السبت، 14 يونيو 2008

فاصل .... إذاعي ... ونعود لفيفي

تحديث
ــــــــــــــــــــــــــــــــ
أختكم مفقوعة منزلة بوست في مدونة فرنسا والرايق
روحوا زوروها
وسجلوا رأيكم هناك
ـــــــــــــــــــــــــــــــــــــــــــــــــــــــــــــــــــــــــــــــــــــــــ
أنا وجوزي والنت
________________
صوابعي بتاكلني مش قادرة بقي....

ياريت يوم الجمعة ده يخلص بسرعة عشان أرجع أكتب وأتابع مدونتي
لما أقوم كدة أحط صوابعي في ماية ساقعة جايز تبطل تاكلني
مافيش فايدة
وبعد برهة صغيرة

ريدي ... أستدي ... جووووووو

دي أنا في طُرقة بيتنا ... بأتجهز للإنقضاض علي الكمبيوتر ... إثر سماعي لمفاتيح جوزي بتشخلل إيذاناً بخروجه من البيت
هييييييييييييييييييييييه

جالي إفراج ... جوزي نزل يشتري الفطار.... لما أشوف المدونة بتاعتي عاملة أيه

وتعدي الدقائق فوريرة وأسمع صوت موتور عربية جوزي بيقرب

هوب تلاقيني أفط أنط جري من قدام الكمبيوتر عشان ألحق أداري أثار الجريمة وأرجع كل حاجة مكانها

ماتستغربوش دي أحداث يوم أجازة جوزي من شغله ... فقد وعدته وعد مشدد إني مش هاأقعدعلي النت ولا صوابعي هاتكتك تكتوكة صغنونة علي أحرف الكي بورد حبيبي
أيوة حبيبي ... مش بزمتكم من حق جوزي يغير من حبيبي
عندك كمان لما بنبقي زعلانين أنا وجوزي مع بعضينا ... عادي أي أتنين متجوزين بيزعلوا مع بعض أومال أيه ؟! أنتم فاكرين الحياة لونها بمبي
لأ دي الحياة لونها بمبي وكوحلي وكل الألوان ... يقوم جوزي مايلاقيش غير طريقة واحدة يعاقبني بيها وهي أنه يخبي كابل الكمبيوتر ...وهو ده العقاب المناسب للمرأة المناسبة في الوقت المناسب .... وأنا أقعد طوووول الليل أدور علي الكابل ... فيييييين حبيبي فيييييييين ... وطبعاً مش بألاقيه.... كان غيري أشطر ....

بقولكم أيه ... مش أحنا أصحاب

تعملوا معايا جمعية أقبضها أنا الأول عشان أشتري أسبير كابل ... يعني بالبلدي كدة كابل أحتياطي

ينفعني في اليوم إللي تطلع فيه زعابيب جوزي

أختكم مفقوعة مزنوقة ياجدعان

ومن قدم شيء بيداه ألتقاه

ويابخت من ساعدني ... بكرة لما يتزنق أكيد راح أساعده
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
عرضت لكم بالتقريب ماتمت إذاعته في الراديو ... الذي كان ردي علي سؤال ... ماهو موقف من في البيت من أقبالك أو إدمانك للنت ... وقد عرضت قطة الصحراء مشكورة السؤال في مدونتها علي لسان مدونة الإذاعة
التي عنوانها
http://dear.to/cairo وهاتلاقوا حلقات البرنامج فى البوكس على يمين المدونةhttp://netonradio.blogspot.com/الدعوة عامة للنقاش والحوار للجميع دون استثناء
أبقوا روحوا أسمعوا الحلقة هناك
وشكراً لبرنامج أنت تسأل والكمبيوتر يجيب

هناك 97 تعليقًا:

Mafrousa يقول...

هههههههههههههههههه
مفقوعه يا اختي انتي بتحكي عننا كلنا و لا ايه
هههههههههههههههههه
انا بقى ياختي بحاول اعمل لجوزي تنوييم مغماطيسى لما ما يكونشي فيه برامج كوره.....ياااا ده انت شكلك تعبان ...ياه ده انت مرهق قوم نام و من الكلام ده كتير قوم الاقيه بيتاوب و يقولى انا حدخل اريح شويه...اقول الحمد لله جالي الفرج و اول لما اطمن انه دخل اجري زي الرهوان و اقعد على الكمبيوتر ههههههههههههههه
اما بقى الدعاء اللي بيصاحب بقيه الادعيه بتاعتي اليوميه
اللهم كتر الماتشات
اللهم كتر برامج الكوره
اللهم كتر مشاكلهم و برامجهم
ههههههههههه
امال يا اختي اصل كل الحاجات ديه بتخليه فى البيت و مشش حاسس بيا خااااالص
ههههههههههههههه

Empress appy يقول...

