الجمعة، 18 يوليو، 2008

الدهن في العتاقي



يعني ما بقاش حد يسأل عن البت سوسو المسلوعة ... مش بذمتكم أنا ألذ منها بكتير ..

ماهو الجزارين يقولولك الدهن في العتاقي
وأنا مش ممكن أكذب الجزار ين أبداً .. هو حد في الدنيا يفهم قدهم ؟
مش هما إللي قالوا الحد والمستحد مش لعبة أي حد ... ولا سكينة ولا ساطور أحنا إللي قتلنا التور
خلونا في سوسو ... بلاش التشتيت ... مش تباركولي .. مش الواد أبني طلع أبن أصول بصحيح وطمرت فيه التربية وساب المدهولة علي عينها عروسته في الصباحية ودخل بيتي ذي القمر المدور .. وحب علي أيدي وقفلها علي فلوس .. وأنا ماأقدرش أكسف أيده... كانت نفسه تنكسر لو قلت له لأة بلاش أنت محتاجهم ... وبعدين ماهم خدوا علي قلبهم قد كدة نقوط ... وأشترالي شقتين فول وشقتين طعمية .. أربع شقق في عين العدو ... عقبال ماأشوفهم بالمسلح ... قولوا آميين ... وطلبت منه يعمل فيا معروف ويشتريلي الشاي والسكر عشان أمخمخ ... ماهو لازم يشوف طلباتي قبل مايسافر يقضي يومين عسل في الغردقة ... عسل أسود علي قلبها البعيدة ... طبعاً الست سوسو ماقالتش عن رحلة الغردقة دي ... هاتقول أيه ... ماأنا سيبته يفسحها هناك ولا بركت علي نفسهم ولا لمحت أنهم ياخدوني معاهم ولا حاجة ... وألا بس تفتكرنا في الحاجات الوحشة وتنسي جمايلي عليها ... وياريتهم أنبسطوا هناك دول رجعوا متخانقين ... أحسن ده ذنبي ... بس بيني وبينكم أنا كان نفسي أشوف الغردقة دي ... ده أنا لو خرجت برة بيتنا دلوقتي أتوه ... الله يرحم الصحة وسنينها ... كنت زمان بألف الدنيا طولها وعرضها ... وكله بالطيارة ... أحسن تكونوا فاكريني هفية ... لأ دي البت سوسو المفعوصة دي لا شافت ولا هاتشوف فسحة من فسحاتي
وقال الست هانم المتبغددة مستكتر ة عليا تيجي تزورني بعد تلات أيام من جوازها ... هي هاتعمل فيها عروسة وعلي رجليها نقش الحنة ...يعني عاوزاني أنا العضمة الكبيرة إللي أهز شحمي ولحمي .. وأزورها في بيتها ... بقي ده أسمه كلاااااااام ياناس ؟
وزعلانة أوي إني شتمتها ... وماله مش بقت في مقام بنتي ... أنا آه مابشتمش ولادي بس إيش جاب لجاب هما رجالة لكن هي بنت ... وبعدين أنا متعودة أشتم أجدعها شنبات ولا بيهمني ... هاآجي عندها وأعمل مستحية ...بيني وبينكم أنا كنت بأجس النبض ...لوكانت ماشغلتش موتور الدموع .. كان هايبقي كله من ده .. بس البت أتدلعت فيها وكأني ضربتها بالنار .. ضربة في قلبها ... ومحموقة أوي عشان الواد قعد يبوس فيا ونسيها .. وهو بيبوس حد غريب ... هي هاتغير من أمه كمان ... يعني عاوزة تشوفني بأطق من جنابي ومستكترة عليا يطيب خاطري ببوستين
ده علي رأي المثل لو أجتمعت مامتك بمراتك ... أمك هي الأولي بالبوسة .. بلا وكسة
بوناسيرة عليكم بقي ... هأقوم أفتح الباب لأبني أحسن جاي يطمن علي المدام بتاعته المحبوسة في أوضة الفيران

هناك 75 تعليقًا:

semsem يقول...

