الأربعاء، 18 فبراير 2009

سياسة الضرب علي القفا


سياسة الضرب علي القفا

قفانا يامصريين ورم وتعب وجاب دم من كتر الضاربين عليه ومع ذلك مازلنا نتلقي الصفعات القاسية بلا هوادة واللي مكتوب علي الجبين لازم يشوفه القفا ويابخت من بات مضروب علي قفاه ولا باتش ضارب فالمصريين معروف عنهم استكانتهم التي فاقت الحد فلا هناك منادي بحق يحصل علي حقه ولا هناك مقاوح بيحصل علي مراده ...واضرب راسك في أجمدها حيط وتأكد مليون في المية أن حقك مهضوم مهضوم وفوقيه كوباية سفن آب وأبسط مثال علي كلامي هو ماحدث في نكسة كل النكسات نكسة الغاز ... المصريين رفضوا وأعترضوا أن خير أرضهم اللي ملكهم يتصدر لألد أعدائنا اللي هايفضلوا طوووول عمرنا وعمرهم أعداء رغماً عن محاولات التطبيع الضارية التي تأخذ مجراها الآن علي المستوي الحكومي ... وبالفعل حصل المصريين علي حكم قضائي بوقف تصدير الغاز بناءاً علي رغبة شعبية وقضائية مؤيدة لهذا المنع ... ولكن الحكومة في عز تلك المعمعة طمئنت الأخوة اليهود ـ وتم ذكر هذه التهدئة في جرائدهم ـ بأنه لا مساس بتصدير هذا الغاز لإسرائيل والحكومة كلمتها عمرها ماهاتنزل الأرض أبداً ..وطظ في الشعب وإرادة الشعب .. شعب أيه اللي أنت جاي تقول عليه ... وتم المراد وتم نقض الحكم وإلغائه ولا حياة للإرادة الشعبية والرغبة الشعبية

ليه وصلنا لكدة ... ليه اتحولت كلمتنا لكلام في الهوا
عشان لما بياع يديك بضاعة البوبي لامؤاخذة يرفض يشتريها وتسكت وتقول سُهي عليه .... ولما بياع الملابس يبيعلك هدوم بواقي هدوم لا يمكن أن تُلبس وأنت ولا تفتح بقك المسمسم ولا تشتكي ... ولما تتسرق عيني عينك وتفضل راضي بأكلة سد الحنك الشعبية اللي مخلياك مش عارف لا تصد ولا ترد... و لما تدفع رشوة بدون وجه حق لواحد مرتشي عشان تاخد حقك اللي كدة كدة لازم تاخده بالعرف والقانون هاتاخده لكن نعمل ايه استسهلت وقلت تهين قرشك ولا تهينش نفسك رغم ان اهانة قرشك معناه اهانتك واهانة اي حد يحاول ياخد حقه بعدك.. احنا بلا فخر اللي بنربي الحرامية علي أيدينا ونديهم حقوق مش من حقهم .. بعد كدة مانقدرش نتكلم ونقول احنا ليه بقينا كدة
لأن سيادتك واحد من الجناة اللي جنوا علي كلمتنا وخرسوا صوتنا

هناك 23 تعليقًا:

حسام غانم يقول...

احنا خلاص اتربينا عالاستكانة والمشي جنب الحيط

مفييييييش فايدة

حواء يقول...

مفروسه هانم
انتي جايه تفرسينا ولا ايه ماحنا عارفين
ودلوقتي كمان الشيوخ بتحلل الرشوه
تصدقي لما ندفع رشوه علشان ناخد حقنا في نفس دورنا يبقي حلال
ولما ندفع رشوه علشان ناخد حقنا قبل غيرنا يبقي حرااااااااااام

موناليزا يقول...

هى على دى بس ده فى كل حاجة
حسبى الله ونعم الوكيل

ghorBty يقول...

السلام عليكم

عندك حق والله
ربنا يرحمنا بجد مش عارفه هنوصل لفين تاني

الشعب بجد الل يعينه نايم وشايل همومه مفيش حد بقا اصلا قادر يتكلم ولا يطلب ولو الوضع فضل كدا يبقي حقوقنا كلها راحت والحمد لله

فالمقولة الشهيره يجب ان نضعها اما ما اعيننا ونحيا بها

لن يضيع حق وراءه مطالب

بس اللي بيطالب في بلادنا بينال علي قفاه اكتر من الساكت

وربك يسترها

غربتي

mohamed ghalia يقول...

عندك حق والله ياسحر
احنا عاملين ننضرب على قفانا ومش عارفين لغاية إمتى
ربنا يستر علينا
دمتى بكل الود أختى

محمد فارس يقول...

