الأربعاء، 30 يوليو 2008

من حقي السجادة مادامت مرمية علي الأرض



صوت من بعيد بينااااااااادي
ألحقووووووووني ... حد سامعني أنا هنا ... حد يفتح الأوضة الضلمة ... الفيران هاتاكلني ... آآآآآآآآآآآآآآآآي... الفار أبن الفارة قرم حتة من طرف الجلبية... آه ياجلابيتي.. ياللي أتقطعتي جديدة ياااااااااااني

ماتنكتمي ياللي تنقرصي
أيه مستغربين ليه ... ده صوت المفعوصة سوسو من جوة ... أوعي تشاور عقلك وتقول هاأنقذها .. أنا صاحيالك ياأللي هناك ... أنا أيدي طايلة وممكن أحبسك معاها ... والفيران مفجوعة وتاكل من الحبايب ألف ...
النهاردة هارد علي الهانم اللي زعلانة اوي اني باطالب بحقي في السجادة اللي في بيت أبني ... ماهو أصل أنا إللي شارياها من الست جارتنا الدلالة... يعني مجايبي وعاوزاها


بقي أنا أديها سجادة آجي ألاقيها متلقحة علي الأرض ذي بقيت سجاجيد الدنيا... ده بدال ماتشيلها جوة حباب عينيها أو تعملها حجاب يحميها وحتي لو كانت السجادة بفلوس الواد أبني وهو أنا وأبني أيه
...هو مش بيقولك في المثل
أمك هي أمك حتي لو شربت من دمك
وأنا ماليش نفس أشرب من دمه أنا بس عاوزة سجادتي حبيبتي
وقال أيه البت رايحة تشكيني لأبني وهو يقدر يردلي كلمة ...ده أنا كنت أنام وأنا غبضانة عليه .. يصحي الصبح يلاقي نفسه في الشارع وبينادي ويقول عشانا عليكي ياحكومة... ده دعا الأم يابا ... مابيأخرش.. ويايقدمك خطوة يايوديك اللومان
كملت الهانم عاوزة تعمل ذيي وتطالب بحقوقها في هداياها ليا ... ياخي جات كسر حُقها مابتختشيش
إيش جاب الطعمية لصحن الكباب .. الكباب أنا طبعاً
أنا راضية زمتكم .. بقي يرضي مين أن إللي تنشك في نواضرها سوسو تروح تشتكي لبعلولتي .. هي فاكراني بخاف وأكش من ده الوش ... أنا بس لايمتها المرة دي عشان الراجل بقاله سنين غايب ومش عايزة أرجعه بخناقة ... ولو أنه ولا يهمني ببصلة ... ده أنا فيفي والأجر علي الله ..مش هاييجي علي آخر الزمن ويهزولي شعرة من شعراتي

هناك 49 تعليقًا:

نعكشة يقول...

لأ صحيح معندهاش حق

كانت تلزقها في السقف ولا تعملها برواز

معندهاش زوق يا اوختشي

اهم حاجة انك مسكتيلهاش

هههههههههه

والله انتي سكر

ربنا يعزك و يعينك

دمتي سالمة

سلامٌ عليكي

Mercy Devil يقول...

بصى من الاخر انا اول مرة ادخل على البلوج بتاعك ومش فاهم انتى عندك كام سنة بالضبط ؟ !!! بجد والله
قرأت موضوع 3 مرات ومفهمتش حاجة مش عارف ليه !!!! انا مش غبى بس علشان مش متابع اللى فات
فممكن توضحى علشان أحب بعد اذنك طبعا انى اكرر زيارتى ؟

إبن مصر يقول...

السلام عليكم
الحمد لله ان احنا مش حبايب اه اصل سوسو طلعت من حبايب الست فيفى اصلها كانت بتقول ... والفيران مفجوعة وتاكل من الحبايب ألف ...

ربنا يستر علينا

ياست فيفى خفى عن سوسو شويه دى بنت ناس برضه

nageh

Mahmoud البطراوى يقول...

