الجمعة، 7 نوفمبر 2008

أيها المدون ... لا تستهن بكلمتك فقد تكون في كلمتك الشفاء



لو مخك تعب أو أعصابك تلفت وشخصيتك أتهزت ...بقوة عشرة ريختر ... علي فين هاتروح يامسكين ؟
طبعاً هاتعمل فيها ابن ذوات وهاتروح علي أقرب دكتور نفساني تشكيله حالك
أنا بقي لقيت حالتي أتدهورت وروحي بقت في مناخيري وخلاص فاض بيا فقلت ألجأ للعلاج النفسي... مش عيب هاتقولوا مجنونة...أنا مجنونة المهم أحافظ علي أبراج الحمام إللي معششة في نافوخي
ولكن خطوة كهذه تحتاج لكثير وكثير من التفكير والفحص والتمحيص

وبماإني مجنونة... مش قلت هاروح للنفساوي أتعالج قعدت مع نفسي في جلسة تحضيرية للزيارة النفساوية ولقد صور لي عقلي زيارة الطبيب النفساني كالتالي
ففي عيادة الطبيب النفساني ذو المدة القصيرة والفيزيتة الكبيرة
سيجلسني الطبيب علي الشيزلونج وهايطلب مني قول مابدا لي بدون كسوف أو حرج ... وسيحدد الفترة الزمنية المسموح لي فيها بالشكوي وهي ساعة بكتيره وقد يحدث بيننا الحوار كالتالي
أنــا : تعبانة يادكتووووووور ...مش قادرة أكتم في نفسي أكتر من كدة
الدكتور : قدامك ساعة واحدة بس عشان زمايلك العيانين إللي برة ... فأدخلي في الموضوع بسرعة
يلحقها بنظرة خاطفة علي الساعة
أنــــا : حماتي يادكتور .. بتييجي في الكوابيس وعملالي قلق ... ساعات أشوفها طابقة علي زمارة رقبتي وراسها وألف سيف أن زمارتي بتاعتها ولازم تاخدها مني
الدكتور : هـــــــا وبعدين .. ماكل الحماوات كدة يشمعني أنتي إللي تعبتي وجاية تشتكي .. عندك مامتي كانت عاملة في مراتي بلاوي والست كانت مستحملة وساكتة وعمرها ماأشتكت ...ولما أشتكت وزعتها
أنــــــــا : ومرات حضرتك فين دلوقتي ؟؟؟
الدكتور : طلقتها من زماااااااااااااان ... إللي مالهاش خير في أمي مالهاش خير فيا.
أيه الدوكتور الكفتة ده ... أما عقلي مهوي صحيح
أنـــــــــا : أنا خلااااااااااااص فاض بيا يادكتور وعشان كدة قلت آجي زيارة لحضرتك جايز تديني دوا يسبب لي برود وجمود نفسي مع الست حماتي
الدكتور : وجوزك يامدام رأيه أيه في الحكاية دي
أنـــــــــا : وهو يقدر يعمل أيه يعني ؟ دي مامته برضه يادكتور ... ومش هاينفع أفضفض معاه عشان ماأعملش زعل مابينهم
الدكتور : بصي يابنتي ... حلك الوحيد في الفضفضة وعشان كدة عاوزك تيجي عندي جلسات فضفضة أسبوعية ...تعالي الأسبوع الجاي عشان نكرر الجلسة
ثم نظر نظرة فاحصة علي ساعته المحتلة لمعصم يده الشمال وقال
تايم آوت ... ميعادنا في الجلسة التانية
أنـــــــــا : طب كلمة واحدة كمان يادكتوووور
الدكتور : وقتك خلص يامدام أنتي فاكرة مافيش غيرك في العيادة ...العيادة مليانة عن آخرها بالعيانين ...ويمكن الواحد منهم محتاج علاج أكتر منك ... بالسلامة يابنتي
وطبعاً سأخرج من عيادة الطبيب وسيكون قراري بعدم معاودة الزيارة مرة أُخري ... وسأفوم بمعالجة نفسي بنفسي ... والحاجة أم الأختراع ... وتفتق ذهني عن علاجي الوحيد في مدونتي الحبيبة وزوارها الأعزاء ...وجلساتها اليومية غير مدفوعة الأجر يصاحبها ألاف الأطباء النفسيين المتفهمين الصبورين ... فرُب مدونة خير من ألف طبيب
ولو كان بيدي لأعطيت لكل مدون منكم شهادة تثبت جدارته لممارسة مهنة الطب النفسي
شكراً لك يادكتور منك له
وربنا مايضربلكم الأرباع

هناك 38 تعليقًا:

صابر وراضى يقول...