ارجوكى
افرجى عن سوسو
ينوبك ثواب دي طيبة

kochia يقول...

هي تستاهل اكتر من كدة عشان اتجوزت ابنك
هي كانت راسمة علي ايه يعني
تاخده منك
ولا يمكن فكرت اني هتكبري وتحبسك هي في اوضة الفيران

ولا يمكن فكرت انك ام طبيعية وهتسيبها تعيش حياتها عادي زي مانتي عشتي ايامك مع جوزك
الا حماتك كنتي بتعملي فيها ايه ؟؟؟

بقوللك
ابقي خرجيها كدة تشم هوا من وقت للتاني لحسن يجرالها حاجة ويتهموكي فيها

انا خايفة عليكي
واسم الله عليكي وعلي ابنك المحروس من العين

Two in One يقول...

يا طنط يا طنط انا جيالك بمفاجعة
انتي صعبتي عليه خالص خالص من حبستك
و ابنك المزغود ومراته المفقوعة بيتفسحوا وانتي لا
اخس عليهم
اخس
اخس
اخس

ولا يهمك يا طنط .. غردقة ايه ديه اللي عايزة تروحيها ديه مش من مقاممك
انا حجزتلك فى رحلة هتنبسطي فيها خالص خالص خالص
حجزتلك طيارة لجوانتيناموووووووووووووووووووو
اللي كل اللي راحوها نامووووووو
ناموا النومة الابدددددددددددددية
هههههههههه

شهد الكلمات يقول...

يا معقدة بطلي عقد ع سوسو ولا عشان حماتك طلعت عينك في جوازك عايزة تطلعي عين سوسو البريئة
و هي ذنبها اية اذا كنتي قرشانة و سوسة و قرفتي حماتك و هي طلعت عينك تقومي مركبات النقص اللي عندك تطلعيها ع الغلبانة
عموما انا عملت اتصالاتي و هاتلاقي البوليس بيخبط ع الباب دلوقت و يخلص المسكينة من فيرانك يا لأيمة

Son of Egypt يقول...

ايه ده يا مفقوعه
ايه اللى بتعمليه ده والله حرام عليكى مش سوسو الملسوعه لا ابنك
خليك ياخد راحته شويه مع سوسو
وخرجيها له من الأوضه بتاع الفران
هو انا بكلم مارى منيب
انتى لازم تغيرى عنوان مدونتك للعكس
مفقوعه تحياتى ودوام التوفيق
nageh

maiosha يقول...

حرام عليكى يا فيفى
كمان حابسة سوسو فى أوضة الفيران
أنا هبعت لمجلس الأمن يفك الأسر ده.. هجبلك قرار إزالة

سوسو عودى يا سوسو .. متقلقيش هنروح نجيب شوية دبابات على كام أر بى جى ونعمل غزو على فيفى وننقذك

وينكى يقول...

ياااااااااماااااااااماااااااااا
يالهوى يالهوى
ايه ده؟؟؟
هو انا دخلت المدونه بالغلط ولا ايييييييييه
بدل ما ادخل مدونة اللى اتفقعت مرارتها دخلت مدونة حماتها
تاكسييييييييي

فاتيما يقول...

بصى بقى يا حاجة
الحكاية شكلها كدا فشنك
لا سوسو مخطوفة
و لا جوزها إتجوز عليها
و لا حاجة
إنتى قعدتى تتحايلى على مفقوعة
و البنت إكمنها إخلاق صعبتى عليها
و قالتلك إتفضلى المدونة يا فيفى
فكى عن نفسك ببوستين تلاتة و لا حاجة
يا سحورة روحى الست دى بيتها
وحشتينا قوى و حاسبى منها لتاخد المدونة بوضع اليد
ولو مش عايزة تمشى بالحسنى
قوليلى
أبعتلك الاربعة بتوعى

appy يقول...

