الأحد، 22 مارس 2009

آأأأأأأأأأأأأأأأأأأأأأأأأأ ه يانا


امبارح اكتشفت ان الماسنجر بتاعي بياكل ويتغذي ويقتات علي الرسايل الأوف لاين

قلت اصلحه، وجبت عدة الشغل والشاكوش بالمرة عشان لو عصلج معايا اضربه بيه واخلص من قرفه، والنوم جفاني وفضلت سهرانة مخصوص عشان اشوف له صرفة واصلحه

برضه مافيش فايدة ، انا آه بأقعد ألف علي المساعدة جوة الكمبيوتر واكتر من مرة حليت مشاكلي بنفسي

لكن واضح اني المرة دي جيت أكحلها عميتها وجات الطوبة في الإيميل بتاعي إللي قفل بالضبة والمفتاح

وأدخل إيميلاتي ورسايلي الحجز وحكم عليهم بالمؤبد

ومش عارفة أتصرف إزاي، فحاولت أخد المساعدة من الستات والبنانيت اللي عندي علي الماسنجر بصراحة هما جدعين جدا

بس للأسف إمكانياتهم الهندسية الكمبيوترية مش مساعداهم، حاولت مع الجنس لآخر بس ماحدش معبرني والندالة حكمت
وانا اتعودت إني لما اتزنق في حاجة اطلبها منكم
نصيبكم كدة معايا هانعمل ايه؟

عشان كدة عاوزين حد مهندس كمبيوتر ولو حتي من منازلهم يتبرع ويقوللي هو الإيميل بتاعي جراله أيه قبل مااحاول اصلحه وأكمل العك وأجيب ضرف الكمبيوتر كله في وشي وانتم عارفين ان الكمبيوتر أصبح كالماء والهواء

وماحدش يقوللي بخريه لأني عندي حساسية من ريحة البخور
ولا إديله حقنة لأنه بيخاف من الحقن
انا هنا مستنياكم

هناك 17 تعليقًا:

محمد عبدالرحمن شحاته يقول...

الأول كده ألف سلامه على إيميلك أنا عاوز اقول حاجه لو كان أحرف الإيميل بتظهر كابتل سا عتها الإيميل ما بيفتحش وبيقعد يقوا في خطأ في البيانات بس انا سألت صديق ليا على الموضوع ده نصحني بالضغط على زرار الكابس لوك وبعدين اكتب اسم الإيميل والباصوورد عادي والحمد لله فتح لو كان مشكلة الإيميل عندك كده ممكن تعملي زي ما انا عملت أما ممكن يكون العيب من الماسينجر نفسه وهنا ممكن تحدثي نسخة الماسينجر أو تسطبي واحد جديد ويارب أكون أفدتك ودمتي بخير

المـــفـــــــقــــــــوعـــــة مــرارتـهــا يقول...

الف شكر علي استجابتك السريعة ياشاعر
بجد كتر خيرك
انا مشكلتي مع الكمبيوتر اني بأحس انه امتدادي الطبيعي ويوم مابيحصل له حاجة بالاقي نفسي بأجري وراه عشان اصلحه بنفسي جايز باتعب واهلوس في النهاية بس في الآخر لما بيتصلح باحس بالإنجاز
شكرا لك

AHMED SAMIR يقول...

و دة بيعلمنا ان احنا المفروض ما نلعبش في حاجة مالناش فيها

MǿиY El-Shreef يقول...

ازيك ياسوسو عامله ايه ياحببتشي

هقولك ع اسهل حل

ودي الجهاز حادي بادي لمبرمج وهو هيبقى فل

:D

حسام غانم يقول...

هديكي خلاصة خبرتي اللي مبتطلعش لحد

اعملي ايميل جديد

kochia يقول...

سد سد متعيطيش
بتحصل في احسن العائلات
لو فاكرة انك عملتي الايميل امتي وعاملة في بيناته ايميل احتياطي هيبقي سهل انك تصلحيه من خلاله

او ممكن لو فاكرة برده من البينات الاولية بتاعة السؤال اياه ده وكود صندوق البريد وكدة

لو عندك رزار بايظ او بيعلق

لو موضوع الكابتل والصمول مش شغال كويس راجعيه

ساعات الكمبيوتر نفسه بيقل الماسنجر بس مش الايميل من الفاير وول بتاعه

او في النهاية الوندوز تعبان
والحل الاخير والنادر ...
ممكن يكون اتسرق

تحياتي

صيدلانيه طالعه نازله يقول...

ماااااااااشى يا سحر طبعا موضوع بخريه ده كان اقتراحى انا و الظاهر
انك بتلقحى كلام عليا و الله اعلم
هههههههههههههههههههههه
على العموم اللى اخد منك القرد يا سوسو قااااااادر يرجعهولك
اقتراحى انا انه ادى العيش لخبازه و لو كل العيش كله برضه بالهنا و الشفا

عبدالله يقول...

ودي اخره الاستعانه بالصديقات :))))

انا مش فاهم ايه مشكلتك بالظبط احكي الي حصل و ايه الوضع الحالي علشان اقدر اساعدك او ضيفيني علي الماسنجر

تحياتي

بحبك يامصر يقول...

السلام عليكم
اقترح انك تجربى تدخلى بالاميل من على اى جهاز تانى لو نفعت يبقى غيرى نسخة الوديندوزز لو منفعتش يبقى حاولى تفتكرى البيانات اللى عملتى بيها الاميل وغيرى مثلا الباس ورد
سلاام ويارب اميلك يقوم بالسلامه

قلب ينبض بالحب يقول...

هههههههههههه معلش ياا سحور تيب ااقولك جبيله هدية عيد الاب يمكن مفروس من موضوع هدية عيد الام و عامل مقموص عادي بقى كل سنة وانتي زي الفل ياسحورة

عمرو يقول...

طسي أوصفى أيه المشكله اللى بتقابلك بالظبط و اٍن شاء الله لها حل
بس لازم نعرف الأول أيه المشكله و أيه اللرساله اللى بتظهر لك لما بتحاولى تدخلى على الميل
تحياتى

شمس النهار يقول...

شوفي انا عندي اتنين خريجي كمبيوتر ساينس وعلي طول اللاب توب بتاعي عطلان وحياتك معاكي المولي عز وجل

محمد فارس يقول...

الاخت العزيزه المفقوعه مرارتها
هو الماسنجر اتعدي ولا ايه الحكايه
انا اسف لاني مش هاقدر افيدك بحاجه
لان نفس الموضوع حصل معايه
بس بيفتح المدونه فقط
عملت غيره لان كان فاضل اجيبله بل جيتس
بس خفت احسن يفشل هو كمان
بس بقي عندي 2 اميل واحد بيفتح المدونه بس والتاني فاتحها علي البحري
قلديني مش هاتخسري كتير
مع تمنياتي لاميلك بالعوده او ربنا يرزقك بغيره

شبه إنسانه .....( سهوره ) يقول...

بحييكى على البلوج الجامد ده
ومن الواجب أأقول لك البقاء لله والعزاء واجب للايميل بتاعتك
ويا حبيتى شيدى حيلك احنا جنبك
والدنيا فانيه ومحدش واخد معاه لا موس ولا كيبورد ولا حتى رامه
ومعلش قدر ومكتوب
والمكتوب على البروسوسر لازم تشوفيه على الشاشه لازم تشوفه العين

المـــفـــــــقــــــــوعـــــة مــرارتـهــا يقول...

A.SAMIR
================
مااقدرش مالعبش
واللعب دا ممكن ييجي بحاجة حلوة ولو انه بيعلم في المتبلم يصبح ناسي


MǿиY El-Shreef
------------------
لا يمكن ابدا انا جهازي ماينكشفش علي حد غريب وبعدين المشكلة انا حاساها ان شاء الله مش صعبة اوي
حسام غانم
==============
لا ياعم برضه العشرة ماتهونش الا علي الخاين وبعدين انا لما صدقت احفظ عنوان ليا بعد ماتهت قبل كدة في ايميلات اسمها مش بيثبت في المخ

kochia
===============
يتسرق يالهوي تفي من بقك ياشيخة دا انا كنت اخد في الحرامة تأبيدة


صيدلانيه طالعه نازله
======================
احمدي ربنا ان الماوس ماجاش في وشك لما قلتيلي بخريه قال بخريه قال


عبدالله
==============
بص هو انا والحمد لله فتحته عن طريق مختلف النهاردة بس مش عارفة ليه مش بيفتح بالطريقة العادية المحترمة
الف شكر ياذوق شايلينك لوقت عوزة

بحبك يامصر
===============
شكرا للنصيحة والله انا كل شوية باكتشف انكم آخر جدعنة


قلب ينبض بالحب
================
وانت طيب بس هدايا عيد الام بقت من العهد البالي وانتهت لا بقي فيه حد بيجيب هدايا ولا يحزنون احنا في ازمة مالية كلنا

عمرو
===============
اولا الف الف شكر علي الاهتمام الكبير دا وثانيا
الرسالة اللي بتجيلي هي دي
Ooops. Yahoo! Mail can't load

Loading Yahoo! Mail failed due to a client side error

You might try going into your firewall settings, and disabling "Ad blocking". If that doesn't work, please contact customer care.


Try clearing your browser cache
Try clearing your browser cookies
Taking too long? More info
If you received an ActiveX warning, please enable ActiveX
Check your email in Yahoo! Mail Classic
Switch back to Yahoo! Mail Classic
by opting out of Yahoo! Mail
Click here to try again

المـــفـــــــقــــــــوعـــــة مــرارتـهــا يقول...

شمس النهار
------------
ليس بالعلم وحده ينصلح حال الكمبيوتر ولكن بالعلم والدعوة الحلوة

محمد فارس
===============
كلنا لهاااااااااااااااا

سأظل أشبه نفسى بالانسانه
=======================
كان طيب وابن حلال كان مليان ومتغذي ايميلات

شاب كــ طخين ـــــا يقول...

احسن حل
يعنى الخلاصة بجد اعمل ايميل جديد هتلاقى القديم بقى زى الفل :d