وعليكم السلاااااااااام


ايه ياجماعه انا كنت ماشى فى النت والظاهر انى دخلت مستشفى المجانين ولا ايه؟؟
طيب طيب نستفيد من الوضع الحالى
وادخل اجرب الجلسات
واما اطلع ان شا الله ابقى اقولكم

صابر وراضى يقول...

الدكتور اللى هنا محتاج دكتور

الكحيان يقول...

تصدقي بالله يامفقوعة، أنا يراودني خاطر هذه الأيام أن أترك التدوين،وأقفل بقي، لكني لا أستطيع، وأتراجع دوما؛ لأني أشعر الآن معه براحة نفسية كبيرة، لأنها فضفضة وتهوية وفش غل، هذا فضلا عن أنك تجدين من يتجاوبون معك من اصحاب العقول الكبيرة والصدور الرحبة والمثقفين الحقيقين الذين يتفقون معك ويختلفون معك بأدب جم، وأجد نفسي أستفيد منهم جدا جدا من فضفضتهم وآرائهم، وهذا أفضل من أن أكتم في نفسي حتى تنفقع مرارتي الثانية، أسوبك جميل ورائع يامفقوعة، أخبريني هل تعملين في الطب النفساوي؟ شكرا على مرورك بمدونتي المتواضعة وأنا أتمنى أن أحصل منك على شهادة أيزو أو حتى شهادة معاملة أطفال . شكرا لك .

صبرني يارب يقول...

مفقوعتي الجميله

ازيييييك وواحشاني وكان نفسي اشوفك النهارده فى التجمع عند خيخه

عود حميد

انا على فكره مؤمنه جدا بان الكلمه فعلا شهادى حق
يعنى لو حد اخد رايي فى حاجه وجاملته او قلت اي كلام ده يبقى مش فى مصلحته
حتى لو كان غلطان والكلمه هاتضايقه لكن يمكن تكون هي علاجه

واحنا كلنا اذان صاغيه يا جميل وباذن الله ربنا يقدرنا ونقول كلمة حق

فشكووول يقول...

المفقوعه مرارتها .. سلامة مرارتك .. بس يا بنتى الله يكون فى عونك .. انت حتقدرى على حماتك .. ولا جوزك ولا الدكتور الضارب اللى انت رحتى له .. آهو انا عرفت دالوقت انت سميتى نفسك المفقوعه مرارتها ليه .. شوفى كل ما حد يعصبك عدى من واحد لحد ميه وصممى انك ما ترديش عليه الا بعد العدد 100 وبعدين ابقى قولى لى حصل ايه
اشكرك على المرور عندى وربنا يحئنى ويحئك ويعزنى ويعزك

Miss. Sosa يقول...

سلامتك يا سحورة من الجنان وربنا يبعدك عن الموريستان

هي حماتك مضايقاكي اوي كدا لدرجة انها بتطلعلك في الكوابيس

لا حول ولا قوة الا بالله

انا المرة الوحيدة اللي طلعلي بني ادم في كابوس كان دكتور عندنا في الكلية وكنت رايحة تاني يوم اسلم مشروع له وهو راجل مرعب يابنتي وشرس
وطول الليل عمالة احلم اني اخبط ع الكيبورد لحد ما هب فيه في الحلم قومت وقعت من السرير وايدي اتكسرت

ههههههههه

ادي اخرة التعليم واللي بيتعلموه

فرفشي كدا ولو اي حاجة مضايقاكي كلنا اذان مصغية .. بس استني كدا اشيل الهيدفون :))

سلاااااام يا قمر

فشكووول يقول...

اقصد ربنا يحظنى ويحظك ويعزنى ويعزك

mohamed ghalia يقول...

إيه حكاية الدكاتره النفسسين معاكى!
هههههههههه
شكلنا هنروح كلنا
تحياتى

Remas يقول...

الف سلامة عليكى من الجنون
وبجد اسلوبك يجنن
وبالنسبة للتدوين عندك حق جدا ان مجرد الكتابة فضفضة بتريح جدا والتعليقات من الناس الجميلة اللى بتهتم وتحاول ترد وتحفف عن الناس حتى بكلمة بيكونلها مفعول السحر في النفوس وتغنى عن مليون طبيب بجد
ودا اللى حصل معايا لما شفت تعليقك في المدونة بتاعتى
تحباتى
ريم

غير معرف يقول...

هههه فكرتنى بالذي مضي بس على فكره النظام ده اتغير من زمان فى عيادة الدكاتره النفسسين ومبقاش فى شيزلونج ولا حاجه ومبقناش نقعد ساعه هيا ربع ساعه بكتيره ويكتبلك علاج الاكتئاب ويقولك طب تمام تمام تعالالى بعد 6 اشهر ياااااااااااااااانى 6 اشهر تانى اسكتى متفكرنيش

همس الاحباب يقول...

هههههههههه
يعنى انا بقيت دكتور بشهادة من سوسو هانم
طب اروح اقلب المدومنة مورستان
وكل اللى داخل يدفع فزيته
اهو عيادة والسلام
هههههههه
البوست رائع جدا كعادتك يا مفقوعة
تسلم ايديكى
وفعلا اختلاف الاراء ووجهات النظر بتعلمنا اشياء كتير
وممكن تبقى مشكلة صعبة من وجهة نظرنا ولكن حلها بسيط من وجهة نظر اخرى
تحياتى

Dr. Ibrahim يقول...

يارب ويكون كلامنا خفيف

بالهنا والشفا
.....

د/هيما

emey يقول...

اجمل حاجة انك تتكلمى مع حد اى كان المهم انك تستريحى عاة فى الكلام ومتكونيش خايفة ن اى حاجة المهم تستريحىىىىىىىىىىىىىىىىىىىىىىى متضنا معاكى

emey يقول...

الرجاء زيارتك والتعليق

موناليزا يقول...

دكتور ليه بس واحنا موجودين ده كلام:)
يابنتى اسأل مجرب ولا تسأل طبيب

mahasen saber يقول...

اولا الدكتور لذيذ موت طلق وريح دماغه يخرب بيت دماغه

بس ااقولك هيا حماتك مشكله قوى كده يا ستى مش ربتلك رتاجل زى الفل اهه وربتلك الخفيف برضه عديلها اى شئ وفوتيلها واستحمليها
والافضل عقد معاهده سلام معاها لا هيا تدخل فى حياتك ولا انتى تتحشرى فى اليى يخصها
اصل عبالك مكنش عندى اى مشاكل مع حماتى ايام الجوازتخيلى كنا سمن على عسل بس خلاص عملنا دايت

mohamed يقول...

لا لجلد الطبيب المصرى بالسعوديه1500 جلده

المـــفـــــــقــــــــوعـــــة مــرارتـهــا يقول...

صابر وراضى
==========
خلاص اتبرع له عشان نعالجه
وحسنة قليلة تمنع بلاوي متلتلة

المـــفـــــــقــــــــوعـــــة مــرارتـهــا يقول...

لا إله إلا الله
الدكتور النفساني في بلاد برة بيكسب كتير جدا من جلساته العلاجية اللي فيها بيسمع للمريض فقط
اي حد عنده اكتئاب او حاجة مضايقاه محتاج حد يسمعه بس محتاج يخرج اللي جواه تراكماته افكاره معاناته
تحياتي

المـــفـــــــقــــــــوعـــــة مــرارتـهــا يقول...

صبرني يارب
=================
انا زعلانة اني ماشفتكيش... دي أول لقاء ليكي مع المدونين.. صح
تتعوض المرة الجاية ان شاء الله
انا كان نفسي آجي وآخد جوزي معايا هو اللي بيتبرع بالدم لأن فصيلته نادرة بس نسيت اقوله خالص
منوراني ياجميل

المـــفـــــــقــــــــوعـــــة مــرارتـهــا يقول...

fashkool
=====================
هااجرب طريقة العد دي ولو اني كدة هااعيش حياتي كلها بأعد لحد مية
منورني ياعم فشكول

المـــفـــــــقــــــــوعـــــة مــرارتـهــا يقول...