ده النت بقى ادمان يا بنتى يا بختك بطلتيه ههههههههههههه
انا معنديش رقيب عليه هههههههههه بالعند فيكى تعالى اقعدى عندى
مبروك الاذاعه يا حبيبى

همس الاحباب يقول...

هو فعلا النت بقى ادمان
ولو على الكابل سهل غتدى كابلات احتياطى كتير ابقى اديك واحد هدية عندا فى فيفى هانم
والف مبروك ياستى على البرنامج العام
وعقبال الفضائيات
تحياتى وتقديرى

tamer.sala7 يقول...

ده علي كدة انتي عايزة لينك في الوريد

ربنا يستر عليا انا لو اتجوزت واحدة شرط اساسي تكون جاهلة تكنولوجيا وربنا يستر ومتطلعش مدونة والا البيت حيبقي سيبر ونخلف عيال من علي الماسنجر ونربيهم في البلوج سبوت

كوارث يقول...

انا موافق على موضوع الجمعية
اؤيدك وبشدة
وبعدين بالراحة عالراجل شوية
ده غلباااااااان

HERO يقول...

ياسلاااام
ايه الحلاوة دي ؟
يعني جوزك ليه درة في البيت ؟
بس مش تزوديها بقى علشان الغيرة مش تزيد وممكن يقتله ههههههههه

تحياتي

موناليزا يقول...

ايه نظام لوى الدراع ده
لا ياسوسو لازم تعترضى هو مش متشطر غير على الجهاز ولا ايه

mohra يقول...

لما يخبى الكابل ابقى امسحى قناه الرياضه

R-H-S يقول...

انتى كمان مدمنه كمبيوتر
طيب هو جوزك جابه ليه علشان مواكبه العصر ولا الحاح منك
علي العموم لو محتاجه كابل استبن ممكن تعملي طريقه حلوه خالص
تقومي حاطه صباعه ورا الكمبيوتر مكان الكابل وبعدين تقومي حاطه الصباع اللي في الايد التانيه في الفيشه الجهاز هيشتغل بس انتي مش هتعرفي تردي علي البوستات
بهزر طبعا هههههههه

ملحوظه لو مش قادر علي الكمبيوتر علشان ادمنتيه ممكن تجيبي حاجه تسليكي
اتاري مثلا ....
تحياتي

حبيبـــــــة القمـــــر يقول...

تعددت الاسباب والادمان واحد
بجد مصيبه لما الواحد يرتبط بحاجه واحده بالشكل دا لكن هنعمل ايه زي مايكون فيه مغناطيييييييييييييس بيشد وربنا
كل ماالواحد يحاول يبعد يرجع يلزق اكتر من الاول

حاجات جوايا يقول...

هههههههههه
مبروك يا سوسو عالبرنامج
سمعته وجيت اباركلك لقيتك نزلتى الموضوع
عقبال ما نسمع حلقة عن مغامراتك مع فيفى

بس بجد الحلقة كانت جميلة جداااا

عقبال كل مرة ان شاء الله

دمتى بخير حبيبتى

سالى

غير معرف يقول...

هههههههههههههههههه
بيفكرني ببابا
بس انا واختي بأه نقوم ما نلاقش الكيسة مرة
مرة ما نلاقيش الماوس
مرة ما نلاقيش الكي بورد

الرجااااااااااالة
اهلا بيهم

المـــفـــــــقــــــــوعـــــة مــرارتـهــا يقول...

واحدة مفروسة
====================
ربنا يخليلنا الماتشات وتعليقات مابعد الماتشات وأفلام الرعب والأكشن إللي بتجذب الرجالة بعيد عن ستاتهم

المـــفـــــــقــــــــوعـــــة مــرارتـهــا يقول...

appy
==================
يابختك .. ولا يابختك علي أيه ؟
مانتي كلها اقل من سنة وتكوني في حزب المتزوجين المحتاجين لأسبير كابل

المـــفـــــــقــــــــوعـــــة مــرارتـهــا يقول...

هيثم الدهشان
====================
انت تتشرط علي عروستك قبل الجواز تكون داخلة بالكمبيوتر بتاعها منعاً للمشاكل وكله يتكتب في القايمة

المـــفـــــــقــــــــوعـــــة مــرارتـهــا يقول...