السجاده على الارض؟؟
السجاده الى هى السجاده تتحط على الارض؟؟
دا استهتار .. دا عدم شعور بالمسئوليه
السجااااااااااده على الارض

دى لازم مش تتحبس فى اوضه الفيران ... دى تتحبس مع اسد جعان المفروض

بس على متلاقى الاسد ابقى انقليها اوضه فاضيه
:)

Mafrousa يقول...

تصدقى يا تيزه
عندك حق مليون فى الميه
بقى حد فى الزمن ده يحط السجاده على الارض؟؟؟؟
بقى حد عاقل يعمل كده؟؟؟؟؟
يعمل عملتها السوده ديه؟؟؟؟
هيه الارض برضه مقام السجادة
ولا السجادة مقامها الارض؟؟؟؟؟
لا لا لا
انتي لازم تنتقمي شر انتقاااام
ايون
لازمن ولا بد...تعاقبيها اشد عقاب شاهدته البشرية

انتي تأشري بس تقوولى انتي كنتي عايزه السجاده تتحط فين ونحط سوسو بدلها اه
يعني لو عاوزانا نفرشها على السرير يبقى خير
عاوزانا نحطها فى دولاب احسن برضه
بس اكيد مش حتكوني عاوزاها تتحط فى اوضة الفيران مش كده؟؟؟؟
ديه السجادة.....طبعاااااا

د/اجدع بنوته يقول...

هههههههههههههههههههههه

وحشتينى ياسوسو والله

ووحشتنى حكايات جدا

ووحشتنى حماتك والله

يارب تكونوا كلكم بخير

kochia يقول...

ازاي الكلام ده
السجادة علي الارض

ملهاش حق ابداااااااا
امال لما تحط سجادتك انتي علي الراض تحط السجاجيد العادية فين
في الزبالة

سوسو دي تستاهل الفيران
اوعي تخرجيها من الاوضة

تحياتي
ويخليلك ابنك يا حبييبتي

حنين القلب يقول...

طبعا فيفى عندها حق فيه سجاده تتحط على الارض معلش يا فوفه هى مش عارفه انها بتتفرش على السرير بدل الضرابيه
يخرب بيت كده
والله عند حق يا سوسو دنا لو منك كنت ولعت فيها هى والسجاده
وايه ان امك تمص دمك
ده مين اللى قال المقوله دى دراكولا
ابعدى عنها يا سوسو ولو على السجاده فى داهيه
هاتى غيرها وان شاء الله تحطيها فى الحمام براحتك
ربنا يصبرك

اهو ده عيبه يقول...

ايه يا سوسو هى الست دى مش ناوية ترتجع بقى
انا كل ما ادخل الاقيها يبقى هاين على اقفل المدونة على بوزها
وبعدين سجاده ايه دى كبيرها كليم ولا حصيرة
ارجعى بقى يا سوسو وابعدى والنبى الست دى لحسن عندى حساسية

عالم ماريونت يقول...

انا عايزة اشوف دم
مش كفاية الكلام والشتيمة ولا حتى الضرب
بصي يا مفقوعة: انتي لو اللي بتحكي علية دة بجد يبقى ربنا يكون في عونك اصبري وانشاء الله ليكي الجنة
ولو عايزة نصيحتي:احلة حاجة تعمليها انك تطنشي وتكبري الدي وتسقعي الجي

غير معرف يقول...

في مثل ستي اللهيرحما قالتهولي وانا صغير بفتكرهكلما ادخل عندك
- الحما حمى - يظهر حماتك من النوع دة
ربنا يصلحلك الحال

Mona Shereif يقول...

ايه ده
معقول فيه سجادة تتحط على الارض
لا حقك انك تاخديها مش معقول ابدن ابدن ابدن

انا كمان بقول تبلغى فيها وزارة الشجاجيد ده اهدار لحقوق كل سجاده ودى كمان مش اى سجاده دى السجاده اللى من عند الست جارتنا الدلاله

انا بضم صوتى لصوتك

همس الاحباب يقول...

والله يا تيتا فيفى
مفيش حاجة تغلى عليكى
ولا السجادة ولا الشقة كلها انا لو منك اعمل احتلااااااااال للشقة
واستولى على عفش الشقة بسجاجيده
مش كفاية الجاهلةحاطة السجادة على الارض
عشنا وشفنا سجادة فيفى هانم تتفرش على الارض عجايب..
انتى فين يا بنتى مش ظاهرة ليه عند فرنسا والرايق
يارب تكونى بخير
تحياتى

شهد الكلمات يقول...

اعذائي المدونين

تعلن منظمة طوبة علي طوبة هانخلي الحماة مغلوبة

ان حمات المذكورة سوسو قد تم وضعها علي القائمة السودا

و جاري الان تحديد موقعها للقضاء عليها بالفلت

و هذا للعلم

تم البيان

انتهي

Unknown يقول...

انا عندى فكرة
ابعتي السجادة دى متحف اللوفر يمكن ترضى عنك

حاجات جوايا يقول...

انتى لسه عايشة يا فيفى ؟؟

طب وسعى كده وسعى

ستك سحر فين ؟؟

افتحيلها الباب يا ست انتى بدل ما اروح اشتكيكى لجوزك .. ست قادرة ومفترية صحيح


اطلعى يا سوسو اطلعى
خدى جبتلك جلابية جديدة اهو بدل اللى كلتها الفيران ...

بس مش هديهالك الا لما تحلى الواجب اللى بعتهولك

تعالى بقى خديه يا قمر


سالى

ذو الوجه المبتسم يقول...

انا اول مرة ادخل عندك
بس بصراحة ايه فظيعة
ايه يابنتى الكلام ده ... خطير
دى جريمة يحاسب عليها القانون
تصدقى بالله
انا من كم يوم بافكر اكتب فى موضون الحماة وزوجة الابن
بس ايه يلا انتى سبقتينى
ربنا يخلى لنا الحموات الفاتنات
بس سؤال هاطرحة فى موضوعى لما اكتبه
تفتكروووو ايه الحل فى الخلاف بين الزوجة والام الراجل يروح فين ولمين ؟؟؟؟
تحياتى لشهد ومش هاقول المفقوعة مرارتها
هاقول المبتسمة
ربنا يوفقك.. واتمنى زيارتك ليا تانى

ماء تشرين يقول...

طنط فيفي معنكيش ابن تانى ده انت لو حماتى ايوووو بجد كنا هنعمل احلى دوتى بس يالله مش مشكله لما سوسو بقه تجيب نونو وتبقى انت حماتى بردو
بجد انا قريت كل البوستات من جمالهم بجد
تحياتى

تجربه المحب يقول...

لالالالالالالالالالالالالالالالالالالالالالالالا
اوعى تسكوتى ابدا لازم تخدى حقك منها
ولازم كمان ترفعى قضيه تعويض ورد شرف ورد سجاده كمان امال ايه
لو سكتى ع الموضوع ده يبقى عليه العوض ومنه العوض مش حتقدرى تخدى منها حقك بعد كده
وياعينى عليكى يا طيبه
أتمسى بالخير

عروسة ننوسة يقول...

معلش يا فيفى والنبى سيبى البت سوسو احنا عايزينها وبعدين حرام عليكى......سجادة ايه وبتاع ايه يا شيخة افتكرتك حبستيها علشان حاجة دهب

صبرني يارب يقول...

ايوه يا فيفي عندك حق طبعا

البت سوسو دي طماعه هى مش فرشتها كمان كام سنه اهو
كفاااااااااايه عليها مش كفايه انها خدت الواد الحليوه ابنك الى مافيش زيه

وبعدين وانتى بتاخدي السجاده ما تنسيش
فاكره ايام الفرح ؟؟
مين الى اشتري لابنك الاندر وير بتاعه ؟؟؟

مش انتي برضه ؟؟؟
يلا انتى كنتى جايباله دسته صح ؟؟
خدي نص الدسته بقى للواد زحلق ابنك التاني اهو غلبان مش لاقيش شغل على مقاس جماله ودلع امه .

سوووووووووووسو يا وحشااااااااااني خليكى جوه لحد ما اجيلك اقعد معاكي

Ehab يقول...

لكي الله يا سوسوووووووو

ترجعي بالسلامه يا حبيبتي

ههههههههههههههه

ايه ده يا باشا ده ازاي رمت السجاده الهديه بتاعتك على الأرض وتلاقيها كمان بتدوس عليها برجليها والجزم كمان
دي ناس مفتريه يا شيخه
لا لا لا انتي دلعتيها هي والمعدول جوزها
اصلك لو كنتي بتعرفيهم قيمة الهديه اللي بتجيبيها كانوا خافوا عليها
معلش يا اختي معلش
ربنا يصبرك ويصبرنا على ما بلانا

سلااااااااااااااااااااااااام

Foxology يقول...

هههههههههههههههههههههههههههههههههه

لالالالا محدش هينقذها سيبوها تلاقى مصيرها .. حد يرمى النعمة على الأرض ؟؟ :))

تحياتى بدوام الحبسة :))

عصفورة من الشرق يقول...

اهلا يا فندم انا قلت بالعند فى حماتك اهديكى حتة تاج حكاية وانتى تستاهليه ولهى ارجو تجاوبى على الاسئلة وتقبلى التاج بس اوعى حماتك تطمع فيه

المـــفـــــــقــــــــوعـــــة مــرارتـهــا يقول...

نعكشة
---------------


هانعمل ايه فيها بقي

غلبت أفهمها هذية حماتك مافيش قبلها ولا بعدها تتحط في العين وتتكحلي عليها

المـــفـــــــقــــــــوعـــــة مــرارتـهــا يقول...

Mercy Devil
---------------
الحكاية ان سوسو ذي 28 سنة كتبت مقالات عن حماتها في الأول
ودلوقتي بنعرض رأي حماتها مدام فيفي عشان مانبقاش ظلمنا حد

المـــفـــــــقــــــــوعـــــة مــرارتـهــا يقول...

Son of Egypt
----------------
ده حقي ومش هاافرط فيه خليني اطلع اللي في نفسي

المـــفـــــــقــــــــوعـــــة مــرارتـهــا يقول...

بطوط حبوب
---------
تعجبني دماغك يابطبطقوللها احسن دي عاوزة عشرة يفهموها اصول فرش السجادة

المـــفـــــــقــــــــوعـــــة مــرارتـهــا يقول...

واحدة مفروسة
--------------
العبي غيرها ياست مفروسة السجادة نحطها علي السرير ماشي لكن سوسو تتحط مع الفيران جايز تخلصنا منها

المـــفـــــــقــــــــوعـــــة مــرارتـهــا يقول...

د/اجدع بنوته
----------------
كلنا بخير وبنسلم عليكي ياجميل
ده انتي اللي وحشتينا موووووووت

المـــفـــــــقــــــــوعـــــة مــرارتـهــا يقول...

kochia
-------------
شفتي أديكي قلتي ابقي تعالي بقي فطميها احسن دي مافيش فايدة فيها مصممة ان السجاجيد كلها ذي بعضها

المـــفـــــــقــــــــوعـــــة مــرارتـهــا يقول...

أهو ده عيبه
============
الدنيا حر بصي لما الجو يتحسن سوسو هاترجع خليها بعد رمضان بقي

المـــفـــــــقــــــــوعـــــة مــرارتـهــا يقول...

يوميات نائمة في الأرياف
==============
عاوزة دم بس
من عينيا ده انتي تؤمري

المـــفـــــــقــــــــوعـــــة مــرارتـهــا يقول...

حنين القلب
------------
ماله مص الدم يعني فيه بني آدم هايستخسر في مامته دمه

المـــفـــــــقــــــــوعـــــة مــرارتـهــا يقول...

مصطفي ريان
------------------
المثل بيقولك الحماة حماة حتي لو كانت ملاك نازل من السما عادي مثل جميل وبيعبر عن وقائع وحقائق

المـــفـــــــقــــــــوعـــــة مــرارتـهــا يقول...

Sometimes
-------------------
السجاجيد بتاعة جارتي مالهاش ذي الواحدة تجيلها بتلاتين جنيه حتة واحدة يبقي لما نرميها علي الارض كأننا بنرمي التلاتين جنيه علي الارض

المـــفـــــــقــــــــوعـــــة مــرارتـهــا يقول...

همس الاحباب
----------------
انا بس عندي كسل تدويني بس عندي نشاط صحفي

المـــفـــــــقــــــــوعـــــة مــرارتـهــا يقول...

شهد الكلمات
===========
دي آخريتها الفليت
لأ كدة مش لاعب

المـــفـــــــقــــــــوعـــــة مــرارتـهــا يقول...

عاليا حليم
----------
بيدفعوا كويس في متحف اللوفر ده يابنتي

المـــفـــــــقــــــــوعـــــة مــرارتـهــا يقول...

حاجات جوايا
==========
اعفيني من الواجب ده
احسن انا وانا في المدرسة كنت احل الواجب ده من هنا وروحي تطلع برة من هنا

المـــفـــــــقــــــــوعـــــة مــرارتـهــا يقول...

ذو الوجه المبتسم
==============
منور المدونة
بص الراجل مفروض يكون علي الحياد يعني يسمع لدي ويسمع لدي ومايطلعش حد منهم غلطان عشان ماتتقطعش هدومه في النص المسألة دي محتاجة ديبلوماسية عشان مايزعلش الاتنين

المـــفـــــــقــــــــوعـــــة مــرارتـهــا يقول...

ماء تشرين
=============
عندي ابن تاني بس مش ناوية اجوزّه كفاية علينا سوسو واحدة

المـــفـــــــقــــــــوعـــــة مــرارتـهــا يقول...

تجربة المحب

============
انا هالجأ لمجلس حقوق السجاجيد
فيه سجادة تتعامل بالقسوة دي
وينداس عليها بالجزم
اخيه علي الأخلاق
الأخلاق خلصت من البلد ياجدعان

المـــفـــــــقــــــــوعـــــة مــرارتـهــا يقول...

عروسة ننوسة
===========
فكرة برضه ادخلي معاه في اوضة الفيران عشان تقنعيها تديني دهبها رد شرف
ماتخافيش مش هاحبسك بدالها واطلب دهبك رد شرف برضه
ماتخافيش خدي كلامي سيقة

المـــفـــــــقــــــــوعـــــة مــرارتـهــا يقول...

صبرني يارب
==============
وليه النص انا أخدهم كلهم
الواد زقلط ابن الست ام ظقلط الدلالة عاوزهم يبيعهم تاني اصلي انا كنت واخداهم شكك

المـــفـــــــقــــــــوعـــــة مــرارتـهــا يقول...

الشنكوتي الكبير
-------------
يابني انا كل مااديها حاجة اديها وصية انها لو هاتعامل هدايايا بطريقة غير إنسانية يبقي ترجعها تاني ليا
غلطش انا ؟

المـــفـــــــقــــــــوعـــــة مــرارتـهــا يقول...

Foxology
----------------

قول لها
دي فلوس ياناااااااااااااااااااااااااس

المـــفـــــــقــــــــوعـــــة مــرارتـهــا يقول...

عصفورة من الشرق
=======================
تاجك علي عيني وعلي راسي من فوق بس التيجان بتسببلي هرش وحساسية

الحياه حلوه يلا نعشها بجد يقول...

ههههههههههههههههه المدونه بتعتك تحفه وانتى جميله جدا يا مفئوعه والموضوع جميل زيك يا امر