الخميس، 3 يوليو 2008

العلم لا يكيل بالبتنجااااااااااااان



مدرسة التنغيص الحماواتي
ــــــــــــــــــــــــــــــــــــ
بإختصار أنا هااعمل مدرسة، مالكم مبرقين كدة ليه ؟! ماتبرقوش كدة أحسن تحولوا ... آه مدرسة وهو أنا شوية ... وفيها هاأعلم الستات إللي ناويين يجوزوا بناتهم أو ولادهم
كيف يكونون حماوات مفتريات مستبدات مصاصات للدماء ... أنا قلبي علي البلد وعشان كدة بحاول أحافظ علي نوعية الحماوات الفاتنات وهاأعمل إعلان في الجرايد القومية والمعارضة وهااكتب فيه
إعلانات مبوبة
ـــــــــــــــــــــــــــــــ
تعلن مدرسة فيفي عن حاجتها لشغل المناصب التالية
عدد عشرة مدرسات خبيرات في أصول النكد الحماواتي وذلك في إطار سعينا المتواصل للحفاظ علي نوعية الحاجة فيفي من الإنقراض .... يشترط في المتقدمات لشغل الوظيفة أن لا يقل السن عن سبعين سنة ... وأن يكن المتقدمات ذوات خبرة من لا تقل عن خمس سنين في التنكيد والتغتيت علي زوجات الأبناء ونفضل المفتريات علي الأبناء كمان
كما يجب أن تتوافر في المتقدمات الآتي
ـ اللسان المبرد طوله لا يقل عن نص متر ... هانقيس بالمسطرة وسيتم أستبعاد قصيرات اللسان
ـ القلب الميت .. هانكشف عليه بالسماعة وإللي هايطلع قلبها بيدق هانطردها شر طردة ويشترط ان يكون ميت وشبعان موت من نحو ربع قرن علي الأقل
ـ عينان قاسيتان بتطق نار وشرار .. كل عين وعين تندب فيها رصاصة حتي لا تستهين بها زوجة الأبن

ـ متخرجة من معهد التمثيل البيتي
علي من تجد في نفسها توافر هذه الشروط التقدم لأقرب فرع لمدرستنا ... أوعي تقولي لعدوتك عليه
مدارسنا تعطيك خبرة تؤهلك للسفر للخارج
أفكارنا متميزة ... متفردة ... متعجرفة
شعارنا حماتي يانينا هاتطلع عينيا
مقرنا الرئيسي
بيت الست فيفي جنب بياعة الفجل ... وإللي يسأل مايتوهش
دروسنا متفردة وجديدة ومتنوعة
تليفون زيرو خمس أصفار
الدفع بالدولار واليورو ...ولا نقبل الفكة
تعالي ياحاجة ماتخافيش الدرس عندنا أحسن منه مافيش

الدرس الأول
ـــــــــــــــــــــــــــــــ
الحما حما حتي لو كانت ملاك من السما
أوعي تنخي ... أوعي تطيبي .. خليكي متأنزحة ومتمسكة بولادك
أنتي أولي بفلوس ولادك ... لعبتنا لعبة نفس
وإللي نفسه أطول هو إللي بيكسب
وأوعي تعملي بالمثل اللي بيقول ربي ياخايبة للغايبة ... خليكي واعية مش خايبة

الدرس التاني
ـــــــــــــــــــــــــ
أبنك بعد عنك
... أتشد للمقروصة مراته
ولا يهمك ... هانرجعه مع بعض
خطوة
خ ط و ة
الحل الطازة ... عند فيفي هاتلاقيه
أمسكي قلبك ... مش اليمين ياشيخة ... إللي في الحتة الشمال ياحاجة ... ماتبوظيش الطبخة
قولي ورايا .. بمسكنة وشحتفة
آآآآآآآآآآآآآآآآه قلبي ..مش قادرة هاأموت ألحقني بالدكتور
لو معاكي في الشقة سخسخي .. أقعي علي الأرض بشويشششششششششش ... أوعي تتكسري بالراحة علي نفسك
هايجري بيكي علي الدكاترة ... رسم قلب وكشوفات

ممكن في مرة تانية تمسكي كبدك ... آآآآآآآآآآآآآىه ياكبدي
وأجري بيه علي الدكاترة
خلي بالك الدفع علي أبنك
مع تحيات مدارس فيفي لتعليم الحماوات الفاتنات الساحرات

هناك 108 تعليقات:

•√أريـ السمر ـج√• يقول...

