعيها من دماغك انتى ترتاحى .

شفقة هانم واحسان بك يقول...

البوست تحفة بس علشان خاطرى بلاش عياط اهى اهى اهى

الزواج.....روضة الحب يقول...

وحشتيني جدااااااااااااا
إنتي لسة يا بنتي بتبعزقي علي فيفي من حسناتك
طب هاتي شوية
والا فيفي أغلي مني

snohe يقول...

اسلوبك جميل
والله فيه حموات زى العسل
لكن انا لسه مشفتهومش
سلام

مهيج الجماهير يقول...

دا انتى احتليتى المدونة بقى
حيث كدة ... انا معاكى طبعاً
و ربنا يديكى الصبر و طولة البال على اللى اسمها سوسو دى
( سامحنى يا رب )
يللا سلام

appy يقول...

والله يا طنط فيفى انا اقعده يغسل الاطبقا احسن




بنت يا مفقوعه مشى الست دى من هنا احسنلك انا اتخنقت ههههههههههههههههههههه

ana ga3an يقول...

طنط طنط
هي اية الحكاية
الناس مكبراكي لية كدة

الله يكون في عونك يا تيزة

الـجـدة فـصـيـحـة يقول...

السلام عليكم ورحمة الله وبركاته


هو ايه اللى حصل كل ما أجي الاقي فيفي
يابخت من زار وخفف يافيفي ورجعي المكان لصحابه
وأديكي عرفتي السكة وابقى عدي كل سنة ولا حاجة نطمئن عليكي


أما بقى موضوع أنا سوسو لازقة
فأنتِ تحمدي ربنا انه رزق ابنك واحدة تحافظ عليه وعلى بيته
مش مع اول مشكلة تهد البيت فوق دماغه


دمتم في رعاية الله

نوره الخشن ــ آي و كفاية يقول...

مابتفهمش ايييييييييييييه ده انتي اللي على نياتك
دي عاملة هابله المستهبلة

وبعدين المثل بيقول
اللي يخرج من داره ماينساش ياخد المفتاح معاه

اللي انتي كتباه ده بئى هنحرف المثل ولا ايييييييه
تؤ تؤ تؤ

وبعدين اوامك كده الواد يمشي عيزة تأجري الاوضه طب استني لما يربعن وبعدين هديها حتى لو تحبي

بس يلا مبروك وعوبال مايجيبلك زبلز صغننين

عبده الرايق يقول...

نو
نو
نو
متصدقيش كلامها
انا سمعتها بتقول انا بعيط لان الواد خساره فيها
وجايه دلوقتى تقول دموع الفرح؟
اوعى تصدقى
انا بس محضر خير
وغرضى الناس تبقى سمنه على عسل مع بعض
يلا بقى خدى حقك منها بسرعه
خير البر عاجله

مصطفي ريان يقول...

مفقوعة هانم
تحياتي لهذا البوست الجميل

bastokka طهقانة يقول...

ايه الحكاية بقى ده ازدواج سخسية و لا تلبس بالجريمة اقصد بالرووح بتاعك حماتشك

حابس حابس ربنا يجعل كلامنا خفيف عليها

اوروفوار

funckydoctor يقول...

استعوضى ربنا فيه بقى
ده سنة الحياة

maiosha يقول...

إيه ده ؟؟
مفقوعة راحت فين ؟؟
مفقوعة إلحقى المدونة حصل فيها إحتلال
فيفى إحتلت المدونة

عودى يا مفقوعة

ملحوظة لفيفى:

بجد يا فيفى لو إبنك بيصرف على البيت جنية وربع بحالهم ده يبقى مسرف .. لازم فعلا تحجرى عليه.. قال جنية وربع قال .. ليه كل ده .. هم 75 قرش ويبقى فضل وعدل

maiosha يقول...
أزال المؤلف هذا التعليق.
Son of Egypt يقول...

السلام عليكم بجد بجد زيارتك دى اثلجت صدرى ووسام على صدرى
نورتى المدونه عندى وكالعاده جيت افطس نفسى من الضحك على المواضيع الجميله دى
اهنيكى واحيكى على السرد الرائع للموضوع والله برافوا بوست رائع
تحياتى
nageh

Diyaa' يقول...

بصي بصي بصي..هو أنا خلاص بصمت بالعشرة إن البوستات دي مسخرة
هخش أضحك وبس :))
مش عايز أتكلم مشغول بضحك :))
تحياتي
وربنا يخليكم لبعض عشان تضحكونا علي طول كده :))

bar2ash يقول...

هي المدونه دي مش اسمها المفقوعه مرارتها من حماتها

هو انتي بقيتي حماة انتي كمان
ههههههههه

ولا انا اللي مش فاهم

ع العموم انا شايف ان الست اللي بتتكلم بلسان البوست دي صعععععععععبه جدا

ومفيش بنت تتحمل كده
الست دي بتفسر كل حاجه صح بمزاجها تبفي غلط

اتمني متكونيش انتي

نونو يقول...

اله يطمنك والله كتير جدااااااااا
خلاص بلاها موضوع الجواز خالص
يا سلام بقى على واحدة زلى ماما لا بتهش ولابتنش
مراتة ابنها ممكن تودييها البحر ونجبها عطشان
ربنا يهدى حماتك وتبقى زى ماما

صبرني يارب يقول...