ههههههههههههه انا فرحانه فيكى يا سوسوه بس خلاص

همس الاحباب يقول...

مش القوى فيه الاقوى منه
والمفترى فيه المفترى اكتر منه
شدى حيلك يا فيفى
وياريت تخلصى على سوسو وتريحينا منها ومن صداعها
بس بلاش اوضة الفئران انا مش خايف على سوسو لا سمح الله
بصراحة خايف على المخلوقات الرقيقة اللى اسمها فئران من الست سوسو احسن تطفشهم وينقرضوا من الحياة
تحياتى يا ست فيفى وانا معاكى قلبا وقالبا .

واحدة مفروسة يقول...

انتي يا حااااجه
يا حااااجة
تصدقي البت سوسو ...مش هيه صحبتي و حبيبتي...الروح بالروح؟؟؟؟!!!
لكن تستاهل انها تتحط في اوضة الفران....مش بس الفران لأ و السحالي كماااان
و لعلمك حلال اللي انتي بتعمليه فيها ده.....
و بعدين اصلا اصلا...انتي يوم فرحهم كنت بيتي المحروس ابنك جنبك ....في حضنك

صراحة البت سوسو تستاهل كل اللي يجرالها
ديه جوازه تتجوزها؟؟؟؟!!!
و لا ديه حما تناسبها؟؟؟!!!
المفروض كانت عملتلك اختبار الاول...و ان معجبتيهاش....ما كانتش تكمل الجوازه...بس الصراحه تتستاهل

انا معاكي فى كل اللي بتعمليه فيها

ashraketamal يقول...

مفقوعة مرارتها

شو هاد موضوع يجنن هما فعلا الحموات جمع حمايه يعني المفتريات ممكن يعملوا كدا

ربنا يكون بعون سوسو ويسامحها ربنا هي دي جوازة توقع فيها

بس رجاء رجاء كبير انك تخرجيها من غرفة الفيران احسن تبقة جربه وبعد كدة تعديكي انا خايفة عليكي

سلام تقبلى مروري تعليقى

wanna b a physician يقول...

محبوسه فى اوضة الفيران ياعينى يا سوسو
ليكى الجنة (وش بيعيط)

فارس بلا جواد يقول...

السلام عليكم ورحمة الله وبركاته
بالراحه على سوسو

تحياتى

أحسن تـستاهـل يقول...

خاف الله خااااااااااااااف
ارحمني
ما تضربنيش

ده نشيد الأسرة بتاعتكو انا عارفة انا عارفة ما تحلفيش خلاص

مها ميهوووو

سبهللة يقول...

تصدقى انت ست طيبة والبت دى ظالماكى
مش كفاية انك ما سافرتيش معاهم فى شهر العسل
هى هاتنهب ؟؟
دى المفروض تشيلك الجميلة اليتيمة دى طول العمر
بت قليلة الاصل صحيح
تصدقى انتى ابتديتى تصعبى علينا
يالا خليها فى اوضة الفيران يمكن تعرف قيمة الحرية اللى هى اتبطرت عليها

شفقة هانم واحسان بك يقول...

ههههههههههههههههه
كده برضوا لسه حبساها فى اوضة الفيران واللهى حرامى عليكى البت هتفطس
شفقة

مهيج الجماهير يقول...

تستاهل
مش هى اللى وافقت على الحوازة من الأول ؟
تشيل بقى
تحياتى ليكى
سلام

زفته وقطران يقول...

ارحميني ياست انت
كمان عاوزه تروحي الغردقه
انت لسه فيكي نفس ارحمينا بقي

ثم متخرجي من بيتك وتوهي

ثم سوسو تستاهل مكنش المفروض تتجوز ابنك لو حتي حتعنس بعدها
العنوسه ارحم
روحي طلعيها
وخلي ابنك يطلقها ويريحها منك

semsema يقول...