حرام عليكي .. انت عايزة دكاترة المرارة ما يبطلوش شغل و لا ايه :)

فكرة مميتة الله يعين الزوجات

دمتى بكل خير

Mafrousa يقول...

فيفي....فييييفيييي طنط فيييفيييي
انا حماتي عاوزه تيجي المدرسة بتاعتك...ياااادوبك مكمله ال 75
بس عماله تزن عليا...قال إيه اجبلها مريلة الاول ..لزوم المدرسة
وعاوزه كمااان شنطة مدرسة من ام عجل..اللي بتتجر على الارض...علشان مش حتقدر تشيلها....و يكون مرسوم عليها باربي
وقاال إيه عاوزه جزمة جديده و شراب ابيض لغاااية الركبة
و عاوزه شريطة بمبى تحطها فى شعرها و هيه رايحه المدرسة

كل ده جميل و كويس....بس المشكله فى حاجتين
الاول انا مش لاقيه شريطة...فهيه زعلانه و حرنت و قالت والله ما انا رايحه من غيرها
التانيه بقى ...مش تقدر تنزل السلم علشان تيجي...و بتقولي شيليني.....
ممكن تيجي تديها درس خصوصي

قوس قزح يقول...

احمدك يا رب
انا حماتى اقل من 70 لولولوى

اما الحق افنجر المدونة دى قبل ما تنتشر و تعرفها حماتى

فيفى احترررررسى
انتى كده بتعادى كل الزوجات و البنات كمان

انا هربط حوالى حزام متفجرات و اخدك بالحضن فداء كل الزوجات

kochia يقول...

والله الفكرة كويسة
بس فيه زوجات قد الحماوات دول 10 مرات في موضوع اه يا قلبي واه يا كبدي وابنك عيان وامك عملت و و و و و الخ

وبصراحة رايي تعملي لهم برده فصل في المدرسة
اهو تاخدي ثواب في الاتنين
ولو دخلتني انتخابات
تاخدي اصوات جميع الاطراف

تحياتي

ادم المصرى يقول...

يلهوتى ايه ده الله يكون فى العون انا مش هكمل تعليق الموضوع محرج

اسلام الحضرى يقول...

يعنى كده انا لما اروح اتجوز لازم اشوف حماتى واخده شهاده من المدرسة دى ولا لا



طب انا عندى مشروع حلو كمان

تفتحى مدرسه مضادة

يعنى اللى تشرحيه فى المدرسة دى تشرحى المضاد بتاعه فى مدرسه للزوجات بقى وكده يبقى مشروع استثمارى

Ahmed Kamal يقول...

يالنساء!

صدق من قال إن كيدهن عظيم .

تحياتي :)

خالد كامل يقول...

ههههههههههههههههههههههه
لا بقى انا أمى ضامنها ... ست طيبة
اما بالنسبة لمراتى فى المستقبل
هختارها يتيمة
أو لقيطة أصلاً مش مهم
انما انا مش حمل حد يعمل معايا كدة
سلام

رئـــــيسـة حزب الأحلام يقول...

ماشاء الله هو كدة ياحاجة فيفى بتحبى تفيدى الناس من خبراتك اللوزعيه
ربنا يخليكى لحموات مصر
والحصه بكام ياحاجة فيفى

hamssah يقول...

هي المصاريف كام ؟والفصول الفصول مكيفه ولا لا ؟والشهاده معتمده من وزارة التربيه والتعليم ؟ وفيه باص ولا ؟ والزي لونه ايه؟و ... بعدين بقى
همسه

Eldebug يقول...

لازم كلنا يا رجال نشجع المدرسة دى ... لان من غير وجود حماوات زى فيفى هنضيع احنا فى الرجلين ومراتاتنا هتبقى فاضيالنا بقى وانته اتاخرت ليه وكنت فين وايه اللى مسهرك لوش الفجر والكلام ده ... خليهم احسن ملهيين فى حماتاتهم
ورب ضارة نافعة ... هذا والله ولى التوفيق وكل دعواتنا معاكى يا نصيرة الحموات

دكتور بهــدوء يقول...

وبالنسبه للشهاده
بتتعادل م وزاره التربيه والتعليم
اصل ناوي ادخل بناتي فيها
اه اهو يتودكوا ويتعلمو اصل اللعبه

Unknown يقول...

