الجمعة، 9 يناير، 2009

ياإما مني زكي يابلااااااااااش


ياإما مني زكي يابلااااااااااش
-------------------------------
حماتي الغالية فيها طبع انتم عارفينه ومتابعينه وهو انها عندها ميول استخباراتية وطرق تعذيب ذهنية تفوق الموساد في قوته وضراوته وعندها مقدرة غريبة علي دحلبة اللي بتكلمه وتقنعه بأمور يعتقد إنها خارجة من دماغه هو شخصياً... وياااما وقعتني في الكلام وانا ذي الشاطرة كنت بأقع ذي المدب واطلع كل اللي جوايا ...الست دي خسارة انها ماكملتش في سلك التعذيب كانت هاتبقي ظابط شرطة ممتاز علي كتفه نياشين بالكووووم.... فمثلاً لو أتأخرنا في الذهاب إليها تبدأ هي في أخذ أقوالنا لتعرف ليه أتأخرنا ثم تسأل الشهود عن الواقعة والشهود طبعاً هما أطفالي الصغار لأننا في نظرها كلنا كذابين وتبقي ليلتنا مطينة بطين لو الأقوال تضاربت يبقي أكيد الحكاية فيها إنّا... عشان كدة دايماً تلاقيني رايحالها بمصحف عشان أحلف عليه كلما دعت الحاجة لذلك... وبرضه مش بتصدق... علي رأي المثل قالوا للحرامي أحلف قال جالك الفرج ....وأنا في نظرها شيخة منصر.
طبعاً حماتي عرفت عن موضوع الكتاب وهي مرحبة بطريقة مريبة ..تدعو للقلق والحذر جايز برضه عشان تخليني اقرالها اليوميات دي وتستخدمها ضدي ... الجديد بقي أنها بتحكي عن يومياتها من أول ماأتولدت لحد ماأدحدر بيها الحال وبقت حماتي.
وبعد ماحكت عن زواجها الأول من دبلوماسي سوري علي ضرة والمعاملة الوحشة اللي كانت بتتعاملها هناك عشان هي مصرية ثم هروبها منه ولجوءها للقنصلية المصرية ثم طلب الطلاق من زوجها السوري وتدخل الرئيس عبد الناصر شخصياً ليطلقها منه ثم زواجها من حمايا الذي كان يعمل في شركة رمسيس نجيب للإنتاج السينمائي مما جعلها علي علاقة صداقة بالعديد من الممثلين والملحنين منهم الموجي وأحمد رمزي وسعاد حسني وفتونة علي رأيها أو فاتن حمامة مش قلنا أصحاب بقي وبيدلعوا بعضيهم وزهرة العلا ... كل ده وانا باسمع ولأني علي نياتي فبأصدق... جايز بتسرح بيا كالعادة بس أهي حكايات مُسلية بتقتل الوقت اللي بيمشي يتمخطر طول ماأنا في صحبتها... ورغم ان الحكايات دي كانت بتتحكيلي علي حلقات علي مدار سبع سنين بس هي لاقت اني ممكن اشهرها واطلعها السما...فبدأت تزود الجرعة.. الجميل في الموضوع انها عاوزة تعمل قصة حياتها فيلم بس حقوق الملكية تبقي ليها هي بس وبشرط ان مني زكي تمثل دورها لانها شايفة نفسها في شبابها شبه مني زكي الخالق الناطق... دي وجهة نظر يا مني ماتزعليش نفسك وقالت ان حمايا طلب منها توكيل عشان يكتب لها قصة حياتها ... واخدين بالكم من التكتيك بتاعها بتحاول تعمل نفسها عليها طلب عشان تخليني اقول وليه تتعبي حمايا أكتبه أنا...بس علي مييييييييييييين خلي الطلعة دي لحمايا ده لو فيه طلعة أصلاً... كفاية عليا كتاب واحد ولو انها ممكن يتعمل منها موسوعات.

هناك 20 تعليقًا:

موناليزا يقول...

كان الله فى عونك
وكويس انها مقالتش عايزة هيفاء وهبى ولا نانسى عجرم:)

Che يقول...

انا متاكد دلوقتى انه حماتك مالهاش فى النت عشان الكلام الجميل اللى انتى كاتبه و بالنسبه للكتاب نصيحه خالصه لوجه الله ماتهديهاش نسخه و لو وصلت انك تقوليلها ان النسخ خلصت مش مشكله ، العمر مش بعزقه برضه
اما بخصوص منى زكى حاولى تفهميها انه منى زكى مش مقامها بس هتعملى ايه مهى صوفيا لورين اعتزلت التمثيل و نعيمه الصغير الله يرحمها بأه
فى انتظار المزيد من اليوميات

Eng. Ahmed Abo El-Ella يقول...

