الثلاثاء، 8 سبتمبر 2009

حماتى لسة ملااااااااااك


هل جئتي ياحماتى تطلبين ناراً أم تراكي جئتى تشعلين البيت ناراً

الست حماتى ربنا يعمر بيتها بخناقة شبه اللي عملتها عندى في بيتي جاءت زيارة وكانت ناوية تقعد عندى قول تلات أيام بالكمال والتمام

اول يوم شيلتها على كفوف الراحة فهى كانت مريضة بالانفلونزا المعدية بصورة وبائية لدرجة انى اخدت الدور منها واتسطحت على الكنبة جنبها مريضة

دا اول يوم مرعلى خير رغم العدوي التى اصابتني


اليوم التاني وانا مريضة متسطحة اخذ اولادى العفاريت يلعبون ويجرون هنا وهناك وانا زورى مع الصيام تعبان لايخرج صوتاً

حتى جاء زوجى من عمله وهنا صدّرت له حماتي بوذاً مستورد من القلب الاسود فدخل زوجى المطبخ عليا مجلجلاً : انتي عملتى ايه في ماما نفسيتها مش تمام اوعي تكونى زعلتيها

ومع الحاحه

قامت الحريقة اخذت تحكى له عما حدث : الست مراتك سامعة عيالك بيصرخوا ومش بتنطق

انتم جايبيني هنا تتعبونى والا تريحونى بقي دا بيت فيه واحدة ست

اخذت اسمع كلام يخرج من فمها رصاصا مع محاولة يائسة من جانبي لكي اهدئها

انا كنت نايمة عيانة ياناس اعمل ايه بس

مش مهم طبعاً بالنسبالها نومي وتعبي اللي هي السبب فيه وجوزي بالطبع كان معها على طول الخط مافيش تهدئة من ناحيته، وطبعا فضيحتى هاتبقي بجلاجل

على اساس كلامها اللي انا متصوراه واللي هايكون : انا روحت عند ابني ، مرات ابني بقي ست بااااااااااااااااردة

العيال بيعملوا دوشة وهي مش هاين عليها تقول بس ياواد

طبعا جوزي في حالة زعل منى بسبب مامته

والملاك هاتفضل طول عمرها ملاك تعمل العملة وتقعد تتفرج على الدنيا بتولع حواليها

هااااااااااااااا دنيااااااااااااااااااااااا وحدووووووووووووووووووووه


هناك 20 تعليقًا:

Unknown يقول...

انا جاى اهدى النفوس
نصيحة
فى الأيام المفترجة ديه
صالحى حماتك و بوسى راسها
و اشرحلى لزوج حضرتك
اللى حصل
و هدوا الأمور
عشان العشر الأواخر
و بيقولوا ان ربنا لا يغفر لمتشحانان
و بعد العيد بقى
شوفى حتتصرفى ازاى

ربنا يهديكى للصواب و للخير
بس حماة حضرتك ست ملاك فعلاً
بدليل كتاب حماتى ملاك اللى قريته
و عجبنى
:-)

غير معرف يقول...

See, both you and your mother-in-law are mistaken.
so, come on, grow up and you either solve the problem from the roots or stop complaining.
Complaining is for the weak

الـسـيـدة نـون يقول...

روحي يا بنتى فهمى جوزك القصة ايه
وبعدين انتى مش بتقولى انك تعبانة وباين عليكى وصوتك مش طالع؟
يبقى المفروض جوزك يقدر تعبك

صبرني يارب يقول...

طبعا طبعا

جوزك غلطان يعنى هو مش شايف انك تعبانه

المؤمن كيس فطن يا سيدى الفاضل

ارضي مامتك وراضي مراتك

قولها يا ماما معلش اصل سوسو تعبانه

قولها معلش يا سحور استحملي ماما ست كبيره وتعبانه

زعق فى العيال وقولهم يا وحشين يا اشرار تعبتوا تيته وماما وهوما تعبانين

اعملك شو كده وانت قاعد

ارضي جميع الاطراف

ونفسي نفسي نفسي

الناس كلها تعمل بالمثل الى بيقول

شيل ده عن ده يرتاح ده من ده

ما تبقوش تجيبوا البنزين جمب النار بعدين تقولوا ولع ليه

الف سلامه عليكى يا جميل خدي بالك العيال تتعدي

غير معرف يقول...

:(

جوزك كان المفروض يتفهم موقفك ..بس معلش يمكن ضغط الشغلو الصيام..فهميه اللى حصل و راضى حماتك عشان ربنا و رمضان و ربنا يجازيكى خير يا رب

moustapha achraf يقول...

مش شايف مشكلة اصلا

Ranim Ayman يقول...

هههههههههههههههههههههه


حتي في رمضاننننننننننننننننن يا عيني عليكييييييييييوربنامعاكيييي يا سوسو

كيكى عوووووو يقول...

العبى لعبة الافلام وفاهمية

Asmaa mahaba يقول...

معلش نصيبك اقصد نصيبتك:)

micheal يقول...

ربنا يصبرك..حاولي تستحملي

Mohammed Salaheldeen يقول...

حماتك دي بتفكرني بأمي :D :D
نفس السخسيه اللي خايفه على ابنها
وابنها اللي هو انا اللي متعلق بمامته جدا
بس ده مالهوش حل
لازم تطلقو حالا
انا جي اهدي النفوس :P:P:P

غير معرف يقول...