السلام عليكم ورحمة الله وبركاته
يافيفى عندى لكى تلموذة تديكى وتدى المدرسات بتاعتك دروس وتخرجهن(بأعتبار نون النسوة )بروفسيرررررررات ..
بجد مش بهزر
فيها كل الشروط بتاعتك
مش انا ماتبصيش كده ليا!!!!
ده مرات اخويا الله يرحمه
والوليه من (قدرتها الفائقةالمتمكنة )مش بس قتلت جوزها وبقت ارملة
لأ موتت اخويا من الغيظ والطلبات ومعاه 2 من اجواز بناتها الاخريات
بس فيه واحد معسلج معها شوية(فى الانعاش دلوقتى)
تسلمى يافيفى انت وكل الحموات الفاتنات السكرات اللى زيك.

فارس بلا جواد يقول...

ههههههههههههههههههههه
حلوه بجد
بس حرام عليكى
كده مش هيبقى فى حياه اصلا ولا حد هيتجوز من اساسه
بس بجد تسلم ايدك
تقبلى تحياتى

همس الاحباب يقول...

هههههههههه
ادى الافكار ولا بلاش يا ست فيفى
الحمد لله حماتى لسه تحت الستين ولا تصلح لتلك الاعمال
لذلك انا ممكن ابعتلك ستى يا دوب عندها 90 سنة وخبرة كمان
يعنى ممكن تمسك رئيس مجلس ادارة وتاخد نص المرتب والنص تانى ليه طبعا
شاورلى نفسك وردى عليه احنا فى الخدمة
المهم تقضى على البنت سوسو وامثالها من المجتمع
تحياتى

blue-wave يقول...

الله يعينا ويرحمنا
حرام عليكى يا شيخه:))

دكتور حر يقول...

لا كده تستاهلي بقى


وربنا يعافينا من شر الحماوات الشرانيين

:))




لكن اسلوب جميل ولك خالص تحياتي

فزلوكة يقول...

عايزين مدارس من دى كتيييير
محتاجينلها فى وطننا القومى مصر

بس الدفع بالدولار؟؟؟

عايزين أسعار إقتصادية
تليق بالأسرة المصرية

أسلوب ممتع فى الكتابة الساخرة
بالتوفيق

Radwa يقول...

هههههههههههههههههههههههههه
لا بوست جااااااااااامد
ولا كلمه
ربنا يستر يارب وحماتى تطلع عاقلة وحلوة كده وتكون خلصت الدنيا
هههههههههههههههههههههه
لا يا رب تطلع حماتى كويسه وانا والله طيبه ومش هعمل فيها حاجه يارب
حتى لو هى عملت فى ايه
...............................
بصى اعملى مدرسه كمان للزوجات ازى تتعامل مع الحموات اللى هتتخرج من مدرستك
............................ز
تحياتى
سندريلا

Unknown يقول...

كده برده ؟
كنت فاكرة حليقى عندك وظيفة
لكن طلعت المدرسة للى عندهم خبرة و الى ناوييين يجوزا بس
و انا لا من دول و لا من دول
تحياتى القلبية
:)

Empress appy يقول...

ههههههههههه يا عينى يا بنتى
بجد عقدتينى خالص ربنا يكرمك

بطوط حبوب يقول...

المدرسه دى بتشترط مجموع معين عشان اى واحده تعرف تدخلها؟؟

زفته وقطران يقول...

تصدقي ياست انت
انا مرارتي اتفقعت مني خلاص
ارحمي امي
بقي



انا لي عندك سؤال
متكتبي حلقه عن حماتك
وعامايلها فيكي
اصل شكلك معقده

funckydoctor يقول...

ههههه
احنا المستفدين من المصلحة ده
نحن معشر الدكاترة
:D

Unknown يقول...

خربتيها يا حاجة خدى رايحة فين
دانا هبلغ عنك بتوع الاموال التايهة ينبشوا فى التراخيص بتاعتك
ولا ايه هيبقوا الحموات والمدامات
واحنا يا عينى تتخرب جيوبنا
اكتر ماهيا خربانة

تقبلى تحياتى

Mohamed Dawod يقول...

على فكره بقى دى فكره نميسه عويصه لئيمه من أفكار الست فيفى علشان تجمع البيض كله فى مدرسه واحده قصدى سله واحده وبعدين تدشه وتعمله عجه وتخلص من كل الحماوات بضربه واحده....أوعوا حد من الحماوات يروح يا جماعه المدرسه دى....امال مين اللى حينكد على زوجاتنا حبيباتنا.....تحياتى للبوست اللذيذ يا مفقوعه وابقى طللى علينا...شكرا

جيهان علي يقول...

