السبت، 14 فبراير 2009

خليها تصدي وموديلها يعدي


الناس اللي هااحكيلكم عنهم هما ناس شالوا ايديهم من علي خدهم وحاولوا يتصرفوا بإيجابية .. طبعا احنا يادوب هانتفرج عليهم بس بكرة نعمل ذيهم في حاجات بنستخدمها واسعارها علي قدنا
الناس دي وقفوا قدام الإستغلال وقالوا له أستوووووووووووب لحد كدة
حل عن سمانا وسيبنا نتنفس
الحكاية أيه ؟

كلنا عارفين ان سعار الأسعار جعل من حياتنا كمواطنين حياة صعبة وكل مانسأل ليه الأسعار بتزيد كدة نلاقي رد واحد مافيش غيره أصل الأسعار العالمية أرتفعت وأحنا لازم أسعارنا المحلية ترتفع هي كمان احنا مش في جزيرة مهجورة لوحدنا .. فيه خامات بنستوردها من بلاد برة

ورغم أن المخزون من السلع بيبقي بالأسعار القديمة المنخفضة لكن التجار أول مابيعرفوا أن فيه أسعار بترتفع بيقولوا بركة ياجامعر ويقوموا يرفعوا الأسعار بسرعة رهيبة وأحنا ذي الهبل بنجري نشتري

و لما الأسعار أنخفضت علي مستوي العالم وقف التجار وقالوا لا مساس بالأسعار المحلية... أسعارنا ثابتة بغراء وإستحالة تنزل قيد أنملة
ياسلاااااااااااااااااااااااااام

يشمعني هما المصريين مالهومش نفس يتمتعوا بإنخفاض الأسعار دا ذي بقيت شعوب العالم ولا المصريين في الفرح منسيين وفي الحزن مدعيين

وعشان كدا ظهر جروب علي الفيس بوك ياريت كلنا ندعمه وننشره ونحاول نروج له وياريت ننفذ بنوده وهي عدم شراء أي سيارة حديثة حتي نتساوي مع شعوب العالم المتقدم والنامي في إنخفاض الأسعار و حتي تتساوي الاسعار اللي في الفضاء مع اسعار السيارات في اي دولة عربية اخري ممكن حتي تبقي اغني مننا خليك إيجابي وشارك في الجروب او حتي ماتشتريش عربية ... أنا عن نفسي ممتنعة عن شراء عربية من قبل الجروب دا ماينزل الأسواق مُجبر أخاك لا بطل ... وعندي أمل ان الجروب دا ينزل تمن العربيات وزساعتها يبقي في مقدور اي مواطن عادي يشتري عربية صغيرة تحميه من سؤال اللئيم ....والجروب دا أسمه خليها تصدي وموديلها يعدي ولينكه



هناك 13 تعليقًا:

maiosha يقول...

أول تعليق

الفكرة حلوة جدا وفعلا عندك حق
حتى لو نزلت الأسعار التجار بينزلوا ويرفعوا على مزاجهم ومفيش إتزام بسعر محدد

فكرة الجروب حلوة جدا .. وأنا أكيد متضامنة معاهم.. قال عربية قال . أنا أشترى عربية .. وجديدة كمان

ههههههههههههههه

ربنا يعدى الأزمة دى على خير

AHMED SAMIR يقول...

انتي تقريبا بتؤذني في مالطا
مش عارف المصريين دول عندهم جين اسمه خالف تعرف
عمرهم ما يتفقوا على حاجة ابداااااااااا

Che يقول...

طبعا اللى انتى بتقوليه ممكن يتنفذ فى اى مكان غير بلدنا اللى ليها اكتر من سبع تلاف سنه زى ما هى و عمرها ما هتتغير و كل الموضوع هتلاقى التجار بيدعو عليكى و الحكومه بتتهمك بوقف عجله التنميه الدافعه الى عبور الازمه الاقتصاديه و حاجات كتير جدا .. سيبك اصلا انه مفيش ناس هتنضم ليكى عشان احنا شعب سلبى جبان

أحمد سعيد بسيوني يقول...

عربية
!!!!!!

خليها تصدي

mohamed ghalia يقول...

إحنا فى بلد العجايب
نقولهم ياجدعان الأسعار رخصت يقوللنا لا
مش عارف التجار دول عايشين فين
بس فكرة هايلة
دمتى بكل الود

الفراغ يقول...

سلام عليكم
ياريت حد يسمع الكلام
انا عن نفسى هاسمعه لانى مابفكرش اصلا اشترى عربيه
لكن اللى معاه فلوس ونازل يشترى فعلا ياريت يفكر فى كلامك
وزى ماتجمعوا وقالو يا ريس افتح المعابر
يجمعوا ويقولو ا لا لجشع التجار

فكرة من الزمن ده يقول...

لو احنا قلنا خليها تصدي
في ناس معاها فلوسها ومش هاممها حد ومش هايسيبوها تصدي تضامنا مع بتوع الفايس بوك ويمشوا بعربية مش موديل السنة
بس ماتقوليش اني متاشئمة
تحياتي

مسدس صغير يقول...

خليها تصدى وموديلها يعدى ولا حد سائل عننا فى الجزمة القديمة ولو ان الناس دى معندهمش جزم قديمة كل جزمهم جديدة طبعا..
غير كدة الاسعار لو غالية والسعر العالمى غالى يقولو هنعمل ايه احنا مرتبطين بالسعار العالمى يعنى لازم نتسعر زيهم ولو رخيصة يقولو للحفاظ على السوق المحلى والمنتجات المحلية..

mostafa rayan يقول...

صباحك ورد الاول
بصي ان ماعنديش عربية بس ان معاكم
احنا لازم نحاول ننشر فكرة الدعوة الفردية يعني نتكلم مع اصحابنا واصدقائنا واقاربنا عن الموضوع دة وننشر القضية مايبقاش بس الفيس بوك لان في ناس كتير مش بتدخل عل النت والفيس بوك ومكويين بغلاء الاسعار
تحياتي الطيبة لك ويارب الكتاب ينجح ويكسر الدنيا

عاشقة حبيبتى يقول...

مساء الخير
انا مصرية عايشة برة مصر بس صدقينى لم بنزل مصر بندصدم دة انتو مستواكم ماديا احسن من برة
دخلت مطعم عادى دفعت انا بس ١٥٠ جنية عشاء عادى جدا جدا لفرد واحد وبالرغم من ارتفاع الاسعار مكنش فية مكان وكل الطربيزات كاملة وكلهم طبقة متوسطة وتقولى نرفض ونقاطع

انت بتنادى بمقاطعة طبعا مستحيل يحصل كدة لان الا بيروح يشترى سيارة جديدة اكيد معاة تمنها واكتر انتى طالبى بقلب نظام الحكم اسهل

مدونتك حلوة تحياتى

hasona يقول...

السلام عليكم

جميل الموضوع ده

ويمكن اللي بنشوفه ده نتيجة تزاوج السلطة والسياسة برجال الاعمال

فأصبحوا يشرعون ما ينفعهم فقط
يعني لما يكون الوزير رجل أعمال
أكيد هيفكر في مصلحته الفردية فقط
وينسي ( يبيع ) مصلحة الشعب
،،،،،
يمكن مش السيارات بس اللي عايزة وقفة مماثلة
وانما كل شئ - ابتداء من القوت الي الحديد الي كل شئ يوجد به استغلال


تحياتي

koukawy يقول...

قلبتي عليا المواجع
انا مرتني ذنبه ايه بالأسعار الزفت العالميه

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
شات صوتي
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه