الثلاثاء، 9 سبتمبر 2008

حقيبة إسعافات هيفاء وهبي

موضوع من موضوعاتي في مجلة علّي صوتك الالكترونية
قانون المرور الجديد... يجعل كلامنا خفيف عليه... أوجب تواجد حقيبة إسعافات أولية داخل حقيبة السيارة فما هي مُحتويات تلك الحقيبة المُعجزة التي ستسوي الهوايل وستصنع المُعجزات وتُعيد الشباب وتشفي الجروح
وسيصبح المواطن مننا طبيب يستطيع ان ينقذ حياة الألف في طريقه.. ياواد ياجامد أنت وهو
فإذا صادفت في طريقك للشغل مثلاً رجلاً يكاد يفقد حياته بعد حادثة سيارة تحطمت نتيجة لها أضلعه فعليك أيها الرجل الهُمام أن تقف بسيارتك وتُخرج عدة الشغل.. الحقيبة الجهنمية وتبدأ في ممارسة مهامك الجديدة كطبيب مُحنك
قم أولاً بتطهير الجرح ولا تنسي أن تترك القليل من المُطهر في الزجاجة حتي لا تأخذ مخالفة مرور إذا صادفتك لجنة في طريقك بعد ذلك وضع علي الجرح القليل أيضاً من الميكروكروم ثم ضع قطنة ولفها بقطعة شاش ولا تنسي أن تقيس له الضغط لعل ربنا يجعل في جهاز ضغطك الشفاء العاجل أو هاتها من الآخر وأستخدم العلاج الأكيد لجميع حالات كسور العظام بمختلف أشكلها وبوس الواوا ذي ما الدكتورة هيفاء بتقول
ولهذا أقدم أقتراحي المتواضع للحكومة العظيمة لكي تستطيع جذب الشعب الغير مُطيع إلي شراء حقيبة الإسعافات الأولية بلا مُجادلة قد تسبب صداع مُزمن في دماغ السادة المسؤلين ربنا يصدعنا ويشفيهم... وهذا الأقتراح يتمثل ببساطة في إطلاق اسم هيفاء وهبي علي حقيبة الإسعافات الأولية المُقترحة حتي يُقبل علي شرائها جميع المواطنين ... كله هايبوس الواوا.. بل ستجد تلك الحقيبة المُفتخرة قد حلت محل زوجة قائد السيارة وأحتلت المقعد الأمامي من السيارة وسيضع قائد السيارة المدام مكانها في صندوق السيارة حتي يخلوا له الجو مع حقيبة المُعجزات.. ولا عزاء للزوجات.
وتأكد عزيزي المواطن أنك مع هيفاء في أيد أمينة
وإذا لم يحوذ هذا الإقتراح علي الإعجاب فهناك حل أخر وهو إصطحاب طبيب عظام وطبيب تخدير وطبيب باطني معكم في السيارة تحسباً لأي حادث قد يعترض طريق السلامة الذي هو بالقطع طريقك...وبذلك نوجد حل لبطالة الأطباء وسيكون شعار الحملة هو حتي لا تصبح فريسة للطريق لا تنسي أن تصطحب معك الطبيب

ومازال الكلام مُستمراً عن حقيبة الاسعافات التي فرضتها حكومتنا المصون علينا مؤخراً والتي ستتسبب في تحويل حالة المُصابين إلي حالات حرجة وسيعود بنا الزمان إلي فهلوة حلاق الصحة الذي لم يكن يفهم شيئاً ولكنه يؤدي العديد من العمليات الجراحية والتي قد تتسبب في قتل الكثيرين نتيجة جهلنا بأصول إجراء الجراحات وبالفعل حصل كل مواطن لديه سيارة علي رخصة لعلاج ومداواة الجرحي مادام يملك حقيبة اسعافات أولية في حقيبة سيارته... أحب أقول ان العلم في الراس مش في الحقيبة... في بلاد برة عندهم اسعاف طائر وسيارات اسعاف تُحترم بديلاً عن تلك الحقائب الديكورية التي لن تُفيد بل قد يُساء أستخدامها
وسنجد أنه من الأمور البديهية التي نتعلمها عندما كنا نأخذ مباديء الاسعافات الاولية في المدارس انه يجب الا يتم تحريك المُصاب في حادث قد يكون لديه كسر في عظامه أو نزيف داخلي إلا في وجود مختص حتي لا تتفاقم الحالة ويصعب علاجها.
ولأنني علي يقين من أن تلك الحقيبة ستنزل الأسواق ويصاحبها لسان ليغيظ في أرائنا المُعترضة أرجو أن يكون هناك برنامج يبث علينا من الحين للآخر المُعجزات التي تؤديها تلك الحقيبة في شفاء الحالات الحرجة مع عمل لقاءات مع المواطنين الشجعان الذين أستطاعوا معالجة المرضي بتلك الحقيبة المُعجزة، وذلك حتي يتأكد لنا ظلمنا لقرارات الحكومة الذكية ولنعلم يقيناً أننا شعب مُفتري لا يُقدر كم المجهود الذي يتكبده من أجل سلامتنا صانعوا القرار.
سحر غريب

هناك 27 تعليقًا:

د. إيمان مكاوي يقول...