الاخت الغاليه سحر
ايوه ده الكلاك اللي لما تكتبيه
انا ما ازعلش لكن لما تكتبي عن مقاطعة او التنويه عن مقاطعة شراء السيارات الجديده
بتزعليني منك انا عارف انك بقيتي مؤلفه وان شاء الله هاتبقي مؤلفه كبيره
فارجو ان تراعي كل الطبقات في كتاباتك القادهه ان شاء الله

مسدس صغير يقول...

وجهة نظر سليمة بالنسبة للجزئية الاخيرة..

احنا فعلا اللى بنربى الحرامية والمرتشين والنوَر والنصابين لأن احنا اللى بنساعدهم على ده..

اما سياسة اضربو راسكو فى الحيط فدى سياسة قديمة قدم المصرى فى بلاد الله..

هنعمل ايه يعنى؟

لنا الله

تحيتى

د/عرفه يقول...

سلام عليكم
دى اول زياره ليا هنا
وفعلاانا بكره السكوت والسلبيه المنتشره اوى عندنا
تكلم اى حد يقولك حتودى نفسك فى داهيه ليه يا عم واحنا مالنا
موضوع جميل

ثانيا بحب اقول بس لاى زائر حابب انه يعلن عندنا فى المدونه يشرفنا
http://advsarab.blogspot.com/
وبنرحب باى حد وعلشان خاطرك هنعملك اعلان عندنا من غير متطلبى كمان

قوس قزح يقول...

الضرب على القفا مش بيجى من فراغ
يعنى بيكون نتيجة ان الواحد حاول ياخد حقه و انضرب على قفاه او شاف حد بيحاول ياخد حقه و بردو انضرب على قفاه
و محدش بيحب ينضرب على قفاه
كويس اننا لسه عندنا دم ..تخيلى بقى لو كمان كل مرة نحاول نخد حقنا و ننضرب على قفانا .. بعد شوية هنكون مدمنين و نوصل لمرحلة الضرب على القفاه الاول قبل الفعل

و بعدين هاتى اى حد و دوريه طول النهار فى ساقية و تعالى اخر اليوم اضربيه على قفاه هتلاقيه يروح فى النوم فورا و لا هيفكر فى القفاه ده خالص .. و هى دى سياسة الحكومة

فكرتنى بنكتة الفئران ..لما اشوفك اقولهالك لو متعرفيهاش

سلام

kalamfady يقول...

بلدنا يا عجيبه فيكى حاجه محيرانى.. نزرع القمح فى سنين...يطلع الارع فى صوانى

م/ الحسيني لزومي يقول...

من اجل هذا كانت مدونتي مواطنون ضد الشعب فحن النين نشعل الحرئق ونولول ولا نحاول اطفائها الشعب المصري لا يثور الا اذا شبع هل رايت مثل هذا...كل يوم الاسعار تولع ولا مجيب ...شركات توظيف الاموال تنصب منذ عشرات السنين والمصريون مازالوا يضعون اموالهم بغيت مكسب 200% مع علمهم ان المخدرات بتكسب 50% الشعب لمصري في حاجه الي ما قاله الراحل جمال حمدان ن الشخصية المصرية حيث قال.

" إن ما تحتاجه مصر أساسا إنما هو ثورة نفسية، بمعني ثورة علي نفسها أولا ، وعلي نفسيتها ثانيا ،أي تغيير جذري في العقلية والمثل وأيديولوجية الحياة قبل أي تغيير حقيقي في حياتها وكيانها ومصيرها ...ثورة في الشخصية المصرية وعلي الشخصية المصرية ...ذلك هو الشرط المسبق لتغيير شخصية مصر وكيان مصر ومستقبل مصر"

blue-wave يقول...

ما خلاص
الكلام دلوقت زى اللى بيخطب فى ميت
ربنا يلطف بينا

د.خالدأمين يقول...

بسم الله بدانا التعليق

ايه الحلاوه دي

احلي قفا هو اللي بينضرب
اذا كنا بننضرب علي قفانا فده دليل علي ان قفانا حلو خالص وزي العسل واللي بيشوفه بيكون هيموت ويلحس العسل بايديه
تيجي سيادتك وعاوزه تحرمي الحكومه والداخليه والناس الغلبانه دي من انهم ياكلوا عسل من علي قفانا

الحل للي عاوز مينضربش علي قفاه انه يدهن قفاه ببصل او اي حاجه متشجعمش علي الاكل

بصاره مثلا

سلام بقي


اصل الدبان اتلم علي قفايا

كلاكيت تانى وتانى يقول...