السلام عليكم ورحمة الله وبركاته

حراااااااااااااام عليكش يافيفي
براحة شوية
مدرسة كدة دفعة واحدة
طب واحدة واحدة
افتحي الأول فصول محو الأمية
وبعد كدة بقى خدي الأمهات من البداية كدة عشان يكبروا حموات على ايدك
وكل بثوابه

ولا حول ولا قوة إلا بالله
ولا عزاء لكل البناتيت اللى هايجوزا من حموات اتعلموا على ايدك


تحياتي

شهد الكلمات يقول...

ههههههههههههههههههههههههههههههههههههههههههههههههههه
تحفة بجد البوست ده تحفة تحفة تحفة
انا عمالة اضحك لحد دلوقت جميل اوي و دمه خفيف موووووووووووووووووت
لا و مدرسة جامدة طيب مش عايزين ناس في البيبي كلاس

شهد الكلمات يقول...

إعلان هام

تم بحمد الله افتتاح فرعنا الجديد في المدونات مدونة حكاوي القهاوي
تعاطفك واحده مش كفاية أتبرع و لو بزيارة
تعالوا زورونا باي باي
http://hakawyelahawy.blogspot.com

غير معرف يقول...

ياربي على الاذى اللي انتي فيه
ده انتي المفروض يحطوكي فموسوعة الحماوات الفاتنات
يابنتي ايه العقد اللي انتي فيه دي

طب ايه رأيك بئى ان انا هعمل جمعية مضادة ليكي هخلي كل مراة ابن تدفع 5جنية ونشتري رصاص ونمشي نموت في الحموات

ولا على ايه انتو مش بينفع معاكم حاجة ممكن نكلف نفسنا ونلائيكم فالاخر بتطلعولنا لسانكم!

بسمه عبدالباسط يقول...

يالهوى أيه كل ده ده انتى شفتى كتير على كده
انا لسة جديدة خالص ومخطوبة من كام شهر بس شفت شوية حاجات ياسلام ربنا يحفظنا ونكمل على خير

ايه رأيك ندى دروس للوقاية من غلاسة الحموات لو عندك استعداد يالا ايدك فى ايدى ونعمل مدونة نسميها ضد غلاسة الحموات
وده ميلى للتواصل
rohbosbos@gmail.com

تحياتى

الـسـيـدة نـون يقول...

ههههههههههههههههههههههههههههههههههه
هههههههههههههههههههههههههههههههههههههه
ههههههههههههههههههههههههههههههههههه
هههههههههههههههههههههههههههههه
لا حلوة صحيح يعنى

سبهللة يقول...

انا امى اتصلت بيا وعايزة تسجل عنك يا طنط فيفى
اصلها شايفة كل المواصفات تنطبق عليها دة غير انها مجننة مرات اخويا اللى امها داعية عليها
بسالحلق يتقال الست مش قادرة على جوزى
اصل واقفة لها زى اللقمة فى الزور كل ماتيجي تهوب ناحيته ابرق لها تخاف على طول
معلش يا طنط هى رسوم التسجيل كام؟؟

حاجات جوايا يقول...

هههههههههههههههههههه
ربنا يعينك يا سوسو يا حبيبتى


والنبى يا حاجة معايا زيارة لسوسو ممكن أدخلهالها اوضة الفيران ولا ممنوع ؟؟


إيه ؟
عايزة تعرفى إيه اللفة دى ؟؟
طبعا تلاقيكى طمعتى فيها

دى فضلة خيرك 3 قطط يخلصوا على الفيران اللى مع البنية الغلبانة دى

أهى معاكى اهى
أمانة فى رقبتك يا فيفى
أما اشوف بقى أخبار الامانات معاكى ايه ؟؟؟؟؟؟؟؟

حبيبـــــــة القمـــــر يقول...

بقى كل دا ومحتاجين مدرسه كمان
صدقيني ياطنط كل واحده هتبقى مدرسه لوحدها
وهتتركني انتي عالرف
احسن حاجه اصبري وانتي هتشوفي جيل قادم من الحموات عنده اساليب مفتكسه بدل اسلوب ماري منيب اللي بطل من زمااااااان

غير معرف يقول...

أعجبنى أسم مدونتك فمررت للتحيه
........
مدونتك لطيفه سعدت بتصفحها

Doba يقول...

يخربيت فقرك يا فيفى
يعنى أكلتى البت سوسو وكمان هتدى دروس

الله يسهلوا ياااابااااا
يا جمالو يا جمالو
ده انتى هتكسبى أولوفات ويمكن تعملى دورة للحموات المش متجوزات تجوزيهم كمان

فلة عليكى يا فيفى

شيتوس الاهلاويه اووووي يقول...

