السبت، 20 ديسمبر 2008

قفلوا عليكي يا حلوة تابووووووت


حتشبسوت ... فاكرينها الست الكمل اللي لبست لبس الرجال ونطت علي حكم مصر في الدولة الحديثة وحكمتها... ست عليها هيبة تهز اجدعها شنبات... ست بألف راجل ... خرجت من تابوتها ونظرت ناحيتي شزراً وبكل تأفف قالت :
نفسي ايام العز ترجع تاني للمصريين... نفسي اشوف المصري رافع راسه من تاني وليه شنة ورنة ذي ايامنا يافراعنة مش دلوقتي المصري بقي مقهور ياكبد أمه وكل مين يسوي ومايسواش بيديه علي قفاه وفين يوجعه... دول قالوا في الأمثال اللي يخرج من داره يتقل مقداره وانتم يامصريين عاوزين تهجوا من بلدكم وتسيبوها... طب مين هايبني أهراماتكم؟ومين هايزرع ومين راح يقلع؟
قلت لها : بلدنا بقت قاسية أوي علينا والفقر في الوطن غربة... مصر السبب في اللي بيحصل ده طردت العلماء عشان مش مدياهم فرصة يكبروا ولما خرجوا وفاتوها واحد منهم اكتشف الفمتو ثانية والتاني اكتشف علاج للسرطان واخدوا جوايز عالمية والاسم مصريين والفعل أمريكان مخترعين .. تفتكري ياست الستات لو كانوا الناس دي فضلت في مصر وفضلت الحكومة تناقرهم ويناكفوها كان زمانهم اكتشفوا حتي صباع موز... خلينا ساكتين وبالهجرة متهنين وخليكي انتي في حالك ماهو اللي مايعرفش يقول عدس.
قالت الست شوشو: طب واللي سمعت عنهم في رقدتي ... الناس اللي بتهاجر هجرة غير شرعية وبترجع في بطن السمك مخفية.
أنا وقد بدأ صبري ينفذ من جهلها الحاد بحال البلد: الناس دي أكتشفت ان موتهم احسن الف مرة من عيشة الضنك اللي عايشينها هنا.
قالت وعرق الوطنية نفرعلي رقبتها: فين انتمائكم يافراعنة فين أمجادكم فين اهراماتكم فين كرامتكم
قلت لها خليكي نايمة في رقدتك ياحاجة ماتتعبيش نفسك... مصر خلاص جالها جفاف انتمائي... مصر مابقيتش الحضن اللي في البرد بيدفينا مصر حضنها بقي شوك بيشكشك فينا.
اختفت حتشبسوت في تابوتها صارخة ارجعوا مصر ياولاد مصر ... مصر محتاجاكم
هنا استيقظت من نومي لأكمل كتابة ورق الهجرة الذي بدأت فيه بالأمس وما أعطلكيش ياأرض الجدووووووود.

هناك 34 تعليقًا:

Mafrousa يقول...

:(
حتهاجري يا مفقوعة؟؟؟؟؟
:(
حتهاجري؟؟؟
:(

على فكرة انا كمان واحدة صحبتى بتحضر اوراق الهجرة
و تفسيرها للموضوع ان برة الناس عارفه اللى ليها و اللى عليها
اما هنا كله متلخبط على بعضه
سلطة من اللى قلبك يحبها
و البلطجة بقت بالكوم
و مش بس من اولاد البلد
لأ
كمان من الطلبة العرب اللى بيجوا و يبرطعوا و بيعملوا ما بدالهم
اه البيت زي بيتهم
بس مش بيتهم
و لازم يحترموه
و اصحاب البيت سايبين باب البيت مفتوح لكا من هب و دب
يا حبيبتى الدنبا خربانة على الآخر
و مافيش لا قانون و لا رقيب و لا دياولو
انا حاسة ان القيامة حتقوم قريب
من اللى الواحد بيشوفه
قلبتى عليا المواجع يا مفقوعة
و زودتي فرستي باللى بيجري

koukawy يقول...

بيتهيألي ان طانط حتشبسوت لو موجوده كانت لمت بؤجتها و هاجرت هي كمان

خمسة فضفضة يقول...

السلام عليكم ورحمة الله وبركاته

طيب يا مفقوعه بما انك بتحضري اوراقد ياريت تسحبيلي استماره معاكي انا كمان واهو نونس بعض في الغربه

ومعلش بقي يا تيته حتشيبسوت ما نعطلكيش


سلام

حروف يقول...