عرض رائع للموضوع ..سلمت أفكارك
وبالنسبه لموضوع الشنطه فهو مجرد تقليعه من تقليعات حكومتنا المبجله بدون دراسه أو حتى نظر في أحوال من سينفذون هذا القانون
ربنا يرحمنا ويرزقنا بناس بتفهم
تحياتي
وكل سنه وإنت طيبه

nona يقول...

طبعا انتى بتقولى اية دية حقيبة الاسعاف هتسوى الهوايل
هتاخد مكان فى شنطة العربية
هتشيل اتنين كيلو تراب عليها
هتخلى كل واحد يهتم بنضافة العربية عشان الشنطة تبقا نضيفة و ماياخدتش مخلفة
ممكن بعد كدة تديها للولاد الصغيرين يلعبوا بيها
عادى يا بنتى احنا اتعودنا اننا حقل تجارب كل شوية ينزلوا قرار جديد او يشيلوا قرار جديد
زاى قالوا لازم كل سواق تاكسى يحط عداد للعربية و الاى ما يحطش عداد ياخد مخلفة 300 جنية و العربية تاخد وقف من الشغل شهر
قال يعنى العداد دة خيشتغل و الناس هتدفع زاى ما العداد يقولوا
ربنا يرحمنا

عالم ماريونت يقول...

بصراحة الواحد مبقاش يعرف يفرق بين القوانين
اية صح واية غلط
اهي كلها قوانين
العبرة باللي بيتنفذ فعلا
احنا بلد العشوائية
تحياتي ليكي وكل سنة وانتي طيبة
اختك رنا

blue-wave يقول...

هههههههههههههه
حلوة الفكرة
مع اعتراضى على حكاية اصطحاب الطبيب دى:))
تحياتى

غير معرف يقول...

كل سنه وانت طيبه
فين ارائك السديده...عنوانا ما يتوهش
http://netonradio.blogspot.com

Ahmed Al-Sabbagh يقول...

هههههه
والله موضوع جامد جدا
وبتعجبنى موضوعاتك فى المجلة
تقديرى ومحبتى

شفـقــة و إحســــان يقول...

برافو عليكى غبتى شوية بس رجعت ببوست جنان وحشتينا اوى

بنات صاحبة الجلالة يقول...

ههههههههههههههه

فكرة برضوا الواحد ياخدله دكتور بتاع كله علشان يوفر مفيش مكان لكذا دكتور هو دكتور واحد يكفي والله بالنسبة للشنطة انا قولت اجيبها احسن ياخدوا مخالفة علي العجلة هههههههههههههه واهه برضوا اكسب ثواب حالة انسانية

تسلم ايديكي ياقمر

ojg يقول...

بالنسبة لموضوع الشنطة ومعجزاتها
عايزة اقولك بقى انكو وحشين وبتظلموا القانون
وبجد بجد هيئة حقوق الشنط ممكن ترفع عليكو قضية وتاخد منكو الحق والمستحق
ليه بقى؟
لأن الشنطة دي هتعمل البدع
خاصه بعد ما تتواجد في حر القاهرة فتنشف محتوياتها تماما او تتدلق ان شاء الله على بعضها فتكون خليطا رائعا على رأيك يعدل المايلة ويرجع العجوزة صبية وسمعت اشاعات انه هيعالج الصلع وفي 24 ساعة بس
بس انتوا بس استنوا واتفرجوا
مش شجب واستنكار على طول كده
دوشتونا
:)
بالنسبة بقى لإقتراح هيفاء أنا من المشجعين والمؤيدين
ورغم اني مش عندي عربيه
بس هجيب شنطنتين
دي هيفا يا ناااااس
:)
بوست حلو أوي

غير معرف يقول...

أسلوبك هايل جدا فى البوست
أنا متهيألى إن الشنطة دى كمان ممكن تصحينا لو متنا....طبعا مش إقتراح الحكومة يعنى تقدر تعمل كل حاجة و أى حاجة


حسبى الله.....كل شوية يطلعولنا بحجات تافهة و لا ليها لازمة و سايبين الحجات المهمة و الناس اللى بتموت كل يوم

غير معرف يقول...

