السبت، 5 ديسمبر 2009

علي مشارف الثلاثين


اقف الآن علي مشارف الثلاثين.. خائفة مترددة أؤخر قدم وأقدم الأخري أنادي علي العشرينات وأتوسل إليها ألا تتركني فأنا لم أحقق أحلامي الكثيرة فأحلامي ماتزال جنيناً يحيا داخلي ...لم تتنفس نسائم الحياة بعد ولم تصرخ صرختها الأولي

ولم تأخذ أسماً يُميزها، أحلامي لم تسكن البيوت ولكنها مازالت تسكن داخل رحم أفكارى



مُصابة أنا بإكتئاب ماقبل سن الثلاثين، هكذا أسميته فمن تلك اللحظة ستتغير نظرة العالم لي سأتحول من فتاة عشرينية إلي إمرأة ثلاثينية .

سأنتظر خطوط تجاعيدي الأولي وشعيرات رأسي البيضاء فبعد الثلاثينيات تحين الأربعينات والخمسينيات بملحقاتهما المقيتة.


خائفة أنا فهاهنا ستكون نقطة اللاعودة .



ولن يكون بإمكاني كإمرأة أن أكذب بشأن عُمري فأنا كتاب مفتوح يرفض أن يكذب أو يتجمل

كتاب تعرف تفاصيله كلها منذ نظرتك الأولي علي العنوان.

سحر غريب

هناك 21 تعليقًا:

Heba يقول...

على فكرة, سن أهل الجنة 33 إن شاء الله

فاتيما يقول...

الاول
صباح الخير يا سحورة
و كل سنةو إنتى طيبة ياحبيبتى
ثانيااااا
معلش
ادينى رقبتك لما امسك فى زمارتها
زعلان يا قمر إنك شارخ عالتلاتين
اروح اموت نفسى انا و لا اولع فى الرقم القومى و لا اعمل إيه؟!!!
محنا رايحين ع الأربعين أهو و لا هاممنا
لأ طبعا ... يهمنى و مش هضحك عليكى
بس انتى فعلا فى حالة كآبة تلاتينية معتادة كلنا تقريبا مرينا بيها
بس لما مريت بيها الوقع كان على خفيف لأن كان عندى حاجات ابشع وقتها تكئبنى
ليه بصة للجانب الفاضى يا سحر ؟؟
إنتى يا حبيبتى إنجزتى كتير برضو
صحيح ليس كل ما تتمنى دا طبيعى
لكن متعرفيش
مش كل شىء بأوان ؟
و جايز امنياتك نصيبها
لم يحن بعد؟
ربنا يبارك فى وقتك و ايامك
و عيد ميلادك ال 31 يكون البوست مغاير لبتاع السنة دى
كل سنة و انتى طيبة يا سحورتى
هتيجى انتى و سلوى يوم البؤجة و لا مينفعشى؟؟

dramaqueen يقول...

كل سنة وانتى طيبة وعقبال السبعين
وهتبقى برضه قمر
ربنا يديم عليكى الصحة والعافية

احلام جوليا يقول...

تعرفي ايه اسوا هاجس ثلاثيني اسوا هاجس ان تكوني عجوز في عيون حبيبك زوجك او ان يفكر بانك اصبحت عجوز ويفكر في شابة صغيرة هذا اكبر هواجس النساء اعاننا الله على بكرة الثلاثيني والاربعيني

سواحة يقول...

كل سنة و انت طيبة :-)
تصدقى عديها و انا مش واخده بالى ، كانت حياتى شغل و شغل وشغل :-) مفرقتش العشرين من الثالثين، و ياريت محسش بيها عند الاربعين كمان:-)

بس الناس هى الى بتركز قوى فى السن اكثر منك و صحيح الرفم القومى بقى فاضحنا مش عارفين نخبى منه :-)

المهم ايه نظرية سن اهل الجنة ده ؟؟ مفهمتهاش يكن اروح اموت دلوقتى :-)))

بسمه عبدالباسط يقول...

كل سنه وانتى طيبة يا سحورة

وعلى فكرة مالكيش حق تكتأبى خاااااالص ويمكن هقولك ليه بس فى موضوع بقى معتبر لأنها كبرت فى دماغى

:))))))))

Mafrousa يقول...