عندك حق انا كمان حعمل تاجيل دراسة واسافر مش عايزة اقعد هنا والله اتخنقت ومتقولليش من اية انت صغيرة حقوللك من حقنا اللي ضايع من قريب وبعيد يالا مطولش عليكي اول زيارة وجميل البوست لو انتي ححتسافري انجلترا اقابللك هناك عشان انا حسافر انجلترا ان شاء الله ونعمل تجمع للي مخنوقين من البلد سلام يا جميل

م/ الحسيني لزومي يقول...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا
م/ الحسيني لزومي
مدونة /مواطنون ضد الشعب
-----------------

شفـقــة و إحســــان يقول...

وحياتك كلنا عايزين نهاجر ونسيب البلد دى
يا خسارة مابقاش فيها خير او تقدرى تقولى فيها بس مش لينا للى بيينهبوها ومش بيسيبولنا الا الفتافيت
حتى الفتافيت كنا عايشين راضين بيها لكن للاسف حتى دى كمان بيخدوها منا
عموما ياريت تقوليلنا هتروحى على فين واحنا معاكى

انسانةعادية فى عالم مش عادى يقول...

ولما كل واحد فى البلد يهاجر علشان مفيش فيها خير كل واحد يقول يلا نفسى وميحاولش يصلح فى بلده
قرار انانى جدا ان الانسان يهاجر ويسيب بلده بتستنجد بيه
مهما يكون فى مصر لازم نفضل فيها نصلحها مش نسيب الكلاب تنهش فيها

mohamed يقول...

أنا وبحكم السن هاجرت فعلا وقولا
أما عن مكان الهجره
فهو داخل نفسى والى العالم الافتراضى
أنا ضيف الى أن يأتى الامر الالهى بالرحيل.

موناليزا يقول...

وطاوعك قلبك ياسوسو؟
طب وحماتك هتسيبيها تفقع مرارة مين؟

حاجات جوايا يقول...

انتى هتهاجرى بجد ؟؟؟؟؟؟؟؟؟؟

اوعى يكون بجد

والله اعيط

:(( :(( :((

المـــفـــــــقــــــــوعـــــة مــرارتـهــا يقول...

واحدة مفروسة
=================
ماانكرش اني فكرت في الهجرة كتيييير
بس الحمد لله التفكير ده مابينزلش ارض الواقع عشان يتنفذ طبعا الهجرة وغربتها هم بس للأسف بلدنا هي اللي بتخلينا نفكر نسيبها
وحشاني يامفروسة

المـــفـــــــقــــــــوعـــــة مــرارتـهــا يقول...

koukawy
=================
حتشبسوت ماكانتش هاتهاجر عارفة ليه عشان هي كانت من الناس اللي كانت واكلاها وهي والعة
الهجرة دي للناس اللي زينا اللي شايفة بلدها بتتنهب ومش قادرة تقول حاجة

المـــفـــــــقــــــــوعـــــة مــرارتـهــا يقول...

خمسة فضفضة
=================
احنا جبنا اوراق لاستراليا بس ماكملنهاش واترمت في الباسكت
نصيبنا مش عاوزنا نسيب بلدنا خلينا قاعدين لما نشوف ايه اخريتها

المـــفـــــــقــــــــوعـــــة مــرارتـهــا يقول...

حروف (دلو مرة ثانية وجرح ثاني سابقا
===============================
انتي لا اول واحدة ولا هاتكوني آخرهم واضح ان بلدنا نجحت انها تخلي شبابها متقبلينها علي مضض لان فيه دراسة بتقول ان ثمانين في المائة من الشباب بيفكروا في الهجرة
منورة عالم التدوين

المـــفـــــــقــــــــوعـــــة مــرارتـهــا يقول...

mohamed
==================
ومين سمعك معظمنا مهاجرين هجرة داخلية في زوارق النفس بس اكيد ساعات بتفكر تهاجر برة وتسيب الجمل بما حمل وبما لم يحمل

المـــفـــــــقــــــــوعـــــة مــرارتـهــا يقول...

موناليزا
==================
اهي تاخد اجازة مننا وتشوف لها غيرنا تتسلي عليه والا اقولك ناخدها معانا برة

المـــفـــــــقــــــــوعـــــة مــرارتـهــا يقول...

