مأزق القرارات

تحديث

غداً الخميس الساعة خمسة ونص في برنامج أسرار البيوت علي الأيه آر تي شوفوني

وشكر خاص لجريدة النهار ومعد صفحة عالم المدونات الأستاذ أشرف شحاته لنشر بوست من بوستاتي في الصفحة

طوووول عمر جوزي في وقت اتخاذ القرارات المصيرية أعصابة تبقي بايظة وشايط علي طول

كنت ساعتها بااااااااااااااااردة والا التلاجة وكنت دايماً أقول له ليه كدة الدنيا ابسط من كدة

ومش مستاهلة ان الواحد يتعب نفسه بالمنظر دا

صحتك أهم من الدنيا يابعلي

لحد لحد ماجه الدور عليا وبقت في ايدي قرارات لازم اخدها ومشاكل مفروض احلها

اكتشفت ان الدنيا مش سهلة ذي ماكنت فاكرة ومش بسيطة خاااالص ومحتاجة تفكير واتخاذ قرارات

قبل ماامشي عاوزة اقول حاجة ...انا دخلت عند زميل تدويني رائع أحبكم تزوروه ...العزيز مايكل

http://strugglingmichealitoo.blogspot.com/

الفرخة والخنزير

عندما بدأت انفلونزا الطيور سياحتها الطويلة في مصر قلت مافيش فايدة فينا ....مصر هاتستقبلها احسن استقبال وهاتكرمها بكرم ضيافتنا اللي احنا مشهورين بيه

وعدت السنين ووصلت مصر بجدارة للمركز الثالث في عدد حالات الإصابة بإنفلونزا الطيور

والآن يدق بشدة علي بوابة الأوبئة القاتلة مرض جديد ولو انه كان متوقع منذ بداية انتشار انفلونزا الطيور

فقد قيل وقتها ان فيروس انفلونزا الطيور سيتحور إلي فيروس جديد سينتشر بين البشر اذا حدث وتقابل الفيروسان الذي يصيب الانسان

والذي يصيب الطيور في جسد الخنزير مصنع الأوبئة وهو ماحدث فعلاً والفيروس الجديد لعنة جديدة لا علاج لها حتي الآن انتشر بصورة حادة في خلال ايام معدودة ... لعنة الله عل علم وقف ساكناً والناس يموتون ... ماذا قدم العلم لنا لماذا لم

يتم نقل الخنازير من حظائرها القريبة من البشر اولماذا حتي لم يتم ذبحها منذ عرفنا بالمصيبة التي في انتظارنا

الكارثة انهم عندما بدأوا في ذبحها واعدامها بقرار رئاسي قام بعض مربيها بتهريب بعضها

أيها الجهل اللعين مودينا علي فيييييين؟

لقد قتل الفيروس الجديد العديد وقد وصل بالفعل الي اسرائيل جارتنا اللدود ونحن ننتظره قريباً عندنا للأسف فاتحين اذرعنا منتظرين للموت ليأخذنا بين أحضانه مُرحباً

وسيتم تطهير مصر من سكانها في القريب العاجل

ياتري هانروح في التطهير ولا لسة لينا بقية

حماتي ملاك في مجلة كل الناس

فيه تحقيق عن الحماوات نزل في مجلة كل الناس بقلم الكاتبة الموهوبة هند أمين

التحقيق اخذ منها ست صفحات منهم صفحة كاملة تمثل مشاركتي في التحقيق

بجد أنا سعيدة جداً أن مجلة عريقة ذي مجلة كل الناس تكتب عن كتابي

في نفس المجلة اللي بيكتب فيها الشاعر والمفكر الذي احترمه واحترم أرائه كلها

فاروق جويدة والكاتب الكبير دكتور سامي هاشم الذي أتابع عموده في النهاردة أجازة

ابقوا اقروا التحقيق وبلغوني رأيكم

سوبر أديب

محمد تهامي موهبة جديدة خارقة للعادة يثبت أن الموهبة لا تحتاج عمراً طويلاً لكي تختمر داخل الإنسان

سعيدة بوصول كتبه إلي مكتبتي وقد لاحظت من خلال قراءتي لكتابه بني آدم مع وقف التنفيذ

أن نقطة قوة محمد تهامي في الكتابة هي كتابة الروايات التي تنبع من أعماق ودهاليز التاريخ فتصف

حدث قديم مثلاً من خلال مجموعة من الشخصيات والأحداث الخاصة

وقد أنهيت أول قصة قصيرة من كتاب بني آدم مع وقف التنفيذ وتركت الكتاب وأخذت أقول

بصوت عالي ووووووووووووواو

القصة روعة بالفعل وأسلوب محمد فيها أكثر من ممتاز... لون جديد سيخلق كتب مبسطة

للتاريخ الذي هجرناه

ولقد حضرت مؤخراً حفل توقيع كتاب هيروبلس لمحمد تهامي

والكتاب معي في جدول قراءاتي وسأقرأه وأقول لكم عن رأيي بصراحة فيه

سعيدة بمحمد جداً وأتنبأ له بمولد أديب جديد

خارق للعادة أو سوبر أديب

بالتوفيق يامحمد

راحت عليك يالساني

اذيكم كلكم

انتم ناس ممتازين خاااالص وحلوين وذي الفل

بس أنا بقي اللي لازم أكن في الذُرة واخليني في حالي وانكتم عشان كلامي دا بيجيبلي وجع القلب

وبيزعل ناس كتيييييييير مني

مش معني كدة اني هااقفل المدونة

لأ بس هااحاول مااقولش كل اللي جوايا

أومال انا باعمل ايه دلوقتي ؟

باقول برده اللي جوايا .

ياريت اللي قري حاجة تزعله يسامحني

انا بصراحة كنت فاكرة ان المدونة مش مقروءة

حاجة كدة مالهاش لازمة حاجة خاصة بأفضفض فيها وأطلع اللي جوايا بدال مااطق

بس واضح اني بعد كدة هااطق من سُكات

ولا من شاف ولا من سمع

مصر هاتفضل زحمة

تحديث :

موضوع كتبته الكاتبة النشيطة باسنت موسي علي موقع الأقباط المتحدون زوروه علي اللينك دا

http://www.copts-united.com/article.php?I=57&A=2089

مصر هاتفضل زحمة عارفين ليه؟

لان المصري لو اتخلص من الزحمة عينيه هاتفتح علي حاجات مش ولابد

الديموقراطية مثلاً والعياذ بالله يااخوانا دي رجس من عمل الشيطان ولازم نبعد عنها

طول ماندي ضهرنا للديموقراطية هانفضل عايشين عيشة هنية

والا الحرية... استغفر الله العظيم... البت سحر النهاردة بتجيب سيرة حاجات مش ولابد

دي الكلمة لوحدها تودي النار والعياذ بالله

وعشان شيطاننا الله يجازيه مايوزناش ونجري وري الحاجات الوحشة دي الحكومة

كتر خيرها مظبطانا زحمة وطوابير والذي منه

يعني تعمل ايه المغفور لها ... غلبت معانا

شعب لسانه عاوز القطع والبنية مستحملانا

ولا يوم قالت تخلص علينا ولا يوم فكرت ... شفتوا فكرت بس ..تخنقنا بسحابة بنفسجي

واحنا مع كل دا مش مقدرين نعمة الديكتاتورية .. يديمها علينا نعمة

ومش مقدرين سياسة اللسان المقطوع اللي مابيسمحش غير برأي واحد وكلمة واحدة

تعيش الكلمة الواحدة تا تا تعيش

دي الوحدة حلوة ياجودعااااااااان

في بلدنا انت معي اذاً انت قديس انت ضدي فانت ابليس

والعياذ بالله

انتم معايا ولا مش معايا

خلي باااااااااااااالكوفكر كويس ياعم انت وهو

معااااااااااااايا

زيارة المنصورة أتأجلت ولما يتحدد ميعادها هاابلغكم

تحدديث مهم جداً : جاني تليفون من محمد هشام عبية كتر خيره الراجل شقيان معانا بصراحة بيقول ان صاحب المكتبة أعتذر عن حفلة التوقيع فالحفلة أتأجلت ولما يتحدد ميعادها بعد هاابقي

المهم حلقة قناة الإنسانية عدت علي خير والمذيعة كانت هايلة بصراحة وشاطرة ومحضرة علي غير عادة

مذيعين الايام دي