ارحمى من فى الارض ليرحمك من فى السماء

نوره الخشن يقول...

طب دهنتيها عسل اسود قبل ماتحطيها في اوضة الفيران ولا اييييييه
طب انا برضو مش فاهمة انتي زعلانة عشان الزيارة ولا البوسة ولا الغردقة ولا عيزة منها ايه دلوقتي
ولا هو جر شكل وخلاص
ياربيييييي .. يلا هنعمل ايه المؤمن دائماً مصاب

الشنكوتي الكبير يقول...

ربنا معاكي يا مفقووووووووووعه

اما انتي يا طنط فبصراحه كنت عايز اعرف بس من حضرتك هو انتي ناويه تفتحي محل جزاره وتبقى معلم قد الدنيا
علشان لو ناويه اجي اشتغل معاكي في المحل بعد الضهر واهو نستنفع
هههههههههههههههه

سلااااااااااااااااااااااااام

funckydoctor يقول...

برضه اكيد سعادتك عندك حق بنات اخر زمن ايه دهيا اختشى حاجة غريبة
الواد يروح الغردقة ويسيبك لالالا ده كتير قوى :D

عبده الرايق يقول...

فينك ياسحر الغيبه طالت
والضاحكون مفتقدينك
ياريت تطمنينا عليكى

مهيج الجماهير يقول...

سلامو عليكو
انا سيبتلك واجب عندى
عاوزين نشوف اجابات الحموات بقى
الواجب من هنا

تحياتى

شفقة هانم واحسان بك يقول...

انتى فين وحشتينا اوى اوى
ليه مختفية؟؟
شفقة

نونو يقول...

حسبى الله ونعم الوكييييييييييييييل
لهم فى الدنيا ولنا فى الاخرة

ربنا على الظالم والمفترى

واحدة مفروسة يقول...

سمع هووووووووووووووووس
الاخت سوسو اخدتها حماتها
وحلفت ميت يمين لتخرجها من الحبس الانفرادي على البحر عدل
تغرقها هناك
قوم سوس تغطس و تقب
تغطس وتقب
وهيه هناك لازالت بتغطس و لازالت بتقب
و حنشوف مين اللي حينتصر فى الآخر

ساعد نسرين الايمن يقول...

هههههههههههههههههههه

طيب بتشطر ع سوسو
طيب استلقي وعدك بقي لما امها تعرف

كمان هي لازم تغير لما يبوسك
انا عافر واحدة اتخانقت مع جوزها لما باس ايده وش وظهره

مفتقدك ع فكرة

الارهاب المنزلى يقول...

هو لسه فى اود فيران

حماتك دى قديمة اوى

قلب يحترق يقول...

نهارك اسود

انتي حابساها في أوضة الفيران

حرام عليكي يا شيخة

الـجـدة فـصـيـحـة يقول...

السلام عليكم ورحمة الله وبركاته

ربنا يفك سجنك ياسوسو

على فكرة يافيفي أنتِ كتير جدًا بيكون عندك حق في منطقك بشكل ما
لكن للأسف اسلوبك الغلط بيجيب الغلط عليكِ في الأخر
ما لو بتستخدمي أسلوب الحسنة كل طلباتك تكون أوامر من غير نكد والحياة هاتكون حلوة أوي


دمتم في رعاية الله

mostafa rayan يقول...

بوست جميل كالعادة
تحياتي ليكي

سومه...مجنونه فى بلد عاقل يقول...

زى العسل يا مفقوعه لولا انى مش قادره اطلع الضحكه من قلبى بعد الخبر القهرى بتاع امبارح
تحاتى ليكى سومه_87

Dr.Mohammed Gohary يقول...

هههههههههههههههه

والله داخل بإيدي اليمين

هههههههههههههههههههههههههه
مبروك محل الجزارة اللي فتحتية
بس عاوز اتنين كيلو كيلو ريش من بين الضلوع وكيلو من الفخدة وحته موزة وحتة دهنة وعضماية علشان الشوربة
نياهاهاهاااااااا
ههههههههههههههههههههههههههه

بس اي الامثال دي
حلو حوار الحد والمستحد
عرفتية منين
مش بقولك سووووووووووووسة
هههههههههههههههههههههههه

طبعا انتي احلي من سوسو ايه سوسو المسلوعة دي لما تكلبظ شوية نبقا نشوفها
هههههههههههههههههههههههههههه


مش الواد أبني طلع أبن أصول بصحيح وطمرت فيه التربية وساب المدهولة علي عينها عروسته في الصباحية ودخل بيتي ذي القمر المدور .. وحب علي أيدي وقفلها علي فلوس

هيء هيء هيء هيء هيء هيء
دي احلام اليقظة صح
نياهاهاهاهاااااااااااا
دا الواحد ما بيصدق يمسك عروسته ما بيطلعش الا بعد أسبوع ههههههههه يوم هو يطلعلك يوم الصباحية ويأبجك كمان
ههههههههههههههههه دي أحلام
نياهاهاهااااااااااااا


وياريتهم أنبسطوا هناك دول رجعوا متخانقين ... أحسن ده ذنبي

قال لو كانوا رجعوا مبسوطين كنتي هتنبسطي هههههههههه الحماه حماه ولو ملاك من السما
هيء هيء هيء
ههههههههههههههههههههههههههههه

وزعلانة أوي إني شتمتها ... وماله مش بقت في مقام بنتي

لا والله عندك حق
هيء هيء هيء
وانا اللي فاكرك طيبة دانتي حمااااااااااه .........تيييييت....
هههههههههههههههههههههههههه

ومحموقة أوي عشان الواد قعد يبوس فيا ونسيها .. وهو بيبوس حد غريب

هههههههههههههههههه أنا عارف
دا حتي انتي أجمل منها يعني لازم يبوسك انتي وينفضلها
ههههههههههههههههههههههههههههههه

هأقوم أفتح الباب لأبني أحسن جاي يطمن علي المدام بتاعته المحبوسة في أوضة الفيران

انتي كمان حبستيها في اوضة الفيران ههههههههههههههههههههه لا والله انتي كريمة خالص وطيبة خالص
ههههههههههههههههههههههههههههههه


لك تحيتي
بس انا عارف انك طيبة وعمرك ما تعملي كدا
ههههههههههههههههههههههههههههه

خالص تقديري
بعدي أهووووو هااااااااا

سلااااااااااامووووووووووووووووووون

المـــفـــــــقــــــــوعـــــة مــرارتـهــا يقول...

semsem
----------------
سوسو بح
سوسو مافيش
سوسو خلص وماتسألونيش

المـــفـــــــقــــــــوعـــــة مــرارتـهــا يقول...

kochia
==================
الهوا هوايا وبس
انتي عاوزاني اخرجها في الهوا كمان
دي كانت تبقي عيبة في حقي وحق الحماوات كلهم

المـــفـــــــقــــــــوعـــــة مــرارتـهــا يقول...

Two in One
===================
لا ابدا لا يمكن ابداً مااروحش انا جوانتي دي
انا قاعدة علي قلب المفعوصة لحد مانشوف ياانا ياانا

المـــفـــــــقــــــــوعـــــة مــرارتـهــا يقول...

شهد الكلمات
====================
مابلاش نجيب سيرة النايمين
احسن روح حماتي تطلع تظبط الأريال وتلرجع تاني

المـــفـــــــقــــــــوعـــــة مــرارتـهــا يقول...

Son of Egypt
------------------
كلنا مفقوعين
دمتم لنا

المـــفـــــــقــــــــوعـــــة مــرارتـهــا يقول...

maiosha
=================
مالها الفيران
حد يطول يعيش مع الفيران في اوضة واحدة

المـــفـــــــقــــــــوعـــــة مــرارتـهــا يقول...