شفقة هانم واحسان بك
==========================
تعالي معانا علي كوالالامبور
انا نفسي اروح استراليا لأن امريكا بتقع بعيد عنك وناسها بينتحروا وانا ماليش نفسي انتحر اليومين دول

المـــفـــــــقــــــــوعـــــة مــرارتـهــا يقول...

انسانةعادية فى عالم مش عادى
=============================
للأسف البلد دي مابتتغيرش
انا مش عارفة احنا جرالنا ايه

المـــفـــــــقــــــــوعـــــة مــرارتـهــا يقول...

حاجات جوايا
==================
لا ماتعيطيش ماتخافيش التفكير حاجة والتنفيذ حاجة تانية خالص
وانا كسولة في امور التنفيذ

mohra يقول...

انا موافقه على كلام حتشبسوت
بلاش تهاجرى

wanna b a physician يقول...

بصى هو طبعا الوضع بيخلى الواحد عايز يطفش من دلوقت
بس انتى نفسك قولتى ان حتى برة مش بيبقوا بكرامتهم لاننا برضوة احنا اللى عملنا كدا وبنسوء سمعتنا
يبقى فى الوقت الحالى نفضل هنا على الاقل جنب اهلنا لحد ما نشوف حل لتتعدل هنا
لنظبط صورتنا ونروح بره
سلام

HERO يقول...

بصي اهم حاجة انك كملتي ورق الهجرة بتاعك ههههههههههه وسيبك من كلام الشعارات بتاع الانتماء والذات والحاجات الغريبة دي - انا مش عارف بيجيبوا الكلام ده منين - يالا تروحي وتيجي بالسلامة بقى

تحياتي

Foxology يقول...

المفروض تحمد ربنا انهم قفلو عليها تابوووت :))

لو كانت لسه عايشة كان زمانها اتحنطت من غير مواد وتحنيط وطقوس وبتاع :)

تحياتى :)

مسدس صغير يقول...

عشان كده بنقول " يبقى انت اكيد فى مصر "

انا حره يقول...

عودى ياهاااااااميس قصدى يامفقوعه

اسمعى كلام جدتك الكبيره حشتبسوت ولا اسمها ايه دى بتتكتب ازاى ههههههههه يانهار منيل اسمها صعب يتكتب موت

Kiara يقول...

مش عارفه اقولك ايه انا فعلا بفكر في السفر برغم ان الفكره كانت بعيده عني تماما

الحرامي يقول...

بيا ن رقم 1
بيان تأسيس العصابة
يشرفني انا الاستاذ / حرامي لص نشال

ان اعلن لكم عن تأسيس اول عصابة لسرقة المدونين

واحب اعرفكم اني خلاص بقي عندي عصابتي
واسلحتي ومفاتيحي وطفاشتي واعلن لكم جميعا عن ميثاق الشرف لتأسيس هذه العصابه

ويتضمن المواد الدستوريه التالية
1- ان لا يتم سرقة الا ما هو نفيس وغالي وعلي المدونين اللي أي كلام انهم يتطمنوا لاني مش هقرب ناحيتهم
اما المدونين المتميزين فيعرفو اني هسرقهم هسرقهم
2- اي عملية سرقة او سطو مسلح لن تتم الا بعد التهديد والوعيد يعني هبعت رساله للزبون اقوله اني نويت اسرقه
3- يتم ترك بصمات(تعليق ) علي كل مدونه تمت سرقتها عشان تعرف انها اتسرقت


4- يتم عمل نقطة بوليس (عندي في المدونه ) لتلقي البلاغات والشكاوي والتعليقات

5- لن يتم نشر اي موضوع الا اذا كان مسرووووق يعني انا مش هكتب حاجه من عندي

6- ان جيت في يوم واتقفشت فسوف اعلن توبتي وابطل سرقه واحل العصابه
وعشان تقفشني لازم تعرف اسم المدونة الاصليه بتاعتي اللي هيه مش سرقه يعني
- يتم نشر هذا البيان علي اكبر عدد ممكن من المدونات للعلم فقط
اعلانات مبوبه
اعلان لكل الجرايد الرسميه والغير رسميه
مطلوب مساعدين لحرامي.... علي ان يكونوا خبره لا تقل عن عام في السرقه والنصب والتدوين وعلي من يرغب في التقدم للوظيفه ارسال cv وصورتين او تعليقين
امضاء
الحرامي الكبير

mostafa rayan يقول...