ارجو نشر الايفنت لديك على مدونتك والدعوة لحضور الحفل بين كل المدونين وذلك لتأييد المدونات المشاركات فالحدث ويشرفنا حضورك
حفل توقيع العدد الثالث من سلسلة مدونات مصرية للجيب
كتاب "أنا انثى " ..لمجموعة من المدونات النساء

أول كتاب يناقش اهتمامات المرأة بقلم مجموعة من النساء ويطرح القضايا للنقاش

ضيفة شرف الحفل ..(غادة عبد العال ) صاحبة مدونة ..عاوزة أتجوز..والتي صدر لها كتاب بنفس العنوان عن دار الشروق

ومن المشاركات في كتاب ..أنا أنثى
نوارة نجم
اسر ياسر
ايناس لطفى
نرمين البحطيطى
شمس الدين
د . رشا عبد الرازق
بيلا شريف
مكسوفة
بسمة عبد الباسط
مريم الغنيمى
إيمان نادى
زهراء امير بسام
آية الفقى
مروة السيد
أميرة محمد محمد محمد
فاتيما
مذكرات عانس
نرمين البحطيطى
سلمى أنور
انجى سمراء النيل
سارة ابراهيم على
سمر مجدى
مروة النجار
شيماء حسن
نسرين عبد النعيم
د.مرام محمود
ايناس لطفى
نجلاء الشربينى
محاسن

يصاحب الحفل عرض فيلم قصير و==================================
المكان
المركز الثقافى الدولى
17 ش السد العالى ميدان فينى الدقى
الشارع المقابل لشيراتون الجزيرة
اقرب محطة مترو انفاق محطة الاوبرا
الزمان
يوم 3 مارس الساعه 4.30 عصرا

اقصوصه يقول...

فاعتقادي

هاي مش بس مشكلة المصريين

هاي مشكلة العرب كلهم

مشكلة الامه الاسلاميه بشكل عام

كلنا ما عدنا نقدر نحقق اللي نبيه

دايما نتامل الخير بالمستقبل

وعلى امل ومتعشمين

ان القادم يكون اجمل

الله يعينا على ما بلانا

نسال الله حسن العاقبه بالاخير

bastokka طهقانة يقول...

ان جت على الضرب عالقفا تهون
المشكلة ان الضرب بقى تحت الحزام
اوروفوار

hasona يقول...

السلام عليكم
تذكرت كتاب - علشان ما تنضربش علي قفاك

لكن لا مجيب

وكل فرد بيدور علي قفاه لوحده
ومش بنتحرك الا لما يجي الدور علينا
لذلك لن نتقدم ولن نتحرك للأمام

لابد أن نكون علي قلب رجل واحد

محتاجين ثورة في مجالات كثيرة
وثورة علي أشياء أكثر

تحياتي

Foxology يقول...

يا استاذة احنا اساسا ملناش كلمة ع الحكومة وده من قديم الأزل من أيام الفرعون ذات نفسه :))

شئ طبيعى اننا نبقى مهمشين !! ومن امتى الحكومة بتنفذ مطالب شعب ؟؟؟ احنا اخرنا ان اللى ينفذ طلباتنا اليوم المفتوح فى فقرة ما يطلبه المشاهدون !

لو احنا اللى جبنا الحكومة .. لو احنا اللى بنتحكم فى مصير الحكومة .. كان هيبقى فى كلام تانى :)

تحياتى :)

صيدلانيه طالعه نازله يقول...

للاسف دلوقتى اى حد بيخلص مصلحه ليه فى اى مكان اصحابه يسألوه و دفعت كام عشان تخلص بسرعه
عشان كده انا دايما مشاويرى الحكوميه متعطله لانى بارفض اسلوب الرشوه
اما بالنسبه للحاجات اللى واحد بيشتريها و تطلع مش تمام الواحد مش بيرجعها ساعات من باب الكسل مش من مبدأ التهاون فى الحق و المره اللى فكرت ارجع حاجه بايظه كانت كيتشن ماشين جبته من هايبر فى اكتوبر و سافرت من اسيوط لاكتوبر عشان اغيره بسرعه و فى الاخر طلع انا اللى معرفتش اشغله
ههههههههههههههههههههه

bolbol يقول...

مدونه لطيفه ورقيقه جدا---- الرب يباركك ويرزقك بعريس مثلي

مدحت محمد يقول...

عندك حق

MaNoO يقول...

طبعا كلامك كله فى الجون والله يمكن دا كمان من العصور القديمة واحنا كدا بس محبتش فكرة عرض المشكلة برده ماهوا دا من اسباب الضرب على القفا برده اننا نعرض المشكلة وخلاص مانشارك بعض حلول عملية عشان فعلا نحس ان كتاباتنا دى بتعمل حاجة
ارجو تقبل رأيى المتواضع واتمنى التواصل بالمدونات

funckydoctor يقول...

ايوة احنا بنمشى جوة الحيط الصراحة
مش هما ربونا على كده :S