ميس سوسة
====================
وهو حد يقدر يزعل وانتم حواليه؟!
بس انتي كوابيسك بتودي في داهية
ربنا يبعد عنك الكوابيس اللي بتكسر دي
منورة يااحلي سوسة في الدنيا

المـــفـــــــقــــــــوعـــــة مــرارتـهــا يقول...

mohamed ghalia
=====================
وهو احنا دلوقتي محتاجين دكاترة نفسانيينواحنا موجودين مع بعض؟!
ربنا يخليلنا مدوناتنا

المـــفـــــــقــــــــوعـــــة مــرارتـهــا يقول...

reem
===================
منورة ياريم وربنا يصبرك ويصبرنا علي مابالانا

المـــفـــــــقــــــــوعـــــة مــرارتـهــا يقول...

اسامه عبدالعال
====================
انا بقي كنت لما افكر اروح لدكتور نفساني اقدم رجل وأخر الرجلين
ولما فعلا فاض بيا فتحت المدونة دي وتصدق فعلا اتعالجت فنفسيا بقيت احسن حالا

المـــفـــــــقــــــــوعـــــة مــرارتـهــا يقول...

همس الاحباب
===================
اللي بيبقي برة المشكلة بيكون اقدر علي متابعة ابعاد المشكلة بصورة واقعية واضحة وده اللي بيحصل فعلا معانا
منور ياأخ خالد وسلملي علي همس

المـــفـــــــقــــــــوعـــــة مــرارتـهــا يقول...

Dr- Hema
===================
خفيفي جدا تسلموا لي

المـــفـــــــقــــــــوعـــــة مــرارتـهــا يقول...

emey
=================
الفضفضة فعلا مش هاتنفع غير مع حد مالوش علاقة مباشرة بيكي لأن الموضوعات اللي هاتفضفضي بيها جايز تضايق القريبين منك
منورة

المـــفـــــــقــــــــوعـــــة مــرارتـهــا يقول...

موناليزا
================
انا بأقول كدة برضه
ربنا مايحرمنيش منكم

المـــفـــــــقــــــــوعـــــة مــرارتـهــا يقول...

mahasen saber
=====================
هي كانت مشكلة بس خلاص اتحلت بقيت انا اكتر نضجاً في التعامل معاها وربنا يهدينا جميعاً
لو عجبك الدكتور احجز لك عنده ده بعد الدعاية دي هايحتاج اي حد يزوره والدفع عليه
منورة ياجميل

Ehab يقول...

انتي يا بنتي
دكتور ليه بس
ولا دكتور ولا يحزنون
انتي ارزعي كل اللي جواكي هنا وسطنا
وصدقيني هتلاقي الف قلب والف ايد بتتمدليكي
علشان كل الناس بتحبك جدا
وهتلاقي اللي يضحكك من الموقف
واللي ينصحك بجد
واللي هيحكيلك تجربته وتفيدك

تقدري تقولي جمعيه تعاونيه بنساعد بعض كلنا

وربنا يفرحك ويسعد ايامك

سلاااااااااااااااااااااااااام

اخوكي ايهاب

عايش علي الهامش يقول...

علي فكره اسلوب الفضفضه ده انتهي في الطب الحديث الامور بقت قائمه علي العللاج يعني لما هتروحي للدكتوةر هيبصلك يرفع حاجبه هيقولك هاتي من الاخر هيسمع من حوارك كلمة حماتي
وجوزي
يديكي قرصين مهدئ من اي نوع وغالبا فاليوم علشان تودعي مع دوا بروشته تعد بانها هتبهدل كمياء المخ اكثر من ما هيه متلخبطه .... وهيقولك يا تجربي ده ياما تقتلي حماتك وهيديك كتاب كي تقتل حماتك في ستة اسابيع بدون معلم

ودمت

شكرا لك

اقصوصه يقول...

جميل ما كتبت

وبسيطه هي هذه التدوينه

اسجل اعجابي بما قرات

دمتي بخير

المـــفـــــــقــــــــوعـــــة مــرارتـهــا يقول...

الشنكوتي الكبير
==================
اهم حاجة إني ماأصدعكوش وأدوشكوا بمشاكلي وحكاياتي
منورني كالعادة ياإيهاب

المـــفـــــــقــــــــوعـــــة مــرارتـهــا يقول...

عايش علي الهامش
======================
حتي الفضفضة لاغوها يالسخرية الأطباء
منورني

المـــفـــــــقــــــــوعـــــة مــرارتـهــا يقول...

اقصوصه
=================
ربنا يخليكي ياأقصوصة ومنورة مدونتي المتواضعة

emey يقول...

الموضوع حلو ولكن مش كل المدرسين وحشين وكله اْيضا مش حلوين

koukawy يقول...

و الله فكره تصوري