عندك حق
مصر بقت قاسية قوي على اولادها
رغم حبهم الكبير لها
ربنا يهديها وترجع زي الأول حنينة وطيبة
دمت بكل الخير

emey يقول...

على فكرة حتى لو هجرتى مفيش راحة لا هنا ولا هنا ولا فى اى مكان بس الكان اللى تعرفية احسن من المكان اللى متعرفهوش.......................




دمتى على خير

أبو العريف يقول...

لا لا لا
لا والف لا احنا اينعم متبهدلين ومتنيلين
وحالتنا جميعا ضنك
ونفسنا نهاجر (علي فكة انا بشتغل في السعودية) لكن الوطنيه هيه هيه
تصدقي الواحد بيحب مصر اكتر وهو براها
عشان كده الحكومه بتزهق الناس منها ودايما بتطفشهكم عشان يحسوا بقيمتها زي ما قالت الاخت شرين
يمكن ناسي لانك فيها
مش وحشاك ولا غبت عليها
بس اللي مجرب وفارقها
قال في الدنيا مفيش بعديها

بقولها

لا مش ناسي انا دايما فاكر
في كل حاجه ترتيبها الاخر
نفس في يوم الاقيها كده سابقه
والاقي حد ييجي بعديها

المـــفـــــــقــــــــوعـــــة مــرارتـهــا يقول...

mohra
=============
اديني قاعدة مخللة لما نشوف اخريتها ايه ويا بلدنا

wanna b a physician
========================
احنا فعلا متهانين برة ومعظم بلاد الدنيا واخدين عنا فكرة مش تمام مش عارفة ليه

HERO
==========
اعتقد وبصراحة ان الانتماء اندفن في حرب 73

المـــفـــــــقــــــــوعـــــة مــرارتـهــا يقول...

Foxology
==============
لا بس كانت هاتتأله اكتر من اللي كان بيحصل زمااااان طول ماهي عايشة

مسدس صغير
=================
يبقي انت اكيد شربت من مية نيلها اللي بتوجع البطن
انا حره
==============
شكلك كدة كنتي ادبي متعلم

مولان
============
بصي مافيش حد مافكرش في السفر قبل كدة كلنا فكرنا او عدت علينا الفكرة

الحرامي
=============
انت تشاور بس وانا اديك اللي انت عاوزه مادام اسمي هايبقي في ذيل الموضوع


mostafa rayan
=================
مصر مش هاتحن علينا الا لما احنا نتغير ولما احنا نتغير اكيد الحكومة اخلاقياتها هاتتغير لان الحكومة جزء متفرع مننا كلنا ومن اخلاقياتنا كلنا

المـــفـــــــقــــــــوعـــــة مــرارتـهــا يقول...

emey
==============
المنطق بتاع اللي تعرفيه احسن من اللي ماتعرفيهوش ده هو اللي مخلي بلدنا واقفة محلك سر ومش بتتغير ولا بتطلع لقدام

حد مش فاهم حاجه
===================

يمكن ناسي لانك فيها
مش وحشاك ولا غبت عليها
بس اللي مجرب وفارقها
قال في الدنيا مفيش بعديها

بقولها

لا مش ناسي انا دايما فاكر
في كل حاجه ترتيبها الاخر
نفس في يوم الاقيها كده سابقه
والاقي حد ييجي بعديها


ياااااااااااه كلام جميل جدا وللأسف هي دي الحقيقة اللي صعب اننا ننكرها

Unknown يقول...

مبروك يا أم أحمد كل أخوانك الصحفيين والمحررين والعاملين بجريدة المقطم جريدتك وبيتك الثانى طبعاً وانا بالنيابه عنهم هشام السروجى مدير الجريدة أهنئك على ابنك الاولانى وعقبال كده ما يبقى عندك زوربة عيال يطلعوا عينيكى ويتنططوا حواليكى ، الى الامام دائما واحنا من وراكى ، وتحيتى الى الجندى المجهول زوجك الحبيب اللى انا بعتبره قدوة لكل راجل بيقف جنب زوجته و يشجعها بجد هو ده الحب اللى بينجح وبيدفع لقدام ،، بس خلاص