وينكى
==================
بلاها تاكسي خدي توك توك

المـــفـــــــقــــــــوعـــــة مــرارتـهــا يقول...

فاتيما
==============
هاتي الاربعة وانا اكلهم علي مزاجك
وبكرة ينسوا فاتيما ويقعدوا مع حماة مفقوعة

المـــفـــــــقــــــــوعـــــة مــرارتـهــا يقول...

appy
==============
مش كدة برضه
اللي ييجي علي فيفي مايكسبش يدخل اوضة الفيران

المـــفـــــــقــــــــوعـــــة مــرارتـهــا يقول...

همس الاحباب
====================
ماتخافش علي المخلوقات الرقيقة اللي اسمها فيران
دول فيران قوات خاصة اوي يعرفوا يمشوا امورهم مع المتوحشة سوسو

المـــفـــــــقــــــــوعـــــة مــرارتـهــا يقول...

واحدة مفروسة
====================
لا بقي انتي اللي غلطانة
بقي فيه حد عاقل يصاحب واحدة حماتها فيفي
دي لازم ابراج حمامها طايرة من زمان
وبكرةتطيرلك ابراجك انتي كمان

المـــفـــــــقــــــــوعـــــة مــرارتـهــا يقول...

ashraketamal
=================
ماتخافيش
مانا لما هااخرجها هابقي احميها بالديتول والفنيك
انا مايتخافش عليا

المـــفـــــــقــــــــوعـــــة مــرارتـهــا يقول...

wanna b a physician
==========================
ووش بيعيط ليه
حقك تعمل وش بيضحك وش بيفرفش
وش بيرقص
ورقصهم ياجدع
عشان ماليش نفس ارقص

المـــفـــــــقــــــــوعـــــة مــرارتـهــا يقول...

فارس بلا جواد
=====================
هو ده اللي قدرك عليه ربنا
ده بدال ماتقوللي اديها ادي وماترحميهاش

المـــفـــــــقــــــــوعـــــة مــرارتـهــا يقول...

أحسن تـستاهـل
=====================
ماتخافوش احنا بنضرب المعازيم اللي بييجوا يشربوا بيبس كولا بس لكن الضيوف الخفاف بنشيلهم علي المشاية اللي علي مدخل البيت

المـــفـــــــقــــــــوعـــــة مــرارتـهــا يقول...

مهيج الجماهير
====================
انبي تقول لهم
هو انا اللي قلتلها تناسبني

المـــفـــــــقــــــــوعـــــة مــرارتـهــا يقول...

زفته وقطران
===================
بصي يازفتة
بقي سلامة في الغردقة والغردقة راحها عمنا سلامة
هو انا اقل من سلامة عشان اتحرم من الغردقة
ماليش دعوة انا عاوزة اتغردق
ها

المـــفـــــــقــــــــوعـــــة مــرارتـهــا يقول...

semsema
==================
وهو فيه زيي في الدنيا
ماانا بارحم القطط والكلاب اللي في الشوارع
يعني اقطع نفسي

المـــفـــــــقــــــــوعـــــة مــرارتـهــا يقول...

نوره الخشن
=====================
انا زعلانة انا مقموصة
يعني بلاش اخرج اللي في بالي

المـــفـــــــقــــــــوعـــــة مــرارتـهــا يقول...

الشنكوتي الكبير
=======================
تعالي بس بشرط تنزل اعلان في الجرايد تكتب فيه
تحيا فيفي نصيرة الشوباب
وانا هااشغلك صبي جزار يادوب تحط ايدك علي الزورار عشان تشغل المفرمة وتقفلها
بس هات شهادة خبرة من جزار عجول

المـــفـــــــقــــــــوعـــــة مــرارتـهــا يقول...

funckydoctor
==================
يالا بكرة يندموا علي غلطتهم في حق فيفي

المـــفـــــــقــــــــوعـــــة مــرارتـهــا يقول...

