رغم اني قديمة شوية علي الدنيا وبطلت اروح المدرسة وبطلت اتعلم من زماااااااااان بس لسة جوايا حب لأيام المدرسة .
حب غريب ... كنت بأحب المدرسة ومش بأحب المذاكرة... مخكم مايسرحش لبعيد انا كنت شاطرة اه بس مش متفوقة يعني ... ومع ذلك كنت ارفض الغياب بتاتاً.. وحالة حب المدرسة دي كانت واضحة في فترة الثانوية العامة جايز لاني كنت كارهة لقعدة البيت لوحدي وعارفة اني استحالة هااذاكر لو بابا وماما مش قاعدين فوق راسي .. لحد مادخلت الكلية بتاعتي وهي أداب إرشاد سياحي وعشقت الكلية ونظام الدراسة فيها ...فكنت اول واحدة تلاقيها قاعدة في المدرج مستنية المحاضرة وكنت واخدة المسألة جد أوي لدرجة ان كشكول محاضراتي كان من المراجع المهمة للمناهج ... واتذكر اني ماغيبتش عن الدراسة في الكلية غير يوم واحد فقط وكان بالقوة الجبرية لاني كنت عيانة جدا وكنت يوميها رايحة الكلية لولا ان بابا لحقني وانا نازلة... كان عندي يوميها احتفان في الزور ...الاحتقان اللعين اللي منعني من الاشتراك في كورال المدرسة زمان رغم صوتي اللي كاان حلو.
دلوقتي بقي لسة بأحب المدرسة وأيام المدرسة مع أولادي.. الولاد شخصيتهم بتتحسن طووول ماهما في مدارسهم وبيتعاملوا اجتماعيا مع اطفال في سنهم... البكاء والصراخ بيقل في فترات الدراسة والنوم بيتظبط والحالة بتبقي عال العال
بجد بجد بجد ربنا مايحرمنا من المدارس ويبعد عنا الاجازات وهم الأجازات
هناك 12 تعليقًا:
كلام جميل
كلام معقول مقدرش اقول حاجه عنه
بس احنا دلوقتي ازاي نأمن على أولادنا لما نوديهم مدرسة المدرسين فيها بيفقعوا عين التلاميذ ويكلوا دراعهم ويقتلوهم بدم بارد؟
متهيألي الأطفال مش هيحبوا المدرسة زيك
ولا ايه؟
يا شيخه بلا مدارس هيه دى مدارس كان زمان ايام طه حسين وعلى مبارك وحسين كامل رؤوف خليف وعصام الشوالى..هههههه اشكرك على البوست الجميل.
السلام عليكم ورحمة الله وبركاته
ههههههههههه
مدارس ايه يا بنتي هو في احلي من الاجازات
اكيد مش عاوزه اجازات عشان الولاد يحلو عن نافوخك شويه لما بيكونوا في المدرسه مش كده
كل سنة وانت طيبه
كلام جمييييل
بس لا ينطبق علي نظام التعليم العقيم اللي في مدارسنا
دهنظام تعليم يجيب تخلف
و هو نظام الدح للركب و الصم للكعان
المدرسة ليها دور إجتماعى هايل محدش يقدر ينكره
موضوع هايل
دمتى بكل الود
فى حفظ الله
فكرتينى بنفسى ايام دراستى
بس ياترى ده راى ولادك برضه؟؟ ولا الجيل اختلف
كلنا يا مفقوعة بنفتقد الايام ديه
كلنا نفسنا نرجع المدارس تاني
و يا سلام على اللى يرجعنا
كانت ايام جميله
ههههههههههههه
بس ارجع من غير ما اذاكر و انبي
يالله تعالى نعمل مشروع
و نعمل مدرسة للكبار
نعمل فيها يونيفورم
من غير مذاكرة
هههههههههههههههههههه
و انا اكون اول النتقدمين
هههههههههههه
بس يارب السن يكون قانوني
هههههههههههههههه
كل سنة و انتى طيبة يا مفقوعه هانم
وحشتيني
و كلمتك بالتليفون مش رديتي
عام سعيد عليكي و على عيلتك
و اخواتك
و شغلى الماسينجر بقا كنا بنتكلم اكتر
سلام
loooooooooooool
تدوينه جميله
استمتعت بالمرور من هنا
تمنياتي بالتوفيق :)
ربنا يخليلنا المدارس ..
بس هي فين المدارس ؟..
المدارس الحكومية راحت في خبر كان ..
طبيب الاطفال حسين قضى على البقية البقية من المدرسة كمنظومة تربوية ..
يمكن الخير يكون موجود في المدارس الخاصة بس كله بتمنه ..
بس معظم اولياء الامور ما بيحبوش الاجازات علشان شقاوة العيال ..
مرة سمعت واحدة جارتنا بتصرخ في عيالها امتى المدارس تفتح وتلمكوا ..
سلام
ايام الدراسه فعلا أحلى ايام ..
كنا بنكرها .. لكن لما دخلنا الجامعه كنا بنستمتع بالاربع سنين صح لاننا كنا عارفين ان بنهايتها هنتهي احلى سنوات حياتنا .. الدراسه
انا معاكي
وكل سنه وانتي طيبه
بتحبي المدرسة والكلية ؟؟؟
على فكرة انتي من الناس القلائل اللي بيحبوا المدرسة وبتمثلي 10 % هههههههههه من قيمة السكان وعلى فكرة برضه هو كلامك صح في التظبيط والنوم المعاملات بس المشكلة ان معدش في مدراس بالمعنى المفهوم
تحياتي
بجد عايزه اقولك ان المدونه بتاعتك جميله جدا وكلامك زي العسل
إرسال تعليق