العزيزة حماتي ملاك ياريت تقولي لي فين اقرا الاجزاء الاولى من مدونتك وحكاويك عن حماتك الست ملاك لانها عجباني قوي ودمتي.

غير معرف يقول...

العزيزة حماتي ملاك ياريت تقولي لي فين اقرا الاجزاء الاولى من مدونتك وحكاويك عن حماتك الست ملاك لانها عجباني قوي ودمتي.

المـــفـــــــقــــــــوعـــــة مــرارتـهــا يقول...

عزيزي غير معرف
يسعدنى تواجدك وزيارتك
الاجزاء الأخرى من حكايات حماتى ملاك موجودة داخل كتاب يباع الآن في المكتبات الكبرى مثل الشرووق والبلد وفيرجن كل ماعليك هو ان تذهب الي احد تلك المكتبات وتسال عن الكتاب وسيدلوك عليه
وشكرا على كلامك الجميل
سحر غريب

المـــفـــــــقــــــــوعـــــة مــرارتـهــا يقول...

عزيزي غير معرف
يسعدنى تواجدك وزيارتك
الاجزاء الأخرى من حكايات حماتى ملاك موجودة داخل كتاب يباع الآن في المكتبات الكبرى مثل الشرووق والبلد وفيرجن كل ماعليك هو ان تذهب الي احد تلك المكتبات وتسال عن الكتاب وسيدلوك عليه
وشكرا على كلامك الجميل
سحر غريب

MǿиY El-Shreef يقول...

وايه اخرة ده كله طيب

ماتفهميه وتفهميها كل حاجه

ربنا يعينكم على بعض

كل سنه وانتي طيبه يا سحر

عمرو جويلى يقول...

السلام عليكم
أشكر حضرتك على زيرتك
كل عام وحضرتك إلى الله أقرب
وكل عام وحضرتك والأمة الإسلامية بكل خير
وكل عام وأنت إلى الله أقرب
وتقبل الله منا ومنكم جميع صالح أعمالنا
أسأل الله العلى القدير أن يغفر لنا جميع ذنوبنا
(" كبيرها وصغيرها ")
وأسأل الله العلى القدير أن يرحمنا
وأسأل الله العلى القدير أن يرزقنا الجنة
وأن يجمعنا فى الجنة
وتقبل الله
خالص تقديرى

غير معرف يقول...

افرحي إن انتي متجوزة راجل .. راجل بصحيح .. يقف مع أمه على مراته و على الجن الأزرق

مش راجل أهبل مراته هي اللي حاكماه و ممشياه

احمدي ربنا إن جوزك عنده أصل و وفاء لأمه و هي كبيرة في السن .. عشان حضرتك لما تكبري و تعجزي و وشك يكرمش و جسمك يبوظ جوزك يفضل برده عايزك و ما يبصش لواحدة تانية أصغر منك .. ده اسمه أصل و وفاء

انتي الغلطانة بنسبة 100% .. غلطانة عشان ما ربتيش عيالك صح و فهمتيهم إنهم مش المفروض يعملوا دوشة و جدتهم نايمة تعبانة (و أمهم كمان نايمة تعبانة) و غلطانة عشان بتدلعي .. إيه يا هانم .. مش هاين عليكي تدوسي على نفسك و تسكتي عيالك؟ لو مش خارج منك صوت كان بإيدك تقومي تسكتيهم من غير ما تتكلمي .. لكن انتي كنتي مستمتعة بمضايقة الست العجوزة

غلطانة عشان بتحاولي تقومي جوزك على أمه .. بتحاولي تصنعي من جوزك واحد عاق لأمه اللي لجأت لبيته عشان ترتاح فازعجتيها انتي .. إيه يعني اتعديتي منها؟؟ دي لولاها ما كانش زمانك عايشه في بيت الراجل ده لأنه ما كانش هيبقى عنده بيت

فوووووقي يا هانم

غير معرف يقول...

الي غير معرف طويل اللسان

ياسلام وانا بااقوله يرميها فى الشارع بيتى مفتوح لها فى اي وقت بس تيجى من غير ماتخرب البيت وتقلب جوزى عليا شوف الشكلة يابيه حصلت من قد ايه ومع ذلك احنا لسة مش طايقين بعض ازاى يعني احب واحدة بتخرب بيتي
تيجي على عيني وفوق راسي بس مايبقاش آخرة خدمتها علقة ووش خشب انا مااستحقهوش
اقسم بالله لو واحدة غيري فى المواقف دى واتعرضت للاهانات الغير مقبولة دي واهلها مش ناس طيبين ذى اهلي وبينصحونى دايما انى اطاطي عشان المركب تمشي لكانت الحياة انتهت من زمان نهاية مؤلمة
ربنا يارب يسعدك بحماة شبهها اصل اللي مايقدرش ظروف الناس بيشوفها بالظبط
مع عدم تحياتى

شهووووده يقول...

موضوعك اسلوبه جميل,, اما بالنسبة لحماتك استحمليها وحبيها بجد ..او بمعنى ادق كل ما تسيء ليكي عامليها بلطف حتى لو تعبتي باختصار شديد اعتبريها مامتك مش حماتك ....


احتراماتي