هههههههههههه بجد والله دمك خفيف موووووت
سعدت جدا بمروري علي مدونتك اللذيذه دي ارجو منك ان تسمحيلي بمتابعه جديدك
اختك شيتوس

Foxology يقول...

كدة بقى احتلال رسمى للمدونة :))

والله حماتك دى مش ناوية تجيبها البر هتفتح مدرسة كمان ؟؟ انا لو منك ابلغ الأدارة التعليمية والضرايب :))

تحياتى :)

nody يقول...

هههههههههههه
شفتى بقى الخبره الى اكتسبتيها من الست فيفى
لو كنتى فضلتى عمرك كله كنتى ها تعرفى كل ده؟
لو حماتى طلعت كده ها عرف انها متخرجه من عندك
تحياتى

أسوور يقول...

اتنشرلك بوست فى جريدة الأسرة العربية .. العدد بتاع النهاردة

تحياتى

aya يقول...

هههههههههههههههههههههههه

ونعم الدروس
كليات ايه ومعاهد ايه
هو فيه احلى من كده

والله انتى شكلك مش ناوى يجيبها البر

هههههههههه
الله يكون فى عون الجيل الجديد من الزوجات اللى حمواتهم هيتخرجوا فى المدرسة ديه

ربنا يستر

كلبوشستان يقول...

اللهم اني لا اسألك رد القضاء ولكني أسالك اللطف فيه

آمين

الحق احوش المؤخر بتاع الوليه مراتي اللي هتجوزها ان شاء الله من دلوقتي

فتكم بعافيه

أبو خالد يقول...

أبنتى الغالية
لي عتاب عندك كل الدموية دي و الشر الكبير في كتاباتك عن الحماوات لا يتناسب
مع رقة مشاعرك ..فكيف بالله عليك تأتين بكل هذا القتل للمشاعر؟
هذاأن دل يدل علي أنك مبدعة و لكنك تذكريني بشر الفنان عادل أدهم
لي رجاء خففي الضغط قليلا علي الحموات
فهن أمهات

زُمُرده يقول...

ههههههههههههههههههههههه
ههههههههههههههههههههه
هههههههههههههههههههه
التعليم في تطور يا جدعان

ضحكتيني ع اول النهار
قال هم عمرهم مش اقل من سبعين
وهتؤهليهم للسفر للخارج كمااااااان
وعجبيييييييي

بس كده البلد هتولع
مهو اكيد حماه من الحموات هتتمرد وتعمل مدرسه للبنات لمقاومة اضطهاد وفتونة وافترى الحموات
تخيلي بقى
ههههههههه

سلام يا عسل

سارة علي يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
يلهوى هموت من كتر الضحك اية العسل دة
تحياتى
مدونة امورةخااااااااااااااااااالص

زفته وقطران يقول...

ايه ياست انت
انت لسه هنا
امشي بقي

3ala asm masr يقول...

لسه مصر بخير
ونعم الافكار يا سوسو للحفاظ على النوع النادر ده من الحموات

المـــفـــــــقــــــــوعـــــة مــرارتـهــا يقول...

أريـ السمر ـج√•
====================
خلي الشعب يعيش ياسمر
يعني ان ماكناش احنا نشغل الدكاترة مين هايشغلهم يعني
البركة في الحماوات

المـــفـــــــقــــــــوعـــــة مــرارتـهــا يقول...

واحدة مفروسة
======================
اهي دي الستات ولا بلاش
اديكي جاية برجليكي لحد عندي عشان حماتك تتعلم تفرسك وتزهقك
وعشان كدة انا هاديها الدرس الخصوصي في بيتها
بس بشرط كل يوم تمليلي بطني بأكلة حلوة والدفع فوري
والمواصلات عليكم
طيارة خصوصي عشان انا مش احب الزحمة

المـــفـــــــقــــــــوعـــــة مــرارتـهــا يقول...

قوس قزح
===============
يابت عيب ده انا قد تيتة
ماتزعليش نفسك خدي كوباية عصير قصب وانتي تخفي

المـــفـــــــقــــــــوعـــــة مــرارتـهــا يقول...

kochia
====================
تضارب مصالح يعني
يعني انزل العيا السوق
وانزل معاه الدوا يبقي لازمته ايه
ده احنا كدة نقفل من اولها

المـــفـــــــقــــــــوعـــــة مــرارتـهــا يقول...

ادم المصرى
=================
عادي عادي
ابقي كمل بعدين
ها وبعدين

المـــفـــــــقــــــــوعـــــة مــرارتـهــا يقول...

اسلام الحضرى
===================
هي فكرة برضه
بس انا الحر نزل علي نافوخي وسيحها
وماعنديش افكار اليومين دول
او ماعنديش نفس يعني

المـــفـــــــقــــــــوعـــــة مــرارتـهــا يقول...

أحمد كمال
--------------
ماحدش بيغلب كله هاياخد حقه بالزوق بالعافية هاناخد حقنا ...

المـــفـــــــقــــــــوعـــــة مــرارتـهــا يقول...

مهيج الجماهير
======================
ربنا يبعد عنك شر الحماوات الفاتنات

المـــفـــــــقــــــــوعـــــة مــرارتـهــا يقول...

رئـــــيسـة حزب الأحلام
========================
الحصة الواحدة بميت دورار
كل دورار يقول هاللوه للدورار اللي جنبه

المـــفـــــــقــــــــوعـــــة مــرارتـهــا يقول...

hamssah
==============
لو مامعاكيش دورلات ممكن يوروهات
مافيش مشاكل انا متساهلة خالص في المسألة دي
ميت يورو يكفي
تكييف ايه ياحاجة اللي عاوزاه احنا عندنا مروحة مركزية تهوي الفصول كلها
الزي بقي علي كل لون يابطسطة
اهم حاجة يكون مزهر والوانه كتير وحلوة
انا عاوزة ستات تفتح النفس
عاوزين مدرسة متفردة في الطابع

المـــفـــــــقــــــــوعـــــة مــرارتـهــا يقول...

Eldebug
==================
يادي النصيبة
تصدق عندك حق
اتاري الواد ابني كل مايلاقي الحالة رايقة يشعللها

المـــفـــــــقــــــــوعـــــة مــرارتـهــا يقول...

دكتور بهــدوء
===================
وزارة مين يابا
ده احنا الوزارة والغفارة وكله

المـــفـــــــقــــــــوعـــــة مــرارتـهــا يقول...

norahaty
================
لا ياختي احسن تيجي تخلص عليا وانا لسة مادخلتش دنيا

المـــفـــــــقــــــــوعـــــة مــرارتـهــا يقول...

فارس بلا جواد
================
ده هو ده زيت وسمن الجواز
وهو الجوازة من غير حماة تبقي جوازة

المـــفـــــــقــــــــوعـــــة مــرارتـهــا يقول...

همس الاحباب
================
انت هاتوزع ايراد المدرسة بمعرفتك
وانا هنا لازمتي ايه
كان غيرك اشطر يابابا

المـــفـــــــقــــــــوعـــــة مــرارتـهــا يقول...

blue-wave
===============
ليه بس ده كله عشان مصلحة البلد

المـــفـــــــقــــــــوعـــــة مــرارتـهــا يقول...

دكتور حر
==================
يرحمكم الله

المـــفـــــــقــــــــوعـــــة مــرارتـهــا يقول...

فزلوكة
===============
اسعارنا اقل كتير من الجهد المبذول
ده انا هالديهم عصارة خشاشة تجاربي

المـــفـــــــقــــــــوعـــــة مــرارتـهــا يقول...

sendrlla
================
لو رجعتي للقديم هاتلاقي البت سوسو سبقت وكتبت عن كيف تتعاملين مع الحماة النكدية
اللي مش انا طبعا

المـــفـــــــقــــــــوعـــــة مــرارتـهــا يقول...

عاليا حليم
===========
لو عاوزة شغلانة
انا ممكن امسكك جرس الفسحة ترنيه

المـــفـــــــقــــــــوعـــــة مــرارتـهــا يقول...

appy
===============
انتي تعقدينا شوية واحنا نعقدك شويتين
عادي يعني
وما الدنيا الا عقدة بشنيطة

المـــفـــــــقــــــــوعـــــة مــرارتـهــا يقول...

بطوط حبوب
=================
المدرسة دي بتشترط ان مجموع حاصل ضرب اتنين في واحد يدينا حماة واحدة تطلع عينيك

المـــفـــــــقــــــــوعـــــة مــرارتـهــا يقول...

زفته وقطران
================
انا حماتي كانت سورية وعلمتني الاكل هو ده اللي افتكره عنها
الزهايمر بقي مابيسعفش الواحدة مننا

المـــفـــــــقــــــــوعـــــة مــرارتـهــا يقول...

funckydoctor
=============
هاتقوللي
طبعا
سؤال بقي ببلاش من نفسي
اللي قلبه بيدق يبقي سليم ولا عيان
اصل انا قلبي بيدق وحاسة اني عاوزة اكل ايس كريم

المـــفـــــــقــــــــوعـــــة مــرارتـهــا يقول...

هيثم الدهشان
===================
يافتاح ياعليم
يارزاق ياكريم
هو احنا لسة استفتحنا
عاوز تقفلها قبل مانفتحها ياراجل
اموال ايه اللي هاتبلغ عنها
مش لما يبقي فيه اموال ياراجل

المـــفـــــــقــــــــوعـــــة مــرارتـهــا يقول...

Mohamed Dawod
=====================
لا مش فاهمني
انا احب النكد يبقي منتشر
مش كفاية اللحمة اللي شحت عاوز النكد كمان يخلص

المـــفـــــــقــــــــوعـــــة مــرارتـهــا يقول...

جيهان علي
====================\
العلم نورون ياأبلة
فصول محو اللأمية مابتكسبش

المـــفـــــــقــــــــوعـــــة مــرارتـهــا يقول...

شهد الكلمات
==================
انا زرت حكاوي القهاوي وعجبتني
الي الأماااااااااااام ياشهودة

المـــفـــــــقــــــــوعـــــة مــرارتـهــا يقول...

نوره الخشن ــ آي و كفاية
============================
عاوزة تموتيني يانورا
يهون عليكي العيش والمش اللي اكلناه علي شط الترعة سوي ياقاسية

المـــفـــــــقــــــــوعـــــة مــرارتـهــا يقول...

bos bos
=================
نعمل مانعملش ليه
اهو كلها افكار

المـــفـــــــقــــــــوعـــــة مــرارتـهــا يقول...

بت خيخة وأى كلام
==================\
انا جاية يوم الجمعة الجاية معاكم اطبق علي نفسكم الخروجة الجاية
بس الغدا عليكم

المـــفـــــــقــــــــوعـــــة مــرارتـهــا يقول...

سبهللة
===============
لا
ده احنا اللي هانديها مرتب ونديها فصل كمان
احنا عندنا مفهومية ونعرف نقدر المواهب لما نشوفها

المـــفـــــــقــــــــوعـــــة مــرارتـهــا يقول...

حاجات جوايا
=================
ياختي عليها
ياختي
قطاقيطو بني
انا هاخدهم منك واربيهملك وارجعهم لك اسود
ده القطط دي حبيبتي
سوسو بتخاف من القطط وهاتزعل منك لو دخلتلها قطة

المـــفـــــــقــــــــوعـــــة مــرارتـهــا يقول...

حبيبـــــــة القمـــــر
==========================
اساليبنا هي الاصل برضه
وع الاصل دور

المـــفـــــــقــــــــوعـــــة مــرارتـهــا يقول...

حامد
==============
سعدت بزيارتك
شكرا

المـــفـــــــقــــــــوعـــــة مــرارتـهــا يقول...

Doba
============
لا انا ضد جواز الحماوات
انا عاوزاهم متفرغات للتنكيد علي العيال

المـــفـــــــقــــــــوعـــــة مــرارتـهــا يقول...

شيتوس
=================
اي خدمة
المدونة تحت امركم في اي خناقة

المـــفـــــــقــــــــوعـــــة مــرارتـهــا يقول...

Foxology
==============
أشتاتاً أشتوت
ضرايب ايه ياأخينا
فال الله ولا فالك
قال ضرايب قال

المـــفـــــــقــــــــوعـــــة مــرارتـهــا يقول...

nody_1987
=================
احنا في الخدمة
احنا هاننتشر ونتوغل عشان مافيش حماة تتخرج من ورانا

المـــفـــــــقــــــــوعـــــة مــرارتـهــا يقول...

أسوور
================
شكرا ياأسور
بس مش تقوليلي انهي بوست عشان ابقي علي نور

المـــفـــــــقــــــــوعـــــة مــرارتـهــا يقول...

aya
==============
بيقولك الدهن في العتاقي

المـــفـــــــقــــــــوعـــــة مــرارتـهــا يقول...

كلبوشستان
==================
مؤخر ايه
هو احنا بيهمنا مؤخر ولا مقدم

المـــفـــــــقــــــــوعـــــة مــرارتـهــا يقول...

محمود
===============
دم وقتل
انا بخاف من الدم خالص

المـــفـــــــقــــــــوعـــــة مــرارتـهــا يقول...

زُمُرده
===============
التمرد والعصيان اخرته وحشة

المـــفـــــــقــــــــوعـــــة مــرارتـهــا يقول...

سارة علي
=================
جديدة امورة خالص دي
انتي اللي اموورة خالص مالص

المـــفـــــــقــــــــوعـــــة مــرارتـهــا يقول...

زفته وقطران
================

حد يعامل ضيوفه كدة يازفتة هانم

المـــفـــــــقــــــــوعـــــة مــرارتـهــا يقول...

3ala asm masr
===================
كل حاجة في بلدنا هاتنقرض
حتي الحب مسيره ينقرض

محبط افندى يقول...

السلام عليكم

مدونة محبط أفندى

مدونة ..بس للمحبطين ..
ومين فينا مش محبط من حاجة ؟؟

بس يلا بينا ..نحاول اننا نخرج من الاحباط دة

ونشوف اخرتها ايه!!

ونعيش مع الامل ..وياااارب
:)

نتمنى من الجميع المتابعه .. والمشاركة ..والمساعده


الميل ..
amohbat@yaho.com

صيدلانيه طالعه نازله يقول...

بس فكره برضه تتلهوا مع بعض شويه و ترحمونا منكم حتى و لو ساعه
و ترجعوا مهدودين تناموا لتانى يوم و تنسونا شويه
ربنا يبعد عنا الظالم و المفترى

wanna b a physician يقول...

كمان مدرسة على كدا بقا اللى هتجيب مجموع هتخش كلية ايه هههههههههههههههههههههههههههه
تعالي ياحاجة ماتخافيش الدرس عندنا أحسن منه مافيش
حلو الشعار على فكرة

Unknown يقول...

يا جماعة خلو بالكو ان الحما ام برضة ربت وكبرت اولادها وتتمنى لهم السعادة اكيد العيب فى زوجات اليومين دول مش عندهم فن ودبلوماسية المعاملة الواحدة من دول اول ما تتجوز عيزا تملك جوزها ويبقى حكر عليا لسان حالها بيقول شوف بقى امك دى تنساها خالص اكن الراجل دى جة من المريخ علشان يتجوز الست دى مش لية ام ربنا والاخلاق اوصت بيها وشكرا مطلق كان مفروس من مراتة

Miss. Sosa يقول...

ماينفعش اقدم فى المدرسة ديه ؟ واهو كله تعليم مش هيخسر ههههههه

بس انا مش متوفرة فيه الشروط بتاعتكم خالص

ماتعملوا ملحق للاشبال ينوبكم فيه ثواب :)

رئيس جمهوريه نفسى يقول...

كده الواحد لما يفكر يتاهل يشوف واحده بره المواصفات لتكون خريجه جامعة الحاجحه فيفى

semsem يقول...

هههههههههههههه
حلوة فكره المدرسه دي
ههههههههههههههههههههه

المـــفـــــــقــــــــوعـــــة مــرارتـهــا يقول...

صيدلانيه طالعه نازله
=======================
لا يابطتي المدرسة بتاعتنا مش هانتخانق فيها احنا هانوفر مجهودنا للاحتلال العسكري للستات
هو احنا هبل

المـــفـــــــقــــــــوعـــــة مــرارتـهــا يقول...

wanna b a physician
=========================
هات خمسة جنيه واستلم الشعار ومعاه مفتاحه

المـــفـــــــقــــــــوعـــــة مــرارتـهــا يقول...

MEDUS
=================
وهو فيه حد غلط ولا يقدر يغلط في الحماوات
احنا اهوه بنطلع الست هي اللي غلطانة
فيه اكتر من كدة ايه ؟
وبعدين ماهو فيه حماوات للرجالة بتبقي مفترية برضه ولا احنا مالناش نفس نفضفض
وهي الفضفضة بقي فيها راجل وست هي كمان
علي كل منورني

المـــفـــــــقــــــــوعـــــة مــرارتـهــا يقول...

Miss. Sosa
==================
ومستعجلة علي ايه ؟
بكرة ييجي عليكي الدور وتبقي حماة قد الدنيا وساعتها ابقي كسري الدنيا براحتك واحنا هانساعدك

المـــفـــــــقــــــــوعـــــة مــرارتـهــا يقول...

رئيس جمهوريه نفسى
=========================
حرص لنفسك

المـــفـــــــقــــــــوعـــــة مــرارتـهــا يقول...

semsem
==========================
اتفضلي
منورة
بيتك ومطرحك