همس الاحباب ...
====================
بص بقي لما هاشوفك مش هااسلم عليك غير لما تناولني الكابل
انت اللي جبته لنفسك انا شبطت خلاااااص

المـــفـــــــقــــــــوعـــــة مــرارتـهــا يقول...

tamer.sala7
===================
ههههههههههههه
هاتبقوا عائلة نتاوية
مالها ... هاتبقوا ذي الفل

المـــفـــــــقــــــــوعـــــة مــرارتـهــا يقول...

كوارث .........
======================
خلاص انت تقبضها بعدي
بس هاتعمل ايه بيها
هاتشتري كابل انت كمان

المـــفـــــــقــــــــوعـــــة مــرارتـهــا يقول...

HERO
=================
هو مين اللي يقتله ده انا كنت خلصت عليه وخليته يحصله

المـــفـــــــقــــــــوعـــــة مــرارتـهــا يقول...

موناليزا ...
=====================
هااعترض علي ايه والا ايه
خلي المركب تمشي وخلاص

المـــفـــــــقــــــــوعـــــة مــرارتـهــا يقول...

mohra
==============
كله الا كدة
ماهو ممكن يخبي الكابل يوم اتنين
لكن لولاغيت القنوات الرياضية هايفضالي علي طول

المـــفـــــــقــــــــوعـــــة مــرارتـهــا يقول...

GeHaD-----(male
=====================
ههههههههههههههههههههه
ماشي ياعم باين عليك جاسوس من عند الأعداء عاوز تكهربني
وعاوزني أدمن حاجة كمان
مش كفاية علينا النت

المـــفـــــــقــــــــوعـــــة مــرارتـهــا يقول...

حبيبـــــــة القمـــــر
===========================
مفروض يتعمل مستشفي لعلاج إدمان النت والكمبيوتر

المـــفـــــــقــــــــوعـــــة مــرارتـهــا يقول...

حاجات جوايا
==================
ميرسي ياسلسول ... ربنا يخليكي ياجميل

المـــفـــــــقــــــــوعـــــة مــرارتـهــا يقول...

maha miho
===================
بابايا كان بيعمل كدة ... بس كنت بأقول عشان عندي دراسة وممكن يكون خايف عليا ... لكن بعد الجواز كمان ييجي واحد يعمل كدة برضه معايا ... بزيادة بقي
هي الست مفروض تتعامل علي إنها قاصر لحد أمتي ؟

بطوط حبوب يقول...

ههههههههههههه
بقالى كتير كنت محروم من مواضيعك
لعن الله من ايقظ الامتحانات

بس تصدقى العقاب ده عقاب جامد لسه لحد الان وانا طويل وحلو كده-فى عين امى - امى بتعاقبنى بنفس العقاب
بس الظاهر انه مش بالطووووووووووووول كان غيرى اطول

Lobna Ahmed Nour يقول...

هههههههههههههه

ادمان الكمبيوتر ده مالوش حل

بس خللي بالك لا فيفي هانم تمسكها عليكي

وتعملك مشاكل

ههههه

wanna b a physician يقول...

كبل احتياطى
وكمان نساعدك لا حول ولا قوة الا بالله
احنا عايزين اللى يساعدنا هاتى انتى مساعدة
ومن قدم شىء بيداه التقاه وهنيالك يا فاعل الخير والثواب

رئيس جمهوريه نفسى يقول...

طب انتى جوزك انا بقاء الوالد العزيز قبل ما اجيب النت فى البيت كنت برجع متاخر وده كان بيعمل ازمات جبت النت بخلص شغل والمشواير الضروريه واقعد على النت عملت ازمات ربنا يسهل ولما اتجوز حخلى المدام تدمن نت علشان نبقى مرتاحين
فى اتنين جنيه على باب البلوج تبرع للكابل الاحتياطى

ReEm يقول...

اتوقع انه ده العقاب اللي هيستعمله
جوزي اللي ما شفتوش لسه اصل فعلا النت بقى ادمان ربنا يستر
بس دي هتبقى حركة ندلة منه اوي بس لو امه طلعت زي حماتك مش هتسغرب
مش هيجيب من بره يعني

صحفية روشة يقول...