عبده الرايق
=====================
انا كنت بأصيف في الاكسندرية ربنا مايوريك زحمتها

المـــفـــــــقــــــــوعـــــة مــرارتـهــا يقول...

مهيج الجماهير
===================
وعليكم السلام هااشوف وارد عليك يامعلم

المـــفـــــــقــــــــوعـــــة مــرارتـهــا يقول...

سبهللة
==============
طب عن اذنك بقي عشان اروح ابلغها علي كلامك دهوه عشان تعرف انتي قد ايه قلبك عليها وبتحبيها

المـــفـــــــقــــــــوعـــــة مــرارتـهــا يقول...

شفقة واحسان
==================
انا هنا بس مكسلة شوية

المـــفـــــــقــــــــوعـــــة مــرارتـهــا يقول...

نونو
==================
ليه كدة يانونو ده انا حلوة ولذيذة وعندي نفس عزيزة

المـــفـــــــقــــــــوعـــــة مــرارتـهــا يقول...

ساعد نسرين الايمن
======================
يادي الفضيحة ياولاد
بقي واحد يبوس ايده وش وضهر قدان مراته
ده انا لو كنت مكانها كنت اكلته

المـــفـــــــقــــــــوعـــــة مــرارتـهــا يقول...

الارهاب المنزلى
=====================
اسسسسسسكت مش اسمها اتغير وبقي اوضة الماوث والحشرات الزاحفة

المـــفـــــــقــــــــوعـــــة مــرارتـهــا يقول...

قلب يحترق
==================
كله يهون في سبيل الخسسان
دي كان حقها تدفعلي

المـــفـــــــقــــــــوعـــــة مــرارتـهــا يقول...

الـجـدة فـصـيـحـة
====================
مش كدة برضه عداني العيب وقزح وخد في وشه وقال يافكيك

المـــفـــــــقــــــــوعـــــة مــرارتـهــا يقول...

mostafa rayan
=====================
منور يامصطفي الدار

المـــفـــــــقــــــــوعـــــة مــرارتـهــا يقول...

سومة المجنونة
==================
ماعلش ياختي
ماهو ده سلو البلد دي
اللي يعيش باما يشوف واللي يركب العبارة عمره ماراح يشوف حاجة

المـــفـــــــقــــــــوعـــــة مــرارتـهــا يقول...

Dr.Mohammed Gohary
=========================
ربنا يديم الزيارات
بس فين قفص البرتقان الزيارة اللي كان مفروض تدخل عليا بيهم
روح وتعالي ومعاك القفص

bos bos يقول...

هههههههههههههههه

حرام عليكى هموت من الضحك

بنوته مصرية يقول...

هههههههههههههههههههههه

لية يا فيفي كدا لو سمحتي دي صحبتي














اشتمي فيها برحتك زي بنتك برضة ههههههههههههههه

السماء الداميه يقول...

ارحمي سوسو ينوبك ثواب


انا سعيد بزيارتى الاولى لمدونتك

واتمنى انا اعرف رايم فى مدونتى ونتبادل الروابط ونتواصل معا فى التعليقات

semsema يقول...

ايه يا قمر انتى اول مرة تتاخرى انك تنزلى موضوع كده
انا عارفة انك نشيطة اوى
بس اكيد انتى مشغولة
ولا احنا قرينا عليكى

عموما انا بطمن عليكى بس
تحياتى

المـــفـــــــقــــــــوعـــــة مــرارتـهــا يقول...

bos bos



===============
الضحك مفيد في تفتيح لون البشرة
وفي فتح المناخير وغسل المواعين

المـــفـــــــقــــــــوعـــــة مــرارتـهــا يقول...

بنوته مصرية
===============
بقي دي ذي بنتي


السماء الداميه
==============
مبروك أنضمامك للأسرة التدوينية
أكيد هاأزورك

semsema
===============
ماعلش بقي
انتي عارفة الحر والصيف
هانزل جديد من عينيا

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
شات صوتي
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه