الأربعاء، 5 نوفمبر 2008

Too good to be true


اللهم أجعله خير
يبدو أن المصريين مصممين علي حمل الهم إلي مالا نهاية فحتي عندما نجح أوباما لم يفرح بعض المصريين علي إعتبار ان سياسة أمريكا ثابتة إتجاه اليهود والفلسطينين
ونسي المصريون أن رخاء أمريكا عندما أهتز أهتزت معه أرصدة العالم الإقتصادية
إن نجاح أوباما ليس معناه أن أمنياتنا كعرب ستتحقق ولكن يكفي أن أوباما رجل سلام وأنه سيلتفت إلي بلاده لكي ينشغل بها
ولا يأتي من يقول بأن المعونة ستخفض فمصر ليست في حاجة إلي معونة لا أمريكية ولا بلغارية
لقد أكتفي العالم من الحكم الجمهوري الذي كان يبطش بالعالم ككل
وبصراحة لقد ذكرتني الأصوات التي حاز عليها مكين المرشح الجمهوري بصراع الزملاكاويين علي السلطة فهناك تعصب للحزب سواء أكان أداءه جيداً أم لا بصرف النظر عن الثمان سنين العجاف التي عاشتها أمريكا
وختاماً أحب أفرقع قُلة قناوي من النوع الفخم أمام البيت الأبيض في عملية إنتحارية إحتفالاً بخلاص العالم من الكُبة الكئيب المدعو بوش الله مايعيد أيامه
الذي كان كابوساً كابساً علي أنفاس العالم لمدة ثمان سنوات بحالها رغم فشله الذريع في إدارة أمور أمريكا والعالم من حولها
أنا متفائلة عارفين ليه لأنه مافيش حاكم هاياخد لقب أسوء حاكم علي مر التاريخ الامريكي كما حصل عليه بوش

هناك 31 تعليقًا:

خمسة فضفضة يقول...

السلام عليكم ورحمة الله وبركاته

بصي يا سحر انا لا متفائله ولا متشائمه بس مترقبه
مترقبه اشوف ايه اللي هايحصل في الايام الجايه هل فعلا اوباما هايقدر انه يفرض قناعاته الخاصه وميله للسلام علي الناس اللي في البيت الابيض وعلي اللوبي اليهودي وعلي رؤس الاموال اللي مش بتدور الا علي مصلحتها حتي لو كانت في بحر من الدم

هل فعلا ممكن تصدق توقعات البعض اللي بيقولوا ان ممكن جدا بوش في الشهريين اللي فاضلين له يدخل حرب علي ايران ويسلمها لاوباما كارثه تالته بعد العراق وافغانستان

ربنا يسهل وان غدا لناظره قريب

maiosha يقول...

بصراحة يا مفقوعة التغيير فى حد ذاته شيئ جميل
والتغير لصالح ناس كمان كانوا لغاية القرف اللى فات ملهومش حقوق أصلا وكانوا بيتعملوا زى العبيد ده أوضح مثال للديموقراطية الأمريكية

بس أنا بجد كل أملى إن أوباما يتشغل مع أمريكا والإقتصاد اللى ذهب مع الريح ده ومتطلعشى فى دماغه إنه يعلن الحرب على حد تانى زى العراق

أخر حاجة بقى .. ليكى من عندى قفص قلل صعيدى تمام تكسريهم ورا بوش ده ولو عرفتى تكسريهم على دماغه يبقى أحسن

MaNoO يقول...

اولا بجد اسم المدونة يجنن

ثانيا يامفقوعة هانم احنا المفروض ولا نفرح ولا نزعل فعلا واباما هيلتفت لامور بلاده وكمان عمره ماهيبقى اسوأ من بوش لكن برده عمره ماهيبعد عن اسرائيل ودايما هيخليها قبل الجميع عشان كده بقول احنا ملناش فيه ولا نفرح ولا نزعل

وربنا يستر فى اللى جاى يارب

شفـقــة و إحســــان يقول...

معاكى حق الله لا يرجع ايامه
بس تسلم ايدك على البوست ده كلام فيه الخلاصة
بس انا زعلانة انتى مش بتزورينا ليه؟؟
وحشتينا

همس الاحباب يقول...

فى ستين داهية
الى مزبلة التاريخ
وربنا يستر على الجاااااى
الواضح انهم كلهم واحد
مع اختلاف الاسماء
تحياتى

Unknown يقول...

السلام عليكم ورحمة الله وبركاته
انا اول مره اعدى هنا وان شاء الله متكونش اخر مره
مدونه جميله جدا
على فكره انا عن نفسى ميهمنيش مين يحكم امريكا لأن الشعب هو الى اختاره
على قدر ما يهمنى امتى هيحكمنا حد نختاره
اما عن بوش ده فكل الناس بتكرهه حتى الامريكان
ويا رب نتعمل من الى حصله

بوست تحفه
ومتابعه لك

المـــفـــــــقــــــــوعـــــة مــرارتـهــا يقول...

خمسة فضفضة
----------------
أنا مترقبة ذيك
علي فكرة فيه ناس ومنهم زوجي العزيز فاكر ان فرحي ده عشان العرب بس بصراحة أنا بطلت أفرح للعرب أو أزعل لهم عشان حاجة لأن العرب سلبيين بدرجة كبيرة وكلما احلت بالوطن العربي مصيبة تصبح مصر هي الغلطانة فيضعونها بلا رحمة أمام مدافعهم وكأنها هي البلد الجيش المسؤلة عن حما ظهورهم فيما هم في جمع النقود لاهثون
انا متفائلة وفرحانة للأمريكان بصراحة ونفسي ان اوباما يطلع افضل من سلفه
وماقدمناش غير اننا ندعي ربنا ان بوش يلايمها الشهريين اللي جايين دول عشان ماهياش ناقصاه

المـــفـــــــقــــــــوعـــــة مــرارتـهــا يقول...

maiosha
----------------
اختيار الامريكان لواحد في شخصية أوباما اللي تحبي تسمعيه وهو بيخطب وبيتكلم بس بيدل علي الذكاء فشعبية أمريكا في حاجة له بشدة فبعد ماحدث من بوش وعهد بوش امريكا محتاجة فعلا لواحد يرجع للعالم احترامها وحبها في ذات الوقت
وصلت البلاليص وجاري التحضير للعملية الانتحارية

المـــفـــــــقــــــــوعـــــة مــرارتـهــا يقول...

MaNoO
------------------
بصراحة انا مش قادرة غير اني افرح لاني كنت بأكره بوش بطريقة لن تتخيليها وكان نفسي يكون للعالم حق الحجر علي عقول الأمريكان حتي نختار لهم رئيساً أفضل من المتعوس بوش اللي دمر امريكا والعالم معاها
وذي مازعلت عشان اختيارهم لبوش لازم افرح لاختيارهم اوباما عشان ماأطقش اموت

المـــفـــــــقــــــــوعـــــة مــرارتـهــا يقول...

شفقة هانم واحسان بك
---------------------
انا متابعاكم علي فكرة بس كان عندي كسل في ترك التعليقات
ماعلش دي حالة بتجيلي كل فترة كدة
ماتزعليش مني

المـــفـــــــقــــــــوعـــــة مــرارتـهــا يقول...

همس الاحباب
================
لا يا راجل مش كلهم واحد
مافيش حد ذي بوش وحربه المزعومة علي الارهاب ربنا يهديهم كلهم

المـــفـــــــقــــــــوعـــــة مــرارتـهــا يقول...

اسماء جمعه بنت الشمس
===========================
ماتقوليش كدة ؟
احنا كشعب بنتعامل علي اننا قصّر ومالناش حق اننا نختار
وبعدين يوم ماادونا حق الاختيار دخلوا النتخابات كسور ماتسدش عشان مايبقاش قدامنا غير القديم

الربان يقول...

تحياتي...

بصراحة...لا بد ان نتريث ونري...و لا نتوقع الكثير من أوباما...

هناك عوامل كثيرة تتحكم في رسم السياسات الامريكية و ليس رئيس الدولة كما في بلدان العالم الثالث..

البعض فرح لان اوباما اول رئيس من اصول افريقية...و بهذا هو رسخ مفهوم
الجنس...الجنس بمعني ابيض واسود واصفر..
و ايضا عقائديا...كمسلم او مسيحي..او يهودي....وهذا في رأيي لا
يصح ان يحدث....بل الصحيح هو من الاجدر و الانفع لبلده و شعبه...

الشيء الجيد في رأيي هو ابتعاد ماكين
وبالين التي كانت مرشحة نائبة له و التي
اعتقد انها كانت ستتحكم في ادارة الامور
بالرغم من عدم درايتها الكافية.

تحياتي و تقديري

Ehab يقول...

اعذريني في اللفظ بس المثل بيقولوه كده
"قاله خش نقيلك كلب من الزريبه رد قاله كلهم كلاب ولاد كلاب"

يعني احنا مش مفروض ننتظر من اي منهم خير ابدا كلهم بيعملوا لصالح بلادهم ونفسهم بس
احنا بالنسبه ليهم مجرد غنيمه وبس مش بشر

وعموما لما نشوف بكره فيه ايه
تحياتي ليكي
وايه اخر اخبار حماتك

سلاااااااااااااااااااااام
اخوكي ايهاب

mostafa rayan يقول...

مش قادر اقولك اننا لازم نستني ونشوف ايه اللي هيحصل
رغم اانا المفروض نكون عندنا خطة وبنشتغل عليها بصرف النظر عن مين راح ومين جه بس دة لو كنا بلاد بتحترم نفسها
اذكر انه من اقوال الرئيس السابق كلينتون انه قال ( كل حكام العرب قالو لي ماذا تريد منا ان نفعل ولم يقل احد منهم اريدك ان تفعل كذا وكذا ) اوباما زي بوش خدام للأسرائيل
وربنا يستر
- سيبك من كل دة بس انا سعيد بعودتك مرة اخري بعد انقطاع خلال رمضان
عود حميد وكل سنة وانتي طيبة

فاتيما يقول...

سحورة
ازيك يا حبيبتى
عاملة إيه و سامحينى مقصرة فى حقك المدة اللى فاتت ...جميل إنك غيرتى أسلوب المدونة بشكل عام عشان نتواصل أكتر فى موضوعات تانية ...بس هتوحشنا فيفى و الله ...
بخصوص موضوع البوست لسه جاية من عند سبهللة و كانت بتقول وجهة نظر مغايرة شوية أن كلهك زى بعض و لا فرق بين أوباما و بوش ...مع إنى شايفة فرق و لو بسيط لكن يفرق معنا كعرب و هوه الخروج من العراق ...
كمان مجىء اول رئيس أسمر لأمريكا له معانى كتير قوى قوى ....
و كمان موضوع أيران هيكون محك كبير بجانب الأزمة الأقتصادية ...
أما نشوف و الأيام هتورينا
المهم أن بوش راح فىمزبلة التاريخ و من وسع
و دا اللى مسبب الفرحة العارمة فى العالم كله
تحياتى يا حبيبتى و يا ريت نشوفك بكرة أن شاء الله فى التبرع

SemSem يقول...

اول زيارة للمدونة
اعتقد ان الناس مش مبسوطة باوباما اد ماهى مبسوطة بالتغيير نفسه
وانا واحد من الناس مش مبسوط علشان اوباما جه لان هو ولاغيره ياقلبى لاتحزن
لكن انا مبسوط علشان بوش انتهت قصته المأساوية الى الابد

تحياتى

Dr. Ibrahim يقول...

بكرة الخبر يبقى ببلاش


د/هيما

دينا حامد يقول...

والله احنا نستنى لما نشوف هيعمل ايه وهيطلع ايه وقتها نقرر نفرح ولا نزعل
بس هو باين يعني انه مش هيبقى شيطان زي بوش

الله اعلم الايام مخبيه ايه

wanna b a physician يقول...

بصى ياستى الله اعلم ايه هيحصل بكرة طبعا
بس هو يمكن انك زى ما قولتى هينشغل بحل الازمات الاقتصادية
بس عايز اقولك انهم مش محتاجين سنين زينا وفى الاخر مش بنحل حاجة لا عادى يمكن فى وقت قريب جدا تتحل
ويفضوا بقا ويقعد يقولك فلسطين كالعادة
ولا امل من هذا صدقينى مش تشائم بس دى الحقيقة

تحياتى

المـــفـــــــقــــــــوعـــــة مــرارتـهــا يقول...

الربان
==============
الحمد لله إن الحزب الجمهوري قشل في الانتخابات لأن الحزب ده فاشل بكل المقاييس... هو آه يعتبر الحزب المحافظ اللي بيحرم الاجهاض وحاجات خلقية كتير لكن بصراحة هو فاشل علي مستوي الحكم وعلاقاته الخارجية مع العالم
منورني ياربان

المـــفـــــــقــــــــوعـــــة مــرارتـهــا يقول...

الشنكوتي الكبير
====================
كل الدول مصلحتها الشخصية اهم من مصالح دول العالم وبصراحة انا عندي مثل مقتنعة بيه علي المستوي العام وهو ان اللي يعوزه البيت يحرم علي الجامع وامريكا محتاجة لريس ينتشلها من كبوتها اليومين دول يبقي لازم الريس بتاعها يلتفت لمشاكل امريكا الاول ويحلها
وبصراحة احنا مش مفروض نستني امريكا ولا غيرها يحل مشاكلنا ويدخل في حروبنا خلينا بقي واقعيينوبلاش نطلب من حد فوق طاقته
الرئيس الامريكي رئيس لأمريكا مش العرب واللي في مصلحة امريكا هو مفروض يعمله
فيه ناس بتقول وهو رئيس امريكا مهما ان كان هايعمل ايه لفلسطين ياإيهاب فلسطين ماعملتش حاجة لنفسها عشان امريكا تعمل لها دول حتي مش قادرين يطرحوا مشاكلهم جانباً لحد ماياخدوا حقوقهم وجعلوا من العالم ومنهم كثيرين من العرب ضدهم يبقي عاوزين امريكا هي اللي تدخل حروبهم وتاخدلهم حقوقهم
منورني ياإيهاب

المـــفـــــــقــــــــوعـــــة مــرارتـهــا يقول...

mostafa rayan
====================
وانا سعيدة برجوعي
وبعدين ده ماكانش رمضان بس ده كان رمضان والمدارس والسنة دي عندي اتنين في المدارس منهم واحد لسة جديد علي المدرسة فطبعا محتاج مجهود فظيع
المهم احنا لينا اننا ننبسط بالتغيير وببوش اللي غار ربنا مايعيد ايامه ده واحد كان شايف انه مبعوث العناية الإلهية عشان يحل مشاكل العالم كرهناه والغريب ان الأمريكان كمان كانوا بيكرهوه وبيصوره انه غبي في إعلامهم
ومع ذلك قعد في الحكم ومااتغيرش وده بصراحة خلاني دايما كارهة لأمريكا اللي هي كانت مفروض دولة ديموقراطية ومع ذلك رئيسها كان يعتبر مفروض عليهم ودخل الحكم اساسا بطريقة غريبة مشكوك في شرعيتها

المـــفـــــــقــــــــوعـــــة مــرارتـهــا يقول...

فاتيما
=================
الفرق كبير جداً
بوش داعي حرب
أوباما داعي سلام
ماكين كان في حملته بيتوعد إيران بحرب جديدة يعني كان أغبي من بوش لأنه في الوقت اللي امريكا بتعاني فيه من حربين وازمة اقتصادية هو جاي يقول لأمريكا احنا لسة هانحارب وهانحارب
أوباما وعد انه هايخرج من العراق في اسرع وقت ممكن وده في حد ذاته حركة ممتازة هاتفرق كتير... هو جايز يكون حليف جديد لاسرائيل بس انا ليا سؤال وهو فيه رئيس امريكي يقدر يكون غير كدة انا اعرف مصريين عايشين برة بقوا بيشجعوا الاستيطان اليهودي اكتر من الامريكان نفسهم يبقي ازاي نطلب من واحد امريكي انه يبقي عربي اكثر من العرب
منوراني يافاتيما بس للأسف مش هاقدر اروح التبرع ولو اني كان نفسي اشوفكم يالا تتعوض

المـــفـــــــقــــــــوعـــــة مــرارتـهــا يقول...

SemSem
===============
وهو ده اللي انا اقصده التغيير لو ماكين كان كسب كان الحال سيبقي علي ماهو عليه
منورني في اول زيارة

المـــفـــــــقــــــــوعـــــة مــرارتـهــا يقول...

Dr- Hema
================
منور يادكتور هيما
وكلنا فعلا منتظرين الجديد وربنا يجعله خير

المـــفـــــــقــــــــوعـــــة مــرارتـهــا يقول...

دينا حامد
===============
بوش واحد بس فريد في غبائه وتخلفه استحالة يكون في رئيس ذيه

المـــفـــــــقــــــــوعـــــة مــرارتـهــا يقول...

wanna b a physician
======================
يارب مايحتاجوش سنين ولا حاجة لانك لو متابع بورصتنا هاتلاقي انها ةوقعت تضامناً معاهم وياريت بورصتنا بس دي بورصات العالم وده اثر في بيوت كتير كانت دخلت البورصة دي علي امل تحسين مستوي معيشتهم والسر دي اتضررت بشكل فظيع
ربنا يحلها من عنده

م/ الحسيني لزومي يقول...

شارك في الحملة الشعبية للقيد بالجداول الانتخابية وادعو غيرك
ضع بنر الحملة علي ِمدونتك
البنر موجود علي مدونتي

بنت الغربة يقول...

بصى يامفقوعه انا اول مره ازورك-ومش هتبقى اخر مرة ان شاء الله-انا راى ان لسه بدرى قوى على مانحكم على اوباما وميوله اتجاه السلام او الحرب او اى حاجه تخصنا-الايام هى الى هتقول - وعموما انا مش متفائله- لان ماحدش بيدور على مصلحة غيره - واوباما مش هيفرق كتير عن غيره علشان مصلحته مع اللوبى اليهودى مش مع العرب - وبكره نشوف - تحياتى ليك -

المـــفـــــــقــــــــوعـــــة مــرارتـهــا يقول...

بنت الغربة
====================

اولا مرحبا بيكي من الامارات
ثانيا
انا بس عاوزانا كلنا نحط في دماغنا حاجة مهمة جدا وهي ان الحالة الاقتصادية اللي فيها امريكا لا هاتسمح لأوباما انه ينشغل بفلسطين ولا اليهود وهو ده اللي احنا عاوزينه وهو رفع وصاية امريكا عننا
منوراني ياجميل