هههههههههههههه
انا مش عارفة لما اتجوز هيبقى دة حالى بردة ولا لا
انا اميد هستنى اقرب فرصة عشان استخدم الكمبيوتر
__________________________________
ميفوتكش البوست الجديد (فال الله ولا فالك)
__________________________________
للى عاوز يزور لوحه شرف يدخل مدونتى وهتلاقو لينك لوحة شرف فيها
لوحة شرف هى لوحه شرف لكل من دون فابدع وينشر بها افضل بوستات كتبها البلوجرية

عًٍمًرٌٍوٍ آلنْوٍبٌَِى يقول...

ههههههههههههههههههههههههههههههه
ههههههههههههههههههههههههههههههه
حلوه حكاية الكابل دى اوى
وعلى فكـره محدش هيفيدك غيرى انا
تعالى خدى من السيبر عندى بدل الكابل عشرة واعلنى الحرب بيهم
وبكده مش هيبقى فى عقاب تانى
ههههههههههههههههههههههههههههه
انما بقا لحكاية النت دى بقا حكاية
ادمان واى ادمان ده انا ياما شوفت ايام سوده فى البيت بسبب ادمانى للنت
بس الحمد لله نفزت الى فى دماغى وفتحت سيبر وبقيت اقعد على النت براحتى اكل عيش بقا حد يقدر يعترض
ههههههههههههههههههههههههههههههه

Migo Mishmish يقول...

بصي يا سوسو انا عندي خطة لاوذعيه بديله الا وهي - الخطة يعني
خبي كابل النت في اي يوم كدة بس بعد ما تكوني ظبطي نفسك طبعاً ودخلتي عالنت وقرايتي اللي فيها من يمنها لشمالها وتاويه زي مابيعلموا بتوع المخدرات حطيه جوة المرتبه في خزنه باسمك في البنك فوق السطوح في اوضة الجنياني في اي حته. وبعدين كلمي جوزك وانتي بتعيطي ومقهورة وحاسيسه انه هيجيلك ضيق تنفس وذبحه - بعد الشر طبعاً بس ما طلب العلا ومالقهاش يطلبها تاني بعد شوية - وقوليله انك مش لاقيه الكابل وخليه بنفسه يدور وانتي مفحومة من العياط. هتلاقيه ركب على حمارة الابيض - الحصنة غاليه - ومسك سيفه الخشب طبعاً - علشان الحديد غلي - ويقولك ولا يهمك يا حبيبتي انا معنديش اغلى منك - كلهم بيقعوا في الفخ ده لانهم متخيلين اننا عاجزين نعمل حاجتنا بإيدنا مش فاهمين ان الموضوع كله على بعضه كسل مش اكتر - وينزل يجبلك كابل
قوم يبقى كدة عندك كابلين واحد جابه جوزك علشان تستخدمية وواحد اسبير جابه جوزك برضه علشان تستخدميه
وعلى فكرة لو معرفتيش تعيطي ابشري بصل وغرقي بيه منديل ورق وشمي ومقوليش كل فتحه في وشك هاتجيب ميه حتى ودانك
جربي وقوليلي ايه الاخبار

اه سؤال مش برئ اصل انا لسه عروسة جديدة وحاولت اقنع ميجو ان اللاب توب عالريس بس معرفتش. الا صحيح هو اللاب توب علاريس ولا العروسة؟
Love,
MishMish

صيدلانيه طالعه نازله يقول...

بصى يا سوسو لو بحثت وراكى اكيد حاكتشف انك متجوزه جوزى
ههههههههههههههههه
بجد و الله كل اما نتخانق يقوللى مفيش بلوج تانى و ابصله و اسكت
بعد شويه الاقيه فاتح اللابتوب بتاعه و بيقوللى عندك كومنت جديد
و يسألنى اما يبقى الرد من ولد تعرفيه منين ده
ابصله و اضحك و اقولله صاحبى من الحضانه

•√أريـ السمر ـج√• يقول...

موتينى من الضحك ..
لانى مسمية الكمبيوتر جوزى حبيبى اقوم اصبح عليه .. امسى كده قبل النوم و اول ما افتح عيونى افوق و انا بطمن عليه

ما تقلقيش احنا مش حنتخلى عنك و حنعمل رابطة للمدونات و نجيب كابلات احتياطى علشان الحالات الطارئة :)

مبروك الحلقة عن البوست جميلة اوى و دمها زي السكر

بالتوفيق دايما يارب

دمتى بكل الحب و الخير

Bongo يقول...
أزال المؤلف هذا التعليق.
Bongo يقول...

سمعت الحلقة .. لذيذة اوووي

ربنا يقويكي

بس ما تخليه يقعد معاكي علي النت احسن ما تستني لما ينزل و بعدين تقعدي :D

صحيح انا اول مرة اسمع عن الاذاعة دي ؟!
هي اسمها ايه ؟

دكتور بهــدوء يقول...

دا اللي الستات بيعملوه
احنا يا طلبه بنقعد فال ايه بنزاكر واحنا
هع هع هع
بنتابع بلوجاتنا
وربك يستر ع النتيجه
دعواتك يا سوسو وهديه النتيجه
كابل وكابل داتا وشويه جمبرااات عشان تطري الاعده

شفـقــة و إحســــان يقول...

عايزة كام يا مفقوعة وانا اسلفك؟ بس خلى بالك انتى كده هتخدى مهنتى انا واحسان وانتى حره مش عايزين نقطع على بعض

Unknown يقول...

ربنا يستر عليكي يا ستي ومرارتك تخف
دي المرة الأولى الي أتشرف بزيارة مدونتك يارب انت كمان تشرفيني في مدونتي واعتبري دي دعوة للزيارة والتعليق بس بجد مش مجاملة..
مدونتي هناhttp://kanyatklam.blogspot.com/
تحيتي يا ستي

Unknown يقول...

ألف ألف ألف شكر ع الزيارة السريعة جدا دي ويارب تبقى زيارات دائمة وتعليقات مستمرة
وسلامة مرارتك
تحيتي

واحد من البلد دى يقول...

السلام عليكم
حالك لا يخفى علينا أختاه
ونعانى منه جميعا نحن -المتزوجون-
وخصوصا إذا كان الطرف الآخر ليس لديه ميولا (نتية كمبيوترية)
ربنا معاكى و أول ما اعرف حد بيعمل جمعيات حاقولك على طوووول

تحياتى و دعواتى

Asmaa mahaba يقول...

هههههههههه ادخلى الجامعيه مع عبدو الرايق
تحياتى ليككى سومه_87

Phoenix يقول...

مبروك يا سوسو على البرنامج

بس انتى مش شايفه ان كدا ظلم لازم تعملى اضراب يابنتى

يعنى هو يشيل الكبل ويخلى فيفى هى اللى تقعد

لالالالالالالالالا ..مش ينفع خالص

على فكره انا كدا هاقلق من موضوع الجواز يعنى انا ممكن اتحرم من النت )):

شكلى كدا هاعيد النظر من جديد واعمل شرط مشروط ..اه ماهو لازم الواحد يتعلم من تجارب اللى قبله (:

نور الدين (محمد الجيزاوى) يقول...

طبعا كالعادة مواضيعك جامدة جدا
ووالله كلنا بنعانى من ادمان النت
بالمناسبة كنت عايز استئذنك لأنى جبت سيرتك فى البوست الاخير عندى
ابقى قوليلى رأيك
...
نور الدين محمود

غير معرف يقول...

شكلو فمرة هيئفشك ويبئى مسرح الجريمة ملحئتيش تلميه ويرتكب هو بئى الجريمة ونجيب مفيد فوزي يصور ونتفرج عليها فحديث المدينة

لأ بس غلس مفيد هيجيبلك حقك منو متقلقيش

Esraa Hamed يقول...

ههههههههههههههه
انا مش عارفة صحيح ايه الحل لادمان النت اللي احنا فيه ده انا كمان 24 ساعة ع النت
حراااااااام يعني
نفسي ابطل ادمان ده شوية

المـــفـــــــقــــــــوعـــــة مــرارتـهــا يقول...

بطوط حبوب
===================
منور يابطوط ... التعليقات بتبقي ضلمة من غيرك
لكن انت تتحرم من الكمبيوتر ويتشال الكابل مبلوعة عشان مذاكرتك لكن انا اتحرم ليه ؟
انا مخلصة من زماااااااان

المـــفـــــــقــــــــوعـــــة مــرارتـهــا يقول...

Unique
==================
دعواتك معانا
وربنا يجعل كلامنا خفيف عليها

المـــفـــــــقــــــــوعـــــة مــرارتـهــا يقول...

wanna b a physician
========================
ماهي الجمعية هاتلف علينا
انت فاكرني هااقبضها وأخلع
بكرة يجيلك الدور

المـــفـــــــقــــــــوعـــــة مــرارتـهــا يقول...

رئيس جمهوريه نفسى
====================
هي مالهاش غير حل واحد تجيب اتنين كمبيوتر في البيت واحد ليك وواحد للمدام
واوعي تنسي تعملها بلوجر تتسلي فيه وتتشغل بيه

المـــفـــــــقــــــــوعـــــة مــرارتـهــا يقول...

Reem
==================
دي كانت حلركة وحشة من طرف سيادته زعلتني منه اوي

المـــفـــــــقــــــــوعـــــة مــرارتـهــا يقول...

صحفية روشة
=================
انا اعرف واحدة بطلت الكمبيوتر لما اتجوزت بس مش عشان حاجة لا عشان جوزها مايدخلش النت لانه بيستخدمه في حاجات مش ولا بد فخافت يقلدها ويدخل تلاقي نفسها بتدخل نت لبلوجر وهو يدخل الحاجات اللي مايعلم بيها الا ربنا ...

المـــفـــــــقــــــــوعـــــة مــرارتـهــا يقول...

عمرو النوبى
==================
برافو عليك
كدة مافيش حد ليه عندك حاجة
شغل بقي
ربنا يقويك

المـــفـــــــقــــــــوعـــــة مــرارتـهــا يقول...

Migo Mishmish
=======================
اعملوا جمعية واشتروه سوي
عشان بعد الجواز مايجيش يقول اللاب توب ده بتاعي

المـــفـــــــقــــــــوعـــــة مــرارتـهــا يقول...

صيدلانيه طالعه نازله
==========================
وعلي ايه .. الرجالة كلها تحسي انهم عجينة واحدة
كلهم ذي بعض

المـــفـــــــقــــــــوعـــــة مــرارتـهــا يقول...

•√أريـ السمر ـج
=====================
احنا لازم نتعاون في الحالات اللي ذي دي
احنا البلوجراوية مالناش الا بعضينا

المـــفـــــــقــــــــوعـــــة مــرارتـهــا يقول...

Bongo
===================
يقعد معايا فين ؟
ده لو قعد الخناقات هاتشتغل انا هاابقي عاوزة اقعد علي البلوج وهو هايبقي عاوز يقري الجرايد
الاذاعة اسمها اذاعة البرنامج العام
علي الاف ام جنب الشباب والرياضة علي ايدك الشمال

المـــفـــــــقــــــــوعـــــة مــرارتـهــا يقول...

دكتور بهــدوء
=====================
يارب تنجح .. الدعوة من قلبي ومن غير كابلات كمان
بالتوفيق يادكتور

المـــفـــــــقــــــــوعـــــة مــرارتـهــا يقول...

شفقة هانم واحسان بك
=======================
اكتبيلي شيك بألف جنيه ... اشتري الكابل وأمشي حالي بالباقي

المـــفـــــــقــــــــوعـــــة مــرارتـهــا يقول...

كاتب مصري
=================
انا زرتك قبل ماتكتب تعليقك
بالتوفيق

المـــفـــــــقــــــــوعـــــة مــرارتـهــا يقول...

واحد من البلد دى
=========================
انا جوزي بيستخدم الكمبيوتر بس رافض يعمل بلوجر ليه رغم محايلتي لكي يعمل له واحد ليعرض فيه أفكاره

المـــفـــــــقــــــــوعـــــة مــرارتـهــا يقول...

سومه...مجنونه فى بلد عاقل
=========================
مابلااااااااااااااش
عبدو ده ماينفعش يمسك جمعية
هاياخد الفلوس يشتري بيها يخت
يفسحنا فيه

المـــفـــــــقــــــــوعـــــة مــرارتـهــا يقول...

NoRaaMaHdy
===================
ولا تتحرمي ولا حاجة
لما يكون البيه بتاعك في شغله اقعدي علي النت
لكن وهو في البيت خاصمي النت شوية عشان مش يزعل منك جوزك
ان شاء الله

أحمد بكر يقول...

يا ستى لو على الكبل بسيطه
انا بشتغل فى راديوشاك و ممكن اجيبلك كابل على حسابى
انتى تؤمرى بس

المـــفـــــــقــــــــوعـــــة مــرارتـهــا يقول...

Nour eldin
=====================
انا اكيد هاازورك بس ارد علي التعليقات وفوريررررة علي عندك

المـــفـــــــقــــــــوعـــــة مــرارتـهــا يقول...

نوره الخشن
===============
بلاش مفيد اصله لحد مايجيبلي حقي منه يكون طلع عيني انا كمان

المـــفـــــــقــــــــوعـــــة مــرارتـهــا يقول...

Esraa Hamed
=================
هي بتيجي عليا فترات
ساعات تلاقيني مقبلة علي النت وساعات تلاقيني بأرد علي التعليقات بالعافية
واهي ماشية

المـــفـــــــقــــــــوعـــــة مــرارتـهــا يقول...

Baker
==============
ماتكمل جميلك وتظبطلي كمبيوتر كدة وانفصل خالص عن كمبيوتر البيت ويبقالي كمبيوتر لوحدي ماحدش شريكي فيه

عاشــــــ النقاب ـقــــة"نونو" يقول...

مبروووووووووووووووووووك
هدخل معاكي الجمعية
عاووزة شتري روتر وخط نت لوحدييييييييييي
تحيتي

كيكى عوووووو يقول...

اذيك اية اخبارتك
سورى على التاخير
عقبال ما عرفت النتيجة
وقهرتم والحمد الله نجحت
دة يعنى لو عايزة تعرفى..ماشى ماشى
انا عايزة اقبض الجمعية الاول
علشان اجيب الشرابات..مليش دعوة انا الاول
يعنى انا الاول

بنت مصريه يقول...

هههههههههههههههههههه
انا سمعتها يا مفقوعه ف البرنامج بس كويس انك مش قليلالهم اسمك والا فيفى هتزعل وانتى عارفه بقى زعل فيفى
ههههههههههههههه
مبروك يا قمر

FaceMoon يقول...

هههههههههههه
والله انتى سكر
ويارب يشفينا كلنا من الادمان
وانا مستعدة اساعدك فى الجمعية ونشترى الكابل بس تبقى افتكرينى لما اتجوز عشان اشترى واحد ليا انا كمان
تحياتى

shaimaa samir يقول...

ههههههههههههههههههههههههه
يا جميلة
هههههههههههههههه
ضحكتينى جدااااااااا

كان بيعقبك ازاى بقا قبل موضوع المدونة!!
امر حيرنى جدا
ههههههههه

وحشتينى خالص
ادعيلى اخر امتحان يوم الاربع

Unknown يقول...

ههههههههههههه
لا بجد
اانا الحوار دة
مع ماما
لكن لسة مجربتش مع جوزي لو اتجوزت يعني
هعمل اية
بس اكيد هتصرف
مش هنغلب يامعشر النساء
ومبروك الاذاعة
سلام

غير معرف يقول...

باعانى زيك من نفس الموقف

هو انا كل ماشوفك الاقيك قدام الكمبيوتر ؟ .. هو التعليق اليومى الذى اسمعه

أنا عملى بعيد .. باسافر يوميا .. وده السلوى اللى بتسرى عنى .. لانى مش باسهر بره وانا بارجع تمانية مساءا مش شايف قدامى

ايه الحل ؟ مش عارف ؟

أشكرك لمرورك وآسف لتقصيرى

المـــفـــــــقــــــــوعـــــة مــرارتـهــا يقول...

نونو...
====================
خط نت لوحدك ليه ... وخط البيت ماله
ولا عاوزاه اسرع

المـــفـــــــقــــــــوعـــــة مــرارتـهــا يقول...

كيكى
================
الف مبروك علي النجاح ... طبعا مهتمة
انتي لسة مااشتريتيش شرابات لحد دلوقتي ؟!
وبعدين الشتا خلص هاتشتري شرابات ليه دلوقتي ؟

المـــفـــــــقــــــــوعـــــة مــرارتـهــا يقول...

بنت مصريه
==================
لا عادي حماتي مالهاش في الراديو ليها في الدش بس

المـــفـــــــقــــــــوعـــــة مــرارتـهــا يقول...

FaceMoon
=================
لما اقبض الجمعية ابقي اجيبلك واحد هدية تشيليه في جهازك

المـــفـــــــقــــــــوعـــــة مــرارتـهــا يقول...

shaimaa samir
====================
كان بيسيبني اتفلق من العياط اصل محسوبتك زنانة حبتين

المـــفـــــــقــــــــوعـــــة مــرارتـهــا يقول...

My Hope$
==================
الحوار ده كان بيحصل مع بابايا ودلوقتي جوزي مسك الراية وبيكمل مشوار بابايا

المـــفـــــــقــــــــوعـــــة مــرارتـهــا يقول...

Sherif
==================
ده شيء طبيعي
ولا يهمك تعالي في الوقت اللي تحبه
انا مش هاازعل

امل يقول...

ههههههه أنا بروح البيت الزق قدام الجهاز وأبقى نفسي اريح شوية بس بستخسر .. ده فعلا ادمااااان بس ونس برضه بدل ما الواحد يزهق .. تحياتي وحمد الله على السلامه .. مش عايزة اقول سلامي لفيفي هههههههه

زفته وقطران يقول...

مفقوعه حبيبتي
انا سعيده انك موجوده
خفت تكون حماتك كلتك

نـــــور يقول...

والله يااختى اختلفت الشخصيات والرأى واحد... كمان تقول الحكمه الشهيرة.

وانا بصراحه بعانى من المشكله دى بس مع ماما واخواتى لانى لسه مش متجوزه وكنت بفكر قبل ماقرا مدونتك بوقت قليل قوى انى انزل مدونه فى الموضوع ده.

وان شاء الله هنزلها يعنى ..اسلوبك لذيذ وخفيف الظل مزيد من التوفيق يارب

.:.-=- ELGaZaLy-=-.:. يقول...

هههههههههههههههههههههههههههه

ادمان بجد

بس البوست تحفة..ضحكنى بجد...وحالة توم وجيرى دى جميلة اوى

زُمُرده يقول...

هي دي بقت المشكله
ادمان النت
اه انا ساعات بحلم اني ع الجهاز
وايييييييه شغاله
ربنا يساعدك

كل عريس لازم يقدم جهاز كمبيوتر وكابله ووصله النت ويا الشبكه

اه مهو ده التطور الطبيعي للجواز

المـــفـــــــقــــــــوعـــــة مــرارتـهــا يقول...

امل
=================
دي فيفي راجعة بس هي صوابعها واجعاها قامت تريح قمت ساهيتها وقعدت علي المدونة
هو انا ليا بركة الا الغالية

المـــفـــــــقــــــــوعـــــة مــرارتـهــا يقول...

زفته
===============
حماتي مالهاش في السمين تحب بيقف في زورها ومش بيتبلع

المـــفـــــــقــــــــوعـــــة مــرارتـهــا يقول...

habiba
================
كلنا بيعدي علينا المواقف دي
بس ياريت ناخد الامور ببساطة احسن مايجيلنا الضغط والعصبي

المـــفـــــــقــــــــوعـــــة مــرارتـهــا يقول...

زُمُرده
===============
بس خلي بالك الكمبيوتر وخط النت هايبقي بدل الشبكة مااحنا مش هاننهب بقي وناخد شبكة كمان

محمد يقول...

أولا سموك نورتى مدونتى
وبجد أية خفت الدم والجمال دة
وبأعتبار أن حماتك ملاااااااااااك أبقى
سلمى عليها وقولى لها نرجو المزيد من تعليقاتها على مدونتك بأعتبار أنك مرات أبنها بس برجاء متجبش معاها الفتوات الى بيضربوا كفاية علينا الحكومة قايمة بالواجب وزيادة ومش حرمانا من حاجة
بالنسبة لجوزك العزيز
وضحى لسيادتة أن مستقبل الرياضة فى
مصر والعالم متوقف على متابعتة الدقيقة والمركزةفى كل ثانية على كل انواع النشاط الرياضى من أول سباق
الصراصير فى أسيا الى سباق الزلاحف البحرية فى المحيط الى سباق القوارب النفاثةفى امريكا
ومفيش مانع من حلة محشى جنب سعادتة وهو بيتفرج علشان اول ميخلص من الماتش هينام من غير أحم ولا دستور
على العموم منتظر زيارتك فى مدونتاى

http://kalamfekalamm.blogspot.com

و

http://kalamfekalamm-mohamed.blogspot.com/
مع تحياتى لحماتك الشربات

المـــفـــــــقــــــــوعـــــة مــرارتـهــا يقول...

الحشرى
==================
فعلاً مصر محتاجاه يامنعم
ده انا لو جوزي مااتفرجش علي ماتش مصر بتلعب فيه اللعيبة بتبقي مش موزونة وبتخسر الماتش بالثُلُث
منور مدونتي المتواضعة

Unknown يقول...

موضوع جميل ويستاهل يتذاع واستمعت بيه جدا
تحياتى

المـــفـــــــقــــــــوعـــــة مــرارتـهــا يقول...

ayman badr
======================
ميرسي علي زوقك
ربنا يخليك وتقرالي

Ranim Ayman يقول...

هههههههههههههههههههه تحفه اوي البوست ده ما شاء الله ايه بس الحلوه ديييييييي انا نفسيييي اشوفك جدااااااااااا