لسة فاضل 3 شهور بحااااااااالهم
مالك متسربعة ليه
و بعدين الصراحة انتى فارسانى بالبوست ده فرسة مالهاش ولا وصف ولا ملامح
:D
و بعدين يا بنتى ال 30 احلى بكتيييير من العشرينات
و استنى بقا لما توصلى ال40 واااااو حاجة تانية الا بقا لما تبقى 50 مش ححكيلك ...و طبعا بقا ال 60 ديه بقا قصة لوحدها و ملكوت تاااااني خالص...عاوز قاعدة
هههههههههههههه
فرساني يا مفقوعة
الصراحة الصراحة هههههههه فقعتيلي مرارتي
يا بنتى السن فى القلب مش بالمظهر خاااالص
انتى لو حاسة ان سنك صغير...كل اللى حيشوفك
حيشوف فيكي السن اللى انتى حاساه
هههههههههههه خدى النصيحة من مفروسة
ههههههههههه اللى يشوفها يديها يا دوبك كي جي 2
هههههههههههههه
ربنا يسعدك يا سحور و كلسنة و انتى طيبة مقدما
لاحشن يا أوختشي افيص قبلها..ما انتشي عارفة البير و غطاه ..كملنا ال 80 بالعافية
هههههههههه

Foxology يقول...

اختلف معك استاذة سحر فالسن المذكور هو بداية مرحلة النضج الفكرى الكامل والكمال لله وحده

تحياتى وامنياتى بعمر مديد :)

mohamed ghalia يقول...

لا داعى لهذا الخوف

mohamed ghalia يقول...

كل سنة وانتى طيبة ياسحر مع انى زعلان عشان مش بتسألى خالص

بنت مصرية يقول...

يااااه فكرتيني باللحظات دي اهو انا دلوقتي في اقترب من منتصف الثلاثين ولسه بنادي على العشرينات
حقيقي ليكي حق تقفي تقدمي رجل و تأخري رجل لأن العشرينات فعلا مرحلة سنية جميلة لكن الثلاثين اكثر نضجا و تغيير مقاييس رؤية الامور تماما وليها طعم مختلف لكن العشرينات شيئ جميل خصوصا ان فيه اشياء كتير هتلاقيها بتطير من حياتك و مش هتعرفي ترجعيلها ابدا بس تحياتي لك بثلاثين فيه حيويه العشرينات + نضوج و صبر و هدوء

تقبلي مروري

بنت مصرية يقول...

نسيت اقولك كل سنة وانتي طيبة

يوميات شاب منوفى يقول...

كل سنة وحضرتك طيبة كل سن له حلاوتة

شفـقــة و إحســــان يقول...

كل سنة وانتى طيبة يا قمرى
وما تزعليش كلنا لها وبعدين انتى لسه صغيرة دى تلاتين يا سحر بسيطة
وكده نبقى بصرة

Mahmoud البطراوى يقول...

حبيبت بس اقولك ادخلى ولا يهمك .. وابقى احكيلنا فى ايه هناك :D

وحشنى انى اكتب تعليق هنا بس حظى جه فى البوست دا
معلش بقى

مـحـمـد مـفـيـد يقول...

أحساسك بانك لسه مش حققتي اي احلام ده اكبر دافع ليكي لمزيد من النجاح
كل عام وانتي بخير

micheal يقول...

وليه منشوفش الموضوع من زاوية أنا كبرت وخبرتي زادت
تحياتي يا سحر

العلم نور يقول...

على فكرة هذه أحلى مرحلة في العمر فهي تعد قمة النضج لدى الإنسان .. إسأل مجرب.

شفـقــة و إحســــان يقول...

وحشتينا انتى مختفية فين يا سحورررررررررررة
شفقة

sal يقول...

سنغادر هذه الدنيا ولم نحقق ربع احلامنا
ربنا يديم عليك نعمة الصحة والبصيرة
وكل عمر وليه ميزاته وقيمته
ولا تزعلى ربنا معاك

alassmaa يقول...

طب انا فضلي كم يوم وداخلة في العشرين , ومصابة باكتئاب ما قبل العشرين , اعمل ايه بأة ؟؟؟