منى زكي؟ حته وحده؟

طب خليها حتتين؟

على فكره, لو هي فعلا منى زكي, يبقى حماكي لازم يمثله أحمد السقا. وطبعا فيلم زي ده لازم يكون فيه شخصيه شريره (الشخصيه اللي أحمد السقا هيخلص منى زكي منها) وبما إن حقوق الملكيه لحماتك فطبعا هتختارك أنت الشخصيه الشريره ومش بعيد تظلب منك أنك تمثلي الأدوار الصعبه بنفسك.

يعني مثلا تنطي من فوق البرج ولازم تنزلي بدماغك على الأسفلت ولو منزلتيش نعيد المشهد تاني

يااااااه, ده فيلم صعب أوي

ربنا يرحمك, قصدي يعينك على الفيلم ده

هههههههههههههه

بنت الغربة يقول...

حماتك زى العسل
دى اول زيارة وان شاء الله مش الاخيره
انا راى الاوقع نانسى عجرم هى اللى تقوم بالفيلم كله
وحماك هينبسط قوى وهايكتب السناريو والحوار كمان
وجايز يطلب يمثل معاها فى الفيلم
تحياتى ليك ولقلمك الجميل

GHARAM يقول...

تعرفي حماتك دي ست عسوله



بكره حا تفتقديها عندما يتذكرها الله برحمته



وأعتقد أن ما تفعله بك جعل كتاباتك ربما اكثر إبداعا



تحياتي

bos bos يقول...

والله انا خايفة عليكى من الكتاب ده

خلى بالك من نفسك

صيدلانيه طالعه نازله يقول...

اخيرا رجعتى تكتبى عن القمر تانى و الله لها وحشه انا باقول بلاش منى زكى اصلها مش قد كده ممكن نمشيها شاكيرا و تبقى وصلت للعالميه

mostafa rayan يقول...

مبروك يا صديقتي العزيزة على الكتاب
وان شاء الله اكون معاكي وانتي بتحتفلي بيه في المعرض
- عل فكرة انا بردو عندي اخبار سارة ان شاءالله هتكون في المعرض
- واشكرك لانك ذكرتيني في البوست السابق
انتي انسانة تستاهلي كل خير وان شاء الله الكتاب ينجح ويكسر الدنيا ونلاقي الشروق بذت نفسيتها جاية توقع معاكي الطبعة التانية
او عقدد كتابك الجديد ( يوميات زوج مغلوب على امره اسمه حمايا )
مليون مبروك بجد

koukawy يقول...

و الله نفسي اقرا كتابك موجود فين؟؟؟؟؟

صبرني يارب يقول...

ههههههههههههههههههههههههههه
طب يلا بقى عايزين الكتاب

ازيك يا جميل اخبارك ايه ؟؟

enjy يقول...

الله يكون فى عونك بس حلوة تضارب الاقوال دى على فكرة فى الجون يعنى وبعدين بتحصل كتير اوى اوى فعلا

mahasen saber يقول...

انا باركتلك على الكتاب طبعا
واباركلك تانى وتالت يا قمر

بس حماتك سكر سكر
واحمدى ربنا انها ما قالتش صوفيا لورين

مليون مليون مبروك على الكتاب يا جميله

Foxology يقول...

منى زكى ؟؟ اهاااا اتاريها اعتذرت الأيام اللى فاتت عن اعمال كتيرة .. اكيد طبعا علشان تتفرغ بأة لفيلم قصة حياة حماتك :))

تحياتى وفى انتظار الكتاااااب :)

عاشقة الجنة يقول...

والله انا شايفه ان انتي وحماتك زي العسل

والمناورات السلمية اللي بينكم دي تستاهل كتاب فعلا مش مدونة

بس انتبهي احسن تقراه والمناورات تتحول الى حرب ضروس

خالص مودتي لكي ولحماتك منى زكي سابقا

و..تـحــيــاتــــي

فراشة يقول...

طبعا ربنا يعينك
بس حاولى تدورى على سكه تعرفى من خلالها تدخلى لقلبها يمكن الحال يتغير

حروف (دلو مرة ثانية وجرح ثاني سابقا) يقول...

انا بقول وقت صدور الكتاب تسافري منعا لحدوث حوادث مجهولة فاعلها
ربنا يكون في العون

wanna b a physician يقول...

اكيد طبعا انتى نسيتى ان الحماوات فاتنات
وبعدين وماله لما يطلع كتاب تانى عنها هى شوية يعنى

وطبعا مبروك مقدما على الكتاب

تحياتى

Dr.Mohammed Gohary يقول...

سوسو

ليكي تاج عندي

اتفضلي استلميه
http://goharyblog.blogspot.com/

دا لو عندك وقت طبعا

بيكر(baker) يقول...

عادى هاتلها منى زكى و احمد حلمى لو عايزه انتى عندك كام حما يعنى

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
شات صوتي
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه