الأحد، 29 مارس 2009

أنا..........اللي منخوليا مش هو



في يوم من ذات الأيام كنت فاتحة الماسنجر بتاعي لاقيت الماسنجر بتاع أخويا منور...قام نقحت عليا عروق الغلاسة ... قلت أغلس عليه وأضايقه، عادي أخوات وبنغلس علي بعض، وبما إني غلسة ولمضة وحشرية دخلت فيه شمال في شمالـ، مش قلنا أخوات وأنا أتحرمت بسبب جوازي بدري من إني أشد شعر أخويا وهو يشد شعري وأمسك زمارة رقبته وهو يمسك زمارة رقبتي، أقطع كتبه وهو يرسم علي كتبي ويشخبط عليها، ياخسارة مالحقتش أتهني وأعيش الجو الأخوي الخنيق دا أتخطفت وأتجوزت بدري، عيني عليا

المهم ماسنجر أخويا منور وكمان صورته منورة، هي آه من بعيد بس هو أخويا عارفاه، حد يغيب عن أخوه أبن بطن مامته حبيبته، متصور وفي حتة عمري ماشفتها قبل كدة، بس البعاد وحش وهو أنا يعني أعرف كل الأماكن اللي أخويا أتصور فيها


أنا : انت قاعد بتعمل ايه ياابني

BUZZ!!!

أنا : أنت مش وراك كلية بكرة أيه اللي مصحيك لغاية دلوقيت؟
محمد : مين معايا؟
أنا : انا اختك
محمد : ايوه اختى مين؟
أنا : يادي النيلة.... عد غناماتك ياعم جحا... تلاتة في البيت نايمين جوة وواحدة في بيت جوزها

محمد : مش فاهم حاجة
أنا : انت بتنجان ياأخي

أكتشفت مؤخراً إني أنا اللي بتنجانة بس حاطة منيكير
أنا : انا سحر
اوعي تقول سحر مين.... أحسن بالكي بورد وهاافتح نفوخك


كويس أنه هو اللي مافتحش نافوخي وكان هايبقي معاه حق والقانون في صفه ميه في الميه
محمد : معلش عشان بس فى زهايمر
أنا : ههههههههههههههه
الزهايمر ينسيك اختك
يافرحة امك بيك
محمد : سحر مين؟
أنا : سحر مين؟وكمان بتسأل ياخاين العيش والملوخية؟
طب خد ... طب خد .... طب خد
محمد : بجد مش مركز
يابنتى فكرينى

كنت هااجننه... وماله


أنا : ابقي اسال ماما (......) اللي نايمة جوة وهي تفكرك
محمد : ماما مين؟
محمد : ولا اعرف حد بالإسم ده
حضرتك بتكلمى مين بالظبط

مافيش فايدة يابني انت لو بتكلم حيطة كان زمانها فهمت أن صلتك بيها كالصلة بين الحيطة وقرع العسل
أنا : انت هاتشتغلني
صورتك قدامي يامحمد سمير
محمد : انا اصلا مسميش محمد سمير
أنا
: كلمة السر حمودة

هنا بانت الرؤية مادام ماعرفش كلمة السر والسيم اللي بينا يبقي في الحكاية إنا وكأن ولكن ولعل

أنا : لا بجد انت مين

خلاص بدأت أتقهقر وأرجع بالذاكرة لوري، حاسب ياعم الكلاكس خرمان
محمد : حضرتك الى مين
انا معرفش حد اسمه سحر
أنا : انا اسفة
افتكرت ايميلك ايميل اخويا
انت شبهه جدا جدا
محمد : حضرتك عندك مدونة على النت؟
أنا : اه
حماتي ملاك
محمد : يانهار ابيض
دى بقى يتقال عليها ايه
فرصة سعيدة
وقد كاااااااااااااااان
الحمد لله اني فهمت أخيراً لان واحدة يشبه تركيب مخها تركيب مخ الحمار الحصاوي المريض بالتخلف العقلي الذي يجعله أحمر من بقية الحمير اللي خلقها ربنا ... كان حتما ولابد تتمسك برأيها أكتر بس ماحصلش
فرصة أسعد يامحمد وربنا يخليك يامحمد كان زماني بأعاني من حالة إزبهلال وتوهان بسبب الموقف المحرج دا.... بجد البني آدم دا معجزة إلهية يستطيع أن يمتص حرج أي إنسان، موقف ذي دا كان ممكن يرقدني أسبوع عيانة وعندي حالة توهان وأرق يصاحبه إحمرار شديد بسبب الحرج الشديد
أصل محسوبتكم آه حمارة بس عندها مشاعر وأحاسيس وشوية دم صغننين وفيلينج من اللي بيبقي مدفون جوة ومابيطلعش غير في الشديد الأوي

هناك 21 تعليقًا:

Ahmed يقول...

هههههههههه
مقلب جامد جدا
وموقف عامل زي الدش البارد في وسط يناير

معلش معلش
كل مسنجر وانتي طيبه

وبعدين ايه الأخوه المتوحشه ديه؟ كتب وشعر وغلاسه
ونعم الأخوه
ربنا يكون في عونك يامحمد
هههههههههههه

بوست يجنن

شاب كــ طخين ـــــا يقول...

ههههههههههههههههههه
مقلب جامد اوووى
وحصل معاى كتير وبيحصل وبردو مبتعلمش

بوست جامد اوى ودمه خفيف

سلاااااااام

محمد عبدالرحمن شحاته يقول...

انا أحياناً بحب المقالب شكراً جداً يا المفقوع مرارتها وأنا مش عارف أقول ربنا يكون في عونك يا محمد ولا يا صاحبة الموضوع أنا محتار

د.خالدأمين يقول...

معلش بقي




كلنا لها





وممكن تطلعي مالكيش اخوات اساسا



انا عارفكم جيل نساي




فين ايامننا فين




ههههههههههههههه



لا بجد دمك خفيف

د.خالدأمين يقول...

معلش بقي




كلنا لها





وممكن تطلعي مالكيش اخوات اساسا



انا عارفكم جيل نساي




فين ايامننا فين




ههههههههههههههه



لا بجد دمك خفيف

أم فريده يقول...

ههههههههههههههه

مقلب تحفه

مش لازم تصممى كدة استنى واحدة واحدة

بعدين يا بنتى هو فى حد يقول على نفسة حمار لالالالالالالالالالالالالالالالا

تحياتى

mohamed ghalia يقول...

ههههههههههههههههههههههههه
لا تعليق يا سحر يا أحلى أخت فى الدنيا

مسدس صغير يقول...

قعدتى تكلميه 3 ايام. وكل ده ومعرفتيش انه اخوكى؟؟
ههههههههههههههههه
انتى عثل عثل.
هههههههه
بوست تايه وجميل احييك عليه يا سحر يا اختى.

Eno يقول...

ههههههههههههههههههههههههههه
هههههههههههههههههه

ياخبر ابيض عليكي :))

موقف جامد اووووووووووووووي

بوست حلوه اووووووووووي

تحياتي :)

صيدلانيه طالعه نازله يقول...

هههههههههههههههههههههههههه

تعيشى و تاخدى غيرها يا سحور يا

حبيبتى غالبا ده ذنبى عشان كنت عايزه

تحدفينى بالماوس البوست اللى فات

شفتى الانتقام كان سريع ازاى

بس موقف تحفه و الله انا لو منك كنت

رميت نفسى من فوق المقطم و اهو جنبك

عشان متوهيش

نفسى ابعتلك وش بيضحك و مطلع لسانه

هههههههههههههههههههههه و اللسان

اهو

Foxology يقول...

ههههههههههههههههههههههههه

يا خبر ابيض

ده موقف تقيل جداااا

معلش رب صدفة خير من الف ميعاد

تحياتى

د. إيمان مكاوي يقول...

تعيشي وتاخدي غيرها ياسحوره
وألف مبروك على النجاحات ..بجد تستحقيها
دمت سالمة

MǿиY El-Shreef يقول...

ههههههههههههه

تعيشي وتاكلي غيرها

حصلتلي مره وكنت هموت من الكسوف :D

حاسه بيكي يا اوختشي والله

بس قولي الحمدلله ربنا رحمك من شد الشعر والكلام اللايص مع اخوكي ده :p

و ع فكره ادخلي عندي ليكي جايزه :D

شفـقــة و إحســــان يقول...

ايه يا بنتى الزهيمر ده؟؟
اظاهر ان الكتاب خلاكى مبقتيش تركزى
ربنا يكون فى عونك بس ابقى خلى بالك يا سحورة
وسلامى لسالى اوى

شمس النهار يقول...

من حفر حفره لأخيه وقع فيها
دخلتي تغلسي علي اخوكي ربنا بعتلك اللي يغلس عليكي سبحان الله
:)

Mafrousa يقول...

ههههههههههههههههههههههههه
ههههههههههههههههههه
انتى تايهة يا مفقوعة ولاايه؟؟
هههههههههههه
وش بيغمز
مين بقا محمد ده و ايه اللى جاب ايميله عندك يا مصيبة؟؟
هههههههههههههههههههههه
مش حتبطلى الحركات ديه يا مفقوعة هانم
ههههههههههههههههه
ههههههههههههههههههههه
انا متخيلة الموقف وواقعة على روحي من الضحك
هههههههههههههههههههه

msafa يقول...

ممكن تتكرمى عليا بالزياره لو فيها غلاسه يعنى

د. ياسر عمر عبد الفتاح يقول...

هههههههههههه
حصل معايا الموقف ده قبل كده
المشكلة إن اللى قدامى لقى واحد تربة خصبة للإشتغالات .. قام مكمل معايا
وقعدت أبعبع مع صاحبى وأقوله على كلام أسرار
كانت فضيحة .. يلا الحمد لله

القمر الساهر يقول...

ههههههههههههههههه

جامد جدا

ايه التوحش دةةةةةةة

بس بتحصل

وبتكون فضاايح

توبيك دمه خفيف انتى دمك هسل مووت ربنا يحميكي

Ranim Ayman يقول...

سحر انتي متعرفيش انا ابسط قد ايه انا فرحت اوي انك علقتي علي المدونة بتاعي و بجد ليا الشرف ده وبجد لم اكن اتخيل ان تكوني صحفية ولكي اسلوب مليءبالمرح وبجد الكتاب حلو اوي وياريت تعملي حفل توقيع عشانييي

rssamet_algera7 يقول...

هههههههههههههههههههههه

انقلب السحر على الساحر يا سحر

تعيشي وتاكلي غيرها