الأخت صاحبة المدونه الرشيقه
تحيه طيبه وكل عام وانت بخير
http://netonradio.blogspot.com

شهد الكلمات يقول...

وحشتينا يا قمر

و وحشنا قلمك

تسلم ايدك

و رمضان كريم

تحياتي

عاشقة القمر يقول...

كل عام انتي بخير عاشقة القمر من السودان

Unknown يقول...

كل سنة و أنتي طيبة أختي العزيزة

هي الحكومة و شنطة الأسعاف و هيفاء وهبي كلهم متفقين مع حماتك

كيكى عوووووو يقول...

هههههههههههههههههههههه
هههههههههههههههههههههههه
اهى افتكاسات كل شوية ربنا يستر
علينا بقى فىى الافتكاسة الجاية
ههههههههههههههههههههههههه
تسلمى يا غالية وبجد بجد انتى زى السكر وانا مبسوووووطة مووووووووت انى شوفتك مع انى مش اتكلمت معاكى كتير بس انتى سكر
وخدى بقى الامواااااااااااااااة والحضن دة علشان مش لحقت اسلم عليكى
اموااااااااة
عووووووووووووووووووووووووو

ana ga3an يقول...

انا خايف بعد كدة
يقولك مع رخصة السواقة لازم تاخد كورس تمريض للرجال
وارضاع للنساء

جنّي يقول...

السلام عليكم


تقبال الله منا ومنكم الصيام والقيام ايمانا واحتسابا لوجه الله الكريم

وعفا الله عنا وعنكم في ليلة القدر

Foxology يقول...

كالعادة
القرار يصدر من سيد قراره من المكتب المكيف الجلد الفاخر ولا عزاء للعقل والتفكير السليم والمنطق

مرحبا بالفوضى

الـسـيـدة نـون يقول...

سحر
مستنياكي يوم الجمعة 10 اكتوبر
متتاخريش
وهاتي معاكي اخواتك البنات
التفاصيل عندي على المدونة على ايدك اليمين
تحت عنوان اتوبيس هيجي يلمنا

الباحث عن الحقيقة يقول...

بل ستجد تلك الحقيبة المُفتخرة قد حلت محل زوجة قائد السيارة وأحتلت المقعد الأمامي من السيارة وسيضع قائد السيارة المدام مكانها في صندوق السيارة

إصطحاب طبيب عظام وطبيب تخدير وطبيب باطني معكم في السيارة تحسباً لأي حادث

............

يخرب عقلك اكتر ماهو خربان
ههههههههههههههههه
هههههههههههههههه
بس بجداوعدك لو يعملوا حقيبة هيفاء وهبي ده انا انزل اشترى عربية بالتقسيط مخصوص علشان احط الحقيبة جنبي واقول امي دعيالي
هههههههه
كل سنة وانتى طيبة

الجواز و سنينه يقول...

بصى موضوع الشنطه اتضح انه مهم جدااا بس احنا اللى جهله و د عينا مش عيب الحكومه
بس ليه مش حاطين صباع روج فى الشنطه علشان البوسه تعلم المتبلم فايصبح ناسى

Beram ElMasry يقول...

عيد سعيد وكل عام وانتم وجميع الاهل فى صحة وسلامة
ان كنت ممن يتذوقون الشعر العامى والزجل ، ارجو زيارة مدونتى والتفضل بالنقد والتعليق ، فالنقد كالنصح ، والدال على الخير كفاعله
كلنا نقدس مصر ، ولكن اليس من حقنا ان نغضب اذا ما انحرف بها المسار

بنات صاحبة الجلالة يقول...

سحورتي

كل سنة وانتي طيبة ياجميل وعيد سعيد عليكي يارب وعلي اولادك الحلوين ربنا يحميهم يارب ويسعدك ويحلي ايامك

بطلي اكل كحك وبسكويت هههههههههه

هابي عيد

اهو ده عيبه يقول...

كل سنة وانتى طيبة
ودايما ايامك فرح وخير ان شاء الله

تواشيح سياسية يقول...

السلام عليكم

كل سنة وانتم طبيبن وعيد سعيد

سبهللة يقول...

انا داخلة اقولك كل سنة وانتى طيبة
وتقبل الله منك صيامك وقيامك وقرآنك وجعلك من عتقائه فى رمضان

koukawy يقول...

في اوروبا و الدول المتقدمه في نقط اسعاف علي الطريق فيها ممرضين و دكاترة اسعاف مش سلطه كده