اه يا سوسو يا مفتريه كده تقهري فيفي على بكريها

سوسو وربنا انا جايه ازورك من عند الجيران يا اختي كمبيوتري فى احلال وتجديد
وانا عند ماما

عيله مفتريه سابقا يقول...

يالهوى اوختشى
نفس احساسى لما اخويا ختب ، الموشكله ان البت واكله عقله مش بسلامتها على نيتها
لا دى من يومها وحرب وخراب يا دينا خراب
بس انا مسكوتش
طلبت واتشرطت واتأمرت
اوعى تنزلى دمعه واحده يا اوختشى اللهى يسترك قلبى بيتقطشع حتت وفتافيت

بس يا ستو امال فين مفقوعه انا قريت فى الجوابات انك حماتها

انا حمه اه بس طيبه يا طنط

عندكيش عريس


سلامى

صيدلانيه طالعه نازله يقول...

لو زعلانه قوى انه سابك هاتيهم يقعدوا معاكى يونسوكى و ياخدوا بحسك و ينكدوا على الجيران بالمره

Foxology يقول...

ههههههههههههههههههههههههههههههههه

ايه ده كله ؟؟؟

معشل يا فيفى تعيشى وتاخدى غيرها :))

حبيبـــــــة القمـــــر يقول...

الا قوليلي ياطنط فوفو عشان بس الواحد ميبقاش تقيل على حماة المستقبل ولا تفرج عليه امة لا اله الا الله
تفتكري الواحد يخلع يعني عند اول مشكله
كده ابقى كسبت حماتي وخسرت راجلي
وزغرطي بقىىى
لولولولولى
كله فدا عيونك

مقولتيش هتديني كام عالبوقين الحلوين دوووووول

اهو ده عيبه يقول...

ازيك يا سحر
هى فيفى احتلت المدونة ولا ايه
انا بجد احتج
وبطالب بعزلها
انا كده مش عارفه اخد راحتى هنا حاسه انها بتتصنط علينا
مشيها بقى الله يخليكى لحسن تاكلنا

دعاء مواجهات يقول...

ازيك ياقمر

وحشتيييييييينى مووووووووووت

إمواااااااااااااااة

إمواااااااااااة

سلاام

مؤقت

عروسة ننوسة يقول...

انتى تحفة ودمك زى السكر بجد بتموتينى من الضحك انتى معجونه بميه عفاريت
بس واحشتينى اوى

whisper TaNgOoO يقول...

يا عينى
هههههههههه
ع البنت طبعا
المدونه لذيذه بجد :)

3ala asm masr يقول...

هههههههههه
فعلا هو غلطان ليه مستعجل اوى كده؟

سومه...مجنونه فى بلد عاقل يقول...

هههههههههههه وحشانى موت يا سحوره واعزرينى على تقصيرى معاكى ان شاء الله مغيبش تانى
ياخد ديسكاونت على مقداره ههههههههه الله يخليكى يا طنط فيفيت
سلام سومه_87

Dr.Mohammed Gohary يقول...

ده إللي يخرج من داره ياخد ديسكاونت علي مقداره

هههههههههههههههههههههههههه
ميه ميه
فكر مووووووووووز

زيارااااااات بس من غير بيات
ههههههههههههههه هو دا الحل
آه والنيعمة


... ده أنا لوكنت منها كنت أترعبت وقلت في نفسي ... لما أنا علي البر وحماتي تعمل كدة فيا ... أمال لما أغوط في الجوازة هايتعمل فيا أيه ...

ههههههههههههههههههههههههههه تغوط في الجوازة؟؟؟؟؟؟؟ ايه هيا نازلة بحر ههههههههههههههههههه
وبعدين اتجوز وأشيل همي بدل ما أقعد جنب امي هيا في نفسها بتقول كدا
هههههههههههههههههههههههههههههه

فهمها بطيء بطيء بطيء ... غلطانة غلطانة .. كان حد يفهمها ياجماعة ..

بسيطة هسيبوا للأيااااااااااااااام وحماتوا هتعلموا
نياهاهاهاهاهاااااااااااااااااااا
ههههههههههههههههههههههههههههه

وزعلانة أوي الهنومة عشان عيطت في فرح أبني ... وهي أيش داراها بإللي جوايا مش جايز دموع الفرح

أنا عااااارف ياختشششششي البت دي نيتها أبيحة ولازم تتربي ربيهاااا ههههههههههههههههههه

أوعوا يكون بيصرف عليها أكتر من كدة أحسن أشدلي محامي يحجر عليه
هههههههههههههه دانتي غلبانه خالص وعايشة في الخنتاريش دانا سامع انه بيجيبلها كل يوم أيس كريم من أبو جنية ونص دا وساعات ميجا وساعات يغديها برة دي خاربه بيته شدي محامي شدي ولو مش قادرة تشديه اجيبلك عربية نقل وحبل وأشدهولك
هههههههههههههههههههههههههههههه



العواف عليكم بقي عشان أمسح دموعي إللي لسة مانشفتش من يوميها

الله يعافيكي ياختشششششششششششششي

طب والنبي انتنيب زي العسل
هههههههههههههههههههههههههههه


تحياتي

new mami يقول...

ههههههههههههههههههه بجد موضوع رائع تسلم ايدك
وفعلا اللى يشوف حماه غيره....
ربنا يكرمنا كلنا ويقويناا ويدخلنا الجنه جزاءاا على صبرنا ههههههههههههههههه

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
شات صوتي
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه